Read Rampi Matius 24 Bible Online

Matius 24 - Rampi bible

Matius 24

¹Uko mololita, hi Yesu mampolihi Tambina Pueꞌ Ala. TopeguruNahi mangkododungkuiꞌI hingkeꞌna rotidoꞌkiꞌI komarangane hante komarohona tambi tiꞌo.

²Notiꞌikihi hi Yesu, “Iꞌokiꞌmokei lekiꞌ-lekiꞌne tiꞌo. Hingkeꞌna ibahaꞌkei: lekiꞌ-lekiꞌna tiꞌo hingkiꞌ mokero. Hawaꞌi uwaꞌ howeꞌ haꞌanu watu to hingkiꞌ melobi i peꞌohaꞌana.”

³Uko tiꞌo, molaimo hi Yesu hante topeguruNa nolou pe biri Saitu. Kolentuꞌana hi Yesu mahura hadoduoNa, noloumohi topeguruNe meꞌitano pe Io, “Guru, hiwaꞌimbo Tambine Pueꞌ Ala hingkiꞌ nikero hibali to Itiꞌi hingkenia?” Hei meꞌitano womohi, rotiꞌi, “Hapo tandaꞌne kohingkiꞌ hupaꞌMu hei hapo tandaꞌne kotutuana duniaꞌ?”

⁴Nohoniꞌ hi Yesu, “Majaga-jagakei, hingkeꞌna hawaꞌkei nipokonawuꞌ,

⁵alaꞌ woriꞌ toaꞌ hingkiꞌ hupaꞌ hei mantiꞌi koꞌiora Datu Topohompoꞌ, hei woriꞌ toaꞌ to hingkiꞌ ropokonawuꞌ.

⁶Hingkiꞌ ihorikei topoponiꞌ, hei hingkiꞌ ihorikei woꞌo kareba i imbo-imbolu uwaꞌ to moponiꞌ, angkana inioꞌkei morokaꞌ. Lekiꞌ-lekiꞌna tiꞌo bateꞌna hingkiꞌ mewali {alaꞌ nopokonontomo Pueꞌ Ala}. Angkana lekiꞌ-lekiꞌna tiꞌo handoaꞌi tene tempona kotutuana duniaꞌ.

⁷Toharoboꞌ hingkiꞌ moponiꞌ hante toharoboꞌ to ntaniꞌna, kodatua hingkiꞌ moꞌewa kodatua to ntaniꞌna, hei i imbo-imbolu hingkiꞌ uwaꞌ tempo kobilora hei luanoko.

⁸Lekiꞌ-lekiꞌna tiꞌo hangkoꞌlu pepongkana. Komaporiꞌ tiꞌo hibali komaporiꞌ to nohori towoweꞌe to hingkiꞌ moꞌanaꞌ hei komaporiꞌna tiꞌo hingkiꞌ tetambai tene komakajane.

⁹I tempo tiꞌo, nokomi petuntumi pe Aku, roboꞌ-roboꞌna i humanele duniaꞌ hingkiꞌ mokabiriꞌkei. Hingkiꞌ nipeweikei pe topoparenta, hingkeꞌna nipoperima-rimakei hei nirokoꞌkei.

¹⁰Woriꞌ toaꞌ hingkiꞌ mosapuaka petuntura pe Aku. Uwaꞌ to hingkiꞌ mampewei halali hampepoꞌohira pe poniꞌra, hei woriꞌ toaꞌ to hingkiꞌ momepokoiꞌ.

¹¹Hingkiꞌ hupaꞌhi woꞌo woriꞌ nabi to hingkiꞌ mampomonawuꞌ woriꞌ toaꞌ.

¹²I tempo tiꞌo, hingkiꞌ tetambai kokodakere toaꞌ, wute hamboaꞌmo uwaꞌ komarimara i hangko awara.

¹³Angkana toaꞌ to motiko nturusi pepoꞌohira pe Aku wute i kotutuana, hingkiꞌ noposalamaꞌhi Pueꞌ Ala.

¹⁴Ane Kareba Moromiꞌ noniuꞌ i poparentana Pueꞌ Ala ropekarebaikimo i humanele duniaꞌ, hei toaꞌ i lekiꞌ-lekiꞌna roboꞌ pahorimo, honiꞌi hupaꞌ kotutuane duniaꞌ.”

¹⁵Nopololiu hi Yesu lolitonane, Notiꞌi, “Hampiha, nabi Daniel mampololita kohingkiꞌ uwaꞌna ‘Tokodake to Mampomokero’ to hingkiꞌ mokokomaꞌi Tambina Pueꞌ Ala. (Hihimo to mobasa lolita hieꞌe, hangangaa nopekiri moromiꞌ hapo palaihane!) Ane iꞌokiꞌkei to notungkai Daniel tiꞌo metotiꞌi i Tambina Pueꞌ Ala,

¹⁶aginamo toaꞌ to meꞌohaꞌ i woiꞌ Yudea mengkatuwuꞌhi mehilai nolou pe biri.

¹⁷Toaꞌ to kolentuꞌana mahura meꞌohaꞌ i dopiꞌ to marante, hampoliꞌmokei mekahi pe lali tambimi moroa hapo-hapo.

¹⁸Toaꞌ to kolentuꞌana i kineteꞌ, hampoliꞌmokei lebaꞌ mahuliꞌ nolou pe bolaꞌ moroa baduꞌmi. Hangangaa kaliuꞌmokei mehilai!

¹⁹Hingkiꞌ maporiꞌ mpololeke rohori towoweꞌe to mehinonaꞌi hante to mepoꞌomiꞌ anaꞌna.

²⁰Mekokaekei pe Pueꞌ Ala hingkeꞌna ando pehilaihami tiꞌo inioꞌ i tempo pokoꞌura ba i ando penombaha.

²¹I tempo tiꞌo, hingkiꞌ hupaꞌ komaporiꞌ to makaja mpololeke to handoaꞌi tene kahampiha mewali mepongka ka pewalina duniaꞌ wute-wute hinewowoꞌena, hei hawaꞌi woꞌo uwaꞌ to hingkiꞌ mewali hatoꞌo i ando to hingkiꞌ hupaꞌ.

²²Angkana tempo komaporiꞌ tiꞌo hawaꞌi hingkiꞌ nopomorue Pueꞌ Ala, alaꞌ ane Nopomorueꞌi, hawaꞌi uwaꞌ howeꞌ haduo to hingkiꞌ salamaꞌ. Angkana alaꞌ komarimaNa pe toaꞌ to Noꞌuwiꞌ, iomo horiana hawaꞌi Nopomorue tempo komaporiꞌ tiꞌo.

²³I tempo tiꞌo, ane uwaꞌ to mampatiꞌikikei, ‘Ele, hieꞌemo Datu Topohompoꞌ!’ Ba ‘Hintumo humei!’ Inioꞌ ipoꞌohikei,

²⁴alaꞌ hingkiꞌ hupaꞌ tempone toaꞌ mepomonawuꞌ to mantiꞌi koꞌioramo Datu Topohompoꞌ, ba to mantiꞌi koꞌioramo nabi. Hingkiꞌ mowalihi tandaꞌ kuasaꞌ hante tandaꞌ to mekohohokoi, hingkeꞌna mampomonawuꞌhi woriꞌ toaꞌ. Hingkoweꞌ toaꞌ to noꞌuwiꞌ Pueꞌ Ala mewali toaꞌNa, hingkiꞌ nihohongkeꞌhi nipokonawuꞌ.

²⁵Lekiꞌ-lekiꞌna tiꞌo Kutiꞌikimokei umbiꞌ hingkeꞌna ane mewalimoꞌi, hawaꞌkei hingkiꞌ nipokonawuꞌ.

²⁶Mewaliꞌ, ane uwaꞌ to mampatiꞌikikei, ‘Datu Topohompoꞌ uwaꞌ i popada lori,’ inioꞌkei nolou! Ane rotiꞌi, ‘Datu Topohompoꞌ uwaꞌ i tambi, i kamaraꞌ to tewowuni’, inioꞌ nipoꞌohiꞌi!

²⁷Alaꞌ ane hupaꞌ huliꞌ Anaꞌ Manusiaꞌ, hingkiꞌ tongawa mpololeke kohupaꞌNe. Hingkiꞌ roꞌokiꞌ i humanele duniaꞌ, hibali wanta wiaꞌ to mehupaꞌ i motoꞌando hei mewanta wute-wute i kotompuha ando.

²⁸Ane pangkiꞌkei woriꞌ tinti kokao hirampu, ibahaꞌkei koꞌuwaꞌne to mahi itoꞌo. Hatoꞌo woꞌo, hingkiꞌ mombaha mpololeke kohupaꞌne huliꞌ Anaꞌ Manusiaꞌ hei nobahaꞌ lekiꞌna toaꞌ.”

²⁹“Ane liumoꞌi tempo komaporiꞌ tiꞌo, ‘ando hingkiꞌ mabaliꞌ mewali mokorindi, wula hamboaꞌmo hingkiꞌ mewanta, hei betueꞌ hingkiꞌ monawuꞌ ka laniꞌ. Pueꞌ Ala hingkiꞌ modua lekiꞌ-lekiꞌna to uwaꞌ i laniꞌ.’ [40]

³⁰I tempo tiꞌo, hingkiꞌ mehupaꞌ tandaꞌ i laniꞌ to mopalaiha kohupaꞌnamo Anaꞌ Manusiaꞌ, hei lekiꞌ-lekiꞌna roboꞌ i duniaꞌ toaꞌna hingkiꞌ meꞌolahi. Katoꞌo hingkiꞌ pangkiꞌhi Anaꞌ Manusiaꞌ i womboꞌ kini mengkohou humei ka laniꞌ. Hingkiꞌ mombaha mpololeke kuasaꞌNe hante komanobaꞌNa tuwuꞌNa.

³¹Torompeꞌ hingkiꞌ nitowuiꞌ nipokobue, hei Anaꞌ Manusiaꞌ hingkiꞌ morumbaꞌ malaꞌeka-malaꞌekaNa ako morampu toaꞌ to noꞌuwiꞌ Pueꞌ Ala mewali toaꞌNa ka humanele duniaꞌ, mepongka ka motoꞌando wute i kotompuha.”

³²Uko tiꞌo, notiꞌi hi Yesu pe topeguruNa, “Ipoꞌilalikei hapo to hingkiꞌ Kupoturuꞌkikei ka loti ara. Ane iꞌokiꞌkei daꞌane mepuhuꞌ leaꞌ hei mepongka motaweꞌ, ibahaꞌmokei kohingkiꞌ hupaꞌne tempo poko ando.

³³Hatoꞌo woꞌo, ane iꞌokiꞌkei pewaline lekiꞌ-lekiꞌna to Kupowutekikei hingkenia, ibahaꞌkei hamboaꞌmo morue kohingkiꞌ hupaꞌne Anaꞌ Manusiaꞌ.

³⁴Tuꞌu mpololeke to Kutiꞌikikei: lekiꞌ-lekiꞌna to Kutiꞌi hingkenia bateꞌna hingkiꞌ mewali ikohandoaꞌana tene mahi lekiꞌ-lekiꞌna toaꞌ to tuwuꞌ tempo hieꞌe.

³⁵Laniꞌ hante duniaꞌ hingkiꞌ uko, angkana lolitangKu bateꞌna uwaꞌ nturusi wute nantolou-louna.”

³⁶“Angkana ando hante jaa kopewalina tiꞌo, hawaꞌi uwaꞌ toaꞌ to pobahaꞌ. Hingkoweꞌ malaꞌeka to uwaꞌ i suruga, hawaꞌi woꞌo robahaꞌ. Hei AnaꞌNa Pueꞌ Ala hawaꞌi woꞌo Nobahaꞌ, bateꞌnalu UmoꞌKu to pobahaꞌ.

³⁷Hapo to mewali i tempona nabi Nohoꞌ hampiha, hingkiꞌ mewali woꞌo i ando kohupaꞌna huliꞌ Anaꞌ Manusiaꞌ.

³⁸I tempona nabi Nohoꞌ tuwuꞌ tene i duniaꞌ, ikohandoaꞌana tene duniaꞌ nolobuꞌi uwai, manusiaꞌ mangka, maꞌinu, hei mepahamokohi. Hatoꞌo kotuwuꞌra wute tempona nabi Nohoꞌ mekahi pe lali duanga to kodeꞌ.

³⁹Nolobuꞌimohi uwai, hongkoꞌ wae robahaꞌ hapo to mewali. Hatoꞌo woꞌo kolembeꞌre toaꞌ i tempona Anaꞌ Manusiaꞌ hingkiꞌ hupaꞌ huliꞌ pe duniaꞌ.

⁴⁰I tempo tiꞌo, ane uwaꞌ roduo toaꞌ majama i kineteꞌ: haduo hingkiꞌ niroa hei haduo nipolihi.

⁴¹Hatoꞌo woꞌo ane uwaꞌ roduo towoweꞌe to kolentuꞌara mabuhu: haduo hingkiꞌ niroa hei haduo ropolihi.

⁴²Iomo horiana Kutiꞌi: hangangaa majaga-jagakei, alaꞌ hawaꞌkei ibahaꞌ hiwaꞌimbo Pueꞌ hingkiꞌ hupaꞌ!”

⁴³“Hangangaa ipoꞌilalikei pandiriꞌ hieꞌe: Ane kenobahaꞌi umbiꞌ tumpu tambi hiwaꞌimbo kohingkiꞌ hupaꞌne topanako, bateꞌna majaga-jaga, hawaꞌi hingkiꞌ nopotedehi mekahi pe lali tambina.

⁴⁴Hatoꞌo woꞌo ingkei: hangangaa majaga-jagakei nturusi, alaꞌ hawaꞌkei ibahaꞌ hiwaꞌimbo kohingkiꞌ hupaꞌne huliꞌ Anaꞌ Manusiaꞌ.”

⁴⁵“Ipoꞌilalikei pandiriꞌ hieꞌe: uwaꞌ haduo hawiꞌ to pobahaꞌ mampekiri hei to nopoꞌohi tuana. Io nohini tuana motadulakoi hawiꞌ ntaniꞌna hei morewahi pangkara ando-ando.

⁴⁶Ikohupaꞌna tuana, morasiꞌ mpololeke hawiꞌna tiꞌo ane nohuaꞌi tuana kolentuꞌana mampopatengkaꞌ jamana.

⁴⁷Hei Kutiꞌikikei: hawiꞌ tiꞌo bateꞌna hingkiꞌ nohini tuana mewali to morewahi lekiꞌ-lekiꞌna lumana.

⁴⁸Angkana hohumbo ane hawaꞌi moromiꞌ waliane hawiꞌ tiꞌo? Hingkiꞌ notiꞌi i lalina,

⁴⁹‘Tuaku hawaꞌi hingkiꞌ hantouꞌ mahuliꞌ!’ Katoꞌo hingkiꞌ nopemolukamo mokondo hangko hawiꞌne, honiꞌi mangka hante maꞌinuluhi nturusi moꞌawa hante toaꞌ to malanu.

⁵⁰Angkana, hawaꞌi nobahaꞌ kohingkiꞌ hupaꞌne tuana i ando hei i jaa to hawaꞌi nobahaꞌ-bahaꞌ.

⁵¹Hawiꞌ tiꞌo hingkiꞌ pahua pehuku to makaja hei nitube pe peꞌohaꞌana toaꞌ to mampetomoromiꞌ. Itoꞌo, hingkiꞌ meꞌolahi hei maporiꞌ mpololeke rohori.”