Read Rampi Pewaliana 6 Bible Online

Pewaliana 6 - Rampi bible

Pewaliana 6

¹I tempo tiꞌo, manusiaꞌ mepongkamo mawunene koworiꞌne i womboꞌ duniaꞌ hei iohi mampoꞌanaꞌkihi anaꞌ towoweꞌe,

²katoꞌo anaꞌ-anaꞌna Pueꞌ Ala ka suruga mampeꞌele anaꞌntowowalo tiꞌo hingkaꞌ manobaꞌ, katoꞌo roroa mewali hantambira himo to rolei io ropohantambi.

³Mohawaꞌmo PUEꞋ Ala, “InohaꞌKu hawaꞌi hingkiꞌ lebaꞌ nantolou-louna i lalina manusiaꞌ, alaꞌ manusiaꞌ tiꞌo tontona mahi, hei mepongka hinewoꞌena tinuwuꞌra hingkiꞌ hanatu merompuluꞌ ntoꞌalu.”

⁴I tempo tiꞌo, toaꞌ-toaꞌ to hingkaꞌ kodeꞌ hei maroho mpololeke uwaꞌ i duniaꞌ, iohi tiꞌo muleꞌna ka anaꞌ-anaꞌna Pueꞌ Ala hante anaꞌ ntowoweꞌena manusiaꞌ. Toaꞌ-toaꞌ tiꞌomohila to kodeꞌ liaꞌ maroho hei nipohibahaꞌhi i tempo hampiha.

⁵Ikonoꞌelenalu Pueꞌ waliane manusiaꞌ to kodake monono mpuꞌu i duniaꞌ, hinangkana pampekirira timulu mampowuaꞌkilu kokodakea,

⁶iomo horiana nohohoꞌmo laline PUEꞋ, alaꞌ Nowalimoꞌi manusiaꞌ i duniaꞌ, hei tiꞌo mampomasusa laliNa.

⁷Mohawaꞌmo PUEꞋ, “Hingkiꞌ Kuporopuꞌmo manusiaꞌ to Kupopewalimo tiꞌo i womboꞌ duniaꞌ, watoꞌo woꞌo lekiꞌna pinatuwuꞌ hante lekiꞌna tinti, alaꞌ konohohoꞌKu, ikoKuwalira.”

⁸Angkana uwaꞌ haduo to mampomotanaꞌ lalina PUEꞋ, iomo hi Nohoꞌ.

⁹Hieꞌemo lolitonane tuwuꞌna hi Nohoꞌ. Hi Nohoꞌ iomo haduo to mononto lalina, hei tungkuꞌ hante mohaꞌanu hante Pueꞌ Ala, ka lekiꞌna toaꞌ i tempo tiꞌo.

¹⁰Hi Nohoꞌ mampemuleꞌki tolu duo tomaꞌani, iomo hi Sem, hi Ham hante hi Apeꞌ.

¹¹Angkana i tempo tiꞌo lekiꞌ-lekiꞌna toaꞌ ntaniꞌna kodake i pampeꞌelena Pueꞌ Ala, morintodiꞌi lalire hei hirorokoꞌahi.

¹²Pueꞌ Ala mampeꞌele kokodakena duniaꞌ, alaꞌ manusiaꞌ mowalia to kodake i duniaꞌ.

¹³Mohawaꞌmo Pueꞌ Ala pe hi Nohoꞌ Notiꞌi, “Kubutusimo hingkiꞌ Kuropuꞌi kotuwuꞌne hinangkana to tuwuꞌ, alaꞌ duniaꞌ buhaꞌmo kokodakea, mewaliꞌ hingkiꞌ Kuporopuꞌmohi moꞌawa-awa hante duniaꞌ.

¹⁴Mowalimoko haꞌanu duanga ka loti to maroho mpololeke. Duanga tiꞌo hangangaa iwali mokotaꞌ-kotaꞌ hei hangangaa ilopihi hante taru ka huwalina hante ka lalina.

¹⁵Koꞌiwalina duanga tiꞌo hangangaa waheꞌe, kokurauꞌna 133 meteꞌ, kokorobana 22 meteꞌ, hei kodingkaoꞌna 13 meteꞌ.

¹⁶Ipowaliki dopiꞌna, hei kohelaꞌ dopiꞌna ka porindina 44 senti, iwalimo duanga tiꞌo tolu huntu, hei ipowaliki haꞌanu wambaꞌ ka hirina.

¹⁷Alaꞌ Aku hingkiꞌ mampopehupaꞌA uwai to melobuꞌi to hingkiꞌ mamporopuꞌ hinangkana to tuwuꞌ hei to meꞌinohaꞌ i luaꞌna laniꞌ, hinangkana to tuwuꞌ i duniaꞌ hingkiꞌ mahi manasa.

¹⁸Angkana hingkiꞌ mampoꞌuwaꞌA podandi hante ingko, hei ingko hingkiꞌ mekahiko pe lali duanga tiꞌo, moꞌawa-awako hante anaꞌ-anaꞌmu hei hantambimu hante hantambina anaꞌ-anaꞌmuhi.

¹⁹Hei ka hinangkana pinatuwuꞌ, ikomi hampasa-hampasa pe lali duanga tiꞌo, hingkeꞌna terewahiꞌi tuwuꞌre moꞌawa-awa hante ingko.

²⁰Ka hinangkana langkaꞌna tinti hante ka hinangkana langkaꞌna pinatuwuꞌ, ka hinangkana langkaꞌna to mendae i womboꞌ duniaꞌ, ka lekiꞌna tiꞌo hangangaa mehupaꞌ hampasa-hampasa pe ingko, hingkeꞌna terewahiꞌi tuwuꞌre.

²¹Hei ingko, ikomimo hinangkana to wadi niꞌoka, irampumohi lekiꞌna tiꞌo hingkiꞌ mewali pangkamu hante pangkara pinatuwuꞌ tiꞌohi.”

²²Katoꞌo hi Nohoꞌ mampetuntui lekiꞌna tiꞌo, hitontoꞌ hante to nohowoiꞌkiꞌi Pueꞌ Ala pe io, watoꞌomola konowaline hi Nohoꞌ.