Read Rampi Matius 28 Bible Online

Matius 28 - Rampi bible

Matius 28

¹Liumo ando penombara toYahudi, mihoꞌolu-olu ando Minggu, hi Maria toMadalena hante hi Maria to ntaniꞌna nolouhi mampeꞌele petowuana hi Yesu.

²Hangkaꞌ-hangkaꞌ romo mewali luanoko to makaja, alaꞌ haduo malaꞌekana Pueꞌ mengkohou ka suruga humei mololihaki watu potutuꞌina petowua, hei mahura i womboꞌna.

³Lentena mewanta hibali wiaꞌ, hei baduꞌna popuhiꞌ mpololeke.

⁴Surodadu-surodadu to mampodaꞌi itoꞌo, morokaꞌhi mpololeke, mororidiꞌhi liu modungkahi hibali romohi toaꞌ to mahi.

⁵Angkana notiꞌi malaꞌeka pe towoweꞌe tiꞌohi, “Inioꞌkei morokaꞌ. Kubahaꞌ to ipaliꞌkei iomo hi Yesu to nipaku i loti momehulepe.

⁶Io hamboaꞌmo uwaꞌ iseꞌe. Io tuwuꞌmo huliꞌ hibali to Notiꞌikimokei. Humeikei iꞌele koniꞌuliꞌaNe.

⁷Hohiꞌmokei nolou ipowutekei pe topeguruNahi: ‘Hi Yesu tuwuꞌmo huliꞌ. Io medulumo nolou pe woiꞌ Galilea, hei hingkiꞌ ikohidupaꞌkikei itoꞌo.’ Hangangaa ikolowoikei hapo to kutiꞌikikei hieꞌe!”

⁸Hohiꞌmohi towoweꞌe tiꞌo molai ka petowua. Morokaꞌhi mpololeke, angkana motanaꞌhi woꞌo. Mehilaimohi nolou pe topegurunahi hi Yesu alaꞌ rokodokoꞌi mampowutekihi hapo to pewali.

⁹Hangkaꞌ-hangkaꞌ hi Yesu mampohidupaꞌkihi hei Notabeꞌhi mantiꞌi tabea. Noloumohi mangkododungkui hei mokopui kapuꞌNa, tandaꞌ penombara pe Io.

¹⁰Notiꞌikihi hi Yesu, “Inioꞌkei morokaꞌ! Noloumokei itiꞌikikei halalingKu hingkeꞌna nolouhi pe Galilea. Hingkiꞌ hidupaꞌA itoꞌo hante iohi.”

¹¹I tempora towoweꞌe tiꞌo mahuliꞌ, haꞌumbora surodadu to mampoꞌodaꞌ petowua nolouhi pe lali kota mampowute pe tutuꞌ-tutuꞌ tadulako mpenomba lekiꞌ-lekiꞌna to mewali i petowua.

¹²Iomo horiana morapaꞌhi tutuꞌ-tutuꞌ tadulako mpenomba hante tomotodi-tomotodira toYahudi. I porapaꞌra tiꞌo, pudiꞌhi, mampaꞌani doiꞌ pe surodadu tiꞌo hingkeꞌna mampowowutiꞌi.

¹³Hei rotiꞌiki surodadu tiꞌo, “Ilolitakei pe toaꞌ waheꞌe: ‘I halumbu wini kolentuꞌangki leꞌo, wotalokaꞌNa hi Yesu nonako topeguruNahi.’

¹⁴Ane lolitami tiꞌo nohori gubenuruꞌ Pilatu, ingka romoꞌi to mololita pe io hingkeꞌna inioꞌkei nihuku.”

¹⁵Surodadu tiꞌo mantorimohi doiꞌ to nipaꞌaniki, hei mampowutehi hapo to ukomohi nipoturuꞌkihi. Wute hinewowoꞌena, tekareba nturusi lolita tiꞌo i lumbura toYahudi.

¹⁶Topeguruna hi Yesu to hampuluꞌ haduo, nolouhi pe woiꞌ Galilea. Nolouhi pe biri to nopokonontokimohi umbiꞌ hi Yesu.

¹⁷Itoꞌo, mohidupaꞌhi hante hi Yesu, hei menombahi pe Io. Angkana uwaꞌ woꞌo to mororangko tene lalira.

¹⁸Nokododungkuihi hi Yesu, honiꞌi Notiꞌikihi, “Lekiꞌ-lekiꞌna kuasaꞌ i suruga hante i duniaꞌ nopaꞌanikimoꞌA Pueꞌ Ala.

¹⁹Mewaliꞌ, noloumokei pe lekiꞌ-lekiꞌna roboꞌ i humanele duniaꞌ, ipoturuꞌkei toaꞌ hingkeꞌna mewalihi topetuntuKu. Hei niriuhi i lali Konaꞌna Umoꞌ, Anaꞌ hei Inohaꞌ Mangkolehi.

²⁰Nipoturuꞌhi hingkeꞌna motuntunihi lekiꞌ-lekiꞌna to Kuhowoꞌikimokikei. Hei hangangaa ikolowoikei: Aku hingkiꞌ moꞌowonikei nturusi wute i kotutuana duniaꞌ.”[48]