Read Rampi Matius 27 Bible Online

Matius 27 - Rampi bible

Matius 27

¹Mihoꞌolu-olu, lekiꞌ-lekiꞌna tutuꞌ-tutuꞌ tadulako mpenomba hante tomotodi-tomotodira toYahudi mobutusi: hi Yesu hangangaa rohuku mahi.

²Mepongka katoꞌo, Io nihiluꞌ womo honiꞌi rokomi nolou pe hinarona Gubenuruꞌ Pilatu.

³Hi Yudas to mampobaluꞌ hi Yesu pe poniꞌNa. Ikonobahaꞌnalu hi Yudas kohingkiꞌ nihukune hi Yesu wute mahi, nohohoꞌ mpololeke laline. Katoꞌo noloumo mampopahuliꞌ doiꞌ peraꞌ to tolu mpuluꞌ mpepaꞌ pe tadulako mpenomba hante pe tomotodi-tomotodira toYahudi.

⁴Notiꞌi, “Madosamoꞌa! Mampobaluꞌmoꞌa toaꞌ to hawaꞌi masalaꞌ, horiana nibutusi hangangaa rohuku mahi!” Rohoniꞌ, “Hawaꞌi tokibahaꞌkito? Tiꞌo urusiamu hadoduomu!”

⁵Katoꞌo, nopelubaꞌmo hi Yudas doiꞌ tiꞌo pe lali Tambina Pueꞌ Ala, honiꞌi ako menoꞌo mohoi dokoꞌna.

⁶Doiꞌ tiꞌo rorampu tutuꞌ-tutuꞌ tadulako mpenomba, honiꞌi rotiꞌi, “Doiꞌ hieꞌe popotopuna raꞌa to hibobo. Motuntuni atura agamanta, doiꞌ hieꞌe hawaꞌi wadi nipakeꞌ i Tambina Pueꞌ Ala.”

⁷Pudiꞌmohi hingkeꞌna doiꞌ tiꞌo ropopehili woiꞌ to nikokeneꞌi Woiꞌ Topoteru Kiri, hei woiꞌ tiꞌo hingkiꞌ ropakeꞌ nipetawui toaꞌ to handoꞌio toYahudi.

⁸Iomo horiana woiꞌ tiꞌo nikokeneꞌi Woiꞌ Raꞌa wute hinewowoꞌena.

⁹Waliara tutuꞌ-tutuꞌ tadulako mpenomba tiꞌo mobuhoꞌi hapo to notiꞌi nabi Yeremia hampiha, to mantiꞌi waheꞌe: “Tolu mpuluꞌ mpepaꞌ doiꞌ peraꞌ hingkiꞌ rotorimomo alaꞌ tiꞌomo hiline haduo toaꞌ, to nipokonontomo i Saraeli,

¹⁰hei hingkiꞌ ropopehili woiꞌna topoteru kiri. Tiꞌo hingkiꞌ mewali motuntuni hawaꞌna Pueꞌ Ala i aku.” [46]

¹¹Uko tiꞌo, Io rokomimo pe hinarona gubenuruꞌ Pilatu. Meꞌitanomo Pilatu pe Io, notiꞌi, “Ba Ingkomo mpuꞌu dature toYahudi?” Nohoniꞌ hi Yesu, “Ingko hadoduomu to mantiꞌi hatoꞌo.”

¹²Angkana lekiꞌ-lekiꞌna to rosalaꞌikiꞌI tutuꞌ-tutuꞌ tadulako mpenomba hante tomotodi-tomotodira toYahudi, hawaꞌi nohoniꞌ hi Yesu.

¹³Iomo horiana Pilatu meꞌitano womo pe Io, notiꞌi, “Hawaꞌireꞌi Ihori lekiꞌ-lekiꞌne to nisalaꞌikiKo?”

¹⁴Angkana hi Yesu monondiiꞌlu, iomo horiana wuli mpololeke gubenuruꞌ.

¹⁵Toꞌa-toꞌana i Ando Ngkodeꞌ Posusaꞌ Pokalintora, biasana gubenuruꞌ mampolohoꞌ haduo toaꞌ to nitarungkuꞌ, motuntuni perapiꞌra toaꞌ woriꞌ.

¹⁶I toꞌa tiꞌo, uwaꞌ haduo to nitarungkuꞌ to robahaꞌ mpololeke toaꞌ to woriꞌ kokodakene mpololeke waliana. Konaꞌna hi Yesu Baraba.[47]

¹⁷Mewaliꞌ, i tempona Pilatu mahura hingkiꞌ mobutusi kara-karana hi Yesu, woriꞌ toaꞌ to hirampumo itoꞌo. Noteneihi Pilatu, notiꞌi, “Hihimo to ileikei kupolohoꞌkikei toꞌa hieꞌe, hi Yesu Baraba, ba hi Yesu to rotiꞌi Kerisitu?”

¹⁸Pilatu mantiꞌi hatoꞌo alaꞌ nobahaꞌ tadulakora toYahudi mampewei hi Yesu pe io nokomi powahiꞌralu.

¹⁹I tempona Pilatu mahura hingkiꞌ mobutusi kara-karana hi Yesu, hupaꞌmo haduo rumbaꞌa ka hantambina. Notiꞌiki, “Uwaꞌ pepaha ka hantambimu, notiꞌi waheꞌe: Masusa lalingka alaꞌ hiwowini mepototuruꞌa to mekororokaꞌi noniuꞌ i toaꞌ to ihuronikei. Mewaliꞌ, inioꞌ ipekahiꞌi urusiaNe alaꞌ hawaꞌi uwaꞌ salaꞌNe!”

²⁰Angkana tutuꞌ-tutuꞌ tadulako mpenomba hante tomotodi-tomotodira toYahudi mampomolaho lalira toaꞌ to woriꞌ, rotiꞌikihi, “Hangangaa iperapiꞌkei pe gubenuruꞌ Pilatu hingkeꞌna hi Baraba to nopolohoꞌ hei hi Yesu to nohuku mahi!”

²¹Meꞌitano womo gubenuruꞌ Pilatu pe toaꞌ to woriꞌ, notiꞌi, “Ka toaꞌ to roduo hieꞌe, himo mpuꞌu to ileikei kupolohoꞌkikei?” Rohoniꞌ, “Hi Baraba!”

²²Nopeꞌitanoki womo Pilatu, “Ane hatoꞌoꞌi, kupohohumbomo hi Yesu to rotiꞌi Kerisitu?” Rohoniꞌ, “Nipakumolu i loti momehulepe!”

²³Nopeꞌitanoki womo Pilatu, “Mahamporeꞌi? Salaꞌ hapo to Nowali?” Angkana moloaꞌ-loaꞌluhi nturusi ropokobue, rotiꞌi, “Nipakumolu i loti momehulepe! Nipakumolu i loti momehulepe!”

²⁴Koꞌukoana nobahaꞌ hi Pilatu lolitane hamboaꞌmo modumbuꞌ, alaꞌ toaꞌ woriꞌ pedeꞌ metulihi, io horiana noroamo uwai, nowaheꞌ korawene i hinarora toaꞌ to woriꞌ, honiꞌi notiꞌi, “Mewaheꞌa hingkeꞌna ibahaꞌkei hawaꞌi kupekahii koꞌirokoꞌnekei toaꞌ hieꞌe to hawaꞌi uwaꞌ salaꞌNe! Ingkei romo to mantorimo howonine.”

²⁵Mehoniꞌ toaꞌ to woriꞌ, rotiꞌi, “Hatoꞌomolu. Ingka to hingkiꞌ mampohorunga komahiNa, wute-wute i muleꞌki.”

²⁶Katoꞌo, gubenuruꞌ Pilatu mampolohoꞌkimohi hi Baraba, nopewei hi Yesu pe surodadunahi hei nopetiꞌiki hingkeꞌna hi Yesu nilabehiꞌ duluna hante pelabehiꞌ to morui, honiꞌi nipaku i loti momehulepe.

²⁷Koꞌukona hi Yesu nilabehiꞌ, surodadunahi gubenuruꞌ Pilatu mangkomi hi Yesu nolou pe peꞌohaꞌara i lali tambina gubenuruꞌ, hei mowowoihi lekiꞌna awara ako motuleliꞌiꞌI.

²⁸Rowulamo jubane hi Yesu honiꞌi roponopakeꞌi juba to mangkononowa hibali juba datu.

²⁹Rowalimo haꞌanu totali hibali totali datu, angkana ka wulaꞌi to morui, honiꞌi rototalii. Ropaꞌani woꞌo haꞌanu laiꞌ roponotikoiki i korawe kuanaNa hibali to notiko datu, honiꞌi melingkotuꞌhi i hinaroNa. Mampononaꞌahi hi Yesu, rotiꞌi, “KiꞌadaꞌiKo, datura toYahudi!”

³⁰Rolikumo hi Yesu, roroa laiꞌ to i koraweNe honiꞌi ropopokadoꞌ tutuꞌNa.

³¹Koꞌukona ropononaꞌa, rowulamo juba to roponopakeꞌikiꞌI hingkenia, hei roponopakeꞌi huliꞌ jubaNa hadoduoNa. Uko tiꞌo, hi Yesu rokomimo nolou pe howali kota hingkeꞌna nipaku i loti momehulepe.

³²Tempora hi Yesu hante surodadu-surodadu matengkaꞌ nolou pe howali kota Yerusale, mangkohidupaꞌkihi haduo toaꞌ to nikokeneꞌi hi Simo. Hi Simo tiꞌo ka kota Kirene. Surodadu toRoma moparuku hi Simo mangkowaꞌ loti popakuana hi Yesu.

³³Koꞌukoana, hupaꞌmohi i peꞌohaꞌa to nikokeneꞌi Golgota, palaihana biri Bangaꞌ rouꞌ.

³⁴Itoꞌo, hi Yesu ropopaꞌinu anggoroꞌ to nikalo hante poru. Nohohongkeꞌlu hangkiuꞌ, alaꞌ hawaꞌi hiniꞌ maꞌinu.

³⁵Uko tiꞌo, hi Yesu nipaku i loti momehulepe, hei baduꞌNa roroa surodadu. Angkana ikohandoaꞌara modolaꞌ-dolaꞌ baduꞌna hi Yesu, mowalihi duluna pantidoꞌ hingkeꞌna mampokononto himo to pahua parewaNa.

³⁶Uko tiꞌo, mahurahi mampoꞌodaꞌ hi Yesu.

³⁷I loti popakuaNa tiꞌo, i womboꞌ tutuꞌNa, ropodokiꞌ hamokuꞌ lobo to nipoꞌukiꞌi hapo to nisalaꞌiki hi Yesu. Waheꞌe ukiꞌne: HIEꞋEMO HI YESU DATURA TOYAHUDI.

³⁸Tempo tiꞌo, uwaꞌ woꞌo roduo toperompoꞌi to nipaku i loti momehulepe, haduo tinaꞌ i koanana hi Yesu, haduo woꞌo tinaꞌ i koiriNa.

³⁹Toaꞌ to moliu itoꞌo, mododuahi tutuꞌra tandaꞌna mampononaꞌahi hi Yesu,

⁴⁰rotiꞌi, “Itiꞌi hingkiꞌ mokeroKo Tambina Pueꞌ Ala, hei hingkiꞌ Iꞌaro huliꞌ i lali tolu ando! Ane tuꞌu-tuꞌuKo mpuꞌu AnaꞌNa Pueꞌ Ala, Iposalamaꞌmo wotaMa hadoduoMu! MengkohoumoKo ka loti momehulepe tiꞌo!”

⁴¹Hatoꞌo woꞌo tutuꞌ-tutuꞌ tadulako mpenomba, guru-guru agama hante tomotodi-tomotodira toYahudi mampononaꞌahi hi Yesu, rotiꞌi,

⁴²“Toaꞌ ntaniꞌna Nosulungi, angkana wotaNa hadoduoNa hawaꞌi Nobiaꞌ Nosulungi! Ioreꞌito to rotiꞌi Dature toSaraelihi? Ane mengkohouꞌI mpuꞌuto ka loti momehulepe, honiꞌi topoꞌohi!

⁴³Io mepoꞌohi mpololeke pe Pueꞌ Ala, hei Notiꞌi koꞌIona AnaꞌNe Pueꞌ Ala. Topekau, ba hingkiꞌ hupaꞌi mpuꞌu Pueꞌ Ala humei mampohinteꞌI!”

⁴⁴Howeꞌ toperorompoꞌi to nipaku woꞌo i loti momehulepe, mampasuwuhi lolita to mampononaꞌa hi Yesu.

⁴⁵Mepongka tenteꞌ hampuluꞌ dua pohoꞌando, humanele woiꞌ tiꞌo mokorindi tolu jaa komoruene.

⁴⁶Tenteꞌ tolu kononewa, meroraimo hi Yesu Nopokobue, Notiꞌi, “Eli, Eli, lama sabaktani?” Palaihana: “Pueꞌ AlangKu, Pueꞌ AlangKu, mahamporeꞌi hinaꞌ IpolihiꞌA?”

⁴⁷Uwaꞌhi haꞌumbora toaꞌ to metotiꞌi dodungku i popakuaNa to pahori peroraiNa, rotiꞌi, “Pehoromuakei! Io mowowoi nabi Elia!”

⁴⁸Uwaꞌ haduo to mehilai nolou moroa kolumuꞌ, nolomiꞌ i lali anggoroꞌ to moꞌinsu, noporia i doe daꞌa loti honiꞌi nopedumeki i omeꞌna hi Yesu hingkeꞌna Noꞌinuꞌi.

⁴⁹Angkana toaꞌ to ntaniꞌna mantiꞌi, “Pekau duluna, toꞌele ba hingkiꞌ hupaꞌi mpuꞌu hi Elia humei mosulungiꞌI.”

⁵⁰Uko tiꞌo, moloaꞌ womo hi Yesu Nopokobue, Nopeweimo peꞌinohaꞌNe.

⁵¹I tempo tiꞌo woꞌo, rindi wida to tehoi i lali Tambina Pueꞌ Ala hangkaꞌ-hangkaꞌ mohepaꞌ lumbu ka womboꞌ wute i munaꞌu, hante mewali luanoko to makaja, hei biri watu mobongkaꞌ.

⁵²Tempo tiꞌo woꞌo, woriꞌ petawua mekonano, hei woriꞌ toaꞌne Pueꞌ Ala to mahi hampiha nipatuwuꞌ huliꞌ. Koꞌukona hi Yesu nipatuwuꞌ, mekahihi pe kota Yerusale to nitiꞌi kota to manobaꞌ, hei roꞌokiꞌ woriꞌ toaꞌ.

⁵³

⁵⁴Tadulako surodadu hante surodadu-surodadu to mampoꞌodaꞌ hi Yesu, morokaꞌhi mpololeke pahori luanoko hante pangkiꞌ lekiꞌ-lekiꞌna to pewali tiꞌo. Rotiꞌi, “Tuꞌu-tuꞌu mpuꞌu koꞌIona hieꞌe AnaꞌNe Pueꞌ Ala!”

⁵⁵Itoꞌo, woriꞌ woꞌo towoweꞌe to mampeꞌele hi Yesu ka moꞌela. Iohi tiꞌo to metuntu pe hi Yesu hei mosulungiꞌI, mepongka ka pajamaNa i woiꞌ Galilea.

⁵⁶Konaꞌna to haduo hi Maria toMadalena. Uwaꞌ woꞌo hi Maria inoꞌra hi Yakobus hante hi Yusuf. Hei haduo woꞌo hantambina hi Sebedeu, {inoꞌra hi Yakobus hante hi Yohanes}.

⁵⁷Hingkiꞌ mentoriꞌmo ando, hupaꞌmo haduo tosugiꞌ to ka bolaꞌ Arimatea, Konaꞌna hi Yusuf. Hi Yusuf tiꞌo haduo topeguruna hi Yesu.

⁵⁸Io nolou pe hi Pilatu merapiꞌ wotalokaꞌna hi Yesu hingkeꞌna notawuꞌi, hei hi Pilatu morumbaꞌmo surodaduna mampewei wotalokaꞌNa tiꞌo pe io.

⁵⁹Mewaliꞌ, noroamo mpuꞌu hi Yusuf wotalokaꞌne hi Yesu, honiꞌi nowiwiꞌ wida to popuhiꞌ mpololeke hei wolaꞌ.

⁶⁰Noꞌuliꞌ i lali woloꞌ petowuana hadoduona to nopatimomo. Petowua tiꞌo wolaꞌ tene, to niwali i kapuꞌ biri watu. Uko tiꞌo, nololihakimo haꞌanu watu to kodeꞌ nopopotutuꞌi wambaꞌ petawua tiꞌo, honiꞌi molaimo.

⁶¹Angkana hi Maria toMadalena hante hi Maria to ntaniꞌna mahurahi i howali petawua tiꞌo.

⁶²Poꞌonina mihoꞌolu i ando penombaha, tutuꞌ-tutuꞌ tadulako mpenomba hante toParisi nolouhi pe Gubenuruꞌ Pilatu,

⁶³rotiꞌi, “Tua, kikolowoi lolitane topowuti tiꞌo, alaꞌ i tempoNa tene tuwuꞌ, Notiꞌi, ‘Ikotolu andona, hingkiꞌ tuwuꞌA huliꞌ.’

⁶⁴Iomo horiana kiperapiꞌ pe tua hingkeꞌna irumbaꞌhi surodaduma nolou mampoꞌodaꞌ petowuana moromiꞌ-romiꞌ wute ikotolu andona, hingkeꞌna hawaꞌhi nolou topeguruNe manako wotalokaꞌNa. Alaꞌ ane roroaꞌi wotalokaꞌNe, hingkiꞌ rotiꞌi pe toaꞌ to woriꞌ, hi Yesu tuwuꞌmo huliꞌ, horiana woriꞌ toaꞌ to hingkiꞌ nipokonawuꞌ, hei hingkiꞌ meliu mpololeke pepokonawuꞌ i kotutuana hieꞌe hintina to medulu.”

⁶⁵Nohoniꞌ hi Pilatu, “Hieꞌemohi surodadu. Ikomimohi nolou mampoꞌodaꞌ ngkoromiꞌ petowuaNa.”

⁶⁶Noloumohi mpuꞌu pe petowuana hi Yesu. Watu potutuꞌina rotandaꞌi hingkeꞌna robahaꞌi wora intu uwaꞌ toaꞌ to nolou mololihaki petutuꞌina, hei surodadu tiꞌo nirumbaꞌhi mampoꞌodaꞌ petowuaNa, hingkeꞌna hawaꞌi uwaꞌ to mololihaki petutuꞌina.