Read Rampi Matius 20 Bible Online

Matius 20 - Rampi bible

Matius 20

¹Notiꞌi hi Yesu, “Poparentana Pueꞌ Ala hibali pandiriꞌ hieꞌe: Haduo tumpu kineteꞌ anggoroꞌ nolou mampaliꞌ toaꞌ to hiniꞌ majama i kineteꞌna. Mihoꞌolu-olu nohuahi haꞌumbora toaꞌ, hei notiꞌikihi, ‘Noloumokei majama i kineteꞌku, hei hingkiꞌ kupaꞌanikei haduo-haduo haro to biasa pe toaꞌ to majama haꞌando, iomo hampepaꞌ doiꞌ peraꞌ.’[27] Rotorimomo lolitane tiꞌo, honiꞌi noloumohi.

³Tenteꞌ hio mihoꞌolu, nolou womo tumpu kineteꞌ mampaliꞌ to ntaniꞌna. Noꞌokiꞌ haꞌumbora toaꞌ mahohuraluhi i pobaluꞌ-baluꞌa.

⁴Notiꞌikihi, ‘Noloumokei majama i kineteꞌku. Hingkiꞌ kupaꞌanilukei haromi to hintotoꞌ hante pajamami.’ Noloumohi mpuꞌu.

⁵Pohoꞌandomo, nolou womo tumpu kineteꞌ tiꞌo mampaliꞌ toaꞌ. Notiꞌikihi, ‘Humeikei majama i kineteꞌku.’ Hatoꞌo woꞌo to nowowoi tenteꞌ tolu kononewa.

⁶Tenteꞌ limomo kononewa, nohua womo toaꞌ to mahohuraluhi, noteneihi, ‘Mahamporeꞌi hinaꞌ mahuralukei haꞌandoa? Hawaꞌkei majama?’

⁷Rohoniꞌ, ‘Alaꞌ hawaꞌi uwaꞌ to mampopajamaka.’ Notiꞌi tumpu kineteꞌ tiꞌo, ‘Ane hatoꞌoꞌi, noloumokei majama i kineteꞌ anggoroꞌku.’ Noloumohi mpuꞌu majama.

⁸Mentoriꞌmo ando, notiꞌimo tumpu kineteꞌ pe mandoroꞌna, ‘Iwowoimohi topajama tiꞌo, hei ipaꞌanimohi harora, mepongka ka to mekahi majama kamuri wute to mekahi majama medulu.’

⁹Hupaꞌmohi mpuꞌu to majama mepongka tenteꞌ limo kononewa. Pahuahi harora haduo-haduo hampepaꞌ doiꞌ peraꞌ.

¹⁰Hatoꞌo mpuꞌu wute hupaꞌhi i topajama to mepongka mihoꞌolu-olu. Topajama to mepongka mihoꞌolu-olu tiꞌo mantiꞌi i lalira, ‘Mononto bateꞌna melobi to hingkiꞌ nopaꞌanikiki, alaꞌ haꞌandomoki majama!’ Angkana to nipaꞌaniki woꞌo hampepaꞌlu doiꞌ peraꞌ.

¹¹Ikopahuara harora tiꞌo, monau-nauhi pe tumpu kineteꞌ, rotiꞌi,

¹²‘To hupaꞌ ngkamuri, majamahi hajaalu. Angkana ingka, majamaka haꞌando hei nokohuneika. Mahamporeꞌi hinaꞌ ipohibobalilu harongki hante iohi?’

¹³Nohoniꞌ tumpu kineteꞌ tiꞌo, ‘Halalingku, hawaꞌa masalaꞌ pe ingkei. Hawaꞌireꞌi kudandi hingkenia mihoꞌolu hingkiꞌ pahuakei haromi hampepaꞌ doiꞌ peraꞌ to biasa ane toaꞌ majama haꞌando?

¹⁴Mewaliꞌ iroamokei haromi honiꞌi mahuliꞌmokei! Peleihangku mampohibali harora toaꞌ to hupaꞌ ngkamuri hante ingkei.’ ”

¹⁵Ka peleihangkulu mampopodumbuꞌ doiꞌku, mahamporeꞌi hinaꞌ mohiriꞌkei pe toaꞌ ntaniꞌna ane moromiꞌ lalingka pe iohi?

¹⁶Nopotutu hi Yesu pandiriꞌ tiꞌo, Notiꞌi, “Hatoꞌo woꞌo toaꞌ to kamuri i tempo hieꞌe hingkiꞌ mewalihi himpodulu i ando to hingkiꞌ hupaꞌ. Hei hatoꞌo woꞌo toaꞌ to himpodulu i tempo hieꞌe hingkiꞌ mewali kamuri i ando to hingkiꞌ hupaꞌ.”

¹⁷I tempona hi Yesu matengkaꞌ nolou pe kota Yerusale, hei topeguruNa to hampuluꞌ meroduo metuntuhi woꞌo i Io, Nowowoimohi mampohida, honiꞌi Notiꞌikihi,

¹⁸“Ipehoromuakei moromiꞌ! Hinewowoꞌena, kolentuꞌanta matengkaꞌ nolou pe Yerusale. Itoꞌomo Anaꞌ Manusiaꞌ hingkiꞌ nipewei pe tutuꞌ-tutuꞌ tadulako mpenomba hante guru-guru agama, hei hingkiꞌ nibutusi hingkeꞌna nihuku mahi.

¹⁹Hingkiꞌ nipewei Anaꞌ Manusiaꞌ pe toaꞌ to handoꞌiohi toYahudi hingkeꞌna nipokokeniꞌa, nikondo, hei koꞌukoana hingkiꞌ nipaku i loti momehulepe. Angkana ikotolu andona, Io hingkiꞌ tuwuꞌ huliꞌ.”

²⁰I tempo tiꞌo, hantambina hi Sebedeu hante anaꞌna roduo nolouhi pe hi Yesu. Inoꞌra hi Yakobus hante hi Yohanes tiꞌo melingkotuꞌ metoungkaꞌ i hinaroNa alaꞌ uwaꞌ to hingkiꞌ noperapiꞌ.

²¹Nopeꞌitanoki hi Yesu, “Hapo to ikodokoꞌi Kuwali pe ingko?” Nohoniꞌ inoꞌ tiꞌo, “Kuperapiꞌ hingkeꞌna i tempoMu mewali Datu, anaꞌku to roduo hieꞌe hingkiꞌ mahura moparenta moꞌawa hante Ingko, haduo tinaꞌ i koanaMu, haduo tinaꞌ i koiriMu.”

²²Angkana notiꞌi hi Yesu pe hi Yakobus hante hi Yohanes, Notiꞌi, “Hawaꞌkei ibahaꞌ hapo to iperapiꞌkei. Timomokeireꞌi mantaha komaporiꞌ to hangangaa Kurii?” Mehoniꞌhi, rotiꞌi, “Timomoluka!”

²³Notiꞌi womo hi Yesu, “Tuꞌu, hangangaa iriikei komaporiꞌ hibali to hingkiꞌ Kurii. Angkana handoꞌio Aku to mampokononto himo to mahura tinaꞌ i koanangKu hei himo tinaꞌ i koiringKu. Peꞌohaꞌa tiꞌo hingkiꞌ nipaꞌaniki toaꞌ to nopokonontomo UmoꞌKu.”

²⁴Ikonohorinalu perapiꞌre hi Yakobus hante hi Yohanes, bukotahi topeguruNe to hampuluꞌ.

²⁵Iomo horiana hi Yesu mowowoi lekiꞌ-lekiꞌna topeguruNa, Notiꞌikihi, “Ibahaꞌlukei, toaꞌ to hawaꞌi pobahaꞌ Pueꞌ Ala hororokoꞌahi ane moparentaihi toaꞌ, hei toaꞌ to dingkaoꞌ tikoara tiꞌo pokohi moparuku toaꞌ ntaniꞌna hingkeꞌna motuntunihi hawaꞌra.

²⁶Angkana ingkei, inioꞌkei hatoꞌo. Hihimo to mangkodokoꞌi hingkeꞌna i wowomboꞌ tikoane i lumbumi, hangangaa mewali duluna haduo toperewahi.

²⁷Hei hihimo to mangkodokoꞌi hingkeꞌna mokonaꞌ i lumbumi, hangangaa mewali duluna hibali haduo hawiꞌ.

²⁸Hangangaa ipetuntuikei waliane Anaꞌ Manusiaꞌ, alaꞌ tungkaihaNa humei pe duniaꞌ hieꞌe hawaꞌi hingkeꞌna nirewuꞌI, angkana hingkeꞌna mewaliꞌI toperewu hei mampewei wotaNa nirokoꞌ hingkeꞌna woriꞌ toaꞌ Nohompoꞌ ka pehuku dosara.”

²⁹Kopolairalu hi Yesu hante topeguruNa ka kota Yeriko, woriꞌ toaꞌ metuntu i iohi.

³⁰I patengkaꞌara, uwaꞌhi roduo tobilo to mahura i hiri lala. Korobahaꞌnalu kohiYesuna to moliu, moloaꞌhi, rotiꞌi, “Pueꞌ, muleꞌna datu Daudi! Ipokarimaka wongkenaꞌ!”

³¹Woriꞌ toaꞌ to mokamorokihi, rotiꞌi, “Mondiiꞌkei!” Angkana tobilo tiꞌo mewowoiluhi pedeꞌ ropokobue, rotiꞌi, “Pueꞌ, muleꞌna datu Daudi! Ipokarimaka wongkenaꞌ!”

³²Meꞌohaꞌmo hi Yesu, Nowowoihi, honiꞌi Noteneihi, “Hapo to ikodokoꞌikei Kuwali pe ingkei?”

³³Mehoniꞌhi, “Pueꞌ, kikodokoꞌi mpololeke pangkiꞌ!”

³⁴Marima laline hi Yesu pe iohi, honiꞌi Norama matare. Kaliuꞌhi pangkiꞌ, hei metuntuhi pe Io.