Read Rampi Pewaliana 7 Bible Online

Pewaliana 7 - Rampi bible

Pewaliana 7

¹Katoꞌo mohawaꞌmo PUEꞋ Ala pe hi Nohoꞌ, “Mekahimoko pe lali duanga tiꞌo, ingkei hantino, alaꞌ ingkomo to Kuꞌokiꞌ maniuꞌ i hinarongKu ka lumbuna toaꞌ to tuwuꞌ hinewowoꞌena.

²Ka lekiꞌna pinatuwuꞌ to wadi niꞌoka, hangangaa iroa pitu mpasa, laki hante lunarona, angkana ka pinatuwuꞌ to hawaꞌi wadi niꞌoka hampasalu.

³Hei iroa woꞌo ka tinti-tinti i raoha pitu mpasa, bangkoilo hante towoweꞌe, hingkeꞌna noterewahi muleꞌre i duniaꞌ.

⁴Alaꞌ pitu ando tene, Aku hingkiꞌ mampopengkohouꞌA ura pe womboꞌ duniaꞌ iba mpuluꞌ ando iba mpuluꞌ mini komoruene, hei Aku hingkiꞌ mopahi ka womboꞌ duniaꞌ lekiꞌna hinangkana to uwaꞌ, to Kupopewali tiꞌo.”

⁵Katoꞌo hi Nohoꞌ motuntunimo mpuꞌu lekiꞌna to Nohowoꞌikiꞌi PUEꞋ Ala pe io.

⁶I tempona uwai molobuꞌi duniaꞌ, tinuwuꞌna hi Nohoꞌ 600 ntoꞌa.

⁷Mekahimo hi Nohoꞌ pe lali duanga moꞌawa-awa hante anaꞌnahi hei hantambina, hei hantambina anaꞌnahi alaꞌ uwai liuꞌ tiꞌo.

⁸Mepongka ka pinatuwuꞌ to wadi niꞌoka hei to hawaꞌi wadi niꞌoka, ka tinti-tinti hei hinangkana to mendae i womboꞌ duniaꞌ,

⁹mehupaꞌmo hampasa-hampasa moduuꞌ hi Nohoꞌ i lali duanga tiꞌo, laki hante lunaro, hintotoꞌ hibali to nohowoꞌikiꞌi Pueꞌ Ala pe hi Nohoꞌ.

¹⁰Ikopitu andonamo mpuꞌu hupaꞌmo uwai liuꞌ mobuhoꞌi duniaꞌ.

¹¹I tempona hi Nohoꞌ moꞌumuruꞌ 600 ntoꞌa, i wula to kadua, i ando to kohampuluꞌ pitu, wula tiꞌo, i ando tiꞌomola lintubuꞌ hinangkana mata uwai to monono hei woloꞌ-woloꞌ i laniꞌ moweaꞌ,

¹²hei mengkohoumo ura ngkodeꞌ i duniaꞌ iba mpuluꞌ ando iba mpuluꞌ wini komoruene.

¹³I ando tiꞌo woꞌo, mekahimo hi Nohoꞌ hante hantambina pe lali duanga moꞌawa hante anaꞌna iomo, hi Sem hi Ham hante hi Apeꞌ, hante hantambi-hantambira.

¹⁴Hei hinangkana pinatuwuꞌ to moꞌilo, to mononara, to mendae hei hinangkana tinti,

¹⁵ka lekiꞌna to tuwuꞌ mehupaꞌmo hampasa-hampasa mekahi i duangana hi Nohoꞌ.

¹⁶Hei to mekahi tiꞌo iomo laki hante lunaro ka hinangkana pinatuwuꞌ, hitontoꞌ hante to nohowoꞌikiꞌi PUEꞋ Ala pe hi Nohoꞌ. Katoꞌo PUEꞋ Ala mowiti wambaꞌ duanga tiꞌo i tunduna hi Nohoꞌ.

¹⁷Iba mpuluꞌ ando komoruene, uwai liuꞌ tiꞌo mobuhoꞌi duniaꞌ. Uwai tiꞌo mehendeꞌ hei mohini duanga tiꞌo, horiana mekononangko i womboꞌ duniaꞌ.

¹⁸Uwai tiꞌo kotetambaimbaiha hei makaja mpuꞌu kopehendeꞌ-hendeꞌa i womboꞌ duniaꞌ, mekononangko mpuꞌu duanga tiꞌo i womboꞌ uwai.

¹⁹Hei uwai tiꞌo monono kotetambaiane moholuꞌi duniaꞌ, hei notutuꞌi hinangkana biri to dingkaoꞌ i luaꞌna laniꞌ.

²⁰Uwai tiꞌo mehendeꞌ wute podongkeꞌ pitu meteꞌ molewua loloꞌ-loloꞌna biri.

²¹Katoꞌo mahimo mpuꞌu mampopihana to tuwuꞌ, to mengkaduiꞌ i duniaꞌ, tinti-tinti, pinatuwuꞌ to manondoꞌ hei pinatuwuꞌ to moꞌilo hante hinangkana pinatuwuꞌ to mendae, to mengkaduiꞌ i duniaꞌ, hei lekiꞌna manusiaꞌ.

²²Mahimo hinangkana to meꞌinohaꞌ to tuwuꞌ i lerina.

²³Watoꞌomola konopahine Pueꞌ Ala hinangkana to uwaꞌ, hinangkana to i womboꞌ duniaꞌ, moromiꞌ manusiaꞌ ba rewua hei pinatuwuꞌ to mendae hante tinti-tinti i raoha, horiana lekiꞌna tiꞌo nopahi ka womboꞌ duniaꞌ, hi Nohoꞌ romo to tuwuꞌ hei lekiꞌna to moꞌawa-awa hante io i lali duanga tiꞌo.

²⁴Hei uwai tiꞌo mobuhoꞌi duniaꞌ 150 ando komoruena.