Read Rampi Matius 13 Bible Online

Matius 13 - Rampi bible

Matius 13

¹I ando tiꞌo woꞌo, molaimo hi Yesu ka tambi nolou mahura pe bota rano Galilea.

²Woriꞌ mpololeke toaꞌ nolou motuleliꞌiꞌI, iomo horiana Io ako mehendeꞌ pe duanga honiꞌi mahura. Toaꞌ to woriꞌ tiꞌo metotiꞌihi i bota rano,

³katoꞌo hi Yesu mampowutekihi woriꞌ langkaꞌ poturuꞌ moliu pandiriꞌ. Notiꞌi, “Hampiha tempo, uwaꞌ haduo topokineteꞌ to nolou mohawori.

⁴I tempona mohawori, uwaꞌ howoria to monawuꞌ i woiꞌ to morintodi to nopolalai toaꞌ. Hupaꞌ tinti mabingku howoria tiꞌo wute uko.

⁵Uwaꞌ woꞌo howoria to monawuꞌ i woiꞌ to manonipaꞌ alaꞌ mowatuꞌi i luaꞌne. Howoria tiꞌo magasiꞌ kotuwuꞌne alaꞌ manonipaꞌi woiꞌne.

⁶Angkana ikonowantanalu ando, molau wute bani, alaꞌ hawaꞌi kuladu wakaꞌne.

⁷Uwaꞌ woꞌo howoria to monawuꞌ i lali rui. Howoria tiꞌo tuwuꞌ moꞌawa hante rui, koꞌukoana noputuꞌ rui wute mahi.

⁸Angkana uwaꞌ woꞌo howoria to monawuꞌ i woiꞌ to molompoꞌ, tuwuꞌ moromiꞌ horiana mowuaꞌ. Uwaꞌ to hanatu mpiha koworiꞌna ka howoriana, uwaꞌ to oni mpuluꞌ mpiha, hei uwaꞌ woꞌo to tolu mpuluꞌ mpiha.”

⁹Uko mampowute pandiriꞌ tiꞌo, hi Yesu mampatiꞌikihi, “Moromiꞌ mpololeke ane ipoꞌilalikei hapo to ihorimokei!”

¹⁰Hupaꞌmohi topeguruNe, hei haduo ka lumbura meꞌitano pe hi Yesu, notiꞌi, “Guru, hapo tungkaihaMa mampoturuꞌ toaꞌ to woriꞌ moliu pandiriꞌ?”

¹¹Nohoniꞌ hi Yesu, “Hampiha, tewowuni tene poturuꞌ noniuꞌ i poparentana Pueꞌ Ala. Angkana hinewowoꞌena nopaꞌanimokei Pueꞌ Ala pekiri hingkeꞌna ibahaꞌkei palaihane poturuꞌ tiꞌo. Ane toaꞌ to woriꞌ, hawaꞌhi nopaꞌani Pueꞌ Ala pekiri noniuꞌ palaihana poturuꞌ tiꞌo.

¹²Angkana toaꞌ to mangkodokoꞌi pobahaꞌ peleihana Pueꞌ Ala, hingkiꞌ tetambai pebahaꞌre wute robahaꞌ mpololeke. Angkana toaꞌ to hawaꞌhi mangkodokoꞌi pobahaꞌ peleihana Pueꞌ Ala, kehapoꞌi robahaꞌmo hangkiuꞌ, bateꞌna hawaꞌi modumbuꞌ alaꞌ hingkiꞌ niroa huliꞌ.

¹³Iomo horiana mopakeꞌA pandiriꞌ ane mampoturuꞌA toaꞌ to woriꞌ, alaꞌ: ‘Roꞌokiꞌlu angkana hawaꞌi robahaꞌ hapo palaihane to roꞌokiꞌ. Rohorilu angkana hawaꞌi robahaꞌ tungkaihane hapo to ropehoromua.’

¹⁴To rowali toaꞌ hinewowoꞌena mobuhoꞌi hapo to nopowute nabi Yesaia hampiha to mantiꞌi waheꞌe: ‘Hingkiꞌ iꞌokiꞌkei, angkana hawaꞌi hingkiꞌ ibahaꞌkei hapo to mewali. Hingkiꞌ ihorikei, angkana hawaꞌi hingkiꞌ ibahaꞌkei palaihane hapo to ihorikei,

¹⁵alaꞌ lalimi morintodimo, tolinami itutuꞌikei hei matami ipiriꞌkei. Iwalikei hatoꞌo hingkeꞌna hawaꞌkei pangkiꞌ hapo to Kuwali, hawaꞌkei mampehoromua lolitangKu, hei lalimi hawaꞌi pobahaꞌ. Ane iwalikei hatoꞌo hawaꞌkei hingkiꞌ mahuliꞌ pe Aku, hei hawaꞌkei hingkiꞌ Kuposalamaꞌ.’ ” [20]

¹⁶Nopololiu womo hi Yesu lolitaNe pe topeguruNahi, Notiꞌi, “Angkana ingkei, morasiꞌmokei mpololeke, alaꞌ iꞌokiꞌmokei hapo to Kuwali hei ipehoromuamokei poturuꞌKa.

¹⁷Tuꞌu mpololeke to Kutiꞌikikei: hampiha uwaꞌhi woriꞌ nabi hante toaꞌ to moromiꞌ i pampeꞌelena Pueꞌ to mangkodokoꞌihi pangkiꞌ hapo to iꞌokiꞌkei i tempo hieꞌe, angkana hawaꞌi roꞌokiꞌ. Mangkodokoꞌihi mpololeke mampehoromua hapo to ihorikei hinewowoꞌena angkana hawaꞌi rohori.”

¹⁸“Ipehoromuakei! Kutiꞌikikei hapo palaihane pandiriꞌ topokineteꞌ tiꞌo.

¹⁹Woiꞌ to morintodi nipandiriꞌ toaꞌ to mampehoromua mpololeke Pohawaꞌna Pueꞌ Ala noniuꞌ hohumbo poparentaNa, angkana hawaꞌi robahaꞌ palaihane. Hupaꞌmo Belisiꞌ morompoꞌi Pohawaꞌna Pueꞌ Ala tiꞌo ka lalira.

²⁰Woiꞌ to mowatu nipandiriꞌ toaꞌ to mampehoromua Pohawaꞌna Pueꞌ Ala, hei tuꞌu-tuꞌu motanaꞌ lalira mampehoromua.

²¹Angkana hawaꞌi moꞌuwakaꞌ Pohawaꞌne Pueꞌ Ala i lalira, iomo horiana hawaꞌhi mantaha. I tempora nipoperima-rimahi ba nipomaporiꞌhi nokomi pepoꞌohira i Pohawaꞌna Pueꞌ, hingkiꞌ hohiꞌhi maꞌoruꞌ ka pepoꞌohira.

²²Woiꞌ to kedui, nipandiriꞌ toaꞌ to mampehoromua Pohawaꞌna Pueꞌ Ala, angkana mampekiriluhi kotuwuꞌra i duniaꞌ, hei mangkodokoꞌiluhi morampu luma poduniaꞌ. Iomo horiana rokolembulihaki Pohawaꞌne Pueꞌ Ala, hei hawaꞌi modumbuꞌ i lali kotuwuꞌra.

²³Woiꞌ to molompoꞌ, nipandiriꞌ toaꞌ to mampehoromua hei mampoꞌilali Pohawaꞌna Pueꞌ Ala. I toaꞌ tiꞌo, Pohawaꞌna Pueꞌ Ala mowuaꞌ. Uwaꞌ to mowuaꞌ hanatu mpiha ka howoriana, uwaꞌ to mowuaꞌ oni mpuluꞌ mpiha ka howoriana, hei uwaꞌ woꞌo to mowuaꞌ tolu mpuluꞌ mpiha ka howoriana.”

²⁴Nopowute womo hi Yesu halangkaꞌ pandiriꞌ i toaꞌ to woriꞌ, Notiꞌi, “Poparentana Pueꞌ Ala hibali pandiriꞌ hieꞌe: haduo tumpu kineteꞌ morumbaꞌ toaꞌna nolou mohawori tinudaꞌ to moromiꞌ i kineteꞌna.

²⁵I halumbu wini, kolentuꞌara leꞌo, hupaꞌmo poniꞌne tumpu kineteꞌ tiꞌo mohawori wowuni wuaꞌ donaꞌ i kineteꞌ tiꞌo, honiꞌi molai.

²⁶Tuwuꞌmo mpuꞌu kina tiꞌo moꞌawa hante donaꞌ wutehi mowuaꞌ, honiꞌi robahaꞌ koꞌuwaꞌne donaꞌ.

²⁷Mewaliꞌ noloumohi topajamane mampatiꞌiki tumpu kineteꞌ tiꞌo, ‘Tua, handoꞌioreꞌi howoria to moromiꞌ to ihaworio? Ka imboreꞌi humei donaꞌ tiꞌo?’

²⁸Nohoniꞌ tumpu kineteꞌ, ‘Tiꞌo bateꞌna to nowali poniꞌku.’ Katoꞌo, rotiꞌi womo topajamane, ‘Ane hatoꞌoꞌi, hohumbo ane nolouka mowutu donaꞌ to tuwuꞌ moꞌawa hante kina tiꞌo?’

²⁹Nohoniꞌ tumpu kineteꞌ, ‘Inioꞌ, alaꞌ ane iwutukei donaꞌne, hingkiꞌ mowutu woꞌo kinane.

³⁰Itedehimolukei tuwuꞌ moꞌawa hante kina, wute hupaꞌ tempona mekina. I tempo tiꞌo, hingkiꞌ kurumbaꞌhi topekina mowutu duluna donaꞌ tiꞌo, rorampu, hei rohiluꞌ honiꞌi nihunu. Uko tiꞌo, honiꞌi rorampu wae kinane, honiꞌi roporia i lali buhoꞌ.’ ”

³¹Uko tiꞌo, hi Yesu mampowute womo halangkaꞌ pandiriꞌ pe toaꞌ to woriꞌ, Notiꞌi, “Poparentana Pueꞌ Ala wadi nipandiriꞌ hibali howoria sesawi to mororoi mpololeke. Uwaꞌ to mohawori howoria tiꞌo i kineteꞌna.

³²Howoria tiꞌo makaja mpololeke komororoine ka lekiꞌ-lekiꞌna howoria to uwaꞌ i duniaꞌ. Angkana ane nihaworiꞌi hingkiꞌ tuwuꞌ hei dingkaoꞌ ka huꞌa-huꞌa ntaniꞌna. Tuwuꞌ mewali mapongko, hei daꞌana nopehorai tinti.”

³³Uwaꞌ womo halangkaꞌ pandiriꞌ to Nopowute pe toaꞌ to woriꞌ, Notiꞌi, “Poparentana Pueꞌ Ala hibali ragiꞌ to nopakeꞌ towoweꞌe mokalo tinampu to woriꞌ. Ragiꞌ tiꞌo, kehapoꞌi hangkiuꞌlu, wadi mampopembiaꞌ lekiꞌ-lekiꞌna tinampu to nilaboꞌ.”

³⁴Ane hi Yesu mampoturuꞌ toaꞌ to woriꞌ, poko mopakeꞌ pandiriꞌ.

³⁵Mewaliꞌ, tebuhoꞌimo lolita hieꞌe to noꞌukiꞌ haduo nabi hampiha: “Hingkiꞌ Kupoturuꞌhi moliu pandiriꞌ. Hingkiꞌ Kupowutekihi poturuꞌ to tewowuni mepongka i pewaliana duniaꞌ.” [21]

³⁶Uko tiꞌo, hi Yesu mampolihi toaꞌ to woriꞌ hei nolou mekahi pe lali tambi. Noloumohi topeguruNe mangkododungkuiꞌI, rotiꞌi, “Guru, Itiꞌikika hapo palaihane pandiriꞌ donaꞌ to i lumbuna kina.”

³⁷Nohoniꞌ hi Yesu, “Tumpu kineteꞌ to mohawori tinudaꞌ to moromiꞌ, palaihana Anaꞌ Manusiaꞌ.

³⁸Kineteꞌ, palaihana duniaꞌ hieꞌe. Tinudaꞌ to moromiꞌ, palaihana toaꞌ to mewalimohi anaꞌna Pueꞌ Ala i lali PoparentaNa. Donaꞌ, palaihana toaꞌ to metuntu pe Belisiꞌ.

³⁹Poniꞌna tumpu kineteꞌ to mohawori donaꞌ, iomo Belisiꞌ. Tempo mekina, palaihana ando pobutusi i kotutuana duniaꞌ. Hei topekina, palaihana malaꞌeka.

⁴⁰Hibali donaꞌ rorampu hei nihunu, hatoꞌo woꞌo to hingkiꞌ mewali i ando pobutusi i kotutuana duniaꞌ.

⁴¹Anaꞌ Manusiaꞌ hingkiꞌ morumbaꞌ malaꞌekaNa nolou morampu lekiꞌ-lekiꞌna to mepomonawuꞌ hei toaꞌ to kodake ka lumbura toaꞌNa.

⁴²Lekiꞌ-lekiꞌna toaꞌ tiꞌo hingkiꞌ nitubehi pe lali api to mamua nturusi. Itoꞌo, hingkiꞌ meꞌolahi nturusi hei maporiꞌ mpololeke rohori.

⁴³Angkana toaꞌ to moromiꞌ i pampeꞌelena Pueꞌ, hingkiꞌ mewantahi hibali ando i lali poparentana Pueꞌ Ala Umoꞌra. Moromiꞌ mpololeke ane ipoꞌilalikei hapo to ihorimokei!”

⁴⁴Notiꞌi hi Yesu, “Poparentana Pueꞌ Ala hibali bulawa to tetawu i lali woiꞌ, nohua haduo toaꞌ, hei kaliuꞌ notawu huliꞌ honiꞌi mahuliꞌ. Nokomi komotanaꞌna, liu ako mampobaluꞌ lekiꞌ-lekiꞌna lumana, honiꞌi nopopehili woiꞌ ikoꞌuwaꞌana bulawa tiꞌo.

⁴⁵Hatoꞌo woꞌo, poparentana Pueꞌ Ala hibali pandiri' hieꞌe: Uwaꞌ haduo topobaluꞌ-baluꞌ to mampaliꞌ mutiara to moromiꞌ mpololeke.

⁴⁶Konohuanalu haꞌanu mutiara to masuliꞌ mpololeke hilina, liu ako mampobaluꞌ lekiꞌ-lekiꞌna lumana, honiꞌi nopopehili mutiara tiꞌo.”

⁴⁷“Poparentana Pueꞌ Ala hibali jalaꞌ to koroba nipelubaꞌ pe lali rano. Woriꞌ langkaꞌ bouꞌ mekahi pe lali jalaꞌ tiꞌo.

⁴⁸Ikobuhaꞌnalu jalaꞌne tiꞌo, noꞌoreꞌmo pe lorina, honiꞌi topojalaꞌ mahuramohi moꞌuwiꞌ bouꞌ. To moromiꞌ roporia i pamporideꞌana, to hawaꞌi moromiꞌ rotube.

⁴⁹Hatoꞌo woꞌo i ando pobutusi i kotutuana duniaꞌ: malaꞌeka hingkiꞌ nolouhi mampohida toaꞌ to kodake lalira hante toaꞌ to moromiꞌ i pampeꞌelena Pueꞌ Ala.

⁵⁰Toaꞌ to kodake lalira hingkiꞌ nitube pe lali api to mamua nturusi. Itoꞌo, hingkiꞌ meꞌolahi nturusi hei maporiꞌ mpololeke rohori.”

⁵¹Uko tiꞌo, hi Yesu meꞌitano pe topeguruNahi, Notiꞌi, “Ba ibahaꞌkei palaihane lekiꞌ-lekiꞌna pandiriꞌ to Kupowutekikei hingkenia?” Rohoniꞌ, “Kibahaꞌlu.”

⁵²Katoꞌo, Notiꞌiki womohi, “Ane hatoꞌoꞌi, moromiꞌ. Mewaliꞌ, hingkiꞌ ibahaꞌkei woꞌo palaihane pandiriꞌ hieꞌe: lekiꞌ-lekiꞌna guru-guru agama to pobahaꞌ palaihana noniuꞌ poparentana Pueꞌ Ala, wadi nipandiriꞌ hibali tumpu tambi to mampasuwu luma to hohai hante luma to wolaꞌ ka pamporiahana.”[22]

⁵³Koꞌukona hi Yesu mampowute lekiꞌ-lekiꞌna pandiriꞌ tiꞌo, Io molaimo katoꞌo,

⁵⁴nolou pe bolaꞌNa i Nasareꞌ. Itoꞌo hi Yesu mampoturuꞌ toaꞌ i tambi penombahara toYahudi. Lemeniahi toaꞌ to mampehoromua lolitaNa, hei mometenei-teneihi, “Himoreꞌito to mampoturuꞌ toaꞌ hieꞌe horiana hatoꞌo kopobahaꞌNe? Hei himo to mampaꞌaniꞌI kuasaꞌ mowali tandaꞌ kuasaꞌ to mepohele?

⁵⁵To tobahaꞌlu Io anaꞌnalu basi. InoꞌNa hi Maria. Hei halaliNahi: hi Yakobus, hi Yusuf, hi Simo hante hi Yudas.

⁵⁶HalaliNahi towoweꞌe meꞌohaꞌhi woꞌo moꞌawa ingkiꞌ iseꞌe. Hohumbo horiana uwaꞌ kuasaꞌNe mepoturuꞌ hei mowali tandaꞌ kuasaꞌ to mepohele?”

⁵⁷Iomo horiana hawaꞌhi hiniꞌ mampoꞌohi hi Yesu. Katoꞌo, notiꞌikihi hi Yesu, “Haduo nabi niꞌadaꞌi i imbolu koꞌakoana, angkana ane i bolaꞌnaꞌi hadoduona ba i tambina, hawaꞌi niꞌadaꞌi.”

⁵⁸Iomo horiana hi Yesu hawaꞌi mowali woriꞌ tandaꞌ kuasaꞌ i bolaꞌNa, alaꞌ hawaꞌhi mepoꞌohi pe Io.