Read Rampi Matius 3 Bible Online

Matius 3 - Rampi bible

Matius 3

¹Haꞌumbora ntoꞌa ka konipoꞌanaꞌkina hi Yesu, haduo toaꞌ to nikokeneꞌi hi Yohanes Toperiu nolou pe popada lori i woiꞌ Yudea, hei mepongkamo mampowute Pohawaꞌna Pueꞌ pe toaꞌ to woriꞌ.

²Notiꞌikihi, “Mengkatobaꞌmokei ka dosami, alaꞌ hamboaꞌmo morue, hingkiꞌ mepongkamo poparentane Pueꞌ Ala i duniaꞌ.”

³Hampiha, nabi Yesaia mantiꞌi waheꞌe: “Uwaꞌ haduo toaꞌ to meꞌoꞌando i popada lori, notiꞌi: ‘Pueꞌ hingkiꞌ hupaꞌmo! Nipatimomo lalaNe, nipokononto lala to hingkiꞌ Nopoliuhi’ ” [5] Hi Yohanes tiꞌomola to notiꞌi hi Yesaia.

⁴Baduꞌna hi Yohanes niwali ka wilolu unta. Salupiꞌna ka koliꞌ pinatuwuꞌ, pangkana popae hante uwai koniuꞌ.

⁵Woriꞌ toaꞌ to hupaꞌ pe hi Yohanes alaꞌ dokoꞌhi mampehoromua lolitana. Uwaꞌhi to ka kota Yerusale hei ka humanele woiꞌ Yudea. Uwaꞌhi woꞌo to ka bolaꞌ-bolaꞌ to i bota uwai Yarade.

⁶Mopangakuꞌhi dosara, hei noriuhi hi Yohanes i uwai Yarade.

⁷Woriꞌ woꞌo toParisi hante toSaduki nolouhi mampoperiu pe hi Yohanes. Konoꞌokiꞌra mehupaꞌ, notiꞌikihi, “Hibalikei muleꞌna ule to moꞌupoꞌ! Mahamporeꞌi hinaꞌ humeikei? Ba ipekirikei hingkiꞌ himpolohoꞌkei ka kobukotana Pueꞌ Ala to morumpakei i ando to hingkiꞌ hupaꞌ?

⁸Ane tuꞌu-tuꞌu mengkatobaꞌmokei ka dosami, hangangaa iwalikei walia to moromiꞌ hingkeꞌna mombaha konohohoꞌmimo.

⁹Inioꞌ ipekirikei hawaꞌi hingkiꞌ nitorimo pehukune Pueꞌ Ala alaꞌ muleꞌnakei hi Burahima. Tiꞌo hawaꞌi tuꞌu! Hingkeꞌna ibahaꞌkei: ane noleiꞌi Pueꞌ Ala, muleꞌna hi Burahima Nopopewali ka watu hieꞌe.

¹⁰Hingkiꞌ hupaꞌ pehukune Pueꞌ Ala! Hinewowoꞌena uwahi timomomo. Lekiꞌ-lekiꞌna loti to hawaꞌi mowuaꞌ moromiꞌ hingkiꞌ nitowi wute i uwakaꞌna hei nitube pe lali api.”

¹¹Notiꞌi womo hi Yohanes, “Aku hieꞌe moriukei hante uwai, tandaꞌ pengkatobaꞌmi ka dosami. Angkana hingkiꞌ hupaꞌ Haduo toaꞌ to meliu kuasaꞌNe ka aku. Io to hingkiꞌ moriukei hante Inohaꞌ Mangkolehi hei api. Howeꞌ mangkomi sanalaꞌNa, hawaꞌa masipatoꞌ.

¹²Io nipandiriꞌ hibali haduo toaꞌ to mantopihi kina hingkeꞌna kina to moꞌohi hingkiꞌ tepohida ka kina to langkoꞌ. Kina to moꞌohi hingkiꞌ Nokahi pe lali buhoꞌ, angkana kina to langkoꞌ hingkiꞌ Notube pe lali api to hawaꞌi hingkiꞌ pideꞌ.”

¹³I tempo tiꞌo, hi Yesu hupaꞌ ka woiꞌ Galilea nolou pe uwai Yarade mampoperiu pe hi Yohanes.

¹⁴Angkana hi Yohanes hawaꞌi hiniꞌ moriuꞌI, hei notiꞌi, “Kotuꞌuana, akuwae to masipatoꞌ Iriu. Mahamporeꞌi hinaꞌ merapiꞌKo kuriu?”

¹⁵Angkana mehoniꞌ hi Yesu, “Hinamo iwali hieꞌe, hingkeꞌna tebuhoꞌi lekiꞌ-lekiꞌna peleihana Pueꞌ Ala.” Nopetuntuimo hi Yohanes hapo to noperapiꞌ hi Yesu, hingkeꞌna noriuꞌI.

¹⁶Koꞌukona hi Yesu niriu, mehorimo ka lali uwai. Hangkaꞌ-hangkaꞌ romo laniꞌ moweaꞌ, hei Noꞌokiꞌ Inohaꞌ Mangkolehi mengkohou hibali tinti merpati i womboꞌNa.

¹⁷Uko tiꞌo, rohorimo loaꞌne Pueꞌ Ala ka laniꞌ to mantiꞌi, “Iomo hieꞌe AnaꞌKu to Kupokarima hei to mampomotanaꞌ lalingKu.”