Read Rampi Matius 19 Bible Online

Matius 19 - Rampi bible

Matius 19

¹Koꞌukonalu hi Yesu mampowute lekiꞌ-lekiꞌna tiꞌo, molaimohi ka woi Galilea nolou pe woiꞌ Yudea to tinaꞌ i hanupe uwai Yarade, hei metuntuhi topeguruNe.

²Itoꞌo woriꞌ toaꞌ ntaniꞌne metuntuhi woꞌo pe Io, hei to mohakiꞌ Nopokoꞌoriꞌihi.

³Uwaꞌhi haꞌumbora toParisi to nolou woꞌo hingkeꞌna mampaliꞌluhi komonawuꞌana hi Yesu. Meꞌitanohi pe Io, rotiꞌi, “Motuntuni atura agamanta, ba wadireꞌi tomaꞌani mampokaꞌaki hantambina, kehapoꞌi hangkiuꞌlu pododuiꞌne?”

⁴Nohoniꞌ hi Yesu, “Hawaꞌireꞌi ibasakei hapo to teꞌukiꞌ i lali Suraꞌ Mangkolehi? Uluꞌ-uluꞌna Pueꞌ Ala moteru haduo tomaꞌani hante haduo towoweꞌe.

⁵Uko tiꞌo, mohawaꞌmo, Notiꞌi, ‘Tomaꞌani hangangaa mampolihi umoꞌna hante inoꞌna, horiana meꞌohaꞌ moꞌawa hante hantambina, hingkeꞌna to roduo tiꞌo mewalihi hawowota.’

⁶Mewaliꞌ, i peꞌelena Pueꞌ Ala, hamboaꞌmohi roduo angkana mewalihi hibali haduo. Iomo horiana Kutiꞌikikei: himo to nopohaꞌanu Pueꞌ Ala, hawaꞌi mpuꞌu wadi nokaꞌa toaꞌ.”

⁷Meꞌitanohi huliꞌ toParisi, “Ane hatoꞌoꞌi, mahamporeꞌi hinaꞌ hi Musa mampokononto hingkeꞌna tomaꞌani to mangkodokoꞌi mampokaꞌaki hantambina hangangaa mowali suraꞌ mpokaꞌa?”

⁸Nohoniꞌ hi Yesu, “Nokomi komorintodina lalimi horiana hi Musa mampoliu toaꞌ mokaꞌa. Angkana kotuꞌuana, mepongka ka uluꞌ-uluꞌna hawaꞌi hatoꞌo.

⁹Hingkeꞌna ibahaꞌkei: Hihimo to mampokaꞌaki hantambina hantaro hantambine hawaꞌi mampelapiki maꞌanina hei mampohantambi towoweꞌe to ntaniꞌna, toaꞌ tiꞌo mebualosi.”

¹⁰Katoꞌo, topeguruNahi mampatiꞌiki hi Yesu, “Ane hatoꞌoꞌi komadorine atura kohamoko, aginamo inioꞌki hamoko.”

¹¹Nohoniꞌ hi Yesu, “Hawaꞌi lekiꞌ-lekiꞌna toaꞌ to wadi mantorimo lolita hieꞌe. Angkana uwaꞌ toaꞌ to nopokononto Pueꞌ Ala hingkeꞌna hawaꞌhi hamoko.

¹²Rapaꞌna, uwaꞌ toaꞌ to hawaꞌi hamoko alaꞌ hatoꞌomo powotane mepongka ka konipoꞌanaꞌkina. Uwaꞌ woꞌo to hawaꞌi hamoko nokomi waliana toaꞌ pe wotana. Uwaꞌ woꞌo to hawaꞌi hamoko alaꞌ peleihana hadoduona, hingkeꞌna uwaꞌ tempone mampopatengkaꞌ jamana Pueꞌ Ala i lali poparentaNa. Hihimo to wadi mantorimo poturuꞌ hieꞌe, moromiꞌ ane nopetuntuiꞌi.”

¹³Hampiha tempo, uwaꞌhi toaꞌ nolou mangkomi anaꞌra pe hi Yesu hingkeꞌna Notikohi hei Nopekokaekihi. Toaꞌ tiꞌohiꞌo nopowuriꞌihi topeguruNahi,

¹⁴angkana notiꞌi hi Yesu, “Tedehiluiae oꞌanaꞌ humei pe Aku. Inioꞌ niꞌopihi, alaꞌ toaꞌ to hibalihi oꞌanaꞌ hieꞌe to hingkiꞌ mewali toaꞌna Pueꞌ Ala i lali PoparentaNa.”

¹⁵Notikomohi oꞌanaꞌ tiꞌo, honiꞌi Nobarakatihi. Uko tiꞌo, molaimo katoꞌo.

¹⁶Hampiha tempo, uwaꞌ haduo tomaꞌani to nolou pe hi Yesu meꞌitano, notiꞌi, “Guru, walia hapo to moromiꞌ to hangangaa kuwali hingkeꞌna wadiꞌa pahua kotuwuꞌ to wolaꞌ to hawaꞌi mokoꞌukoa?”

¹⁷Notiꞌi hi Yesu, “Mahamporeꞌi hinaꞌ ipetanoki noniuꞌ i hapo to moromiꞌ? Hawaꞌi uwaꞌ ntaniꞌna to moromiꞌ, bateꞌnalu Pueꞌ Ala. Angkana hingkiꞌ Kuhoniꞌ peꞌitanoma. Ane mangkodokoꞌiko pahua kotuwuꞌ to wolaꞌ to hawaꞌi mokoꞌukoa, hangangaa ipetuntui hawaꞌne Pueꞌ Ala.”

¹⁸Meꞌitano womo toaꞌ tiꞌo, “Hawaꞌ to imboꞌina?” Nohoniꞌ hi Yesu, “Inioꞌ merorokoꞌ, inioꞌ mebualosi, inioꞌ manako, inioꞌ mantiꞌi sabiꞌ wuti.

¹⁹Iꞌadaꞌimo inoꞌmu hante umoꞌmu, hei ipokarima hangko manusiaꞌma hibaliko mampokarima wotamu hadoduomu.”

²⁰Notiꞌi anaꞌntomaꞌani tiꞌo, “Lekiꞌ-lekiꞌna hawaꞌ tiꞌo, kupetuntuimo. Hapo tene to hangangaa kuwali?”

²¹Nohoniꞌ hi Yesu, “Ane tuꞌu-tuꞌu mpuꞌu ka lalima mangkodokoꞌi mampetuntui lekiꞌ-lekiꞌne peleihana Pueꞌ Ala, noloumoko duluna mampobaluꞌ lumamu, hei doiꞌna idolaꞌ-dolaꞌkihi toaꞌ to merima-rima tuwuꞌra. Ane hatoꞌoꞌi to iwali, hingkiꞌ kodeꞌ howonine to ihua i lali suruga. Uko tiꞌo, metuntumoko pe Aku.”

²²Konohorinalu anaꞌntomaꞌani tiꞌo lolitane hi Yesu, masusa laline hei molaimo, alaꞌ woriꞌ lumane.

²³Iomo horiana notiꞌi hi Yesu pe topeguruNahi, “Tuꞌu mpololeke to Kutiꞌikikei: masusa mpololeke toaꞌ tosugiꞌ hingkiꞌ mewali toaꞌna Pueꞌ Ala i lali PoparentaNa.

²⁴Kutiꞌikikei womo: mololihaꞌ tene hambaꞌa unta mekahi pe woloꞌ daruꞌ hintina tosugiꞌ mewali toaꞌNa Pueꞌ Ala i lali PoparentaNa.”

²⁵Ikorohorinalu topegurunahi lolitane hi Yesu, ropohoko mpololeke alaꞌ ropekiri tosugiꞌ nobarakati Pueꞌ Ala. Iomo horiana rotiꞌi, “Heꞌ, ane hatoꞌoꞌi, himo romo to pahua kotuwuꞌ to wolaꞌ to hawaꞌi mokoꞌukoa?”

²⁶Hi Yesu meꞌele pe topeguruNahi hei Notiꞌi, “Ane manusiaꞌ, hawaꞌi nobiaꞌ mowali hapo-hapo hingkeꞌna ropahua kotuwuꞌ to wolaꞌ to hawaꞌi mokoꞌukoa. Angkana ane i Pueꞌ Ala, lekiꞌna wadi mewali alaꞌ hawaꞌi uwaꞌ to hawaꞌi Nobiaꞌ Nowali.”

²⁷Iomo horiana notiꞌi hi Peturuꞌ pe hi Yesu, “Hade ingka, hapomo to hingkiꞌ kihua?” Kipolihimo lekiꞌ-lekiꞌne hapongki hingkeꞌna metuntuka pe Ingko.

²⁸Nohoniꞌ hi Yesu, “Tuꞌu mpololeke to kutiꞌikikei: i tempona Pueꞌ Ala mowolaꞌi lekiꞌ-lekiꞌna to uwaꞌ, Anaꞌ Manusiaꞌ hingkiꞌ mahura i pahura kodatuaNa to manobaꞌ hei hingkiꞌ moparenta. I tempo tiꞌo, ingkei to metuntu pe Aku hingkiꞌ mahurakei woꞌo i pahura kodatua to hampuluꞌ roꞌonu, moparenta toSaraeli to hampuluꞌ merontino.

²⁹Hihimolu to mampolihi halalina, inoꞌna ba umoꞌna, anaꞌna ba tambina ba kineteꞌna nokomi petuntuna pe Aku, bateꞌna hingkiꞌ pahua howonina woriꞌ mpiha ka hapo to nopolihi, hei pahua woꞌo kotuwuꞌ to wolaꞌ to hawaꞌi mokoꞌukoa.

³⁰Angkana woriꞌ toaꞌ to himpodulumo, hingkiꞌ mewali kamuri i ando to hingkiꞌ hupaꞌ. Hei woriꞌ woꞌo toaꞌ to kamuri hingkiꞌ mewali himpodulu i ando to hingkiꞌ hupaꞌ.”