Read Rampi Pewaliana 48 Bible Online

Pewaliana 48 - Rampi bible

Pewaliana 48

¹Hawaꞌi morue uko tiꞌo nipekarebaikimo pe hi Yusuf komadorine hakiꞌna umoꞌna. Katoꞌo noloumohi hi Yusuf hante anaꞌna to roduo, iomo hi Eparai hante hi Manase ako mololoꞌo umoꞌna.

²Konohorinalu hi Akoꞌ kohupaꞌne hi Yusuf hampoꞌanaꞌa, nopokarohomo wotane, honiꞌi mahura i koturuana.

³Notiꞌi hi Akoꞌ pe hi Yusuf, “Pueꞌ Ala to makuasaꞌ mampopemombaha wotaNa i aku i Lus, i woiꞌ Kanaꞌa, itoꞌo Nobarakatiꞌa.”

⁴Pueꞌ Ala mololita pe aku, “Alaꞌ Aku, hingkiꞌ woriꞌ oꞌuweꞌma, hingkeꞌna muleꞌmu mewaliꞌ woriꞌ kodatua. Aku hingkiꞌ mampaꞌanihi bolaꞌ hieꞌe pe muleꞌmu ropotumpu wute nantolou-louna.”

⁵Nopololiu womo hi Akoꞌ lolitane notiꞌi, “Yusuf, roduo anaꞌmu hi Eparai hante hi manase to nipoꞌanaꞌki i woiꞌ Masiri i kohandoaꞌngku tene hupaꞌ i hieꞌe, kurekeꞌmohi anaꞌku, hibali hi Rube hante hi Simeo.

⁶Ane uwaꞌ womohi anaꞌma, hamboaꞌmohi kurekeꞌ anaꞌku, angkana mewalimohi anaꞌmu. Manaꞌra hingkiꞌ rotorimo ka kokaꞌra iomo hi Eparai hante hi Manase.

⁷Kuwali hieꞌe alaꞌ inoꞌmu hi Raheli. Tempoki mahuliꞌ ka woiꞌ Pada-Aram io mahi i woiꞌ Kanaꞌa hawaꞌi moꞌela ka bolaꞌ Eparata, hei aku hanondoihaꞌa loleke. Aku motawuꞌi i hiri lala pe Eparata” [Hinewowoꞌena nikokeneꞌi Beteleme.]

⁸Konoꞌokiꞌnalu hi Akoꞌ anaꞌ-anaꞌnehi hi Yusuf, nopeꞌitanoki, “Himo oꞌanaꞌ hieꞌe?”

⁹Mehoniꞌ hi Yusuf, “Iomohila anaꞌku to nopaꞌanikiꞌa Pueꞌ Ala iseꞌe i woiꞌ Masiri.” Notiꞌi hi Akoꞌ, “Kuperapiꞌ i pododungkuhi pe aku hingkiꞌ kubarakatihi.”

¹⁰Alaꞌ komotodinamo hi Akoꞌ hamboaꞌmo rahi pangkiꞌ, hi Yusuf mampododungku anaꞌnahi tiꞌo pe hi Akoꞌ, honiꞌhi nokopui hante noꞌumaꞌhi.

¹¹Uko tiꞌo mololita womo hi Akoꞌ pe hi Yusuf, “Kotuꞌuana himaꞌmo kupohinaru hingkiꞌ hidupaꞌki tene, angkana Pueꞌ Ala mampaꞌaniꞌa tempo to moromiꞌ mampohidupaꞌki woꞌo anaꞌmuhi.”

¹²Katoꞌo norodiꞌmohi hi Yusuf anaꞌne ka konoꞌawiꞌana hi Akoꞌ, honiꞌi melingkotuꞌ i hinarona umoꞌna metoungkaꞌ wute i woiꞌ.

¹³Uko tiꞌo nopododungkumohi hi Yusuf anaꞌne to roduo tiꞌo i hinarona hi Akoꞌ, hi Manase to kokokaꞌ tinaꞌ i koanana hei hi Eparai tohinoneeꞌ tinaꞌ i koirina.

¹⁴Angkana hi Akoꞌ mampemehulepe korawena, hei korawe kuanana mopalaꞌ tutuꞌna hi Eparai, hei korawe koirina mopalaꞌ tutuꞌna hi Manase.

¹⁵Uko tiꞌo hi Akoꞌ mobarakati hi Yusuf, notiꞌi, “Pueꞌ Ala to ropenombai hi Burahima hante hi Isaki, Io morandaꞌa wute hinewowoꞌena.

¹⁶Iomo Malaꞌeka to mapolohoꞌa ka hinangkana kohurewuꞌ. Toperapiꞌ pe Pueꞌ Ala hingkiꞌ mobarakatihi oꞌanaꞌ hieꞌe. Toperapiꞌ hingkeꞌna oꞌanaꞌ to mewali anaꞌku hieꞌe hingkiꞌ mampopewali kokodeꞌna konaꞌku hei konaꞌra todulungku hi Burahima hante hi Isaki. Toperapiꞌ hingkeꞌna moꞌanaꞌhi hei moꞌoꞌuweꞌhi wute woriꞌ pemuleꞌara i duniaꞌ.”

¹⁷Konoꞌokiꞌna hi Yusuf umoꞌna mohumpada korawe kuanana i womboꞌ tutuꞌna hi Eparai, hawaꞌi nopomoromiꞌ. Iomo horiana hi Yusuf motiko korawe kuanana umoꞌna hingkiꞌ noboliꞌ i womboꞌ tutuꞌna hi Manase.

¹⁸Notiꞌi, “Umoꞌ, inioꞌko watoꞌo. Hieꞌemo anaꞌku to kokokaꞌ. Hangangaa ihumpada korawe kuanamu i womboꞌ tutuꞌna.”

¹⁹Angkana lolitana tiꞌo hawaꞌi notorimo umoꞌna, notiꞌi, “Kubahaꞌlu, anaꞌku. Kubahaꞌlu hi Manase hingkiꞌ kodeꞌ woꞌo kuasaꞌne, hei pemuleꞌana hingkiꞌ mewali haꞌanu kodatua to kodeꞌ. Angkana kehapoꞌi watoꞌomo, hineeꞌna to hingkiꞌ meliu kokodeꞌne kuasaꞌna ka io, hei muleꞌna hingkiꞌ mewali kodatua ngkodeꞌ.”

²⁰Katoꞌo i ando tiꞌo hi Akoꞌ mobarakati womo oꞌanaꞌ tiꞌohi notiꞌi: “Mepongka hinewowoꞌena, toSaraeli hingkiꞌ mamponindi konaꞌmu ane mobarakatihi toaꞌ hante mantiꞌi: ‘Toperapiꞌ pe Pueꞌ Ala hingkeꞌna norewahiko hibali hi Eparai hante hi Manase.’” Watoꞌomo hi Akoꞌ mampodulu hi Eparai ka hi Manase.

²¹Hi Akoꞌ mololitamo pe hi Yusuf notiꞌi: “Himaꞌmo morue hingkiꞌ mahiꞌa, angkana Pueꞌ Ala hingkiꞌ mampoꞌowonikei hei mangkomikei mahuliꞌ pe woiꞌ bolaꞌra tododulumi.

²²Hingkiꞌ kupaꞌaniko woiꞌ, melobi ka to kupaꞌanikihi halalimu. Hinewowoꞌena kupaꞌaniko hambeiꞌ biri, woiꞌ to kuperompoꞌi ka toAmori hante piho hei panangku.”