Read Rampi Matius 23 Bible Online

Matius 23 - Rampi bible

Matius 23

¹Katoꞌo, hi Yesu mampatiꞌikihi topeguruNa hante toaꞌ to woriꞌ, Notiꞌi,

²“Guru-guru agama hante toParisi, iomohi to uwaꞌ kuasaꞌre mampoturuꞌkei aturana hi Musa,

³iomo horiana hangangaa ituntunikei lekiꞌ-lekiꞌne to nipoturuꞌkikei, angkana inioꞌ ipetuntuikei waliare, alaꞌ iohi hadoduora hawaꞌhi mampetuntui hapo to ropepoturuꞌki.

⁴Iohi mampomasusahi toaꞌ hante atura hei adaꞌ agama to madori, angkana hawaꞌhi kahampiha mosulungi toaꞌ hingkeꞌna motuntunihi atura hante adaꞌ tiꞌo.

⁵Woriꞌ waliare toparisi hante guru-guru agama to mampetoromiꞌlu. Rapaꞌna, iohi mampodokiꞌhi kokatoꞌ pamporideꞌa Suraꞌ Mangkolehi i rouꞌra. Hatoꞌo woꞌo mampodokiꞌhi renda-renda i wida petangkoniꞌara, ropokurauꞌ hingkeꞌna rotiꞌi toaꞌ ntaniꞌna maroho mpololeke poꞌagamare.

⁶Motanaꞌhi ane nipopahurahi i pahura to moromiꞌ i posusaꞌa hante pahura to niꞌadaꞌi i tambi penombaha.

⁷Motanaꞌhi ane noꞌadaꞌihi toaꞌ i imbo-imbolu pororampua, hei ane niwowoihi ‘Guru.’

⁸Angkana ingkei topegurungKu, inioꞌkei mangkodokoꞌi niꞌadaꞌi hante niwowoi ‘Guru’. Alaꞌ haduolu Gurumi hei ingkei lekiꞌ-lekiꞌ, hibalilukei topohalali.

⁹Inioꞌ woꞌo iwowoikei toaꞌ i duniaꞌ hieꞌe ‘Umoꞌ’, tandaꞌ peꞌadaꞌimi, alaꞌ Umoꞌmi haduolu, iomo Umoꞌ to uwaꞌ i suruga.

¹⁰Hei inioꞌkei woꞌo mangkodokoꞌi niwowoi ‘Tadulako’, alaꞌ Tadulakomi haduolu, iomo Datu Topohompoꞌ.

¹¹Hihimo to niꞌadaꞌi i lumbumi, iomo to mewali toperewahimi.

¹²Toaꞌ to mampokokodeꞌ bateꞌna hingkiꞌ nipariwoiꞌ, hei toaꞌ to mengkaꞌiwowoiꞌ bateꞌna hingkiꞌ nopokodeꞌ Pueꞌ Ala.

¹³Hurewuꞌkei, guru-guru agama hante toParisi! Mampetomoromiꞌlukei! Ingkei to mohida lalane toaꞌ to dokoꞌhi mewali toaꞌna Pueꞌ Ala i poparentaNa, angkana ingkei hadoduomi hawaꞌkei hiniꞌ mewali toaꞌNa, hei ilowaꞌkei woꞌo toaꞌ to mangkodokoꞌi mewali toaꞌna Pueꞌ Ala. [

¹⁴Hurewuꞌkei, guru-guru agama hante toParisi! Mampetomoromiꞌlukei! Itiꞌikei mosulungikei towoweꞌe tobembaꞌ to merima-rima tuwuꞌra, hantarowae ibagiuꞌlukei hei iroakei tambire. Uko tiꞌo, mekokaekei ngkurauꞌ hingkeꞌna motutuꞌilukei waliami to kodake tiꞌo. Iomo horiana hingkiꞌ makaja konihukumi][37]

¹⁵Hurewuꞌkei, guru-guru agama hante toParisi! Mampetomoromiꞌlukei! Ipenoꞌoimokei matengkaꞌ moꞌela hei mewute tahiꞌ, hingkeꞌna pahualukei haduo toaꞌ to mekahi pe agamami hei mewali topegurumi, hei ipopewalikei toaꞌ to meliu mpololeke komadosane ka ingkei hei masipatoꞌ nipelubaꞌ pe naraka.

¹⁶Hurewuꞌkei! Hibalikei tobilo to moranda toaꞌ ntaniꞌna! Mepoturuꞌkei waheꞌe: ane uwaꞌ toaꞌ to mosumpa i lali konaꞌna Tambina Pueꞌ Ala, itiꞌikei hawaꞌi tehiluꞌ hante sumpana tiꞌo. Angkana ane mosumpaꞌi i lali konaꞌna luma bulawa to i lali Tambina Pueꞌ Ala, io tehiluꞌ hante sumpana tiꞌo.

¹⁷Bebekei hante bilokei mpololeke! Ba itiꞌikei kodeꞌ tene dumbuꞌne bulawa hintina Tambina Pueꞌ Ala? Kotuꞌuana, Tambina Pueꞌ Ala tiꞌo to mampomangkolehi luma bulawa to uwaꞌ itoꞌo.

¹⁸Mepoturuꞌkei woꞌo waheꞌe: ane uwaꞌ toaꞌ to mosumpa i lali konaꞌna potutua popenomba to i lali Tambina Pueꞌ Ala, hawaꞌi tehiluꞌ hante sumpana tiꞌo. Angkana ane mosumpaꞌi i lali konaꞌna popenomba to nihunu i womboꞌ potutua tiꞌo, bateꞌna tehiluꞌ hante sumpana tiꞌo.

¹⁹Bilokei mpololeke! Ba itiꞌikei kodeꞌ tene dumbuꞌne popenomba hintina potutua popenomba? Kotuꞌuana, potutua tiꞌomo to mampomangkolehi popenomba to uwaꞌ i womboꞌna.

²⁰Hihimo toaꞌ to mosumpa i lali konaꞌna potutua popenomba, palaihana to notiꞌi tepekahi woꞌo popenomba to nihunu i womboꞌna.

²¹Hei hihimo toaꞌ to mosumpa i lali konaꞌna Tambina Pueꞌ Ala, palaihana to notiꞌi tepekahi woꞌo Pueꞌ Ala to meꞌohaꞌ itoꞌo.

²²Hei hihimo toaꞌ to mosumpa i lali konaꞌna suruga, palaihana to notiꞌi tepekahi woꞌo pahura kodatuana Pueꞌ Ala hei to mahura itoꞌo.

²³Hurewuꞌkei, guru-guru agama hante toParisi! Mampetomoromiꞌlukei! Hingkoweꞌ huꞌa-huꞌa to kokiuꞌ to hibali hohore, sederei hante rampa-rampa ntaniꞌna, nipopenomba hadolaꞌ hampuluꞌ pe Pueꞌ Ala motuntuni aturana hi Musa.[38] Angkana atura to hangangaa nipohimpodulu hawaꞌi ipetuntuikei: waliami hangangaa mononto i toaꞌ ntaniꞌna, mampokarimakei hangko awami, hei mobuhoꞌikei dandimi. Kotuꞌuana, atura to nipohimpodulu tiꞌo to hangangaa ipetuntuikei mpololeke, angkana inioꞌ woꞌo ipohentekei pampetuntuimi i atura to ntaniꞌna.

²⁴Hibalikei tobilo to moranda toaꞌ ntaniꞌna, ingkei hibalikei toaꞌ to modoto mampopolai olaliꞌ ka uwai to iꞌinukei, angkana unta iliomikei.

²⁵Hurewuꞌkei, guru-guru agama hante toParisi! Mampetomoromiꞌlukei! Ingkei hibalikei toaꞌ to mowaheꞌ paꞌinua hante taboꞌ i howalinalu, angkana lalimi buhaꞌ hante kokodakea hei mangkohokalukei nturusi lumana toaꞌ!

²⁶Ingkei toParisi, bilokei mpuꞌu! Hibali lalina paꞌinua hangangaa iwaheꞌkei, hatoꞌo woꞌo lalimi hangangaa ipomangkolehi dulu hingkeꞌna waliami hante pololitami mewali moromiꞌ.

²⁷Hurewuꞌkei, guru-guru agama hante toParisi! Mampetomoromiꞌlukei! Hibalikei petowua to niwewuilu niwewui to popuhiꞌ.[39] Howalina maranga niꞌokiꞌ, angkana i lalina buhaꞌ hante wuku to mahi hei woriꞌ langkaꞌ to mekokomaꞌi.

²⁸Hatoꞌo woꞌo ingkei. Waliami moromiꞌ niꞌokiꞌ, angkana lalimi hawaꞌi hatoꞌo. Topowutikei hei kodake waliami.

²⁹Hurewuꞌkei, guru-guru agama hante toParisi! Mampetoromiꞌlukei! Ikoromiꞌikei nturusi petowuare nabi-nabi hante toaꞌ to moromiꞌ i pampeꞌelena Pueꞌ Ala to tuwuꞌ hampiha.

³⁰Itiꞌikei, ‘Ane rapaꞌna uwaꞌka moꞌawa hante tododulungki hampiha, kehawaꞌka mampetuntui waliara morokoꞌ nabi-nabi.’

³¹Mewaliꞌ motuntuni lolitami tiꞌo, ipangakuꞌkei mpuꞌu koꞌingkeine muleꞌne toaꞌ to morokoꞌ nabi-nabi.

³²Mewaliꞌ, ipololiumokei waliare tododulumi tiꞌo!

³³Ingkei hieꞌe hante tododulumi hibalikei ule to moꞌupoꞌ. Ba ipekirikei hingkiꞌ himpolohoꞌkei ka konihukumi i lali naraka?

³⁴Tododulumi hampiha morokoꞌhi woriꞌ toaꞌ to mononto waliara, mepongka ka porokoꞌra hi Abeli, wute-wute i porokoꞌra nabi Sakaria anaꞌna hi Berekia. Io nirokoꞌ i tanobaꞌa Tambi Penombaha, i kohelaꞌna tambi to manobaꞌ tiꞌo hante meja potutua popenomba. Iomo horiana hingkiꞌ Kurumbaꞌhi nabi-nabi, toaꞌ to pobahaꞌ mpololeke pohawaꞌna Pueꞌ, hante guru-guru agama mampowute lolitangKu pe ingkei to tuwuꞌ hinewowoꞌena. Angkana uwaꞌ ka iohi to hingkiꞌ nirokoꞌ, uwaꞌhi to hingkiꞌ nipaku i loti momehulepe, uwaꞌhi to hingkiꞌ nikondo i lali tambi penombahami, hei uwaꞌhi woꞌo to hingkiꞌ nidapaꞌ wute pe bolaꞌ ntaniꞌna. Koꞌukoana, ingkei to tuwuꞌ hinewowoꞌena hingkiꞌ nihukukei notumba lekiꞌ-lekiꞌna dosara tododulumi hampiha alaꞌ morokoꞌhi toaꞌ to mononto i peꞌelena Pueꞌ Ala.

³⁶Tuꞌu mpololeke to Kutiꞌikikei: ingkei to tuwuꞌ hinewowoꞌena hingkiꞌ nihukukei alaꞌ waliami hante waliara tododulumi to kodake.”

³⁷“O, toYerusale, toYerusale! Mahamporeꞌi hinaꞌ irokoꞌkei nabi-nabi, hei mowatuikei toaꞌ to norumbaꞌ Pueꞌ Ala pe ingkei? Woriꞌ mpiha Kukodokoꞌi mampoꞌodaꞌkei hibali hinana manuꞌ to moriomouꞌi anaꞌna, angkana hawaꞌAkei itorimo.

³⁸Ipehoromuakei! Tambi penombahami hieꞌe hingkiꞌ nopolihi Pueꞌ Ala.

³⁹Hingkeꞌna ibahaꞌkei: hamboaꞌmoꞌA hingkiꞌ iꞌokiꞌkei wute hupaꞌ tempona hingkiꞌ itiꞌikei, ‘Pueꞌ Ala mobarakati toaꞌ to hupaꞌ, to mewali rumbaꞌaNa!’ ”