Read Rampi Pewaliana 44 Bible Online

Pewaliana 44 - Rampi bible

Pewaliana 44

¹Hi Yusuf mohowoꞌi tadulako to mampoꞌodaꞌ tambina, notiꞌi, “Iꞌohiimokei karuꞌre hante kina hukaꞌna pebiaꞌra mangkomi. Hei doiꞌra haduo-haduo ikahikihi mahuliꞌ i karuꞌra, iporia i womboꞌ kina to ikahi i karuꞌra.

²Hei paꞌinuangku to niwali ka peraꞌ ikahiki i lali karuꞌna tohinoneeꞌ, moꞌawa hante doiꞌ popehilina kina.” Toporewahi tambina motuntuni hapo to notiꞌi hi Yusuf.

³Poꞌonina mehoꞌolu-olu, halalina hi Yusuf nopopewotumohi, molai hante kalidera.

⁴Iohi handoaꞌhi moꞌela ka kota tiꞌo. Hi Yusuf mantiꞌi pe topeꞌohaꞌna, “Nolouko idapaꞌhi, ane ihuahi, ipetiꞌiki pe iohi, mahamporeꞌi hinaꞌ komoromiꞌa ihowonikei hante kokodakea?

⁵Haporeꞌi hinaꞌ inakokei paꞌinua peraꞌ tonopaꞌinui tua, hante to nopakeꞌ mampebaꞌu? Ingkei mampaliꞌ-paliꞌlukei salaꞌ ngkodeꞌ.”

⁶Konodongkeꞌnalu toporewahi tambina gubenuruꞌ halaline hi Yusuf, nopowutekimohi mpuꞌu hibobali hante pantiꞌina hi Yusuf.

⁷Mehoniꞌhi, “Hapo tungkaihama tua? Hawaꞌka wurani mowali walia to kodake hibali tiꞌo

⁸Ibahaꞌlu tua, hingkohoweꞌ doiꞌ to kihua i lali karuꞌ to uwaꞌ i womboꞌ kina hampiha, kipopahuliꞌlu woꞌo. Hapo tene hingkiꞌ mangkomika peraꞌ ba bulawa ka tambina tuamu.

⁹Ane nihuaꞌi haduo ka lumbu-lumbungki to moroa luma tiꞌo, aginamo io mahi hei lekiꞌ-lekiꞌki mewalimoka hawiꞌna datu.”

¹⁰Notiꞌi to nirumbaꞌ tiꞌo “Moromiꞌ rahimo, ane hihimo to nihua morodiꞌ paꞌinua tiꞌo, bateꞌna mpuꞌu io mewali hawiꞌku, to hantenaꞌna mahuliꞌmolu.”

¹¹Rohohiꞌi mampohou komiara hei roꞌuweꞌmo karure hori-hori.

¹²Katoꞌo to mampoꞌodaꞌ tambina hi Yusuf noparesaꞌmo mpuꞌu karune to kokokaꞌ wute i karuꞌna tohinoneeꞌ, hei mombaha mpuꞌu paꞌinua tiꞌo nohua i karuꞌna hi Benami.

¹³Kokaꞌ-kokaꞌnahi maporiꞌ mpuꞌu rohori lalire, horiana mohepaꞌ-hepaꞌhi baduꞌra, uko tiꞌo mohumboꞌakimohi komiara pe kalide, hei mahuliꞌmohi pe kota peꞌohaꞌana hi Yusuf.

¹⁴Ikohupaꞌralu hi Yehuda hampohalalia i tambina hi Yusuf, rohualu tene hi Yusuf i tambina. Katoꞌo melingkotuꞌhi i kapuꞌna hi Yusuf menomba.

¹⁵Notiꞌi hi Yusuf, “Mahamporeꞌi hinaꞌ hatoꞌo waliamio? Hawaꞌkei ibahaꞌ koꞌakuna to makuasaꞌ hei pobahaꞌ mampelao, mampeꞌele walia toaꞌ to kodake?”

¹⁶Uko tiꞌo hi Yehuda mantiꞌi, “Haporeꞌi tene to kitiꞌi pe tuaki, ingka hawaꞌka himpehoniꞌ hei motundu wotangki. Pueꞌ Ala mampomombahamo komasalaꞌki. Lekiꞌ-lekiꞌki, mewalimoka hawiꞌmu, hawaꞌi podo to nipahuahilu paꞌinua tiꞌo.”

¹⁷Angkana notiꞌi hi Yusuf, “Hawaꞌi hatoꞌo, tungkaihangka, hihimo to kupahuahi paꞌinua tiꞌo, iomo to kupohawiꞌo. To hantenaꞌna mahuliꞌmolu pe umoꞌmi.”

¹⁸Uko tiꞌo hi Yehuda mekododungku pe hi Yusuf noperapiꞌ, hei notiꞌi, “Ane moromiꞌi hingkiꞌ mololitaꞌa pe tua, hawaꞌakae ipokoiꞌ tua, alaꞌ ingko hibobali koniꞌadaꞌima hante Pirao.

¹⁹Tua hampiha iteneika, ‘Ba uwaꞌluꞌi tene umoꞌki hei halalingki ntaniꞌna?’

²⁰Mehoniꞌka, ‘Umoꞌki uwaꞌlu tene, i tempona memolo hineeꞌki umbiꞌ motodimo umoꞌkio. Kokaꞌna hineeꞌki to haꞌinoꞌ-inoꞌhi mahimo, mewaliꞌ, hadoduo romo to tuwuꞌo, iomo hinaꞌ nopotundeꞌ umoꞌki.’

²¹Katoꞌo tua morumbaꞌka mampoꞌawaꞌi humei, hingkeꞌna iꞌokiꞌi

²²katoꞌo mehoniꞌka, ‘Anaꞌ tiꞌo hawaꞌi mpuꞌu hupeꞌ mampokaꞌaki umoꞌna, alaꞌ ane nopokaꞌakiꞌi umoꞌna hingkiꞌ mahi.’

²³Angkana itiꞌi womo tua, ‘Hawaꞌkei wadi mehinaro, ane hawaꞌkei ipoꞌawa hineeꞌmio humei.’

²⁴Kohupaꞌkilu i umoꞌki kipowutekimo mpuꞌu lolitama tuaki.

²⁵Katoꞌo norumbaꞌ womoka umoꞌki humei mehili kopongkonangki.

²⁶Katoꞌo mehoniꞌ womoka, ‘Ingka hawaꞌka hiniꞌ nolou, alaꞌ ingka hawaꞌka wadi mehinaro pe gubenuruꞌ ane hineeꞌki tohinoneeꞌ hawaꞌi kipoꞌawa, hiniꞌluka nolou ane hineeꞌki noloulu woꞌo metuntu.’

²⁷Notiꞌi umoꞌki, ‘Ibahaꞌlukei hantambika hi Raheli, roduolu anaꞌne.

²⁸To kokokaꞌ moruemo molai ka aku, wora intu mahimo nohokiꞌ pinatuwuꞌ to meꞌoꞌoka horiana wute hinewowoꞌena hamboaꞌmo ka mehupaꞌ-hupaꞌ.

²⁹Ane iroa womokei hineeꞌmi ka aku hei ane uwaꞌ mewali hapo-hapo pe io, kohanondoiha to ipopehupaꞌkei pe aku tiꞌo hingkiꞌ mampomahiꞌa, alaꞌ aku hieꞌe motodimoꞌa.’”

³⁰“Ala tiꞌo tuaku,” Notiꞌi hi Yehuda pe hi Yusuf, “Ane mahuliꞌka pe umoꞌki, hawaꞌi kikomi hineeꞌki mahuliꞌ bateꞌna nopomahi umoꞌki. Alaꞌ pampekirina umoꞌki medokiꞌ i anaꞌna iomo hineꞌki hieꞌe, umoꞌki hawaꞌi nobiaꞌ tuwuꞌ mokaꞌa hante anaꞌna tohinoneeꞌ alaꞌ motodimoꞌi mpuꞌu. Horiana kohanondoiha to kipopehupaꞌ pe io hingkiꞌ mampoꞌuwaꞌ komahiana.

³²Modandimoꞌa i umoꞌki, kutiꞌi pe umoꞌki ane hawaꞌi kukomi anaꞌ tiꞌo mahuliꞌ, aku hingkiꞌ mampotumba i kotuwuꞌku wuteꞌa mahi.

³³Kuperapiꞌ pe ingko tua! Aginamo aku to ipohawiꞌno, mampohawa anaꞌ tiꞌo, hingkeꞌna io mahuliꞌlu moꞌawa hante kokaꞌ-kokaꞌnahi.

³⁴Hawaꞌi kudehoꞌ mahuliꞌ pe umoꞌki, liaꞌ hawaꞌi kupokohori mampeꞌele komaporiꞌ to merumpa i powotana umoꞌki, ane hineeꞌki hawaꞌi kipoꞌawa mahuliꞌ.”