Read Rampi Matius 10 Bible Online

Matius 10 - Rampi bible

Matius 10

¹Hi Yesu mowowoi topeguruNa to hampuluꞌ meroduo, hei Nopaꞌanihi kuasaꞌ mampopolai tokodake hante mampokoꞌoriꞌ lekiꞌ-lekiꞌna toaꞌ to molangkaꞌ-langkaꞌ hakiꞌna hei to hawaꞌi manihoiꞌ wotara.

²Hieꞌemo konaꞌre to mewali surona hi Yesu to hampuluꞌ meroduo: hi Simo to nitiꞌi woꞌo hi Peturuꞌ; hi Andaria hineeꞌna hi Simo, hi Yakobus anaꞌna hi Sebedeu, hi Yohanes hineeꞌna hi Yakobus, hi Pilipu, hi Bartolomeu, hi Tomas, hante hi Matius toperuruꞌ sima, hi Yakobus anaꞌna hi Alpeu, hi Tadeu, hi Simo to ka paratei Selo, hei hi Yudas Iskarioꞌ to hingkiꞌ mampobaluꞌ hi Yesu pe poniꞌNa.

⁵Hi Yesu morumbaꞌ suroNa to hampuluꞌ meroduo nolou mampowute Kareba Moromiꞌ. Ikohandoaꞌara molai, Notiꞌikihi waheꞌe: “Inioꞌkei nolou pe bolaꞌra to handoꞌiohi toYahudi, hante pe bolaꞌra toSamaria.

⁶Angkana noloumokei duluna pe hangko toSaraelinta, alaꞌ iohi hibalihi gimba to moholi.

⁷Ipowutekikei waheꞌe: ‘Hamboaꞌmo morue Pueꞌ Ala hingkiꞌ moparenta i duniaꞌ.’[14]

⁸Ipokoꞌoriꞌkei toaꞌ to mohakiꞌ, ipatuwuꞌkei toaꞌ to mahi, ipokoꞌoriꞌkei toaꞌ tokusta, ipopolaikei tokodake to mampekahi toaꞌ. Lekiꞌ-lekiꞌna pebarakati tiꞌo nopaꞌanikikei ntooꞌ Pueꞌ Ala. Mewaliꞌ, hangangaa ipepaꞌanikikei woꞌo ntooꞌ pebarakati to uwaꞌ i ingkei.

⁹Inioꞌkei mangkomi doiꞌ bulawa, doiꞌ peraꞌ ba doiꞌ see.

¹⁰Inioꞌkei mebaku, inioꞌkei mangkomi baduꞌ pempohawami ba sapatuꞌ ba lolaiꞌ, alaꞌ masipatoꞌkei pahua koparaluꞌami ka toaꞌ to isulungikei.

¹¹Ane hupaꞌkei i haꞌanu bolaꞌ, ipaliꞌkei toaꞌ to popuhiꞌ lalire mantorimokei i lali tambira. Meꞌohaꞌmokei itoꞌo wutekei molai pe bolaꞌ to ntaniꞌna.

¹²Ane mekahikei pe lali tambira, metabeꞌkei, waheꞌe: ‘Romiꞌ ngkotuwuꞌ to ka Pueꞌ Ala moꞌowonikei!’

¹³Ane popuhiꞌ lalire tumpu tambi mantorimokei, hingkiꞌ nobarakatihi Pueꞌ Ala. Angkana ane hawaꞌkei rotorimo, hawaꞌhi hingkiꞌ pahua pebarakati ka Pueꞌ hei pebarakati to itiꞌikei mewali dolaꞌmi.

¹⁴Ane uwaꞌ tumpu tambi ba tumpu bolaꞌ to hawaꞌi mantorimokei ba to hawaꞌi palei mampehoromua poturuꞌmi, ipolihikei tambi ba bolaꞌ tiꞌo, hei ikuntakei awu to medokiꞌ i palaꞌ kapuꞌmi. Tiꞌo mopalaiha ihohamokei tumpu bolaꞌ tiꞌo.

¹⁵Tuꞌu mpololeke to Kutiꞌikikei: i ando pobutusi i kotutuana duniaꞌ, hingkiꞌ meliu pehukune Pueꞌ Ala pe tumpu bolaꞌ to hawaꞌi mantorimokei tiꞌo ka konihukura lekiꞌ-lekiꞌna toSodomo hante toGomora hampiha.”

¹⁶“Kurumbaꞌkei nolou pe lumbura toaꞌ to kodake waliana. Ingkei hibalikei gimba i lumbura serigala. Hangangaa pobobahaꞌkei hibali ule, hei pambiarami hangangaa moromiꞌ hibali merpati.

¹⁷Majaga-jagakei, alaꞌ hingkiꞌ nihokiꞌkei hei nikomikei nolou pe topobutusi agama. Hingkiꞌ nikondokei i lali tambi penombahara toYahudi.

¹⁸Nokomi petuntumi pe Aku, hingkiꞌ nipeweikei pe hinarora topoparenta hante pe hinarora datu-datu. Mewaliꞌ tiꞌomo tempomi mampowute Kareba Moromiꞌ i hinarora topoparenta hante pe toaꞌ to hawaꞌhi pobahaꞌ Pueꞌ Ala.

¹⁹Mewaliꞌ ane nikomikei nolou pe hinarora topoparenta, inioꞌkei komomaꞌa noniuꞌ hapo ba hohumbo pehoniꞌmi, alaꞌ i tempo tiꞌo pehoniꞌmi hingkiꞌ nopomombaha Pueꞌ Ala pe ingkei.

²⁰Alaꞌ hapo to hingkiꞌ itiꞌikei handoꞌio ka pekirimi, angkana ka Inohaꞌ Mangkolehi to Nopaꞌanikikei Umoꞌmi to i suruga.

²¹Hingkiꞌ hupaꞌ tempone toaꞌ hingkiꞌ mampewei halalira ba anaꞌra hingkeꞌna nirokoꞌi. Hingkiꞌ uwaꞌ oꞌanaꞌ to moꞌewa tomotodira hei ropewei hingkeꞌna nirokoꞌi.

²²Hingkiꞌ nokabiriꞌkei lekiꞌ-lekiꞌna toaꞌ nokomi petuntumi pe Aku. Angkana toaꞌ to mantaha wute i koꞌukoana hingkiꞌ niposalamaꞌ.

²³Ane nipoperima-rimakei i haꞌanu bolaꞌ, molaikei nolou pe habolaꞌna. Tuꞌu mpololeke to Kutiꞌikikei: handoaꞌkei tene uko mampowute Kareba Moromiꞌ i humanele woiꞌra toSaraeli, Anaꞌ Manusiaꞌ mehupaꞌmo.

²⁴Tomeguru hawaꞌi meliu koniꞌadaꞌine ka guruna. Hawiꞌ hawaꞌi meliu koniꞌadaꞌine ka tuana.

²⁵Ganaꞌmo haduo to meguru ane hibalimoꞌi guruna, hatoꞌo woꞌo haduo hawiꞌ ganaꞌmo ane hibalimoꞌi tuana. Mewaliꞌ, ane rapaꞌna Aku nitiꞌi Belsebul, datura lekiꞌ-lekiꞌna tokodake, hapo tene ingkei to metuntu pe Aku, hingkiꞌ nisalaꞌikei woꞌo.”

²⁶“Angkana kehapoꞌi uwaꞌ to moꞌewakei, inioꞌkei morokaꞌ, alaꞌ lekiꞌ-lekiꞌna pepoturuꞌKu to tewuni tene, bateꞌna hingkiꞌ mombaha. Hei lekiꞌ-lekiꞌna lolitangKu to tewuni bateꞌna hingkiꞌ tongawa.

²⁷Hei hapo to Kutiꞌikikei to handoaꞌi tene rohori toaꞌ ntaniꞌna, hangangaa ipololitakei pe lekiꞌ-lekiꞌna toaꞌ. Hapo to Kupoturuꞌkikei wowuni, hangangaa ipomombahamokei pe iohi.

²⁸Inioꞌkei mangkorokaꞌ toaꞌ to dokoꞌhi morokoꞌkei, alaꞌ wotalu to wadi nirokoꞌ, angkana hawaꞌhi makuasaꞌ morokoꞌ tanuanaꞌmi. To hangangaa ikorokaꞌkei iomo Pueꞌ Ala, alaꞌ Io to makuasaꞌ motube wotami hante tanuanaꞌmi pe lali naraka.

²⁹Ele tinti deno. Rombaꞌa nihililu hampepaꞌ doiꞌ see. Angkana kehapoꞌi hatoꞌo, hawaꞌi uwaꞌ hambaꞌa to mahi ane handoꞌio peleihana Pueꞌ Ala Umoꞌmi.

³⁰Hapo tene ingkei. Hingkoweꞌ wilolumi, nobahaꞌ Pueꞌ Ala koworiꞌne.

³¹Mewaliꞌ, inioꞌkei motehuꞌ pe toaꞌ to moꞌewakei. Meliu tene perewahine Pueꞌ Ala pe ingkei ka tinti deno to woriꞌ.

³²Hihimo to mampangakuꞌ petuntuna pe Aku i hinarona toaꞌ ntaniꞌ, Aku woꞌo hingkiꞌ mampangakuꞌi i hinarona UmoꞌKu i suruga.

³³Angkana himo to mosapuaka petuntuna pe Aku i hinarona toaꞌ ntaniꞌna, Aku woꞌo hingkiꞌ mosapuakaꞌi i hinarona UmoꞌKu i suruga.”

³⁴“Inioꞌ itiꞌikei kohumeingKu hieꞌe hingkeꞌna mampohaꞌanu toaꞌ i duniaꞌ. Hawaꞌi! KohumeingKu hieꞌe mangkomi posisalaꞌ i lumbuna toaꞌ.

³⁵Nokomi kohumeingKu hieꞌe, toaꞌ to hantambi hingkiꞌ mosisalaꞌ, alaꞌ hantenaꞌ hingkiꞌ metuntu pe Aku, angkana hantenaꞌ hawaꞌi. Anaꞌ tomaꞌani hingkiꞌ moꞌewa umoꞌna, anaꞌ towoweꞌe hingkiꞌ moꞌewa inoꞌna, moniana hingkiꞌ moꞌewa ponianana.

³⁷Hihimo to meloliu pepokarimane i inoꞌna ba i umoꞌna hintina mampokarima Aku, hawaꞌi masipatoꞌ mewali topetuntuKu. Hihimo to meliu pampokarimane anaꞌna hintina mampokarima Aku, hawaꞌi masipatoꞌ metuntu i Aku.

³⁸Hihimo to hawaꞌi mantaha i lali komaporiꞌ wute mahi nokomi petuntuna pe Aku, hawaꞌi masipatoꞌ mewali topetuntuKu.

³⁹Angkana hihimo to mampohinte peleihana hadoduona hei metuntu pe Aku kehapoꞌi nirokoꞌ, iomo to hingkiꞌ pahua kotuwuꞌ to wolaꞌ to hawaꞌi mokoꞌukoa. Hihimo to mampetuntui peleihana hadoduona, hawaꞌi hingkiꞌ pahua kotuwuꞌ to wolaꞌ to hawaꞌi mokoꞌukoa.

⁴⁰Hihimo to mantorimokei, hibalimo Aku to notorimo hei hihimo to mantorimoꞌA, hibalimo mantorimo Pueꞌ Ala to morumbaꞌA humei.

⁴¹Hihimo to mantorimo haduo nabi, alaꞌ nobahaꞌi konabine, io hingkiꞌ pahua howonina to hibali nabi. Hihimo to mantorimo moromiꞌ haduo toaꞌ to moromiꞌ i pampeꞌelena Pueꞌ Ala, io hingkiꞌ pahua howonina hibali toaꞌ to moromiꞌ.

⁴²Hihimo to mampaꞌani maꞌinu haduo to i wowoiꞌ tuwuꞌna kehapoꞌi uwai ntooꞌlu, alaꞌ to i wowoiꞌ kotuwuꞌna tiꞌo to metuntu pe Aku, hingkiꞌ pahua howonina i ando to hingkiꞌ hupaꞌ.”