Read Rampi Pewaliana 47 Bible Online

Pewaliana 47 - Rampi bible

Pewaliana 47

¹Katoꞌo hi Yusuf mangkomi limo duo ka halalinehi ako mehinaro pe datu. Notiꞌi, “Umoꞌku hei halali-halalingkuhi mehupaꞌmohi ka Kanaꞌa hante lekiꞌna bekeꞌ, gimba, gapiꞌ hei lekina lumara. Hinewowoꞌena uwaꞌmohi i woiꞌ Gose.”

³Datu meꞌitano pe halali-halalinahi hi Yusuf, “Hapo jamamio?” Mehoniꞌhi, “Ingka hieꞌe topolambaꞌka hibali tododulungki.

⁴Kohupaꞌki humeika lebaꞌ i woiꞌ hieꞌe, alaꞌ i woiꞌ Kanaꞌa kobilora makaja, horiana hamboaꞌmo uwaꞌ kora to noꞌoka bekeꞌ hante gimba. Ane ipoꞌioꞌi datu, hingkiꞌ meꞌohaꞌka i woiꞌ Gose.”

⁵Katoꞌo notiꞌi datu pe hi Yusuf, “Hinewowoꞌena umoꞌmu hante halali-halalimu uwaꞌmohi i hieꞌe.

⁶Ipohibalimo woiꞌ Masiri hieꞌe hibali woiꞌmu hadoduomu. Ipotedehimohi lebaꞌ i woiꞌ Gose, woiꞌ to moromiꞌ mpololeke i woiꞌ hieꞌe. Hei ane uwaꞌi i lumbura toaꞌ to nipoꞌohi hei matikaꞌ, irumbaꞌmohi hingkeꞌna molambaꞌhi woꞌo pinatuwuꞌku.”

⁷Hi Yusuf woꞌo mampopebahaꞌ umoꞌna pe datu. Katoꞌo hi Akoꞌ mobarakati datu,

⁸hei datu meꞌitano pe io, “Haꞌumbomo tinuwuꞌma umoꞌ?”

⁹Mehoniꞌ hi Akoꞌ “Aku tuwuꞌa 130 ntoꞌa mewaliꞌa topolilo. Kotuwuꞌku buhaꞌ komaporiꞌ hante tinuwuꞌku hangkokotu ane topohibobaliꞌi hante kotuwuꞌna tododulungki topolilo.”

¹⁰Uko tiꞌo hi Akoꞌ mesabiꞌmo hingkeꞌna ropokaꞌamo hei noperapiꞌ pe Pueꞌ mobarakati datu,

¹¹uko katoꞌo, hi Yusuf mosulungi umoꞌna hei halali-halalinahi nopopeꞌohaꞌ i woiꞌ Masiri, nopaꞌanimohi woiꞌ to molompoꞌ mpololeke mewali dolaꞌra dodungku i bolaꞌ Ramese, hintotoꞌ hante parentana datu.

¹²Hei hi Yusuf mampatimomokihi lekiꞌna kopongkonana umoꞌna hei halalinahi wute i anaꞌ-anaꞌra.

¹³Kobilora tiꞌo monono mpololeke, horiana i imbo-imbo hamboaꞌmo uwaꞌ kopongkona. Toaꞌ toMasiri hei toaꞌ toKanaꞌa molaumohi ala kobiloraha.

¹⁴I piha-pihana toaꞌ to mehili Kina, hi Yusuf morampu doiꞌ hilina kina honiꞌi noporia i tambi kodatuana Pirao.

¹⁵Ukomo doiꞌne toMasiri hante toKanaꞌa, katoꞌo hupaꞌmo toMasiri pe hi Yusuf hei rotiꞌi, “Ipaꞌanika wongkenaꞌ pangkaki! Hawaꞌka ipotedehi mahi. Alaꞌ doiꞌki ukomo.”

¹⁶Mehoniꞌ hi Yusuf, “Ane ukomoꞌi doiꞌmi, ipaꞌaniꞌakei pinatuwuꞌmi, hingkeꞌna kupaꞌanikei kopongkonami.”

¹⁷Katoꞌo pinatuwuꞌra ropeweimo mpuꞌu pe hi Yusuf ropopotopu kopongkonara hingkeꞌna hi Yusuf mampaꞌanihi kopongkonara topuna, nara, bekeꞌ, gapiꞌ hei kalide. Noꞌuwaꞌ ropotuwuꞌ i lalina hantoꞌa.

¹⁸I korontoꞌana mehupaꞌ womohi pe io hei mantiꞌi, “Hamboaꞌmo kiwowuni pe tua koꞌukone doiꞌki hei pinatuwuꞌki iꞌompui. Hamboaꞌmo uwaꞌ hapo-hapongki to hohumbo kipewei pe tua, ukona wotangki hadoduongki hei woiꞌki.

¹⁹Hawaꞌka ipotedehi mahi! Hei inioꞌ ipotedehiꞌi kineteꞌkio hawaꞌi tetudoꞌi. Wotangki hei woiꞌki ihilimo hante kina. Ingka hei woiꞌki kipeweimo mewaliꞌ hawiꞌna datu. Ipaꞌanimoka kina hingkeꞌna moꞌumpuꞌi tuwuꞌki hei tinudaꞌ to hingkiꞌ kihawori i kineteꞌki!”

²⁰Katoꞌo hi Yusuf mehili lekiꞌna woiꞌ i Masiri mewali woiꞌna datu. Nokomi komakajana kobilora tiꞌo, lekiꞌna toMasiri mampobaluꞌmohi woiꞌra pe io. Watoꞌomola lalane Pirao moꞌompui lekiꞌna woiꞌ Masiri.

²¹Lekiꞌra toaꞌ toMasiri mewali hawiꞌna hi Yusuf i Masiri.

²²Woiꞌna romo tadulako mpenomba to hawaꞌi nohili hi Yusuf, alaꞌ koparaluara hante kopongkonara nopatimomokihi datu. Io hinaꞌ hawaꞌhi paralu mampobaluꞌ woiꞌra.

²³Notiꞌi hi Yusuf pe toaꞌ to woriꞌ tiꞌohi, “Elekei, ingkei hei woiꞌmi kuhilikimo datu. Hieꞌemo tinudaꞌmio hingkeꞌna ihaworikei i kineteꞌmi.

²⁴I tempomi mekina, hangangaa dolaꞌ limona ipepaꞌanikikei pe datu. Pelobiana iomo to iꞌokakei hantino hei iwalikei tinudaꞌmi.”

²⁵Mehoniꞌhi, “Moꞌawerasiꞌka alaꞌ iposalamaꞌka. Hinamoie mewalika hawiꞌna datu.”

²⁶Uko tiꞌo nowalimo hi Yusuf atura i woiꞌ Masiri, iomo dolaꞌ limona ka paꞌintuꞌra hangangaa mewaliꞌ dolaꞌna datu. Wute hinewowoꞌena atura tiꞌo ropopatengkaꞌ tene. Woiꞌna romo tadulako mpenomba to hawaꞌi mewali dolaꞌna datu.

²⁷Katoꞌo lebaꞌmohi toSaraelihio i woiꞌ Masiri, i woiꞌ Gose. Iohi mewalimohi sugiꞌ hei moꞌanaꞌ-anaꞌmohi wute memuleꞌmohi itoꞌo.

²⁸Hi Akoꞌ tuwuꞌ tene hampuluꞌ pitu ntoꞌa i woiꞌ Masiri, wute tinuwuꞌna 147 pitu ntoꞌa.

²⁹Katoꞌo dodungkumo tempone hingkiꞌ mahi, mowowoimo hi Yusuf anaꞌna, hei notiꞌi pe io, “Luleꞌi korawema i kohelaꞌna paꞌangku hei mosumpako, hawaꞌa hingkiꞌ itawu i woiꞌ Masiri hieꞌe,

³⁰alaꞌ aku dokoꞌa lebaꞌ moꞌawa-awa hante tododulungku. Io horiana ikomi wotalokaꞌka intu kaseꞌe hei itawu i lali petowuara.” Katoꞌo mehoniꞌ hi Yusuf, “Umoꞌ hingkiꞌ kuwali, hapo to itiꞌikiꞌa.”

³¹Notiꞌi hi Akoꞌ, “Mosumpako pe aku.” Katoꞌo mosumpamo mpuꞌu hi Yusuf pe io. Katoꞌo melingkotuꞌmo hi Akoꞌ i tinaꞌ petutuꞌana, menomba pe PUEꞋ Ala.