Read Rampi Pewaliana 46 Bible Online

Pewaliana 46 - Rampi bible

Pewaliana 46

¹Hi Akoꞌ hantino mangkolodohihi moꞌoꞌiora hei mewotumohi molai pe Masiri. Kowuteralu i bolaꞌ Baraseba hi Akoꞌ mampopenomba pinatuwuꞌ pe Pueꞌ Ala to nopenombai hi Isaki, umoꞌna.

²I halumbu wini, mampopemombaha womo Pueꞌ Ala pe io i lali peponoꞌokiꞌi Notiꞌi, “Akoꞌ, Akoꞌ!” mehoniꞌ hi Akoꞌ, “Hieꞌeluꞌa Pueꞌ.”

³Mowiharomo Pueꞌ Ala, “Akumola Pueꞌ to nopenombai umoꞌmu. Anioꞌko morokaꞌ nolou pe woiꞌ Masiri, alaꞌ pemuleꞌamu hingkiꞌ Kupopewali haꞌanu kodatua to kodeꞌ i woiꞌ Masiri.

⁴Aku to moꞌowoniko nolou pe woiꞌ Masiri hingkiꞌ Kukomi mahuliꞌ muleꞌma pe woiꞌ hieꞌe. Ane tempomumoꞌi mahi, hi Yusuf to hingkiꞌ morewahiko.”

⁵Katoꞌo anaꞌna hi Akoꞌ mampopehendeꞌmo umoꞌra hante hantambira hei anaꞌra i kereta to nopokatukihi Pirao. Mewotumohi ka bolaꞌ Baraseba.

⁶Rokomimo woꞌo pinatuwuꞌre hante luma-luma to rohua i woiꞌ Kanaꞌa. Hi Akoꞌ hante pemuleꞌana, anaꞌna hante oꞌuweꞌna, noloumohi pe woiꞌ Masiri.

⁸Konaꞌra muleꞌna hi Akoꞌ to metuntu pe woiꞌ Masiri iomo,

⁹Anaꞌna hi Akoꞌ ka hi Lea hamoloꞌ tomaꞌani iomo: hi Rube, mampemuleꞌki hi Henoꞌ, hi Palu, hi Herso hante hi Karmi. Hi Simeo mampemuleꞌki hi Mueꞌ, hi Ami, hi Oha, hi Aki, hi Sohar hante hi Saul, inoꞌra toKanaꞌa. Hi Lewi mampemuleꞌki, hi Gesoꞌ, hi Keha, hante hi Merari. Hi Yehuda, mampemuleꞌki, hi Ere, hi Ona, hi Sela, hi Pere, hi Sera. Anaꞌna ka haduona hi Er, hante hi Ona mahi i woiꞌ Kanaꞌa. Hi Pere mampoꞌanaꞌki hi Hesro hante hi Hamu. Hi Isaka mampoꞌanaꞌki hi Tolaꞌ, hi Pua, hi Ayub, hante hi Simoro. Hi Sebulo mampemuleꞌki, hi Sere, hi Elo, hante hi Yale. Uwaꞌ tene haduo anaꞌne towoweꞌe mampokonaꞌ hi Dina. Mewaliꞌ, muleꞌna hi Akoꞌ to ka hi Lea hantambina, koworiꞌna tolu mpuluꞌ tolu duo, nipoꞌanaꞌki i woiꞌ Padan.

¹⁶Anaꞌna hi Akoꞌ ka hi Silipaꞌ, hawiꞌna hi Lea to nopaꞌaniki hi Laba. Pomehuntu-huntuana iomo: Hi Gati mampoꞌanaꞌki hi Sipio hi Hagi, hi Suni, hi Hesbo, hi Eriꞌ, hi Arodi hante hi Areli. Anaꞌna hi Aser iomo: hi Imina, hi Iswa, hi Iswi, hi Berea hante hi Sera halalira towoweꞌe. Anaꞌna hi Beria iomo: hi Heber hante hi Makie. Mewaliꞌ, muleꞌna hi Akoꞌ ka hi Silipaꞌ, koworiꞌra hampuluꞌ oni duo.

¹⁹Anaꞌna hi Akoꞌ ka hi Raheli meroduohi iomo hi Yusuf hante hi Benami. Anaꞌna hi Yusuf ka hantambina hi Asna to nipoꞌanaꞌki i woiꞌ Masiri iomo, hi Manase hante hi Eparai. Hi Asna hieꞌe iomo anaꞌna hi Potipar tadulako mpenomba i Kota On. Hi Benami hampoꞌanaꞌa iomo: hi Bela, hi Bekeri, hi Asbel, hi Gera, hi Naꞌama, hi Ehi, hi Rosi, hi Mupi, hi Hupi hante hi Ared. Mewaliꞌ, muleꞌna hi Akoꞌ ka hi Raheli koworiꞌra hampuluꞌ iba duo.

²³Anaꞌna hi Akoꞌ ka hi Bilaꞌ, hawiꞌna hi Raheli, to nipaꞌanikiꞌi ka hi Laba umoꞌna, pomehuntu-huntuana iomo: hi Daniel mampoꞌanaꞌki hi Husi. Hi Taliꞌ mampoꞌanaꞌki hi Yase, hi Guni, hi Yeser hante hi Sile. Lekiꞌra pitu duohi.

²⁶Muleꞌna hi Akoꞌ to melimba pe woiꞌ Masiri, lekiꞌna porampuana oni mpuluꞌ oni duohi, handoaꞌi tene nipohaꞌihaꞌa moniane.

²⁷Anaꞌna hi Yusuf to nipaꞌanikiꞌi i woiꞌ Masiri meroduohi horiana tinona hi Akoꞌ to wute i woiꞌ Masiri, porampuana pitu mpuluꞌ duohi.

²⁸I patengkaꞌra, hi Akoꞌ morumbaꞌ hi Yehuda medodulumo ako mowowoi hi Yusuf hingkeꞌna humeiꞌi mampohidupaꞌki umoꞌra i woiꞌ Gose. Ikohupaꞌnalu umoꞌne i woiꞌ Gose,

²⁹hi Yusuf mampatimomo keretana hei akomo mampohidupaꞌki umoꞌna. Pohidupaꞌralu liu mokopui umoꞌna nopeꞌoloni morue i hindaꞌna.

³⁰Notiꞌi hi Akoꞌ pe hi Yusuf, “Hinewowoꞌena wadimoꞌa mahi, alaꞌ kuꞌokiꞌmoꞌi lioma, hei kubahaꞌmo ingko tuwuꞌluko tene.”

³¹Katoꞌo notiꞌi hi Yusuf pe kokaꞌnehi hante halalinahi umoꞌra, “Noloumoꞌa medodulu mampopebahaꞌ pe Pirao, ipehupaꞌnamo halalingku hante tinongku hei umoꞌku to ka woiꞌ Kanaꞌa.

³²Kupowuteromoꞌi pe Pirao, koꞌingkeina topolambaꞌ gimba hante gapiꞌ hei mampopihana lumara, uko ikomikei humei.

³³Ane Pirao mowowoikei, hei meꞌitano, hapo jamami,

³⁴Itiꞌikikei pe io, mepongkaka tene oꞌanaꞌ, wuteka monindi. Ingka topolambaꞌka pinatuwuꞌ, hibobali hante tododulungki hampiha. Ane watoꞌoꞌi datu hingkiꞌ morumbaꞌkei meꞌohaꞌ i woiꞌ Gose, alaꞌ toMasiri mampomokomaꞌ toaꞌ topolambaꞌ pinatuwuꞌ.”