Read Rampi Pewaliana 50 Bible Online

Pewaliana 50 - Rampi bible

Pewaliana 50

¹Hi Yusuf motumpopoꞌi umoꞌna, nopeꞌoloni hei noꞌumaꞌ lione umoꞌna.

²Katoꞌo hi Yusuf mohawaꞌ pe hawiꞌ-hawiꞌna to pobahaꞌ morewahi to mahi, hingkeꞌna norewahiꞌi wotalokaꞌne umoꞌna.

³Jama tiꞌo mangka tempo iba mpuluꞌ ando, alaꞌ adaꞌra morewahi to mahi. Toaꞌ toMasiri moꞌomboꞌ hi Akoꞌ, pitu mpuluꞌ ando komoruene.

⁴Koꞌukonalu tempone omboꞌ notiꞌi hi Yusuf pe hawiꞌ-hawiꞌna datu, “Ipowutekei pepaha hieꞌe pe datu.

⁵Ikohandoaꞌana tene mahi umoꞌku, norumbaꞌa mosumpa pe io, hingkeꞌna kutawuꞌi i lali petawua to nipatimomo i woiꞌ Kanaꞌa. Iomo horiana kuperapiꞌ hingkeꞌna nolouꞌa duluna motawu umoꞌku. Uko tiꞌo mahuliꞌluꞌa intu humei.”

⁶Notiꞌi Pirao, “Noloumoko motawu umoꞌmu hibali to idandikiꞌi pe io.”

⁷Katoꞌo noloumo mpuꞌu hi Yusuf ako motawu umoꞌna. Lekiꞌna topajamana datu, tomotodi-tomotodi i tambina hei lekiꞌna tadulako-tadulako i Masiri, nolouhi moꞌawa-awa hante hi Yusuf.

⁸Lekiꞌna tinona, halali-halalinahi, hei lekiꞌna tinona umoꞌna nolouhi woꞌo, sangadina oꞌanaꞌ to kokiuꞌ romo hante pinatuwuꞌ to holampi i woiꞌ Gose.

⁹Surodadu to mokereta hei topenara metuntu woꞌo horiana woriꞌhi mpololeke to metuntu.

¹⁰Ikohupaꞌralu i pebolaꞌana to mampelabehiꞌki kina i Goren-Hatad, i hambeiꞌna motoꞌando i uwai Yarade meꞌolahi hanondoiha lalire hei meꞌola mangkoreu. Hi Yusuf moꞌomboꞌ tene pitu ando komoruene.

¹¹Koroꞌokiꞌnalu toKanaꞌa omboꞌ tiꞌo i Goren-Hatad iohi mantiꞌi, “Mepohanondoiha mpololeke omboꞌre toMasiri tiꞌo.” Iomo horiana pebolaꞌa tiꞌo rokokeneꞌi Abel-Misraim.

¹²Katoꞌo anaꞌnehi hi Akoꞌ mampetuntui peꞌowowili hi Akoꞌ pe iohi.

¹³Wota lokaꞌna rokomi pe woiꞌ Kanaꞌa nikahi i lali woloꞌ watu Makpela i hambeiꞌ motoꞌando mamre i kineteꞌ to nohili hi Burahima ka hi Epron toaꞌ toHet tiꞌo, mewali petowuara.

¹⁴Koꞌukonalu hi Yusuf motawu umoꞌna, io mahuliꞌ pe Masiri moꞌawa-awa hante halali-halalinehi hei lekiꞌna toaꞌ to metuntu io motawu umoꞌna.

¹⁵Ikomahinalu umoꞌre, notiꞌi kokaꞌnehi hi Yusuf, “Hohumbomoki ane rapaꞌna hi Yusuf, mohowoni walianta hampiha to kodake?”

¹⁶Iohi mepahamohi pe hi Yusuf waheꞌe, “Ikohandoaꞌana mahi umoꞌte,

¹⁷io morumbaꞌka mantiꞌi pe ingko waheꞌe, ‘Iꞌampunikimohi salaꞌ to rowalimo kokaꞌ-kokaꞌmuhi hampiha pe ingko.’ Ingka hieꞌe hawiꞌna Pueꞌ Ala, iomo Pueꞌ to nopenombai umoꞌta, kiperapiꞌ, ampunikimoka salaꞌ to kiwalimo pe ingko.” Meꞌolamo hi Yusuf i tempona mantorimo pepaha lolita tiꞌo.

¹⁸Katoꞌo mehupaꞌ halali-halalinehi melingkotuꞌ i hinarona hei mantiꞌi, “Ingka hieꞌe hupaꞌka mewali hawiꞌmu.”

¹⁹Angkana notiꞌi hi Yusuf pe iohi, “Inioꞌkei morokaꞌ alaꞌ kuasaꞌku hawaꞌi hibali hante kuasaꞌna Pueꞌ Ala.

²⁰Kehapoꞌi itungkailukei mowali to kodake pe aku, angkana Pueꞌ Ala mowolihi to kodake tiꞌo mewaliꞌ to moromiꞌ, hingkeꞌna ka lekiꞌna to mewalimo hampiha, woriꞌ toaꞌ niposalamaꞌ.

²¹Inioꞌkei morokaꞌ alaꞌ aku hingkiꞌ mampoganaꞌiꞌa koparaluꞌami hante anaꞌ-anaꞌmi.” Watoꞌomo hi Yusuf mampododoli lalira hante wiharo to moꞌalusuꞌ, horiana motanaꞌhi.

²²Hi Yusuf tontolu meꞌohaꞌ i Masiri hante lekiꞌna halalinahi, io tuwuꞌ wute tinuwuꞌna 110 ntoꞌa.

²³Io hampakaꞌlu tene mampoꞌodaꞌ anaꞌna hei oꞌuweꞌna hi Eparai. Hampakaꞌlu tene woꞌo mampoꞌodaꞌ anaꞌna hi makhir, iomo oꞌuweꞌna hi Manase, hibali anaꞌna hadoduona.

²⁴Notiꞌi hi Yusuf pe halali-halalinehi, “Hamboaꞌmo morue hingkiꞌ mahiꞌa, angkana Pueꞌ Ala hingkiꞌ morewahikei hei mangkomikei molai ka woiꞌ hieꞌe, pe woiꞌ to nodandimo Pueꞌ hante sumpa pe tododulunta: hi Burahima, hi Isaki hei hi Akoꞌ.”

²⁵Katoꞌo hi Yusuf morumbaꞌ lekiꞌna halalinehi mosumpa i woiꞌ tiꞌo, “Mosumpamokei pe aku, ane Pueꞌ Ala mangkomikei pe woiꞌ tiꞌo, hangangaa ikomikei wukungka.”

²⁶Katoꞌo mahimo hi Yusuf i Masiri tinuwuꞌna 110 ntoꞌa. Halalinahi morewahi wota lokaꞌna hei rokahi pe lali polotiana.