Read Rampi Matius 17 Bible Online

Matius 17 - Rampi bible

Matius 17

¹Oni ando katoꞌo, hi Yesu mangkomi hi Peturuꞌ, hi Yakobus hante hi Yohanes hineeꞌna mampototaniꞌhi nolou pe biri to dingkaoꞌ.

²Kolentuꞌara itoꞌo, tewolihimo lentene hi Yesu. LioNa mewanta hibali ando, hei baduꞌNa bobala manakiꞌ.

³Ikotewolihinalu hi Yesu, hangkaꞌ-hangkaꞌ romo topeguruNehi pangkiꞌ nabi Musa hante Elia mololita hante hi Yesu.

⁴Katoꞌo, hi Peturuꞌ mampatiꞌiki hi Yesu, “Pueꞌ, moromiꞌ mpololeke ane iseꞌemoki meꞌohaꞌ. Ane hiniꞌKo, hingkiꞌ kuwali tolu onu bambaruꞌ iseꞌe: haꞌanu bambaruꞌMu, haꞌanu hi Musa hei haꞌanu hi Elia.”

⁵Kolentuꞌana tene hi Peturuꞌ mololita, hangkaꞌ-hangkaꞌ romo noputuꞌhi kini to mobaro, hei ka lali kini tiꞌo rohorimo loaꞌne Pueꞌ Ala to mantiꞌi, “Hieꞌemo AnaꞌKa to Kupokarima hei Kupotanaꞌ. Ipehoromuamokei lolitaNe!”

⁶Korohorinalu topeguruNa loaꞌne Pueꞌ Ala tiꞌo, morokaꞌhi mpololeke, kaliuꞌhi metumpapaꞌ.

⁷Angkana hi Yesu ako moruntuihi, honiꞌi Notiꞌikihi, “Peꞌarokei, inioꞌkei morokaꞌ!”

⁸Penoaꞌralu, roꞌele, hi Yesu hadoduona romo.

⁹Pengkohouralu ka biri tiꞌo, notiꞌikihi hi Yesu, “Inioꞌ duluna itiꞌi-tiꞌikei pe himolu hapo to iꞌokiꞌkei hingkenia ikohandoaꞌana tene Anaꞌ Manusiaꞌ nipatuwuꞌ huliꞌ ka komahia.”

¹⁰Meꞌitanomohi topeguruNe, rotiꞌi, “Wulika. Motuntuni poturuꞌra guru agama, nabi Elia hangangaa hupaꞌ medulu, honiꞌi hupaꞌ Datu Topohompoꞌ. Hohumboreꞌi hinaꞌ hatoꞌo?”

¹¹Nohoniꞌ hi Yesu, “Tuꞌu to nipoturuꞌkikei, hi Elia hangangaa hupaꞌ medulu, hei io to hingkiꞌ mampatimomo langkaꞌ-langkaꞌna alaꞌ hingkiꞌ hupaꞌ Datu Topohompoꞌ.

¹²Hei Kutiꞌikikei: hupaꞌmo mpuꞌu hi Elia, angkana hawaꞌi robahaꞌ toaꞌ kohihimona. Io nipoperima-rima motuntuni peleihara. Hatoꞌo woꞌo Anaꞌ Manusiaꞌ hingkiꞌ nipoperima-rima motuntuni peleihara.”

¹³Tempo tiꞌo, hongkoꞌ robahaꞌ topeguruNa palaihane lolitana hi Yesu hingkenia: to nipandiriꞌ hibali nabi Elia iomo hi Yohanes Toperiu.

¹⁴Ipengkohoura hi Yesu hante topeguruNa to tolu tiꞌo ka biri, mangkohidupaꞌkihi toaꞌ to woriꞌ, hei uwaꞌ haduo tomaꞌani to nolou melingkotuꞌ i hinarona hi Yesu, notiꞌi,

¹⁵“Pueꞌ, Ipokarima anaꞌku tomaꞌani. Io noniuꞌ hakiꞌ mahi-mahi manuꞌ hei maporiꞌ mpololeke nohori. Ane hupaꞌi hakiꞌne poko modungka i api, hei modungka woꞌo i uwai.

¹⁶Kukomimo pe topeguruMu, angkana hawaꞌi robiaꞌ ropokoꞌoriꞌ.”

¹⁷Notiꞌi hi Yesu, “Mahamporeꞌi hinaꞌ hawaꞌkei mepoꞌohi? Isapuakakei peleihane Pueꞌ Ala! Haꞌumbo tene komoruene hangangaa moꞌawaꞌA hante ingkei? Haꞌumbo tene komoruene hangangaa sabaraꞌA i ingkei? Komikei humei oꞌanaꞌ tiꞌo!”

¹⁸Rokomimo mpuꞌu oꞌanaꞌ tiꞌo pe hi Yesu. Katoꞌo, molai Nopopolaimo tokodake to mampomasusa oꞌanaꞌ tiꞌo. Liu molai tokodake tiꞌo, hei kaliuꞌ moꞌoriꞌ oꞌanaꞌ tiꞌo.

¹⁹Hawaꞌi morue katoꞌo, tempona hi Yesu hadoduoNa, noloumohi topeguruNe meꞌitano pe Io, “Guru, mahamporeꞌi hinaꞌ hawaꞌi kibiaꞌ mampopesuwu tokodake tiꞌo?”

²⁰Nohoniꞌhi hi Yesu, “Alaꞌ makuraꞌi tene pepoꞌohimio. Tuꞌu mpololeke to Kutiꞌikikei: ane uwaꞌi pepoꞌohimi kehapoꞌi hibalilu haworia holuka kokodeꞌne, wadikei moparenta biri hieꞌe, ‘Melimbako kaseꞌe!’ Hei biri hieꞌe bateꞌna hingkiꞌ melimba. Ane mepoꞌohikei, lekiꞌ-lekiꞌna wadi iwalikei.

²¹[Angkana ane mampopolaikei tokodake to hatoꞌo, hangangaa nibue hante pekokae hei paboki.]”

²²I tempona hi Yesu hante topeguruNahi kolentuꞌara mororampuhi i woiꞌ Galilea, Notiꞌikihi, “Anaꞌ Manusiaꞌ hingkiꞌ nipewei pe kuasaꞌna manusiaꞌ.

²³Hingkiꞌ nirokoꞌ, angkana ikotolu andona Io hingkiꞌ tuwuꞌ huliꞌ.” Korohorinalu lolitaNe tiꞌo, masusa mpololeke lalire.

²⁴Kohupaꞌnalu hi Yesu i bolaꞌ Kapenau moꞌawa hante topeguruNahi, hupaꞌmohi to mesingaraꞌ sima to ropakeꞌ morewahi Tambina Pueꞌ Ala. Ropeꞌitanoki pe hi Peturuꞌ, “Ba mobaiariꞌi woꞌo simana Tambina Pueꞌ Ala tiꞌo Gurumi, ba hawaꞌi?”

²⁵Nohoniꞌ hi Peturuꞌ, “Ioꞌ, Nobaiari!” Katoꞌo, mahuliꞌmo hi Simo Peturuꞌ nolou pe tambi to ropeꞌohaꞌi. Ikohupaꞌna itoꞌo, handoaꞌi tene hampakaꞌ mololita, medulumo hi Yesu meꞌitano, “Simo, hohumbo pahuama: datu-datu i duniaꞌ ka hihimo roperuruꞌ sima: ba ka toaꞌra hadoduora ba ka woiꞌ to nokuasaꞌi?”

²⁶Nohoniꞌ hi Peturuꞌ, “Bateꞌna ka toaꞌ to nokuasaꞌi i woiꞌ tiꞌo.” Notiꞌi hi Yesu, “Ane hatoꞌoꞌi, toaꞌna hadoduona hawaꞌi paralu mobaiari.

²⁷Angkana kehapoꞌi hatoꞌo, aginamo mobaiariki, hingkeꞌna hawaꞌi koiꞌ pekirire pe ingkiꞌ. Mewaliꞌ, noloumoko modoa pe rano Galilea. Iwengka omeꞌne bouꞌ to uluꞌ-uluꞌna noroa doamu. Itoꞌo hingkiꞌ pahuako doiꞌ, hei doiꞌ tiꞌo ipopobaiari simanta roduo.”