Read Rampi Pewaliana 45 Bible Online

Pewaliana 45 - Rampi bible

Pewaliana 45

¹Konohorinalu lolitane hi Yehuda, hawaꞌi nobiaꞌ hi Yusuf morii lalina i hinarona toaꞌ topajamanahi. Katoꞌo norumbaꞌmohi lekiꞌ topajamanehi mesuwu ka peꞌohaꞌa tiꞌo. Horiana hamboaꞌmohi mpuꞌu uwaꞌ to holampi itoꞌo. Katoꞌo noroamo koholangkoa mampopebahaꞌ pe halalinahi.

²Hei hi Yusuf meꞌola mangkureu-reu nopokodeꞌ, wute lekiꞌna toaꞌ toMasiri to uwaꞌ i tambi kodatua pahoriꞌi. Kareba tiꞌo wute woꞌo i kodatua Masiri.

³Notiꞌi hi Yusuf pe halali-halalinahi, “Akumola hi Yusuf. Tuwuꞌlu tene umoꞌte?” Korohorinalu mololita, wuliha mewalihi motehuꞌ, hawaꞌhi pobahaꞌ mehoniꞌ.

⁴Katoꞌo notiꞌi hi Yusuf pe iohi, “Humeikei i hieꞌe.” Katoꞌo mekododungkumohi pe io honiꞌi notiꞌi, “Akumola hi Yusuf to ipobaluꞌkei pe toMasiri.

⁵Hinewowoꞌena, inioꞌkei motehuꞌ ba nohohoꞌ lalimi alaꞌ i pobaluꞌakei. Alaꞌ Pueꞌ hadoduona to mangkomiꞌa humei medulu ka ingkei hingkiꞌ mamposalamaꞌ toaꞌ woriꞌ.

⁶Hinewowoꞌena hongkoꞌ rontoꞌa liu tempo kobiloraha. Limo ntoꞌa tene toaꞌ hawaꞌi maꞌintuꞌ ba mekina.

⁷Alaꞌ peleihana Pueꞌ Ala mangkomiꞌa medulu ka ingkei wute mewali haꞌanu lala hingkeꞌna noꞌuwaꞌ morewahi hei mampatuwuꞌkei wute i pemuleꞌami.

⁸Kotuꞌuana handoꞌio nokomi koꞌipobaluꞌkukei hinaꞌ wuteꞌa i hieꞌe, angkana Pueꞌ Ala to mampopewaliꞌa akeleꞌna datu i Masiri, moromiꞌ i tambina Pirao wute lekiꞌna woiꞌ i Masiri.

⁹Hinewowoꞌena hohiꞌmokei mahuliꞌ nolou pe umoꞌta, hei ipowutekei pe io lekiꞌna lolitangku hieꞌe: akumola hi Yusuf anaꞌmu. Pueꞌ Ala mampaꞌaniꞌa kuasaꞌ i malekiꞌna woiꞌ Masiri, humeimokei hohiꞌ pe aku.

¹⁰Umoꞌ hingkiꞌ meꞌohaꞌ i Masiri i woiꞌ Gose. Hingkeꞌna idodungku pe aku hante anaꞌmuhi, oꞌuweꞌmuhi, hei gimba, bekeꞌ, gapiꞌ, hante lekiꞌna lumamu.

¹¹Ane umoꞌ uwaꞌ i roboꞌ Gose, dodungkumoꞌa morewuꞌko. Alaꞌ tempo kobiloraha limo ntoꞌa tene, alaꞌ ane hawaꞌi hatoꞌo umoꞌ hei lekiꞌmi, hingkiꞌ pahua komaporiꞌ to makaja.”

¹²Notiꞌi womo hi Yusuf, “Hinewowoꞌena iꞌokiꞌmokei hadoduomi, hei ingko woꞌo Benami, koꞌakunamo hi Yusuf.

¹³Itiꞌiki umoꞌta hohumbo kokodeꞌna kuasaꞌku i Masiri. Ilolitakimo pe io lekiꞌna to iꞌokiꞌmokei hei hohiꞌmokei mampoꞌawa umoꞌta humei i seꞌe.”

¹⁴Uko tiꞌo hi Yusuf liu mokopui hineꞌna hi Benami katoꞌo meꞌola. Hi Benami meꞌola woꞌo mokopui hi Yusuf.

¹⁵Kolentuꞌana meꞌola hi Yusuf mokopui lekiꞌna halalinahi liu noꞌumaꞌhi lekiꞌra. Uko tiꞌo honiꞌhi momepololitaki.

¹⁶Katoꞌo ikonohorinalu Pirao hante topajamana to uwaꞌ i tambi kodatua kareba kohupaꞌna halalina hi Yusuf, motanaꞌhireaꞌ woꞌo.

¹⁷Katoꞌo notiꞌi datu pe hi Yusuf, “Irumbaꞌhi halalimahio mopatekeꞌ kina i kalidera hei irumbaꞌmohi mahuliꞌ pe Kanaꞌa.

¹⁸Hingkeꞌna rokomimoꞌi umoꞌre hante tinonahi humei. Hingkiꞌ kupaꞌanihi woiꞌ to moromiꞌ i Masiri, hingkeꞌna nomoromiꞌ kotuwuꞌre i woiꞌ hieꞌe.

¹⁹Irumbaꞌmohi woꞌo mangkomi kereta kaseꞌe bahaꞌumbo kereta to hingkiꞌ mangkomi hantambira hei anaꞌ-anaꞌra to kokiuꞌ, hante to mangkomi umoꞌra.

²⁰Bilaꞌmohi mampekiri parewa to ropolihi i Kanaꞌa, alaꞌ lekiꞌna to moromiꞌ i Masiri hingkiꞌ mewaliꞌ dolaꞌra.”

²¹Anaꞌna hi Akoꞌ mampetuntuimohi hapo to notiꞌi datu. Hi Yusuf mampaꞌanihi haꞌumbo onu kereta, hintotoꞌ hante to notiꞌi datu, hei bakura i patengkaꞌara.

²²Nipaꞌanihi woꞌo parewa to maranga haduo-haduo, angkana hi Benami nipaꞌani doiꞌ peraꞌ tolu natu hante parewa limo mpasa.

²³Nopokatu pe umoꞌna hampuluꞌ mbaꞌa kalide laki to nipopangkomi parewa to moromiꞌ ka woiꞌ Masiri, hei hampuluꞌ mbaꞌa kalide lunaro to mangkomi kina, depa hante pangka ntaniꞌna to rowali bakura matengkaꞌ humei pe Masiri.

²⁴Katoꞌo nopopewotumohi halalinehi, notiꞌikihi, “Anioꞌkei moheꞌero i lala.”

²⁵Molaimohi ka Masiri Mahuliꞌ pe Kanaꞌa peꞌohaꞌana hi Akoꞌ umoꞌra.

²⁶Ropowutemo pe umoꞌra rotiꞌi, “Umoꞌ tuwuꞌluwora tene hi Yusuf! Io mewali to makuasaꞌ i lekiꞌna woiꞌ Masiri!” Konohorinalu umoꞌra kareba tiꞌo, menondoꞌlu, alaꞌ hawaꞌi nopoꞌohi hapo to rotiꞌi.

²⁷Angkana korololitanalu lekiꞌna hapo to notiꞌi hi Yusuf pe iohi hante ikonoꞌokiꞌnalu kereta to nopakatu hi Yusuf to hingkiꞌ mangkomihi pe Masiri, hongkoꞌ maroho laline.

²⁸“Anaꞌku hi Yusuf tuwuꞌlu tene! Horiana dokoꞌa nolou mampeꞌeleꞌi ikohandoaꞌangku tene mahi.”