Read Rampi Matius 18 Bible Online

Matius 18 - Rampi bible

Matius 18

¹I tempo tiꞌo, topeguruna hi Yesu noloumohi meꞌitano pe Io, rotiꞌi, “Pueꞌ, himo to i wowomboꞌ tuwuꞌna i lali poparentana Pueꞌ Ala?”

²Katoꞌo, hi Yesu mowowoimo haduo oꞌanaꞌ, Nopopetotiꞌi i hinarora,

³honiꞌi Notiꞌikihi, “Tuꞌu mpololeke to kutiꞌikikei hieꞌe: ane hawaꞌi iwolihikei pekirimi hei hibali oꞌanaꞌ hieꞌe, hawaꞌkei hingkiꞌ mewali toaꞌNa Pueꞌ Ala i lali PoparentaNa.

⁴Hihimo to mengkaꞌiwowoiꞌ hei hibali oꞌanaꞌ hieꞌe, iomo to i wowomboꞌ tuwuꞌne ka lekiꞌ-lekiꞌna toaꞌNa Pueꞌ Ala i lali PoparentaNa.

⁵Hihimo to mantorimo haduo toaꞌ to mengkaꞌiwowoiꞌ, hibali oꞌanaꞌ hieꞌe, i lali konaꞌKu, palaihana Akumo to notorimono.

⁶Angkana hihimo to mampomonawuꞌ haduo toaꞌ to hibali oꞌanaꞌ tiꞌo horiana hamboaꞌmo mepoꞌohi pe Aku, hingkiꞌ makaja mpololeke pehukune Pueꞌ Ala i toaꞌ tiꞌo. Aginamo haꞌanu watu pogilia to kodeꞌ nihoi i dokoꞌna hei nitube pe lali tahiꞌ.

⁷Horewuꞌhi toaꞌ i duniaꞌ hieꞌe, alaꞌ molangkaꞌ-langkaꞌ to rowali hingkeꞌna mampomonawuꞌhi toaꞌna Pueꞌ Ala horiana hamboaꞌmohi mepoꞌohi. Walia to hibali tiꞌo poko uwaꞌ, angkana horewuꞌhi mpololeke toaꞌ to mepomonawuꞌ tiꞌo.

⁸Ane rapaꞌna korawemi hamali ba kapuꞌmi hamali to mangkomikei mowali dosa, ibokuꞌmolu hei nitube. Aginamo hamalilu korawemi ba kapuꞌmi, angkana pahuakei kotuwuꞌ to wolaꞌ moꞌawa hante Pueꞌ Ala, hintina romali korawemi hei kapuꞌmi, angkana nitubekei pe lali api to mamua nturusi.

⁹Hei ane rapaꞌna matami hamali to mangkomikei mowali dosa, nidungkiꞌmolu hei nitube. Aginamo hamalilu matami angkana pahuakei kotuwuꞌ to wolaꞌ moꞌawa hante Pueꞌ Ala, hintina romali matami, angkana hingkiꞌ nitubekei pe lali naraka.”

¹⁰Nopololiu womo hi Yesu lolitaNe, Notiꞌi, “Mewaliꞌ, majaga-jagakei mpololeke. Inioꞌ itiꞌikei toaꞌ to hibali oꞌanaꞌ hieꞌe, hawaꞌhi modumbuꞌ. Alaꞌ tuꞌu mpololeke to Kutiꞌikikei: malaꞌeka to mampoꞌodaꞌhi, uwaꞌhi nturusi i suruga hei mampowutehi pe Pueꞌ Ala hapo to mewali i toaꞌ to ropoꞌodaꞌ.

¹¹[Alaꞌ Anaꞌ Manusiaꞌ hupaꞌ pe duniaꞌ mamposalamaꞌ toaꞌ to moꞌela ka Pueꞌ Ala.][25]

¹²Hohumbo pekirimi ane rapaꞌna uwaꞌ i lumbumi to uwaꞌ gimbana hanatu mbaꞌa, hei hambaꞌa moholi? Hapo to hingkiꞌ nowali? Bateꞌna hingkiꞌ nopolihi gimbane to hio mpuluꞌ hio mbaꞌa i birina, honiꞌi nolou mampaliꞌ gimbana to hambaꞌa to moholi.

¹³Tuꞌu mpololeke to Kuꞌtikikei, ane nohuamoꞌi huliꞌ gimbane to hamombaꞌa, kodeꞌ konopomotanaꞌne ka gimbana to hio mpuluꞌ hio mbaꞌa to hawaꞌi moholi.

¹⁴Hatoꞌo woꞌo Umoꞌmi to uwaꞌ i suruga, hawaꞌi Nolei ane uwaꞌi haduo to hibali oꞌanaꞌ tiꞌo to hingkiꞌ moholi.”

¹⁵Notiꞌi womo hi Yesu, “Ane uwaꞌi halali hampepoꞌohimu to masalaꞌ pe ingko, hangangaa ako ipomehuaki, hei ipololitaki komasalaꞌne, hingkeꞌna hawaꞌi uwaꞌ to pobahaꞌ posisalaꞌmi, bateꞌnalu ingkei roduo. Ane nopehoromuaꞌi lolitama, hei nohohoꞌ ka komasalaꞌna, pohintuwuꞌmi hingkiꞌ moromiꞌ huliꞌ.

¹⁶Angkana ane hawaꞌi hiniꞌ mampehoromua lolitamu, ikomimo haduo ba roduo sabiꞌ hingkeꞌna mampehoromuaꞌi pololitamu pe io. Alaꞌ uwaꞌ teꞌukiꞌ i lali Suraꞌ Mangkolehi waheꞌe: ‘haduo sabiꞌ hawaꞌi maroho, hangangaa roduo ba tolu duo to mosobiꞌi mampetotuꞌu komasalaꞌna, hingkeꞌna mononto kara-karane.’ [26]

¹⁷Ane hawaꞌi womo hiniꞌ mampehoromua lolitara sabiꞌ tiꞌo, ipowutemo i hinarona jumaꞌa. Ane handoaꞌi tene nopehoromua, kehapoꞌi lekiꞌ-lekiꞌna halali hampepoꞌohimi mokamorokiꞌi, nirekeꞌmo hibali toaꞌ to hawaꞌi pobahaꞌ Pueꞌ Ala ba to kodake waliana.

¹⁸Tuꞌu mpololeke to Kutiꞌikikei: Pueꞌ Ala hingkiꞌ mamponiuꞌ hapo to ipeꞌopikikei hei ipetotuꞌukei i duniaꞌ.

¹⁹Kutiꞌikikei womo: ane uwaꞌkei roduo i duniaꞌ hieꞌe to moꞌawa mekokae merapiꞌ hapolu i UmoꞌKu to uwaꞌ i suruga, pekokaemi tiꞌo bateꞌna hingkiꞌ Nopobuhoꞌi,

²⁰alaꞌ i imbo toaꞌ morampu i lali konaꞌKu, kehapoꞌi roduo ba totolulu, Aku uwaꞌA i lumbu-lumbura.”

²¹Uko tiꞌo, hi Peturuꞌ mangkododungkui hi Yesu hei meꞌitano pe Io, notiꞌi, “Pueꞌ, ane halali hampepoꞌohingku masalaꞌ pe aku, haꞌumbo mpiha hangangaa kuꞌampuni? Ba ganaꞌmo pitu mpiha?”

²²Nohoniꞌ hi Yesu, “Hawaꞌi pitu mpihalu. Angkana pitu mpuluꞌ piha ka to pitu mpiha hangangaa iꞌampuni toaꞌ to masalaꞌ pe ingko.

²³Alaꞌ poparentana Pueꞌ Ala nipandiriꞌ hibali haduo datu to moparesaꞌ indana hawiꞌnahi.

²⁴Tempo tiꞌo, uwaꞌ haduo hawiꞌ to woriꞌ mpololeke indana rokomi pe hinarona, koworiꞌna indana mojuta-jutamo doiꞌ bulawa.

²⁵Monontomo toaꞌ tiꞌo hawaꞌi nobiaꞌ mobaiari indane. Mewaliꞌ, notiꞌimo datu, ‘Nipobaluꞌmolu hawiꞌ hieꞌe moꞌawa hante anaꞌnahi, hantambina hei lekiꞌ-lekiꞌna lumana, hingkeꞌna tebaiariꞌi indane.’

²⁶Hawiꞌ tiꞌo kaliuꞌ melingkotuꞌ i hinarona datu, merapiꞌ ampu, notiꞌi, ‘Tua, kuperapiꞌ hingkeꞌna ipaꞌaniꞌa wokaia tempo. Kudandi hingkiꞌ kubaiarilu lekiꞌ-lekiꞌne indangku!’

²⁷Nobahaꞌ datu kohawaꞌne nobiaꞌ mobaiari indana, mewali marima laline i hawiꞌ tiꞌo, honiꞌi notiꞌiki, ‘Indamu kupahimo lekiꞌna, mewaliꞌ mahuliꞌmoko hampoliꞌmo ibaiari.’

²⁸Katoꞌo, molaimo hawiꞌ tiꞌo, hei mangkohidupaꞌki hangko hawiꞌna to maꞌinda pe io hangkiuꞌlu, koworiꞌna indana haꞌumboralu doiꞌ peraꞌ. Kaliuꞌ nohokiꞌ awane tiꞌo honiꞌi noꞌemeꞌ, notiꞌiki, ‘Ibaiari lekiꞌ-lekiꞌne indamu!’

²⁹Melingkotuꞌmo awane tiꞌo merapiꞌ ampu, notiꞌi, ‘Kuperapiꞌ hingkeꞌna ipaꞌaniꞌa tempo. Kudandi hingkiꞌ kubaiarilu indangka!’

³⁰Angkana hawaꞌi notorimo perapiꞌne tiꞌo. Nopopekahilu pe lali petarungkuꞌa wute indana uko nobaiari.

³¹Koroꞌokiꞌna hawiꞌ to ntaniꞌna hapo to pewali, masusa mpololeke lalire i toaꞌ tiꞌo, honiꞌi nolouhi pe datu mampowute waliana hawiꞌ tiꞌo.

³²Konohorina datu lolitare tiꞌo, norumbaꞌmo toaꞌne nolou mowowoi hawiꞌ to kodake waliana tiꞌo. Kohupaꞌnalu hawiꞌ tiꞌo itoꞌo, notiꞌi datu, ‘Kodake mpololeke waliama! Lekiꞌ-lekiꞌna indamu kupahimo ka suraꞌku, alaꞌ merapiꞌko ampu pe aku.

³³Mahamporeꞌi hinaꞌ hawaꞌko mampokarima hangko hawiꞌmu, hibali kokupokarimamu?’

³⁴Datu bukota mpololeke. Hawiꞌ to kodake waliana tiꞌo nokahi pe lali petarungkuꞌa, nikondo nturusi wute tebaiari lekiꞌ-lekiꞌne indana.”

³⁵Nopotutumo hi Yesu pandiriꞌ tiꞌo, Notiꞌi, “Tiꞌo woꞌo to hingkiꞌ nowalikikei UmoꞌKu i lali suruga ane hawaꞌkei moꞌampuni hangko awami ka lalimi mpololeke.”