Read Rampi Matius 14 Bible Online

Matius 14 - Rampi bible

Matius 14

¹I tempo tiꞌo, to meparenta i woiꞌ Galilea iomo datu Herode Antipa. Nohori datu Herode hapo to nowali hi Yesu,

²iomo horiana notiꞌikihi topajamana, “Hi Yesu iomo hi Yohanes Toperiu to tuwuꞌ huliꞌ ka komahia, iomo horiana Nobiaꞌ mowali tandaꞌ kuasaꞌ to mepohele!”

³Hieꞌemo lolitonane komahina hi Yohanes Toperiu. Datu Herode mobualosi hi Pilipu halalina, alaꞌ moroaꞌi hi Herodia nopohantambi. Hi Herodia tiꞌo iomo hantambina hi Pilipu. Woriꞌ mpiha hi Yohanes mokamoroki datu Herode noniuꞌ waliana tiꞌo, notiꞌiki, “Hawaꞌko wadi moroa hantambina halalimu mewali hantambimu, alaꞌ waliamu tiꞌo molungkaꞌi Hawaꞌna hi Musa!” Iomo horiana norumbaꞌ datu Herode surodadune nolou mohokiꞌ hi Yohanes, nihiluꞌ hei rokahi pe lali petarungkuꞌa.

⁵Kotuꞌuana, nokodokoꞌi datu Herode hingkiꞌ morokoꞌ hi Yohanes, angkana mangkorokaꞌ toaꞌ to woriꞌ, alaꞌ rotiꞌi hi Yohanes haduo nabi.

⁶I tempona datu Herode mampoꞌuwaꞌ susaꞌ pangkolowoina ando konipoꞌanaꞌkina, anaꞌna hi Herodia towoweꞌe monariꞌ i hinarora tolori. Motanaꞌ mpololeke datu Herode mampeꞌele ponariꞌna.

⁷Nokomi komotanaꞌna, io mampoꞌuwaꞌ dandi pe anaꞌntowowalo tiꞌo, notiꞌi, “Hapolu to iperapiꞌ, hingkiꞌ kupaꞌanikiko!”

⁸Konohorina hi Herodia dandine, io morumbaꞌ anaꞌna hingkeꞌna merapiꞌi tutuꞌna hi Yohanes Toperiu. Mewaliꞌ, notiꞌi anaꞌntowowalo tiꞌo pe datu Herode, “To kuperapiꞌ, tutuꞌna hi Yohanes Toperiu roporia i kaparaꞌ, rokomi humei pe aku!”

⁹Konohorina datu Herode perapiꞌne tiꞌo, masusa laline. Angkana alaꞌ tabuluꞌ nodandimoꞌi i hinarona tolorina, iomo horiana nopeparentaikimo datu Herode hingkeꞌna perapiꞌna anaꞌntowowalo tiꞌo nopobuhoꞌi.

¹⁰Norumbaꞌmo surodadune nolou pe lali petarungkuꞌa mobokuꞌ dokoꞌna hi Yohanes.

¹¹Mewaliꞌ noloumohi surodadu mobokuꞌ dokoꞌna, horiana tutuꞌna roporia i kaparaꞌ, rokomi nolou pe anaꞌntowowalo tiꞌo, honiꞌi anaꞌntowowalo tiꞌo mangkomi nolou pe hi Herodia inoꞌna.

¹²Korohorinalu topeguruna hi Yohanes hapo to mewali tiꞌo, noloumohi moroa wota lokaꞌna honiꞌi rotawu. Uko tiꞌo, noloumohi mampekarebaiki pe hi Yesu.

¹³Konohorinalu hi Yesu kareba komahine hi Yohanes Toperiu, Io molai katoꞌo, hei topeguruNahi woꞌo metuntu pe Io. Mehendeꞌmohi i duanga nolou pe peꞌohaꞌa to tepohida. Tungkaihana hi Yesu hingkeꞌna moꞌela ka toaꞌ to woriꞌ. Angkana woriꞌ toaꞌ pahori kareba kopolaiNa, iomo horiana mampolihimohi bolaꞌra nolouhi metuntu hi Yesu, motuntunihi lala to mampebota rano.

¹⁴Pengkohounalu hi Yesu ka duanga, Io pangkiꞌ toaꞌ to woriꞌ, horiana marima laliNe, mewaliꞌ Io mampokoꞌoriꞌ toaꞌ to mohakiꞌ to uwaꞌ i lumbura.

¹⁵Kononewamo, noloumohi topeguruNe mangkododungkui hi Yesu honiꞌi rotiꞌi, “Guru, peꞌohaꞌa hieꞌe hawaꞌi uwaꞌ hapo-hapo, hei ando hingkiꞌ mentoriꞌmo. Aginamo Irumbaꞌmohi toaꞌ to woriꞌ nolou pe bolaꞌ to dodungku hingkeꞌna mehilihi pangkara.”

¹⁶Notiꞌi hi Yesu, “Hawaꞌhi paralu nipopolai. Ingkeimola to mampopopangkahi.”

¹⁷Notiꞌi topeguruNe, “To uwaꞌ i ingka, limo onulu depa hei rombaꞌa bouꞌ.”

¹⁸Notiꞌi hi Yesu, “Komiꞌi humei.”

¹⁹Katoꞌo Norumbaꞌmohi toaꞌ to woriꞌ mahura i kora, honiꞌi hi Yesu moroa depa to limo onu hante bouꞌ to rombaꞌa, hei menoaꞌ pe laniꞌ mekokae moꞌawerasiꞌ pe Pueꞌ Ala. Uko tiꞌo, Nokebiꞌ-kebiꞌmo depa tiꞌo, honiꞌi Nopaꞌaniki topeguruNa hingkeꞌna rodolaꞌ-dolaꞌkihi pe toaꞌ to woriꞌ.

²⁰Mangkamohi lekiꞌ-lekiꞌra wutehi wohu. Koꞌukora mangka, topeguruNa morampuhi pelobiana, hampuluꞌ merobakuꞌ tene.

²¹Koworiꞌra to mangka tempo tiꞌo wora uwaꞌhi limo sabu tomaꞌani, handoaꞌi tene teꞌihaꞌ towoweꞌe hante anaꞌra.

²²Uko tiꞌo, hi Yesu morumbaꞌmo topeguruNa meduanga medulu nolou pe hanupe rano, hei Norumbaꞌmohi toaꞌ to woriꞌ mahuliꞌ nolou pe bolaꞌra.

²³Pahuliꞌra toaꞌ tiꞌo, moneꞌmo hi Yesu pe biri, ako mekokae hadoduoNa itoꞌo wute wini.

²⁴I tempo tiꞌo, topeguruNa moꞌelamohi ka botana rano. I lumbu rano duangara tiꞌo norumpa balumba, alaꞌ mangkohidupaꞌkihi parowo to makaja.

²⁵Dodungku ando, munaꞌumo hi Yesu ka biri honiꞌi nolou matengkaꞌ i womboꞌ uwai menonto pe iohi.

²⁶Koroꞌokiꞌnalu uwaꞌ toaꞌ to matengkaꞌ i womboꞌ uwai, morokaꞌmohi, honiꞌi moloaꞌ-loaꞌmohi, rotiꞌi, “Uu lomoa!”

²⁷Kaliuꞌ notiꞌi hi Yesu, “Pokarohokei lalimi! Inioꞌkei morokaꞌ! Akulu hieꞌe.”

²⁸Notiꞌi hi Peturuꞌ, “Ane hi YesuKo mpuꞌu, Iwowoiꞌa hingkeꞌna matengkaꞌa pe Ingko i womboꞌ uwai.”

²⁹Notiꞌi hi Yesu, “Humeimoko!” Mengkohoumo mpuꞌu hi Peturuꞌ ka lali duanga, hei matengkaꞌmo i womboꞌ uwai menonto pe hi Yesu.

³⁰Angkana ikonohorikinalu meparowo hante mebalumba ngkodeꞌ, morokaꞌmo horiana mepongkamo mentoriꞌ, liu mekaraꞌ, notiꞌi, “Pueꞌ! Sulungiꞌa!”

³¹Kaliuꞌ Noꞌonaꞌ hi Yesu koraweNe moruiꞌ hi Peturuꞌ, Notiꞌiki, “Makuraꞌ tene pepoꞌohima! Mahamporeꞌi hinaꞌ mororangko tene lalima?”

³²Ikopehendeꞌralu pe lali duanga, meꞌohaꞌmo woꞌo parowo.

³³Katoꞌo, lekiꞌ-lekiꞌna topeguruNa to i lali duanga tiꞌo menombahi pe hi Yesu, rotiꞌi, “Tuꞌu-tuꞌu mpuꞌu, koꞌIngkonamo AnaꞌNe Pueꞌ Ala!”

³⁴Uko tiꞌo, hi Yesu hante topeguruNa, wutemohi i hanupe rano. Mengkahorihi i woiꞌ to nikokeneꞌi Genesareꞌ.

³⁵Korobahaꞌnalu tumpu bolaꞌ kohiYesuna to hupaꞌ i bolaꞌra, ropekarebaikimo pe bolaꞌ-bolaꞌ to dodungku, horiana lekiꞌ-lekiꞌna toaꞌ to mohakiꞌ rokomi pe hi Yesu.

³⁶Roperapiꞌ hingkeꞌna doena jubaNa roruntui. Mewaliꞌ, lekiꞌ-lekiꞌna toaꞌ to moruntui jubaNa, kaliuꞌhi moꞌoriꞌ.