Read Rampi Matius 25 Bible Online

Matius 25 - Rampi bible

Matius 25

¹“Ane hupaꞌ huliꞌ Anaꞌ Manusiaꞌ, poparentana Pueꞌ Ala hibali pandiriꞌ hieꞌe: hampuluꞌ anaꞌntowowalo notungkai mampekau modupaꞌ tomaꞌani to nipohamoko. Hori-horihi mangkomi palitara.

²Limohi to buhaꞌ pekiri, hei limohi to hawaꞌi buhaꞌ pekiri.

³Anantowowalo to limo to hawaꞌi buhaꞌ pekirire, mangkomihi palitara, angkana hawaꞌi mampopelobi minyaꞌra,[41]

⁴hei anaꞌntowowalo to limo to buhaꞌ pekiri, mangkomihi palitara hei mangkomihi woꞌo minyaꞌ i butoloꞌ to hingkiꞌ ropopotambai minyaꞌ palitara.

⁵Tomaꞌani to nipohamoko morue mpuꞌu honiꞌi hupaꞌ horiana hangkololeꞌomohi anaꞌntowowalo tiꞌo, hei koꞌukoana leꞌomohi lekiꞌ-lekiꞌra.

⁶Hampolumbu wini, hangkaꞌ-hangkaꞌ romo uwaꞌ toaꞌ to mekoꞌalo mewowoi, notiꞌi, ‘Tomaꞌani to nipohamoko hupaꞌmo! Humeimokei, idupaꞌmokei.’

⁷Kaliuꞌ meꞌarohi mpuꞌu anaꞌntowowalo to hampuluꞌ tiꞌo, haduo-haduohi mampatimomo palitara.

⁸Anantowowalo to hawaꞌhi buhaꞌ pekiri tiꞌo merapiꞌhi minyaꞌ pe awara to buhaꞌ pekiri, rotiꞌi, ‘Elo, ipaꞌanika wongkenaꞌ minyaꞌmi hangkiuꞌ, alaꞌ palitangki hingkiꞌ pideꞌmo.’

⁹Rohoniꞌ anaꞌntowowalo to buhaꞌ pekiri tiꞌo, rotiꞌi, ‘Hawaꞌi wadi! Noloumokei mehili pe topobaluꞌ-baluꞌ minyaꞌ. Hawaꞌi intu ganaꞌ kipakeꞌ ane kidolaꞌ womoꞌi.’

¹⁰Molaimohi mpuꞌu anaꞌntowowalo to hawaꞌi buhaꞌ pekiri tiꞌo nolou mehili minya'. Kolentuꞌara mehili, hupaꞌmo tomaꞌani to nipohamoko. Anaꞌntowowalo to limo to buhaꞌ pekiri tiꞌo, mekahi pe tambi posusaꞌa moꞌawa hante tomaꞌani to nipohamoko. Uko tiꞌo, wambaꞌ niwitimo.

¹¹Hawaꞌi morue katoꞌo, hupaꞌmohi anaꞌntowowalo to hawaꞌi buhaꞌ pekiri. Mewowoihi ka howali, rotiꞌi, ‘Tua! Iweaꞌkika wongkenaꞌ wambaꞌmio!’

¹²Angkana mehoniꞌ tomaꞌani to nipohamoko, notiꞌi, ‘Hawaꞌkei kubahaꞌ.’ ”

¹³Nopotutu hi Yesu pandiriꞌ hieꞌe, Notiꞌi, “Mewaliꞌ hangangaa timomokei nturusi, alaꞌ hawaꞌkei ibahaꞌ hiwaꞌimbo kohingkiꞌ hupaꞌne Anaꞌ Manusiaꞌ.”

¹⁴“Ane hupaꞌ huliꞌ Anaꞌ Manusiaꞌ, poparentana Pueꞌ Ala hibali pandiriꞌ hieꞌe: Haduo tuana moliwo hingkiꞌ nolou pe kota to moꞌela. Handoaꞌi tene molai, io mowowoi hawiꞌna hei nopaꞌanihi doiꞌ.

¹⁵Hori-horihi nopaꞌanihi motuntuni pebiaꞌra. Haduo nopaꞌaniki limo sabu doiꞌ bulawa,[42] haduo rosabu, hei haduo woꞌo hasabu. Uko tiꞌo, molaimo.

¹⁶Hawiꞌ to nopaꞌani limo sabu doiꞌ bulawa tiꞌo, loliu mampopodumbuꞌ doiꞌ tiꞌo nopakeꞌ mobaluꞌ-baluꞌ hei pahua anaꞌna, mewaliꞌ nohuamo mpuꞌu anaꞌne limo sabu woꞌo.

¹⁷Hatoꞌo woꞌo hawiꞌ to nipaꞌani rosabu doiꞌ bulawa pahua woꞌo anaꞌna rosabu.

¹⁸Angkana hawiꞌ to nipaꞌanilu hasabu nolou mokoweꞌ woiꞌ nopowuni doiꞌ to nopaꞌaniki tuana.

¹⁹Morue katoꞌo, mahuliꞌmo tuare hei nowowoimohi hawiꞌne. Ikohupaꞌralu hawiꞌne, nopeꞌitanokimo hohumbo konipopodumbuꞌne doiꞌna.

²⁰Hawiꞌ to nopaꞌani limo sabu doiꞌ bulawa mangkomi pe tuana hampuluꞌ sabu, notiꞌi, ‘Tua, to ipaꞌanikiꞌa hampiha limo sabu, hei hieꞌemo woꞌo anaꞌna, limo sabu.’

²¹Notiꞌi tuana, ‘Moromiꞌ mpololeke hapo to iwali. Mewaliꞌ, nokomi kotungkuꞌmu ijama to monangkoꞌ, kupoꞌohiko i jama to madori. Humeimoko moꞌawa hante aku i lali komotanaꞌ-tanaꞌ.’

²²Hawiꞌ to nipaꞌani rosabu doiꞌ bulawa hupaꞌ woꞌo, notiꞌi, ‘Tua, to ipaꞌanikiꞌa hampiha rosabu, hei hieꞌemo woꞌo anaꞌne, rosabu.’

²³Notiꞌi tuane tiꞌo, ‘Moromiꞌ mpololeke hapo to iwali. Mewaliꞌ, nokomi kotungkuꞌmu ijama to monangkoꞌ, kupoꞌohiko i jama to madori. Humeimoko moꞌawa hante aku pe lali komotanaꞌ-tanaꞌ.’

²⁴Uko tiꞌo, hupaꞌmo woꞌo hawiꞌ to nipaꞌani hasabu, notiꞌi, ‘Tua, kubahaꞌ ingko haduo toaꞌ to mohiaꞌ. Ibahaꞌlu moroa wuaꞌne hantaro handoꞌio ingko to mehuꞌa!

²⁵Alaꞌ morokaꞌa pe ingko, iomo horiana kuwuni doiꞌma pe lali woiꞌ. Mewaliꞌ, hieꞌemo doiꞌma. Kupopahuliꞌmo.’

²⁶Notiꞌi tuane tiꞌo, ‘Kodakeko mpololeke hei loheko woꞌo majama! Ibahaꞌlu aku to moroa wuaꞌne hantaro handoꞌio aku to mehuꞌa.

²⁷Mewaliꞌ, mahamporeꞌi hinaꞌ hawaꞌi ipepaꞌaniki doiꞌ tiꞌo pe toaꞌ ntaniꞌna, hingkeꞌna io to mowuliori doiꞌka? Ane kehatoꞌoꞌi koꞌipopodumbuꞌne, hinewoꞌena kekutorimomo huliꞌ doiꞌka hante anaꞌna!’

²⁸Notiꞌi womo tuane tiꞌo pe hawiꞌna to haduona, ‘Iroa doiꞌ to uwaꞌ i io, hei ipaꞌaniki pe hawiꞌku to mampopoꞌanaꞌmo limo sabu doiꞌ bulawa,

²⁹alaꞌ toaꞌ to nipoꞌohi hante hapo to nipaꞌanikiꞌi, hingkiꞌ nipaꞌaniki womo hingkeꞌna notetambai. Angkana toaꞌ to hawaꞌi nipoꞌohi, kehapoꞌi hangkiuꞌlu to uwaꞌ i io, bateꞌna hingkiꞌ niroa huliꞌ.

³⁰Hei hawiꞌ to hawaꞌi modumbuꞌ, itubemolukei moꞌela pe lali komokorindiana. Itoꞌo io hingkiꞌ meꞌola hei maporiꞌ mpololeke nohori.’ ”

³¹Nopololiu hi Yesu lolitaNe pe topeguruNa, Notiꞌi, “I tempona Anaꞌ Manusiaꞌ hupaꞌ huliꞌ, manobaꞌ tuwuꞌNe hei maroho mpololeke kuasaꞌNe. Io hingkiꞌ moꞌawa lekiꞌ-lekiꞌna malaꞌeka, hei Io hingkiꞌ mahura i pahura kodatuaNa to manobaꞌ.

³²Lekiꞌ-lekiꞌna roboꞌ i duniaꞌ hingkiꞌ nirampuhi i hinaroNa hei hingkiꞌ Nodolaꞌhi mewali merontibura, hibali topolambaꞌ mampohida gimba hante bekeꞌ.

³³Toaꞌ to mampetuntui peleihana Pueꞌ Ala nipandiriꞌ hibali gimba to Nopopahura tinaꞌ i kuanaNa, hei toaꞌ to hawaꞌi mampetuntui peleihana Pueꞌ Ala nipandiriꞌ hibali bekeꞌ to Nopopahura tinaꞌ i koiriNa.

³⁴Hei Datu tiꞌo hingkiꞌ mampatiꞌikihi to tinaꞌ i kuanaNa, ‘Humeimokei to Nobarakati UmoꞌKu! Mekahimokei pe lali poparentaKu. Itoꞌo uwaꞌ peꞌohaꞌa to Kupatimomokikei umbiꞌ ka pewalina duniaꞌ.

³⁵Alaꞌ i tempoKu bilora, ipopopangkaꞌAkei. MangkumaroꞌA, ipopaꞌinuꞌAkei. TempongKu mewali tolori, itorimoꞌAkei.

³⁶Hawaꞌi uwaꞌ baduꞌKu, ipaꞌaniꞌAkei baduꞌ. I tempoKu hawaꞌi polido, ipokuliꞌAkei. Kolentuꞌangku nitarungkuꞌ, iloloꞌoꞌAkei.’

³⁷Hingkiꞌ mehoniꞌhi toaꞌ moromiꞌ i pampeꞌelena Pueꞌ Ala, rotiꞌi, ‘Pueꞌ, hiwaꞌimbo kiꞌokiꞌKo bilora hei kipopopangkaKo, ba mangkumaroKo hei kipopaꞌinuKo?

³⁸HiwaꞌimboKo hupaꞌ mewali tolori, hei kipotoloriKo? HiwaꞌimboKo kiꞌokiꞌ hawaꞌi uwaꞌ baduꞌMu, hei kipaꞌaniKo baduꞌ?

³⁹Hiwaꞌimbo hawaꞌko polido hei kipokuliꞌiKo, ba i lali petarungkuꞌa, hei kiloloꞌoKo?’

⁴⁰Hei hingkiꞌ nohoniꞌhi Datu, notiꞌi, ‘Hingkeꞌna ibahaꞌkei: hapo to iwalikei i tempomi mosulungi halali-halalingKu to merima-rima tuwuꞌra, hibalimo woꞌo Aku to isulungimokei.’

⁴¹Uko tiꞌo, hingkiꞌ Notiꞌikihi pe toaꞌ to tinaꞌ i koiriNa, ‘Polaimokei ka hinarongKu, ingkei to buntoꞌmo! Mekahimokei pe lali api to mamua nturusi, to nipatimomokimohi Belisiꞌ hei lekiꞌ-lekiꞌna malaꞌekana,

⁴²alaꞌ i tempoKu bilora, hawaꞌAkei ipopopangka. MangkumaroꞌA, hawaꞌAkei ipokuliꞌi.

⁴³DongkaꞌA, hawaꞌAkei itorimo. Hawaꞌi uwaꞌ baduꞌKu, hawaꞌAkei ipaꞌani baduꞌ. MohakiꞌA, hawaꞌAkei ipokuliꞌi. Kolentuꞌangku nitarungkuꞌ, hawaꞌAkei iloloꞌo.’

⁴⁴Hingkiꞌ rohoniꞌ woꞌo, rotiꞌi, ‘Pueꞌ, hiwaꞌimbo kiꞌokiꞌKo bilora ba mangkumaro ba mewali tolori, ba hawaꞌKo mebaduꞌ, ba hawaꞌKo polido, ba nitarungkuꞌ, hei hawaꞌKo kisulungi?’

⁴⁵Hei hingkiꞌ nohoniꞌhi Datu, ‘Hingkeꞌna ibahaꞌkei: nokomi kohawaꞌna isulungikei toaꞌ to merima-rima tuwuꞌre, palaihana, Akumo woꞌo to hawaꞌi isulungikei.’ ”

⁴⁶Nopotutu hi Yesu lolitaNe, Notiꞌi, “Lekiꞌ-lekiꞌna toaꞌ to kodake tiꞌo hingkiꞌ nihukuhi wute nantolou-louna, angkana toaꞌ to moromiꞌ i pampeꞌelena Pueꞌ Ala hingkiꞌ pahuahi kotuwuꞌ to wolaꞌ to hawaꞌi mokoꞌukoa.”