Read Rampi Pewaliana 49 Bible Online

Pewaliana 49 - Rampi bible

Pewaliana 49

¹Uko tiꞌo nowowoimohi hi Akoꞌ anaꞌnehi notiꞌi, “Morampumokei i hieꞌe, dodungku aku. Kuponobahaꞌikikei hapo to hingkiꞌ ipolalakei i ando to hingkiꞌ nihinoroi.

²O anaꞌ-anaꞌna hi Akoꞌ! Morampumokei hei ipehoromuamokei lolitane hi Saraili umoꞌmi.

³Rube, anaꞌku tokokaꞌ, ingkomo rohongka, ingkomola uluꞌ anaꞌka to nipoꞌanaꞌki i tempoku moleaꞌ tene. Ingko to manobaꞌ hei to maroho ka lekiꞌna anaꞌku.

⁴Ingko hawaꞌko morii peleihana lalimu, hibaliko uwai to makehiꞌ poꞌiline, horiana hamboaꞌmoko rorekeꞌ to kokokaꞌ, to ropengkoruꞌi alaꞌ ingko turuko moloꞌori hante hantambingku, ikokomaꞌimo koturuangka.

⁵Hi Simeo hante hi Lewi to mohalali, iohi to mohiaꞌ.

⁶Hawaꞌi hingkiꞌ kutuntuni butusiare to kodake, hei hawaꞌi woꞌo kupoꞌowoni i lali porampu-rampuara. Alaꞌ nokomi kohirorokoꞌara, merorokoꞌhi, nokomi patampora, motedaꞌhi kolentoꞌna gapiꞌ mampaliꞌ komasanara.

⁷Buntoꞌmohi, alaꞌ waliara hei alaꞌ komatampora. Hingkiꞌ kupopokaꞌa-kaꞌahi i humanele woiꞌ Saraili, hingkiꞌ kupomobuntelahi ka lumbura lekiꞌ-lekiꞌ tinona hi Akoꞌ.

⁸Yehuda, ingko hingkiꞌ penaniko ka poniꞌ-poniꞌmu. Halalimuhi hingkiꞌ mamperenakiko, hei hingkiꞌ melingkotuꞌ i hinaromu.

⁹Hi Yehuda hibali singa to moleaꞌ tene, io morokoꞌ pinatuwuꞌ to hingkiꞌ noꞌoka hei mahuliꞌ pe peꞌohaꞌana, turumo itoꞌo hei hawaꞌi uwaꞌ to podehoꞌ molukeꞌi.

¹⁰Hi Yehuda hingkiꞌ motiko laiꞌ kodatua hei makuasaꞌ, muleꞌna hingkiꞌ moparenta nantolou-louna. Toaꞌ malekiꞌ ka kodatua-kodatua hingkiꞌ mangkomi popenomba pe io, hingkiꞌ metoungkaꞌhi hei mengkoruꞌhi i hinarona.

¹¹Alaꞌ nokomi koworiꞌna angoroꞌna i kineteꞌna, anaꞌ kalidena nopekohoiki i karuna, i karu angoroꞌ to moromiꞌ mpololeke. Io mowaheꞌ parewana hante uwai angoroꞌ, angoroꞌ to momeaꞌ hibali raꞌa.

¹²Alaꞌ nokomi koworiꞌna anggoroꞌ noꞌinu, momeaꞌ matane, hei nihina popuhiꞌ alaꞌ maꞌinu uwai omiꞌna gapiꞌ.

¹³Hi Sebulo hingkiꞌ meꞌohaꞌ i bota ntahiꞌ. Kapalaꞌ-kapalaꞌ tahiꞌ hingkiꞌ maweo itoꞌo i parailiꞌ woiꞌna wute i kota Sido.

¹⁴Hi Isakar hibali hambaꞌa kalide to maroho to molukuꞌ hante tekeꞌana.

¹⁵Noꞌele peꞌohaꞌana tiꞌo moromiꞌ loleke, hei manobaꞌ mpuꞌu bolaꞌ tiꞌo, metobungkuꞌmo io nipohumpadai komiana, hei niparuku majama madori hibali hawiꞌ.

¹⁶Ingko Dan, hingkiꞌ mohuroniko posisalaꞌna toaꞌ, hei muleꞌmu hingkiꞌ mewalihi hantino. Hibali hante tino ntaniꞌna i woiꞌ Saraili.

¹⁷Angkana io hibali hambaꞌa ule to mangawu i hiri lala, hibali ule to moꞌupoꞌ petotiona mobingku pakoꞌna nara, horiana to melambaꞌ hibalingkara.

¹⁸O PUEꞋ, kosalamaꞌ to i weikiꞌa, tiꞌo mpuꞌu to kupekau.” Uko tiꞌo notiꞌi womo,

¹⁹“Hi Gat hingkiꞌ norompoꞌi to merorompoꞌi, angkana hingkiꞌ irompoꞌihi huliꞌ.

²⁰Aser, woriꞌ kopongkonamu to motomiꞌ-tomiꞌ, iomo to hingkiꞌ i palenaꞌ, ipopolora datu-datu.

²¹Hi Taliꞌ hibali lagiwa lunaro to melohoꞌ. Manobaꞌ mpuꞌu anaꞌne.

²²Hi Yusuf winoro kalide to moleaꞌ. Kalide mpoꞌilo meꞌohaꞌ dodungku i mata uwai, hei mesilai-lai i papina.

²³Kehapoꞌi to mepana meꞌewa hei mepodapaꞌ hingkiꞌ mopanaꞌi,

²⁴Angkana meliu tene komarohone korawene hi Yusuf mepopana. Hawaꞌi bata-bata laline. Alaꞌ pepoꞌowonina kuasaꞌna Pueꞌ Alana hi Akoꞌ to morewahi toSaraeli.

²⁵Pueꞌ Alana umoꞌmu to mosulungiko, to makuasaꞌ mobarakatiko hante ura ka laniꞌ, hei uwai ka lali woiꞌ, hei woriꞌ pemuleꞌamu.

²⁶Pebarakatina Pueꞌ Ala to nopenombai umoꞌmu meliu ka komoromiꞌna biri. Hinamo mengkohou lekiꞌna pebarakati tiꞌo, i womboꞌ tutuꞌna hi Yusuf, iomo to niperenaki ntaniꞌ ka halalinahi.

²⁷Hi Benami hibali hulakuꞌ to mohiaꞌ. I mihoꞌoluna io mohokiꞌ to noꞌoka, hei kononewana io modolaꞌ-dolaꞌ to noperompoꞌi.”

²⁸Iomola lekiꞌna toSaraeli, hampuluꞌ merontino ihaꞌne, iomola to notiꞌi umoꞌre pe iohi, i pebarakatina pe iohi, haduo-haduo nobarakatihi.

²⁹Katoꞌo meꞌowilimo hi Akoꞌ pe iohi. “Hamboaꞌmo morue hingkiꞌ mahimoꞌa, ane mahiꞌa itawuꞌakei i hirina tododulungku, i lali woloꞌ to i kineteꞌna hi Epron, toHet tiꞌo.

³⁰I lali woloꞌ to i kineteꞌ Mapela i hambeiꞌ motoꞌando Mamre i woiꞌ Kanaꞌa, kineteꞌ to nohili hi Burahima ka hi Epron, toaꞌ toHet tiꞌo, mewali petowua to noꞌompuimo.

³¹Itoꞌomola nitawuꞌi hi Burahima moꞌawa hi Sara, hantambina, itoꞌomola nitawuꞌi hi Ishak moꞌawa hi Ribka hantambina, hante itoꞌo woꞌo hi Lea kutawuꞌi.

³²Kineteꞌ hante woloꞌ to uwaꞌ itoꞌo nihilimo ka toaꞌ toHet. Itawuꞌakei itoꞌo.”

³³Ikoꞌukonalu hi Akoꞌ meꞌowili pe anaꞌ-anaꞌnahi, noꞌoruꞌmo kapuꞌne pe womboꞌ koturuana hei turu honiꞌi io mahi.