Read Rampi Pewaliana 8 Bible Online

Pewaliana 8 - Rampi bible

Pewaliana 8

¹Katoꞌo Pueꞌ Ala mamponindi hi Nohoꞌ hante lekiꞌna pinatuwuꞌ to uwaꞌ moꞌawa-awa i lali duanga tiꞌo, Pueꞌ Ala mampoꞌuwaꞌ parowo horiana uwai mepongkamo untu.

²Lekiꞌna mata uwai to i lali woiꞌ hante to i womboꞌ laniꞌ Notutuꞌi horiana meꞌohaꞌmo ura.

³Alaꞌ tiꞌo kopengkohou-houhamo uwai tiꞌo ka womboꞌ duniaꞌ. Watoꞌomola pengkohoune uwai tiꞌo ikohanatu limo mpuluꞌ andonamo.

⁴I wulana kohampuluꞌ pitu, i ando kohampuluꞌ pituna i wula tiꞌo, holampimo duanga tiꞌo i womboꞌ biri Araraꞌ.

⁵Wute i wula kohampuluꞌ kopengkohou-houha lekemo uwai tiꞌo. I ando kaꞌisaꞌ wula tiꞌo, mombahamo loloꞌ-loloꞌne biri.

⁶Liumo iba mpuluꞌ ando, katoꞌo hi Nohoꞌ moweaꞌmo salewaꞌ to nowali i duanga tiꞌo.

⁷Hei io mampolohoꞌ hambaꞌa tinti kokao. Tinti tiꞌo meloka nolou humei, wute uwai tiꞌo mobani i womboꞌ duniaꞌ.

⁸Uko tiꞌo nopolohoꞌ womo hambaꞌa tinti kokou to hingkiꞌ nopampeꞌelei, ba mengkohoumoreꞌi uwai tiꞌo ka womboꞌ duniaꞌ.

⁹Angkana tinti kokou tiꞌo hawaꞌi pahua pengkotoꞌuana kapuꞌna, katoꞌo mahuliꞌ pe hi Nohoꞌ pe lali duanga tiꞌo, alaꞌ humalekiꞌna duniaꞌ uwaꞌ tene uwai. Katoꞌo hi Nohoꞌ motando korawena, mopangku tinti tiꞌo nokahi pe lali duanga.

¹⁰Io mampeꞌoꞌoki pitu ando tene, honiꞌi nopolohoꞌ womo tinti kokou tiꞌo ka duanga.

¹¹Ikohingkiꞌ kononewanamo, mahuliꞌmo tinti kokou tiꞌo pe hi Nohoꞌ, mampotio taweꞌna saitu to wolaꞌ. Katoꞌomola nobahaꞌi hi Nohoꞌ koꞌuntunamo uwai ka womboꞌ duniaꞌ.

¹²Katoꞌo, nopeꞌoꞌoki pitu ando womo, katoꞌo nopolohoꞌ womo tinti kokou tiꞌo, angkana tinti tiꞌo hamboaꞌi mahuliꞌ pe io.

¹³I tempona hi Nohoꞌ moꞌumuruꞌ 601 ntoꞌa, i wula ka isaꞌ, i ando kaꞌisaꞌ wula tiꞌo, ohimo uwai tiꞌo ka womboꞌ duniaꞌ. Katoꞌo hi Nohoꞌ moweaꞌmo powitina duanga tiꞌo hei meꞌoꞌele-ele, ohimo mpuꞌu uwai tiꞌo ka womboꞌ duniaꞌ.

¹⁴I lali wula kadua, i ando to korompuluꞌ pitu wula tiꞌo, mobanimo woiꞌ tiꞌo.

¹⁵Katoꞌo, mohawaꞌmo Pueꞌ Ala pe hi Nohoꞌ Notiꞌi,

¹⁶“Memolomoko ka lali duanga tiꞌo, moꞌawa-awa hante hantambimu hei anaꞌ-anaꞌmu hante hantambira,

¹⁷hei hinangkana pinatuwuꞌ to moꞌawa-awa hante ingko, hinangkana to tuwuꞌ, tinti-tinti, hinangkana pinatuwuꞌ to mendae i duniaꞌ, ipopesuwumohi moꞌawa-awa hante ingko, hingkeꞌna lekiꞌna tiꞌo kolopengkaduiꞌa i duniaꞌ hei memuleꞌ koworiꞌ-woriꞌa.”

¹⁸Katoꞌo, mesuwumo hi Nohoꞌ moꞌawa-awa hante hantambina hei anaꞌ-anaꞌna hante hantambina anaꞌ-anaꞌnahi.

¹⁹Hinangkana pinatuwuꞌ to moꞌilo, hinangkana pinatuwuꞌ to mendae hei hinangkana tinti, lekiꞌna to mengkaduiꞌ i duniaꞌ, hori-hori motuntuni langkaꞌna, mesuwumo woꞌo ka duanga tiꞌo.

²⁰Uko tiꞌo hi Nohoꞌ mowali potutua popenomba pe PUEꞋ Ala. Ka hinangkana pinatuwuꞌ to niꞌoka hei ka hinangkana tinti to niꞌoka noroamo haꞌumbora mbaꞌa, katoꞌo nopopenomba popenomba to nitutu i womboꞌ peꞌohaꞌa popenomba tiꞌo.

²¹Ikonorokinalu PUEꞋ Alaꞌ popenomba to mewowau tiꞌo, notiꞌi PUEꞋ Ala i lalina, “HamboaꞌmoꞌA hingkiꞌ motundaꞌ duniaꞌ alaꞌ manusiaꞌ, kehapoꞌi to nopopesuwu ka lalina iomo to kodake mepongka ka kokokiuꞌana, hei Aku hamboaꞌmoꞌA hingkiꞌ mamporopuꞌ hinangkana to tuwuꞌ hibali to Kuwalimo.

²²Ikoꞌuwaꞌanalu tene duniaꞌ hieꞌe, hingkiꞌ uwaꞌ nturusi tempo mohawori ba moruruꞌ wuaꞌ, tempo mepoholeꞌ ba molaho, tempo pokoꞌando ba pokoꞌura, ando hei wini.”