Read Rampi Matius 15 Bible Online

Matius 15 - Rampi bible

Matius 15

¹Hampiha tempo, haumborahi toParisi hante guru-guru agama toYahudi to ka Yerusale nolou mampohidupaꞌki hi Yesu. Ropeꞌitanoki,

²“Mahamporeꞌi topeguruMa hinaꞌ molungkaꞌihi adaꞌra tododulunta? Hibali, ane mangkahi hawaꞌhi mewaheꞌ motuntuni atura agamanta.”

³Nohoniꞌ hi Yesu, “Mahamporeꞌi hinaꞌ ilungkaꞌikei parentane Pueꞌ Ala ane podo mampetuntuikei adaꞌra tododulumi?

⁴Rapaꞌna, notiꞌi Pueꞌ Ala, ‘Hangangaa niꞌadaꞌi umoꞌmi hante inoꞌmi.’ Hei Notiꞌi womo, ‘Hihimo to motundaꞌ umoꞌna ba inoꞌna hangangaa nirokoꞌ.’

⁵Angkana kehapoꞌi hatoꞌo mepoturuꞌkei, toaꞌ wadi mantiꞌi pe toduluna waheꞌe: ‘Hapomo to hangangaa kupoporewukei, alaꞌ kudandimoꞌi hingkiꞌ kupopenomba pe Pueꞌ Ala.’

⁶Toaꞌ to mantiꞌi hatoꞌo hampoliꞌmo paralu moꞌadaꞌi tododuluna. Mewaliꞌ, alaꞌ adaꞌmi tiꞌo, itiꞌikei Pohawaꞌna Pueꞌ Ala hamboaꞌmo modumbuꞌ.

⁷Mampetomoromiꞌlukei! Tuꞌu mpololeke lolitane nabi Yesaia hampiha noniuꞌ i ingkei to mantiꞌi waheꞌe:

⁸Notiꞌi Pueꞌ Ala: ‘Toaꞌ tiꞌohi, i omeꞌralu moꞌadaꞌiꞌA, angkana lalira moꞌela ka Aku.

⁹Hawaꞌi modumbuꞌ penombare pe Aku, alaꞌ poturuꞌra poturuꞌ ka toaꞌlu, handoꞌio poturuꞌ to ka Aku.’ ” [23]

¹⁰Uko tiꞌo, hi Yesu mowowoimo toaꞌ to woriꞌ, honiꞌi Notiꞌi, “Ipehoromuakei hingkeꞌna ibahaꞌkei.

¹¹Hapo to mampomokomaꞌki i peꞌelena Pueꞌ Ala? Ba to mekahi i omeꞌta? Handoꞌio, angkana lolita to mesuwu ka omeꞌta, tiꞌo to mampomokomaꞌki i peꞌelena Pueꞌ Ala.”

¹²Katoꞌo nolouhi topeguruNe mangkododungkuiꞌI rotiꞌi, “Hawaꞌireꞌi Ibahaꞌ kokoiꞌne pekirira toParisi pahori lolitaMu hingkenia?”

¹³Nohoniꞌ hi Yesu, “Tedehiluhiae! ToParisi tiꞌo, hibalihi huꞌa-huꞌa to hawaꞌi nohuꞌa UmoꞌKu to uwaꞌ i suruga, hei bateꞌra hingkiꞌ niwutu. Iohi tobilo moranda tobilo woꞌo, hei bateꞌra hingkiꞌ monawuꞌhi moꞌawa pe woloꞌ.”

¹⁵Notiꞌi hi Peturuꞌ, “Guru, Ipokonontokika pandiriꞌ to Ipowute hingkenia.”

¹⁶Mehoniꞌ hi Yesu, Notiꞌi, “Handoaꞌireꞌi tene ibahaꞌkei palaihane?

¹⁷Bateꞌna ibahaꞌmokei, pangka to mekahi pe lali omeꞌta, liu pe hinaꞌinta, honiꞌi mesuwu. Handoꞌio tiꞌo to mampomokomaꞌki i peꞌelena Pueꞌ Ala.

¹⁸Angkana wae, lolita to kodake mepongka ka lalinta hei mesuwu ka omeꞌta, tiꞌo wae to mampomokomaꞌki i peꞌelena Pueꞌ Ala.

¹⁹Alaꞌ ka lalinta mesuwu molangkaꞌ-langkaꞌ pekiri to kodake, horiana uwaꞌ to merorokoꞌ, mebualosi, mowali walia to mekokomaꞌi, manako, mosobiꞌi wuti hei mampononaꞌa toaꞌ ntaniꞌna.

²⁰Walia to hatoꞌo, tiꞌo to mampomokomaꞌki i peꞌelena Pueꞌ Ala. Angkana ane mangkaki hei hawaꞌki duluna mewaheꞌ, handoꞌio tiꞌo to mampomokomaꞌki i peꞌelena Pueꞌ Ala.”

²¹Katoꞌo molaimo hi Yesu ka woiꞌ Genesareꞌ, nolou pe woiꞌ to dodungku i kota Tiru hante Sido.

²²Itoꞌo, hupaꞌmo haduo towoweꞌe ka woiꞌ tiꞌo. Io toKanaꞌa, handoꞌio toYahudi, hei ako merorai pe hi Yesu, notiꞌi, “Pueꞌ, muleꞌna datu Daudi! Ipokarimaꞌa kaiaꞌ! Anaꞌku towoweꞌe nopekahii tokodake, hei makaja komahakiꞌne.”

²³Angkana hi Yesu hawaꞌi mehoniꞌ. Toloumo topeguruNehi mangkododungkui hi Yesu, rotiꞌi, “Guru, Irumbaꞌmo hingkeꞌna towoweꞌe tiꞌo molai, alaꞌ poko mewowoiꞌi nopokobue metuntu pe ingkiꞌ.”

²⁴Notiꞌi hi Yesu, “Pueꞌ Ala morumbaꞌA hingkeꞌna humeiꞌA mosulungi toSaraeli, alaꞌ hibalihi gimba to hawaꞌi uwaꞌ to molambaꞌhi.”

²⁵Angkana towoweꞌe tiꞌo noloulu melingkotuꞌ i hinarona hi Yesu, notiꞌi, “Pueꞌ, Isulungiꞌa, kaiaꞌ!”

²⁶Mehoniꞌ hi Yesuno, “Hawaꞌi moromiꞌ ane moroaꞌA pangkana oꞌanaꞌ honiꞌi Kutubeki ahu.”[24]

²⁷Angkana mehoniꞌ towoweꞌe tiꞌo, notiꞌi, “Tuꞌu mpololeke Pueꞌ, angkana ahu tiꞌo mangka woꞌo rupuꞌ pangka to monawuꞌ ka mejana uweꞌna.”

²⁸Katoꞌo notiꞌi hi Yesu, “Inoꞌ, maroho mpololeke pepoꞌohima! Hapo to ipohinaru, mewalimo motuntuni peleihamu.” I tempo tiꞌo woꞌo, moꞌoriꞌmo mpuꞌu anaꞌne towoweꞌe toKanaꞌa tiꞌo.

²⁹Uko tiꞌo, hi Yesu hante topeguruNa molaimohi katoꞌo, matengkaꞌ mampebota i rano Galilea. Moneꞌmo hi Yesu nolou pe bobirina, hei mahura mepoturuꞌ.

³⁰Toaꞌ morombongamohi nolou menonto pe hi Yesu. Mangkomihi tokohu, tokokumpa, tobilo, to hawaꞌi hohumbo mololita hei woriꞌ to ntaniꞌne to hawaꞌi polido. Nipododungkuhi i hinarona hi Yesu, hei Nopokoꞌoriꞌihi lekiꞌ.

³¹Lomeniahi toaꞌ to woriꞌ pangkiꞌ lekiꞌ-lekiꞌna to nopokoꞌoriꞌ hi Yesu: toaꞌ to hawaꞌi hohumbo mowiharo mololitamohi, tokokumpa moꞌoriꞌmo, tokohu matengkaꞌmohi, hei tobilo pangkiꞌmohi. Iomo horiana toaꞌ to woriꞌ tiꞌo mampokodeꞌhi Pueꞌ Ala to ropenombai toSaraeli.

³²Uko tiꞌo, hi Yesu mowowoi topeguruNa, Notiꞌikihi, “Marima lalingKa pangkiꞌ toaꞌ to woriꞌ hieꞌe. Tolu andomohi iseꞌe, hamboaꞌmo uwaꞌ pangkare. Hawaꞌi moromiꞌ rekeꞌKa morumbaꞌhi mahuliꞌ kolentuꞌara bilora. Modungkahi intu i lala.”

³³Rotiꞌi topeguruNe, “I imboki hingkiꞌ topahua pangka to maganaꞌ hingkiꞌ topaꞌanikihi toaꞌ to waheꞌe koworiꞌne, alaꞌ peꞌohaꞌa hieꞌe moꞌela ka bolaꞌ?”

³⁴Meꞌitano hi Yesu pe topeguruNa, “Haꞌumbo onu depa to uwaꞌ i ingkei?” Mehoniꞌhi, rotiꞌi, “Pitu onulu, hante bouꞌ to kokiuꞌ haꞌumbora mbaꞌalu.”

³⁵Katoꞌo Norumbaꞌmohi toaꞌ to woriꞌ mahura i woiꞌ.

³⁶Noroamo depa to pitu onu hante bouꞌ to kokiuꞌ haꞌumbora mbaꞌalu tiꞌo, honiꞌi mekokae moꞌawerasiꞌ pe Pueꞌ Ala. Uko tiꞌo, Nokebiꞌ-kebiꞌmo depa hante bouꞌ, Nopaꞌaniki topeguruNa hingkeꞌna rodolaꞌ-dolaꞌkihi toaꞌ to woriꞌ.

³⁷Mangkamohi lekiꞌ-lekiꞌra wutehi wohu. Koꞌukora mangka, topeguruNahi morampu pelobiana, pitu bingkaꞌ tene to kodeꞌ.

³⁸Koworiꞌra to mangka i tempo tiꞌo, iba sabu tomaꞌani, handoaꞌi tene teꞌihaꞌ towoweꞌe hante anaꞌra.

³⁹Uko tiꞌo, toaꞌ to woriꞌ Norumbaꞌmohi mahuliꞌ nolou pe bolaꞌra, honiꞌi mehendeꞌmo hi Yesu hante topegurunahi i duanga nolou pe woiꞌ Magada.