Read Rampi Pewaliana 9 Bible Online

Pewaliana 9 - Rampi bible

Pewaliana 9

¹Pueꞌ Ala mobarakati hi Nohoꞌ hante anaꞌ-anaꞌnahi, hei mohawaꞌ pe iohi Notiꞌi, “Memuleꞌmokei hei ibuhoꞌimokei duniaꞌ.

²Hingkiꞌ motehuꞌhi pe ingko hinangkana pinatuwuꞌ to i duniaꞌ, tinti to i raoha, hei to mengkaduiꞌ i womboꞌ duniaꞌ hei lekiꞌna bouꞌ i tahiꞌ, lekiꞌna tiꞌo Kupepaꞌaniki pe ingko hei ikuasaꞌi.

³Hinangkana to mengkaduiꞌ, to tuwuꞌ, wadi iꞌoka. Kupeweimo mampopihana tiꞌo pe ingko hibali huꞌa-huꞌa to momataꞌ.

⁴Bauꞌ to meraꞌa tene, inioꞌ iꞌokaꞌi alaꞌ tuwuꞌna uwaꞌ i raꞌana.

⁵I duo-duona toaꞌ hei pinatuwuꞌ to morokoꞌ manusiaꞌ hingkiꞌ Kuhuku mahi.

⁶Himo to mobobo raꞌa manusiaꞌ, hingkiꞌ nobobo woꞌo manusiaꞌ, alaꞌ Pueꞌ Ala mowali manusiaꞌ motuntuni lenteNa hadoduoNa.

⁷Hei ingko, memuleꞌmoko hei tetambai woriꞌ, hingkeꞌna muleꞌmu woriꞌ i duniaꞌ.”

⁸Notiꞌi Pueꞌ Ala pe hi Nohoꞌ hei pe anaꞌnahi, to moꞌawa-awa hante io,

⁹“Hinewoꞌena Aku mampoꞌuwaꞌa podandi hante ingko hei muleꞌmu,

¹⁰hante hinangkana pinatuwuꞌ to tuwuꞌ to moꞌawa-awa hante ingko, tinti-tinti, pinatuwuꞌ to manondoꞌ, hante pinatuwuꞌ-pinatuwuꞌ to moꞌilo i duniaꞌ to moꞌawa-awa hante ingko, hinangkana to mesuwu ka duanga tiꞌo, hinangkana pinatuwuꞌ i duniaꞌ.

¹¹Hieꞌemo podandingKu hante ingko, alaꞌ mepongka hinewowoꞌena hawaꞌi uwaꞌ to tuwuꞌ to hingkiꞌ nolobuꞌi womo uwai, hante hamboaꞌi hingkiꞌ uwaꞌ uwai to hingkiꞌ molobuꞌi duniaꞌ.”

¹²Hei pohawaꞌna Pueꞌ Ala, “Hieꞌemo tandaꞌ podandiKu to Kupoꞌuwaꞌ hante ingko hei hinangkana pinatuwuꞌ to tuwuꞌ, to moꞌawa-awa hante ingko, wute nantolou-louna.

¹³Tantoroꞌue Kupoꞌuwaꞌ i kini, hingkeꞌna tiꞌo mewali tandaꞌ podandi ka Aku hante duniaꞌ.

¹⁴Ane Kupopehupaꞌ intu kini i womboꞌ duniaꞌ, tantoroꞌue hingkiꞌ mombaha i kini,

¹⁵Aku hingkiꞌ mamponindiꞌA podandingKu to uwaꞌmo ka Aku hante ingko hei hinangkana pinatuwuꞌ to tuwuꞌ, hinangkana to meꞌinohaꞌ, horiana lekiꞌna uwai hamboaꞌi mewali uwai to hingkiꞌ molobuꞌi hinangkana to tuwuꞌ.

¹⁶Ane tantoroꞌue tiꞌo uwaꞌ i kini, hingkiꞌ Kuꞌokiꞌ, horiana Kuponindi podandiangKu tota uwaꞌ koꞌukoana ka Aku, Pueꞌ Ala pe lekiꞌna to tuwuꞌ i duniaꞌ.”

¹⁷Mohawaꞌmo Pueꞌ Ala pe hi Nohoꞌ, “Hieꞌemola tanda podandiangKu to Kupoꞌuwaꞌ ka Aku pe ingkei to uwaꞌ i duniaꞌ.”

¹⁸Anaꞌ-anaꞌna hi Nohoꞌ to mesuwu ka duanga iomo hi Sem, hi Ham hante hi Apeꞌ. Hi Ham iomo umoꞌna toKanaꞌa.

¹⁹To totolu hieꞌela anaꞌ-anaꞌna hi Nohoꞌ, iomohi peꞌuluane lekiꞌna toaꞌ i duniaꞌ.

²⁰Hi Nohoꞌ iomo topokineteꞌ, iomo to uluꞌ-uluꞌna mowali kineteꞌ angoroꞌ.

²¹Ikopaꞌinunalu angoroꞌ, malanumo hei io mewula mpahi i lali bambaruꞌna.

²²Hi Ham, umoꞌna toKanaꞌa tiꞌo pangkiꞌ kohiliana umoꞌna, katoꞌo nololita pe roduo halalira i huwali.

²³Uko tiꞌo hi Sem hante hi Apeꞌ morodiꞌ hampepaꞌ wida hei ropehodaki i hindaꞌra meroduo, katoꞌo matengkaꞌhi totundu ako motutuꞌihi kohiliana umoꞌra, hingkeꞌna hawaꞌhi pangkiꞌ kohiliana umoꞌra.

²⁴Ikopohorinalu hi Nohoꞌ ka konolanuana, hei nohori hapo to nowali anaꞌ koꞌukoana pe io,

²⁵io mantiꞌi, “Buntoꞌmo muleꞌma iomo hi Kanaꞌa. Hinamo io mewali hawiꞌ to merima-rima pe halalinahi.”

²⁶Notiꞌi womo, “Tepokodeꞌ PUEꞋ Ala, PUEꞋ Alana hi Sem. Hinamo hi Kanaꞌa mewali hawiꞌna.

²⁷Hinamo Pueꞌ Ala mampokoroba peꞌohaꞌana hi Apeꞌ. Hei hinamo io meꞌohaꞌ i bambaruꞌ-bambaruꞌna hi Sem. Angkana hi Kanaꞌa hingkiꞌ mewali hawiꞌna.”

²⁸Hi Nohoꞌ tuwuꞌ tene 350 ntoꞌa uko duniaꞌ nolobuꞌi uwai.

²⁹Mewaliꞌ tinuwuꞌna hi Nohoꞌ 950 ntoꞌa, katoꞌo io mahi.