Read Rampi Matius 22 Bible Online

Matius 22 - Rampi bible

Matius 22

¹Mololita womo hi Yesu pe tadulako-tadulako agama Yahudi, Nopowutekihi haꞌumbora pandiriꞌ.

²Notiꞌi, “Poparentana Pueꞌ Ala hibali pandiriꞌ hieꞌe: Uwaꞌ haduo datu to mowali susaꞌ pepohamoko i anaꞌna tomaꞌani.

³Datu tiꞌo mampohawaꞌkimo hawiꞌnahi nolou mowowoi toaꞌ to nopantiꞌikimo hingkeꞌna mehupaꞌmohi pe posusaꞌa pepohamoko tiꞌo. Angkana to niwowoi, hawaꞌhi hiniꞌ mehupaꞌ.

⁴Iomo horiana norumbaꞌ womohi hawiꞌne to ntaniꞌna, notiꞌikihi, ‘Ipowutekei pe toaꞌ to niwowoimo: Morokoꞌmoꞌa gapiꞌ to molompoꞌ, lekiꞌ-lekiꞌna timomomo. Noloumokei hinewowoꞌena pe posusaꞌa pepohamoko!’

⁵Angkana lekiꞌ-lekiꞌna toaꞌ to niwowoi hawaꞌhi mobuhoꞌi pewowoi tiꞌo. Haduo-haduo nolouluhi pe jamara: Uwaꞌhi to nolou pe kineteꞌra, uwaꞌhi woꞌo to nolou pe jamara ntaniꞌna.

⁶Uwaꞌhi woꞌo to mohokiꞌ hawiꞌna datu tiꞌo to ako mewowoi, nikondo hei nirokoꞌhi.

⁷Konohorinalu datu hapo to pewali, bukotamo mpololeke, io horiana norumbaꞌmohi surodadune nolou morokoꞌ toaꞌ to merorokoꞌ tiꞌo hei mohunu bolaꞌre.

⁸Uko tiꞌo, nowowoi womohi hawiꞌne to ntaniꞌna, notiꞌikihi, ‘Posusaꞌ pepohamoko timomomo, angkana toaꞌ to kuwowoihi hingkenia, hamboaꞌmohi masipatoꞌ humei pe posusaꞌ hieꞌe.

⁹Mewaliꞌ, noloumokei pe lekiꞌ-lekiꞌna pohidupaꞌana lala, hei hihimolu to ikohidupaꞌkikei, iwonahi humei pe posusaꞌ pepohamoko hieꞌe.’

¹⁰Noloumohi mpuꞌu hawiꞌne tiꞌo pe pohidupaꞌa lala, mowowoi lekiꞌ-lekiꞌna toaꞌ to rokohidupaꞌki itoꞌo. Hawaꞌi ropopoꞌoriꞌori to moromiꞌ waliara ba to kodake. Koꞌukoana, buhaꞌ mpololeke tolori i tambi pepohamokoa tiꞌo.

¹¹Uko tiꞌo, datu tiꞌo nolou mampohidupaꞌki tolori. Angkana noꞌokiꞌ i lumbura, uwaꞌ haduo to hawaꞌi mopakeꞌ baduꞌ mposusaꞌ.

¹²Notiꞌi datu, ‘Ee! Mahamporeꞌi hinaꞌ mekahiko pe tambi posusaꞌa, hawaꞌko mopakeꞌ baduꞌ posusaꞌ?’ Toaꞌ tiꞌo monondiiꞌlu.

¹³Katoꞌo, datu tiꞌo moparentahi hawiꞌna, notiꞌi, ‘Hiluꞌkei kapuꞌne hante korawena, honiꞌi nitube pe howali to mokorindi! Itoꞌo, hingkiꞌ meꞌola hei maporiꞌ mpololeke nohori.’ ”

¹⁴Nopotutu hi Yesu pandiriꞌ tiꞌo waheꞌe: “Woriꞌ mpololeke toaꞌ to nowowoi Pueꞌ Ala, angkana hawaꞌhi woriꞌ to Noꞌuwiꞌ mewali toaꞌNa i lali PoparentaNa.”

¹⁵Uko tiꞌo, molaimohi toParisi. Morapaꞌmohi mampaliꞌ lala mampomonawuꞌ hi Yesu moliu peꞌitanora to masusa.

¹⁶Iomo horiana rorumbaꞌmo haꞌumbora topegurure hei haꞌumbora toaꞌna datu Herode hingkeꞌna nolouhi meꞌitano pe hi Yesu noniuꞌ i pobaiari sima. Kohupaꞌra pe hi Yesu, rotiꞌiki, “Guru, kibahaꞌmo koꞌIngkona toaꞌ to mononto. MepoturuꞌKo i kotuꞌu-tuꞌuana hapo peleihane Pueꞌ Ala. Hawaꞌi Ipetuntui pampekirire ba himolu, alaꞌ hawaꞌKo mampopoꞌoriꞌori toaꞌ,

¹⁷iomo horiana kiperapiꞌ hingkeꞌna Itiꞌikika hohumbo pahuaMa: motuntuni atura agamanta, ba masipatoꞌki mobaiariki sima pe Datu Ngkodeꞌ i Roma, ba hawaꞌi?”

¹⁸Angkana nobahaꞌmo hi Yesu tungkaihane lalira to kodake, iomo horiana Notiꞌikihi, “Mampetomoromiꞌlukei mpuꞌu! Mahamporeꞌi hinaꞌ ipaliꞌkei komasalaꞌna lolitangKu?

¹⁹PohumeikiꞌA dulu doiꞌ to biasa nipakeꞌ mobaiari sima.” Mewaliꞌ, nipaꞌanimo mpuꞌu hampepaꞌ doiꞌ peraꞌ.

²⁰Meꞌitano hi Yesu, “Lentena hante konaꞌna himo to uwaꞌ i doiꞌ hieꞌe?”

²¹Rohoniꞌ, “Lentena hante Konaꞌna Datu Ngkodeꞌ i Roma.” Notiꞌi hi Yesu, “Ane hatoꞌoꞌi, ipaꞌanikikei Datu Ngkodeꞌ i Roma hapo to masipatoꞌ nipaꞌanikiꞌi, hei ipaꞌanikikei Pueꞌ Ala hapo to masipatoꞌ nipaꞌaniki Pueꞌ Ala.”

²²Korohorinalu pehoniꞌne hi Yesu, lomeniahi, iomo horiana molaimohi mampolihi hi Yesu.

²³I ando tiꞌo woꞌo, uwaꞌhi haꞌumbora toSaduki to hupaꞌ pe hi Yesu. ToSaduki tiꞌo, iomohi haꞌumbora tadulako agama Yahudi to mampoꞌohi toaꞌ to mahi hawaꞌi hingkiꞌ nipatuwuꞌ huliꞌ.[35]

²⁴Kohupaꞌra toSaduki tiꞌo, rotiꞌi, “Guru, i Hawaꞌna hi Musa mepoturuꞌ waheꞌe: ane haduo tomaꞌani mahi, angkana hawaꞌi uwaꞌ pemuleꞌane, halalina hangangaa mampohantambi tobembaꞌ tiꞌo, hingkeꞌna uwaꞌ muleꞌne maꞌanina to mahi.

²⁵Mewaliꞌ, uwaꞌhi pitu topohalali, hamoloꞌ tomaꞌani. Tokokaꞌ mohantambimo. Handoaꞌi tene uwaꞌ muleꞌne, mahimo. Mewaliꞌ, tobembaꞌ tiꞌo nokohamokoi womo hineeꞌna.

²⁶Handoaꞌi tene woꞌo uwaꞌ muleꞌne, mahimo. Hatoꞌo woꞌo to mewali ikotolu duona wute i kopituna.

²⁷Koꞌukoana, mahimo woꞌo towoweꞌe tiꞌo.

²⁸Mewaliꞌ, ane tuꞌu-tuꞌuꞌi intu tuwuꞌ huliꞌ lekiꞌ-lekiꞌne to mahi, himo to mewali maꞌanine towoweꞌe tiꞌo, alaꞌ pitumohi to mampohantambiꞌi?”

²⁹Nohoniꞌ hi Yesu, “Salaꞌ mpololeke pekirimi, alaꞌ hawaꞌi ibahaꞌkei hapo to teꞌukiꞌ i lali Suraꞌ Mangkolehi, hei hawaꞌi woꞌo ibahaꞌkei noniuꞌ i kuasaꞌna Pueꞌ Ala.

³⁰Alaꞌ ane tuwuꞌhi huliꞌ toaꞌ to mahi, kotuwuꞌra hibali kotuwuꞌra malaꞌeka i lali suruga, palaihana: hamboaꞌmo uwaꞌ kohamoko.

³¹Handoaꞌireꞌi ibasakei i lali Suraꞌ Mangkolehi to mampokononto kotuwuꞌra huliꞌ to mahi? Notiꞌi Pueꞌ Ala waheꞌe:

³²‘Akumo Pueꞌ Ala to ropenombai nturusi hi Burahima, hi Isaki, hante hi Akoꞌ.’ Mewaliꞌ ka lolitana Pueꞌ Ala tiꞌo, tobahaꞌ mpololeke hi Burahima, hi Isaki hante hi Akoꞌ, bateꞌra tuwuꞌhi tene, alaꞌ Pueꞌ Ala tiꞌo handoꞌio to nopenombai toaꞌ to mahi, angkana Pueꞌ Ala tiꞌo to nopenombai toaꞌ to tuwuꞌ.”

³³Lemeniahi mpololeke toaꞌ to woriꞌ pahori poturuꞌna hi Yesu tiꞌo.

³⁴Ikorohorinalu toParisi, toSaduki tiꞌo hamboaꞌmo robiaꞌ mohoniꞌ hi Yesu, iomo horiana toParisi tiꞌo morapaꞌ womohi mampaliꞌ lala mampomonawuꞌ hi Yesu. Katoꞌo nolouhi pe hi Yesu.

³⁵Hei haduo guru agamana toParisi ka lumbura mampehohongkeꞌ mampomonawuꞌ hi Yesu moliu peꞌitanona, notiꞌi,

³⁶“Guru, ka lekiꞌ-lekiꞌna hawaꞌ i lali Aturana hi Musa, hawaꞌ hapo to hangangaa topohimpodulu mpololeke?”

³⁷Nohoniꞌ hi Yesu, “Hawaꞌ to ka isaꞌ hei to nipohimpodulu iomo: ‘Ipokarimakei Pueꞌ Ala Pueꞌmi, hante kopopuhiꞌna lalimi, hante pekirimi mpololeke hei lekiꞌna rohomi.’

³⁹Hei hawaꞌ to korolangkaꞌna to nipohimpodulu woꞌo iomo: ‘Ipokarimamokei toaꞌ ntaniꞌne hibali pampokarimami wotami hadoduomi.’

⁴⁰Lekiꞌ-lekiꞌna Hawaꞌna hi Musa hante poturuꞌra nabi-nabi pongkana ka hawaꞌ to rolangkaꞌ tiꞌo.”

⁴¹Kolentuꞌara tene toParisi hirampu itoꞌo, hi Yesu meꞌitano pe iohi, Notiꞌi,

⁴²“Motuntuni pahuami: himo tiꞌo Datu Topohompoꞌ to nodandi Pueꞌ Ala hampiha? Io muleꞌna himo?” Rohoniꞌ, “Muleꞌna datu Daudi.”

⁴³Notiꞌi hi Yesu, “Mewaliꞌ, mahamporeꞌi hinaꞌ notiꞌi hi Daudi, muleꞌna iomo Pueꞌ to nopenombai? Alaꞌ hampiha nokomi perandana Inohaꞌ Mangkolehi, hi Daudi mampololita noniuꞌ i Datu Topohompoꞌ waheꞌe:

⁴⁴Pueꞌ Ala mololita pe Pueꞌku to kupenombai, Notiꞌi: ‘MahuramoKo tinaꞌ i koanangKu, wute Kupopengkoruꞌhi lekiꞌ-lekiꞌne poniꞌMu pe Ingko.’ [36]

⁴⁵Mewaliꞌ, ane Datu Topohompoꞌ iomo Pueꞌ to nopenombai Daudi, hohumboreꞌi horiana mewali muleꞌna Daudi?”

⁴⁶Hawaꞌi uwaꞌ howeꞌ haduo to nobiaꞌ mohoniꞌi. Mepongka i ando tiꞌo, hamboaꞌmo uwaꞌ howeꞌ haduo to podehoꞌ meꞌitano ba hapo-hapo pe hi Yesu.