Read Rampi Matius 21 Bible Online

Matius 21 - Rampi bible

Matius 21

¹Dodungkumo hi Yesu hante topeguruna i kota Yerusale, moliuhi i bolaꞌ Bepage[28] to i biri Saitu.[29] Itoꞌo, hi Yesu morumbaꞌmo roduo ka lumbura topeguruNa medulu,

²Notiꞌikihi, “Mekahimokei pe bolaꞌ to hingkiꞌ tohua hieꞌe, hei hingkiꞌ iꞌokiꞌkei hambaꞌa kalide hante anaꞌna tehiluꞌ itoꞌo. Iꞌuweꞌmokei honiꞌi iruiꞌkei humei rombaꞌana.

³Ane uwaꞌ to hingkiꞌ moꞌopikei, itiꞌikikei, ‘Pueꞌ mamparaluꞌi rombaꞌana. Hingkiꞌ Nopopahuliꞌlukikei hantudoꞌ.’ ”

⁴Tiꞌo mewali hingkeꞌna tebuhoꞌi hapo to notiꞌi nabi hampiha waheꞌe:

⁵“Itiꞌikimohi pe toaꞌ to meꞌohaꞌ i biri Sio i kota Yerusale: Elekei, tiꞌomo humei Datumi! Io mengkaꞌiwowoiꞌ, Io melambaꞌ hambaꞌa kalide. Hambaꞌa kalide to moleaꞌ tene.” [30]

⁶Mewaliꞌ, noloumohi topeguruNe to roduo tiꞌo, ropetuntuimo mpuꞌu tiꞌo to notiꞌikihi hi Yesu.

⁷Kalide to ntoliꞌanaꞌhi tiꞌo rokomi pe hi Yesu hei rolampii jubara, honiꞌi melambaꞌmo hi Yesu i kalide tiꞌo.

⁸I patengkaꞌna hi Yesu, woriꞌhi mpololeke toaꞌ mowuraꞌ jubara i lumbu lala to hingkiꞌ Nopoliuhi. Hantenaꞌhi moroahi daꞌa loti to motaweꞌ hei rotaleꞌ i lumbu lala, tandaꞌ pepokodeꞌra pe Io.

⁹Woriꞌhi woꞌo to metuntu pe hi Yesu, uwaꞌhi to medulu, uwaꞌ woꞌo to kamuri. Moloaꞌ-loaꞌhi nturusi, rotiꞌi: “Hosana! Topokodeꞌmo muleꞌne datu Daudi! Pueꞌ Ala mobarakati Toaꞌ to hupaꞌ to mewali rumbaꞌaNa! Hei topokodeꞌmo Pueꞌ Ala to i suruga!” [31]

¹⁰Pekahinalu hi Yesu pe kota Yerusale, maroaꞌmohi tumpu bolaꞌ hei mometenei-teneihi, rotiꞌi, “Hihimoreꞌito to hupaꞌ?”

¹¹Rohoniꞌ toaꞌ to metuntu pe Io, “Iomo hieꞌe hi Yesu, haduo nabi to ka Nasareꞌ i woiꞌ Galilea.”

¹²Katoꞌo, mekahimo hi Yesu pe tanobaꞌa Tambina Pueꞌ Ala. Itoꞌo, Io mobue lekiꞌ-lekiꞌna toaꞌ to mobaluꞌ-baluꞌ. Nodungkamo meja-meja potopua doiꞌ, hei Nodungka woꞌo pahurahare to mampobaluꞌ tinti kokou.

¹³Notiꞌikihi, “I lali Suraꞌ Mangkolehi, Pueꞌ Ala mantiꞌi waheꞌe: ‘TambingKu hangangaa mewali tambi pekokaeha.’ Angkana ipopewalilukei tambi porampuana topanako!”

¹⁴I Tambina Pueꞌ Ala, toaꞌ tobilo hante tokohu hupaꞌ pe hi Yesu, hei Nopokoꞌoriꞌihi.

¹⁵Angkana tutuꞌ-tutuꞌ tadulako mpenomba hante guru-guru agama, bukotahi mampeꞌele tandaꞌ kuasaꞌ to nowali hi Yesu tiꞌo. Hei koiꞌ pekirire pahori oꞌanaꞌhi i lali Tambina Pueꞌ Ala to moloaꞌ-loaꞌhi mantiꞌi, “Topokodeꞌmo muleꞌne datu Daudi!”

¹⁶Iomo horiana rotiꞌiki hi Yesu, “Hawaꞌireꞌi Ihori hapo to rotiꞌi oꞌanaꞌ tiꞌo?” Hi Yesu mehoniꞌ, “Kuhorilu. Hawaꞌkeireꞌi ibasa hapo to teꞌukiꞌ i lali Suraꞌ Mangkolehi? Itoꞌo teꞌukiꞌ waheꞌe: ‘Pueꞌ Ala mampoturuꞌmohi oꞌanaꞌ hante himidoꞌ mampasuwu lolita pepokodeꞌ.’ ” [32]

¹⁷Katoꞌo, nopolihimohi hi Yesu honiꞌi molai ka Yerusale, nolou mohamini pe bolaꞌ Betania.[33]

¹⁸Poꞌonina mihoꞌolu-olu, hi Yesu hante topeguruNa mahuliꞌmohi nolou pe Yerusale. Tempo tiꞌo woꞌo, biloramo hi Yesu.

¹⁹I hiri lala, Io pangkiꞌ hapongko loti ara. Noloumo pe tuiꞌna, Nopaliꞌ wuaꞌne, angkana hawaꞌi uwaꞌ howeꞌ haꞌanu. Taweꞌnalu to uwaꞌ. Iomo horiana hi Yesu motundaꞌ loti tiꞌo, Notiꞌi, “Mepongka ando hieꞌe, hamboaꞌmoko hingkiꞌ mowuaꞌ!” Loti ara tiꞌo kaliuꞌ molau hei bani.

²⁰Koroꞌokiꞌnalu topeguruNahi hapo to pewali tiꞌo, ropolemenia mpololeke horiana rotiꞌi, “Hawaꞌi mekahi akala loti tiꞌo kaliuꞌ molau hei bani!”

²¹Nohoniꞌ hi Yesu, “Hingkeꞌna ibahaꞌkei: ane marohoꞌi pepoꞌohimi hei hawaꞌi mororangko lalimi, wadikei woꞌo mowali hibali to Kuwali i loti tiꞌo. Hingkoweꞌ biri tiꞌo, hiniꞌ ipohawaꞌkikei, itiꞌikei, ‘Tehinimoko, hei monawuꞌko pe tahiꞌ!’ Bateꞌna hingkiꞌ mewali.

²²Hapolu to iperapiꞌkei i lali pekokaemi, ane ipoꞌohikei hingkiꞌ itorimokei.”

²³Uko tiꞌo, hi Yesu mekahi i lali tanobaꞌa Tambina Pueꞌ Ala hei mepoturuꞌ. KolentuꞌaNa mepoturuꞌ, hupaꞌmohi tutuꞌ-tutuꞌ tadulako mpenomba hante tomotodi-tomotodira toYahudi, meꞌitano pe Io, rotiꞌi, “Itiꞌikika, Ka imbo kuasaꞌMa mowali tiꞌo? Hei himo to mampaꞌaniKo kuasaꞌ tiꞌo?”

²⁴Nohoniꞌ hi Yesu, “Uwaꞌ woꞌo halangkaꞌ to Kupeꞌitanoki pe ingkei. Ane ihoniꞌkei peꞌitanongKa, honiꞌi Kutiꞌikikei kohihimona to mampaꞌaniꞌA kuasaꞌ mowali lekiꞌ-lekiꞌna tiꞌo.

²⁵PeꞌitanongKu waheꞌe: ka imbo kuasaꞌne hi Yohanes moriu toaꞌ? Ka Pueꞌ Ala, ba ka toaꞌ?” Mororapaꞌmohi tadulakore toYahudi hei rotiꞌi, “Hohumbomo kotohoniꞌne peꞌitanoNa? Ane totiꞌi ka Pueꞌ Ala kuasaꞌne hi Yohanes tiꞌo, hingkiꞌ notiꞌikiki hi Yesu, ‘Ane hatoꞌoꞌi, mahamporeꞌi hinaꞌ hawaꞌkei mampoꞌohi poturuꞌna hi Yohanes?’

²⁶Angkana ane totiꞌi ka toaꞌlu kuasaꞌne, morokaꞌki ka toaꞌ to woriꞌ, alaꞌ woriꞌhi to mampoꞌohi hi Yohanes tiꞌo haduo nabi.”

²⁷Mewaliꞌ, rohoniꞌ, “Hawaꞌi kibahaꞌ.” Iomo horiana hi Yesu mampatiꞌikihi huliꞌ, “Ane hatoꞌoꞌi, hawaꞌkei woꞌo hingkiꞌ Kutiꞌiki himo to mampaꞌaniꞌA kuasaꞌKu mowali lekiꞌ-lekiꞌna tiꞌo!”

²⁸Nopololiu hi Yesu lolitaNe pe tadulako-tadulako agama Yahudi, Notiꞌi, “Hohumbo pahuami noniuꞌ i pandiriꞌ hieꞌe? Uwaꞌ haduo umoꞌ, roduo anaꞌne, hamoloꞌ tomaꞌani. Hampiha tempo, io nolou pe anaꞌna tokokaꞌ hei notiꞌi, ‘Anaꞌku, akoko majama i kineteꞌ anggoroꞌ ando hieꞌe.’

²⁹Io mehoniꞌ, ‘Hawaꞌa hiniꞌ, umoꞌ!’ Angkana koꞌukoana tewolihi laline, hei notuntunilu hawaꞌne umoꞌna.

³⁰Katoꞌo, nolou womo umoꞌne tiꞌo pe anaꞌna tohinoneeꞌ, hei notiꞌi, ‘Anaꞌku, akoko majama i kineteꞌ.’ Mehoniꞌ anaꞌne tiꞌo, ‘Ioꞌ, umoꞌ’, angkana hawaꞌi nolou!”

³¹Hi Yesu meꞌitano womo pe tadulakora toYahudi, Notiꞌi, “Mewaliꞌ, ka oꞌanaꞌ to roduo tiꞌo, himo to mampetuntui hawaꞌne umoꞌra?” Rohoniꞌ tadulakora toYahudi, rotiꞌi, “Tokokaꞌ.” Notiꞌi hi Yesu, “Tuꞌu pehoniꞌmi. Angkana Kutiꞌikikei: toaꞌ to nirekeꞌ hawaꞌi moromiꞌ, to hibalihi toperuruꞌ sima hei towoweꞌe to mekokomaꞌi waliana, iohi to himpodulu notorimo Pueꞌ Ala mewali toaꞌNa i lali PoparentaNa, ka ingkei.

³²Alaꞌ hawaꞌkei mampoꞌohi lolitana hi Yohanes Toperiu to mampokonontokikei lala to mononto. Angkana to mepoꞌohi iomo, toperuruꞌ sima hante towoweꞌe to mekokomaꞌi waliara. Ibahaꞌmokei kopepoꞌohiramo, angkana hawaꞌkei mengkatobaꞌ ka waliami hei hawaꞌkei woꞌo mampoꞌohi poturuꞌna hi Yohanes.”

³³Nopololiu hi Yesu lolitaNe pe tadulako-tadulako agama Yahudi, Notiꞌi, “Uwaꞌ haduo toaꞌ to motudoꞌi kineteꞌna hante anggoroꞌ. Kineteꞌna tiꞌo nobontoꞌ mantuleliꞌ, hei mowoloꞌ woiꞌ nowali pebolaꞌana popiꞌiana anggoroꞌ hei moꞌaro woꞌo lolangkaꞌ pampodaꞌana. Uko tiꞌo, norumbaꞌmo haꞌumbora duo toaꞌ majama hei haseleꞌna rodolaꞌ-dolaꞌ intu, honiꞌi molaimo nolou pe woiꞌ to moꞌela

³⁴Hingkiꞌ hupaꞌmo tempona morupuꞌ wuaꞌ anggoroꞌ, norumbaꞌmohi haꞌumbora hawiꞌne nolou merapiꞌ dolaꞌna ka topajama kineteꞌna tiꞌo.

³⁵Angkana topajama tiꞌo mohokiꞌhi hawiꞌ to nirumbaꞌ: haduo nikondo, haduo nilubaꞌ watu, hei haduo nirokoꞌ.

³⁶Iomo horiana tumpu kineteꞌ tiꞌo morumbaꞌ womo hawiꞌna to ntaniꞌna, woworiꞌhi ka to nolou uluꞌ-uluꞌna. Angkana rowalilu woꞌo hatoꞌo.

³⁷Koꞌukoana, anaꞌnamo hadoduona to norumbaꞌ nolou pe topajamanahi kineteꞌna. Notiꞌi tumpu kineteꞌ i lalina, ‘Bateꞌna mengkoruꞌhi pe anaꞌku.’

³⁸Angkana, i tempora topajama kineteꞌ pangkiꞌ anaꞌna tiꞌo, morapaꞌmohi, rotiꞌi, ‘Hintumo humei anaꞌne, io to hingkiꞌ mewali tumpu manaꞌ kineteꞌ hieꞌe. Aginamo torokoꞌmo woꞌo, hingkeꞌna kineteꞌna hieꞌe toꞌompuiꞌi.’

³⁹Mewaliꞌ, rohokiꞌmo mpuꞌu anaꞌne tiꞌo, roruiꞌ nolou pe howali kineteꞌ honiꞌi rorokoꞌ.”

⁴⁰Uko tiꞌo, nopeꞌitanoki hi Yesu, “Mewaliꞌ, ane mehupaꞌmoꞌi tumpu kineteꞌ, hapo to hingkiꞌ nowali pe topajama kineteꞌna?”

⁴¹Rohoniꞌ, “Mononto io hingkiꞌ morokoꞌ toaꞌ to kodake lalira tiꞌo, hei kineteꞌna hingkiꞌ nopepaꞌaniki pe topajama ntaniꞌna to hiniꞌ modolaꞌ rasiꞌna i tempona morupuꞌ wuaꞌna.”

⁴²Notiꞌikihi hi Yesu, “Handoaꞌkeireꞌi ibasa hapo to teꞌukiꞌ i lali Suraꞌ Mangkolehi to mantiꞌi waheꞌe: ‘Watu to notube topoꞌaro tambi, watu tiꞌo to mewali pahura tambi. Tiꞌo mewali motuntuni peleihana Pueꞌ Ala, hei moromiꞌ mpololeke hapo to nowali Pueꞌ Ala tiꞌo.’ ” [34]

⁴³Notiꞌi womo hi Yesu, “Dolaꞌmi i lali poparentana Pueꞌ Ala hingkiꞌ niroa ka ingkei hei nipaꞌaniki roboꞌ ntaniꞌna to tuꞌu-tuꞌu mampetuntui peleihana Pueꞌ Ala. [

⁴⁴Hihimo to monawuꞌ i watu hieꞌe hingkiꞌ morutu, hei himo to nopihi watu hieꞌe hingkiꞌ morere.”]

⁴⁵I tempora tutuꞌ-tutuꞌ tadulako mpenomba hante toParisi pahori pandiriꞌ to nopowute hi Yesu, robahaꞌ koꞌiora to notungkai lolitaNe tiꞌo.

⁴⁶Iomo horiana ropaliꞌ nturusi lalane hingkeꞌna mohokiꞌhi hi Yesu, angkana hawaꞌhi podehoꞌ alaꞌ mangkorokaꞌhi toaꞌ to woriꞌ, alaꞌ toaꞌ to woriꞌ mampoꞌohi hi Yesu iomo haduo nabi.