Read Rampi Matius 26 Bible Online

Matius 26 - Rampi bible

Matius 26

¹Koꞌukona hi Yesu mampowute lekiꞌ-lekiꞌna poturuꞌNa tiꞌo i topeguruNahi, Notiꞌikimohi,

²“Ibahaꞌmokei, roꞌando romo hingkiꞌ hupaꞌ Ando Ngkodeꞌ Posusaꞌ Pokalintora. Hei Anaꞌ Manusiaꞌ hingkiꞌ nipewei pe korawera poniꞌNa hingkeꞌna nipakuꞌI i loti momehulepe.”

³I tempo tiꞌo, tutuꞌ-tutuꞌ tadulako mpenomba hante tomotodi-tomotodira toYahudi morapaꞌmohi i tambina Tadulako Mpenomba Ngkodeꞌ to nikokeneꞌi hi Kaiapa.

⁴I lali porapaꞌara tiꞌo, pudiꞌmohi mampaliꞌ hohumbo lala mohokiꞌ wowuni hi Yesu hingkeꞌna rohukuꞌI mahi.

⁵Angkana i poliwora tiꞌo, rotiꞌi, “Inioꞌ duluna tohokiꞌI i ando ngkodeꞌ hieꞌe, hingkeꞌna hawaꞌi uwaꞌ pohiho i lumbura toaꞌ to woriꞌ.”[43]

⁶I tempona hi Yesu uwaꞌ i bolaꞌ Betania, Io nolou pe tambina haduo toaꞌ to nikokeneꞌi hi Simo, to kahampiha noniuꞌ hakiꞌ kusta.

⁷Kolentuꞌara mangka, hupaꞌmo haduo towoweꞌe mangkomi haꞌanu butoloꞌ to buhaꞌ minyaꞌ-minyaꞌ to mewowau hante masuliꞌ mpololeke hiline. Towoweꞌe tiꞌo mobobohi tutuꞌna hi Yesu hante minyaꞌ-minyaꞌ to mewowau tiꞌo mewali tandaꞌ peꞌadaꞌina.

⁸Koroꞌokiꞌnalu topeguruNahi hapo to nowali towoweꞌe tiꞌo, koiꞌmohi iomo horiana rotiꞌi, “Mahamporeꞌi hinaꞌ minyaꞌ-minyaꞌ to masuliꞌ hilina tiꞌo nodangkeleꞌilu ntooꞌ?

⁹Aginamolu nopobaluꞌ hingkeꞌna doiꞌ hilina tiꞌo nipaꞌaniki toaꞌ to merima-rima.”

¹⁰Nobahaꞌlu hi Yesu pekirire, iomo horiana Notiꞌikihi, “Mahamporeꞌi hinaꞌ ipomasusakei laline towoweꞌe hieꞌe? Hapo to nowali i Aku hieꞌe, moromiꞌ.

¹¹Ane toaꞌ to merima-rima, uwaꞌ tene tempomi mosulungihi alaꞌ tontora uwaꞌhi i lumbumi. Angkana Aku, hawaꞌA hingkiꞌ moꞌawa nturusi ingkei.

¹²Towoweꞌe hieꞌe mobobohiꞌA hante minyaꞌ-minyaꞌ to mewowau hingkeꞌna mampatimomo umbiꞌ wotangKu i konitawungKu.

¹³Tuꞌu to Kutiꞌikikei: i humanele duniaꞌ, i imbolu Kareba Moromiꞌ nipekarebaiki, hapo to nowali towoweꞌe hieꞌe bateꞌna hingkiꞌ nipololita hei nikolowoiꞌi nturusi.”

¹⁴Katoꞌo, hi Yudas Iskarioꞌ, haduo ka topeguruna hi Yesu to hampuluꞌ meroduo, nolou pe tutuꞌ-tutuꞌ tadulako mpenomba,

¹⁵notiꞌi, “Ane kupeweiꞌi hi Yesu pe lali korawemi, hapo to hingkiꞌ ipaꞌanikiꞌakei?” Katoꞌo moꞌihaꞌmohi doiꞌ peraꞌ tolu mpuluꞌ mpepaꞌ koworiꞌne, honiꞌi nipaꞌaniki hi Yudas.

¹⁶Mepongka katoꞌo, hi Yudas mampaliꞌ tempo to moromiꞌ mampewei hi Yesu pe iohi hingkeꞌna nihokiꞌI.

¹⁷I ando pampemolukana Posusaꞌ Roti to Hawaꞌi niragiꞌi, noloumohi topeguruNe hi Yesu, meꞌitano pe Io, rotiꞌi, “Guru, motuntuni peleihaMu, i imboki hingkiꞌ mangka pangka Posusaꞌ Pokalintora, hingkeꞌna kibahaꞌi kipatimomo?”

¹⁸ Nohoniꞌ hi Yesu, “Noloumokei pe haduo toaꞌ i lali kota Yerusale, itiꞌikikei waheꞌe: Notiꞌi Guru, ‘Dodungkumo tempo to nopokononto Pueꞌ Ala. Kulei mamposusaꞌi Ando Ngkodeꞌ Posusaꞌ Pokalintora i tambimu moꞌawa hante topegurungKu.’ ”

¹⁹Noloumohi mpuꞌu topegurunehi hi Yesu motuntuni hapo to Notiꞌikihi, hei mampatimomohi pangka Posusaꞌ Pokalintora.

²⁰Winimo, hi Yesu hante topeguruNa to hampuluꞌ roduo mahurahi mangka.

²¹Kolentuꞌara mangka, notiꞌi hi Yesu, “Pehoromuakei to Kutiꞌi! Uwaꞌ haduo ka lumbumi to hingkiꞌ mampeweiꞌA pe poniꞌKu.”

²²Korohorinalu lolitaNe tiꞌo, masusamo lalire, honiꞌi meꞌitanohi pe hi Yesu, rotiꞌi, “Pueꞌ! Handoꞌio aku to Itungkaino?”

²³Nohoniꞌ hi Yesu, “Toaꞌ to mampetubuꞌki rotina pe lali taboꞌ moꞌawa hante Aku, iomo to hingkiꞌ mampeweiꞌA pe poniꞌKu.

²⁴Nipokonontomo umbiꞌ i lali Suraꞌ Mangkolehi, Anaꞌ Manusiaꞌ hangangaa mahi. Angkana horewuꞌ mpololeke toaꞌ to hingkiꞌ mampeweiꞌI pe poniꞌNa. Keꞌaginamo toaꞌ tiꞌo hampoliꞌmo nipoꞌanaꞌki.”

²⁵Katoꞌo, notiꞌi woꞌo hi Yudas to hingkiꞌ mampewei hi Yesu pe poniꞌNa, “Guru! Handoꞌio woꞌo aku to Itungkaino?” Nohoniꞌ hi Yesu, “Ingko hadoduomu to mantiꞌi hatoꞌo!”

²⁶Kolentuꞌara mangka, hi Yesu moroamo roti honiꞌi mekokae moꞌawerasiꞌ pe Pueꞌ Ala. Uko tiꞌo, Nokebiꞌ-kebiꞌmo roti tiꞌo honiꞌi Nodolaꞌ-dolaꞌkihi topeguruNa, Notiꞌi, “Hieꞌemo wotangKa iroamokei, hei iꞌokamokei”

²⁷Uko tiꞌo, Io moroa haꞌanu paꞌinua anggoroꞌ, mekokae moꞌawerasiꞌ pe Pueꞌ Ala, hei Nopaꞌanikihi, Notiꞌi, “Maꞌinumokei lekiꞌ-lekiꞌmi,

²⁸alaꞌ anggoroꞌ hieꞌe iomo raꞌangKu to hingkiꞌ hibobo i komahiangKu. Raꞌangku hieꞌe mampokaroho dandi to nopoꞌuwaꞌ Pueꞌ Ala, hingkeꞌna moliu raꞌangKu, woriꞌ toaꞌ mohintuwuꞌ hante Pueꞌ Ala, hei hingkiꞌ Noꞌampuni dosare.

²⁹Hingkeꞌna ibahaꞌkei: mepongka hinewowoꞌena, hamboaꞌmo hingkiꞌ Kuꞌinu anggoroꞌ wute Kuꞌinu anggoroꞌ to wolaꞌ moꞌawa hante ingkei i lali poparentana UmoꞌKu.”

³⁰Uko tiꞌo, molingahi halangkaꞌ linga pepokodeꞌ. Koꞌukora molinga, molaimohi ka kota nolou pe biri Saitu.

³¹Katoꞌo, hi Yesu mantiꞌi pe topeguruNahi, “Nokomi komaporiꞌ to hingkiꞌ morumpaꞌA, hantudoꞌ wini ingkei lekiꞌ-lekiꞌmi hingkiꞌ ipolihiꞌAkei. Kubahaꞌ kohingkiꞌ mewaline, alaꞌ teꞌukiꞌmo i lali Pohawaꞌna Pueꞌ Ala waheꞌe: ‘Hingkiꞌ Kurokoꞌ topolambaꞌ, horiana mogara-garahi gimbaNe.’ [44]

³²Angkana i kotuwuꞌKu huliꞌ ka komahia, hingkiꞌ meduluꞌA nolou pe woiꞌ Galilea, hei hingkiꞌ Kupekaukei itoꞌo.”

³³Notiꞌi hi Peturuꞌ, “Pueꞌ! Kehapoꞌi lekiꞌ-lekiꞌna toaꞌ mampolihiKo, angkana aku hawaꞌi!”

³⁴Notiꞌi hi Yesu, “Kutiꞌikiko: i wini hieꞌe, ikohandoaꞌana tene metantoroꞌoꞌuoꞌ manuꞌ, tolu mpihamoko hingkiꞌ mosapuakaꞌA.”

³⁵Angkana notiꞌi hi Peturuꞌ, “Pueꞌ, kehapoꞌa mahi moꞌawa hante Ingko, hawaꞌi mpuꞌu hingkiꞌ kusapuaka kokubahaꞌMa!” Hatoꞌo woꞌo lolitare topeguruNa to ntaniꞌna.

³⁶Ikohupaꞌralu i kineteꞌ to nikokeneꞌi Getsemani, hi Yesu mampatiꞌiki topeguruNahi, “Mahuramokei iseꞌe, hingkiꞌ nolouꞌA duluna mekokae.”

³⁷Angkana Io mowona hi Peturuꞌ hante anaꞌna hi Sebedeu to roduo, iomo hi Yakobus hante hi Yohanes, hingkeꞌna metuntuhi pe Io. I tempo tiꞌo, maporiꞌ Nohori hei handondoiha laliNe.

³⁸Notiꞌikihi, “Masusa mpololeke lalingKa, hibaliꞌA to hingkiꞌ mahi. Iseꞌemokei duluna, hei majaga-jagakei moꞌawa hante Aku.”

³⁹Uko tiꞌo, Io nolou moꞌela hangkiuꞌ, honiꞌi metumpapaꞌ mekokae, Notiꞌi, “UmoꞌKu, ane hohumboꞌi, IpomoꞌelaꞌA ka komaporiꞌ to hingkiꞌ morumpaꞌA hieꞌe. Angkana Kuperapiꞌ hingkeꞌna handoꞌio peleihangKu to mewali; angkana peleihaMu Umoꞌ.”

⁴⁰Uko tiꞌo, mahuliꞌ womo hi Yesu nolou pe topeguruNa to totolu tiꞌo, Nohuahi kolentuꞌara leꞌo. Notiꞌi pe hi Peturuꞌ, “Hawaꞌkeireꞌi ibiaꞌ majaga-jaga moꞌawa hante Aku, kehapoꞌi hajaalu?

⁴¹Majaga-jagakei hei mekokaekei hingkeꞌna hawaꞌkei norumpa pehohongkeꞌ. I lalimi dokoꞌkei mowali to moromiꞌ, angkana wotami moledeꞌ horiana hawaꞌkei ibiaꞌ.”

⁴²Uko tiꞌo, hi Yesu nolou womo mekokae hadoduoNa, Notiꞌi, “UmoꞌKu, ane komaporiꞌ hieꞌe hamboaꞌmo hohumbo Ipomoꞌela ka Aku, Ipopewalimo hintotoꞌ hante peleihaMu.”

⁴³Uko mekokae, hi Yesu mahuliꞌ womo pe topeguruNahi. Noꞌokiꞌ leꞌo womohi alaꞌ ngkololeꞌohi mpololeke.

⁴⁴Ikotolu mpihana, hi Yesu nolou mekokae. PekokaeNa tiꞌo hibali hante pekokaeNa to hingkenia.

⁴⁵KoꞌukoNa mekokae, mahuliꞌmo nolou pe topeguruNa to totolu tiꞌo, Notiꞌikihi, “Leꞌolukeirope tene? Hingkeꞌna ibahaꞌkei, hupaꞌmo tempone Anaꞌ Manusiaꞌ hingkiꞌ nipewei pe korawera toaꞌ to madosa.

⁴⁶Meꞌaromokei, noloumoki! Ele, tiꞌomo humei toaꞌ to mampeweiꞌA pe poniꞌKu.”

⁴⁷Kolentuꞌana tene hi Yesu mololita, hupaꞌmo hi Yudas, haduo ka topeguruna hi Yesu to hampuluꞌ roduo, moꞌawa hante toaꞌ woriꞌ to mangkomi piho hante petotuꞌ. Toaꞌ tiꞌohi rorumbaꞌ tutuꞌ-tutuꞌ tadulako mpenomba hante tomotodi-tomotodira toYahudi to ntaniꞌna hingkeꞌna nolouhi mohokiꞌ hi Yesu.

⁴⁸Nopetiꞌikimo umbiꞌ hi Yudas haꞌanu tandaꞌ hingkeꞌna robahaꞌi imboꞌina tiꞌo hi Yesu, notiꞌi, “Hihimo to kuꞌumaꞌ, iomo toaꞌne to ipaliꞌkei. Io to hangangaa ihokiꞌkei.”

⁴⁹Mewaliꞌ, kohupaꞌralu itoꞌo, noloumo hi Yudas mampohidupaꞌki hi Yesu, notiꞌi, “Tabea, Guru!” hei liu noꞌumaꞌ.

⁵⁰Notiꞌi hi Yesu, “Bee, io rope horiana hupaꞌko iseꞌe!” Hangkaꞌ-hangkaꞌ romo toaꞌ to woriꞌ tiꞌo mangkododungkui hi Yesu honiꞌi rohokiꞌ.

⁵¹Itoꞌo, haduo topeguruNa to uwaꞌ moꞌawa hante hi Yesu mowutumo pihona motobai hawiꞌna Tadulako Mpenomba Ngkodeꞌ, noniuꞌ tolinana horiana mopudiꞌ.

⁵²Notiꞌi hi Yesu, “Kahiꞌi huliꞌ pihoma! Hihimo to merorokoꞌ mopakeꞌ piho, bateꞌna hingkiꞌ nirokoꞌ woꞌo hante piho.

⁵³Hawaꞌireꞌi ibahaꞌ, ane kemerapiꞌA sulungi pe UmoꞌKu, kaliuꞌ hingkiꞌ Noparentai humei hampuluꞌ merontibura surodadu malaꞌekaNa, ba melobi!

⁵⁴Angkana ane toꞌewahi to mohokiꞌA hieꞌe, hawaꞌi hingkiꞌ tebuhoꞌi hapo to teꞌukiꞌ hampiha i lali Suraꞌ Mangkolehi to mantiꞌi lekiꞌ-lekiꞌna tiꞌo hangangaa mewali i Aku.”

⁵⁵I tempo tiꞌo woꞌo, notiꞌi hi Yesu pe toaꞌ to woriꞌ, “Ba itiꞌiꞌAkeireꞌi toaꞌ toperorompoꞌi, horiana mangkomikei piho hante petotuꞌ humeikei mohokiꞌA? Hantarowae, ando-andona mahuraꞌA i hinaro Tambina Pueꞌ Ala mepoturuꞌ. Mahamporeꞌi hinaꞌ i tempo tiꞌo hawaꞌAkei ihokiꞌ?

⁵⁶Angkana lekiꞌ-lekiꞌna hieꞌe hangangaa mewali, hingkeꞌna tebuhoꞌi hapo to noꞌukiꞌ nabi-nabi hampiha i lali Suraꞌ Mangkolehi.” Uko tiꞌo, mehilaihi lekiꞌ-lekiꞌne topeguruNa mampolihi hi Yesu.

⁵⁷Koꞌukona hi Yesu nihokiꞌ, Io rokomi nolou pe tambina Tadulako Mpenomba Ngkodeꞌ to nikokeneꞌi hi Kaiapa. Guru-guru agama hante tomotodi-tomotodira toYahudi to ntaniꞌna hirampumohi itoꞌo.

⁵⁸Hi Peturuꞌ metuntu ngkamuri ka moꞌela, wute hupaꞌ i tanobaꞌa tambina Tadulako Mpenomba Ngkodeꞌ. Io mekahi pe tanobaꞌa hei mahura moꞌawa hante topampodaꞌhi, alaꞌ mangkodokoꞌi pobahaꞌ hapo to hingkiꞌ mewali i hi Yesu.

⁵⁹I tempo tiꞌo, tutuꞌ-tutuꞌ Tadulako Mpenomba hante lekiꞌ-lekiꞌna Tadulako Agama mampaliꞌhi sabiꞌ wuti hingkeꞌna hi Yesu wadi nihuku mahi.

⁶⁰Kehapoꞌi woriꞌmo sabiꞌ wuti to mosalaꞌi hi Yesu, angkana hawaꞌi rohua salaꞌNe to masipatoꞌ nihukukiꞌI mahi. Koꞌukoana, uwaꞌ roduo sabiꞌ wuti to hibobali lolitare to nolou pe hinarora Tomeparesaꞌ Ngkodeꞌ tiꞌo,

⁶¹rotiꞌi, “Toaꞌ hieꞌe mantiꞌi, ‘Tambina Pueꞌ Ala wadi Kukero, hei i lali tolu andolu hingkiꞌ Kuꞌaro huliꞌ.’ ”

⁶²Metotiꞌimo Tadulako Mpenomba Ngkodeꞌ, mampatiꞌiki hi Yesu, “Hawaꞌireꞌi uwaꞌ pehoniꞌMa noniuꞌ ikorosalaꞌiMu tiꞌo?”

⁶³Angkana hi Yesu hawaꞌi mehoniꞌ. Notiꞌi womo Tadulako Mpenomba Ngkodeꞌ pe Io, “I lali Konaꞌna Pueꞌ Ala to tuwuꞌ, Itiꞌikika i kotuꞌu-tuꞌuana, ba tuꞌu mpuꞌu koꞌIngkona Datu Topohompoꞌ, AnaꞌNa Pueꞌ Ala?”

⁶⁴Nohoniꞌ hi Yesu, “Ingko hadoduomu to mantiꞌi hatoꞌo. Hei Kutiꞌikikei: hingkiꞌ iꞌokiꞌkei Anaꞌ Manusiaꞌ mahura tinaꞌ i koanana Pueꞌ Ala to makuasaꞌ, hei hingkiꞌ iꞌokiꞌkei woꞌo i womboꞌ kini mengkohou humei ka suruga.”

⁶⁵Konohorina Tadulako Mpenomba Ngkodeꞌ hapo to notiꞌi hi Yesu, io mohepaꞌmo baduꞌna nokomi kobukotana, honiꞌi notiꞌi, “Toaꞌ hieꞌe mampohibali wotaNa hante Pueꞌ Ala! Hamboaꞌmo paralu uwaꞌ sabiꞌ! Ihorimokei hadoduomi lolitaNe to mampononaꞌa Pueꞌ Ala.

⁶⁶Mewaliꞌ hohumbo pobutusimi noniuꞌ i toaꞌ hieꞌe?” Rohoniꞌ tomotodi-tomotodira toYahudi tiꞌo, “Hangangaa nihuku mahi!”

⁶⁷Mepongka katoꞌo, uwaꞌhi to moliku lioNa hei mojaguruꞌ wotaNa, uwaꞌhi woꞌo to mampononaꞌaꞌI, rosampele hei rotiꞌiki:

⁶⁸“Hee Datu Topohompoꞌ, Itiꞌi ba himo to mosampeleKo?”

⁶⁹I tempona hi Peturuꞌ mahura i tanobaꞌa, hupaꞌmo haduo towoweꞌe to majama i tambina Tadulako Mpenomba Ngkodeꞌ[45] mampatiꞌiki hi Peturuꞌ, “Handoꞌioreꞌi ingko woꞌo haduo awane hi Yesu toGalilea tiꞌo?”

⁷⁰Angkana nosapuaka hi Peturuꞌ i hinarora lekiꞌ-lekiꞌna toaꞌ, notiꞌi, “Hawaꞌi kubahaꞌ hapo tungkaihami!”

⁷¹Mepongka katoꞌo, io nolou metotiꞌi dodungku i wambaꞌ. Itoꞌo, uwaꞌ woꞌo haduo towoweꞌe to pangkiꞌ hi Peturuꞌ hei mampatiꞌikihi toaꞌ to itoꞌo, “Io hieꞌe to poko moꞌawa hante hi Yesu toNasare tiꞌo.”

⁷²Nosapuaka womo hi Peturuꞌ hante mosumpa, notiꞌi, “Hawaꞌi kubahaꞌ toaꞌ tiꞌo!”

⁷³Hawaꞌi morue katoꞌo, toaꞌ to metotiꞌihi i wambaꞌ mangkododungkui woꞌo hi Peturuꞌ, rotiꞌiki, “Ingko mpuꞌu haduo awaNe! Mombaha ka pololitamu, ingko toGalileako woꞌo hibali hante hi Yesu.”

⁷⁴Mosumpa womo hi Peturuꞌ, notiꞌi, “Aginamo mahiꞌa! Hawaꞌi mpuꞌu kubahaꞌ toaꞌ tiꞌo!” I tempo tiꞌo, metantoroꞌoꞌuoꞌmo manuꞌ.

⁷⁵Katoꞌo nokolowoimo hi Peturuꞌ lolitane hi Yesu to mantiꞌi, “Handoaꞌi tene metantoroꞌoꞌuoꞌ manuꞌ, tolu mpihamoko mosapuakaꞌA.” Molaimo hi Peturuꞌ nolou pe howali, hei makaja peꞌolane.