Read Rampi Matius 4 Bible Online

Matius 4 - Rampi bible

Matius 4

¹Uko tiꞌo, hi Yesu nokomi Inohaꞌ Mangkolehi nolou pe popada woꞌoni hingkeꞌna nohohongkeꞌi Belisiꞌ.

²Itoꞌo hi Yesu maboki iba mpuluꞌ ando hei iba mpuluꞌ mini komoruene, iomo horiana hi Yesu biloramo mpololeke.

³I tempo tiꞌo, Belisiꞌ mohohongkeꞌi hi Yesu, notiꞌi, “Ane tuꞌu-tuꞌuKo mpuꞌu AnaꞌNa Pueꞌ Ala, Ipopewalimo watu hieꞌe mewali kopongkona!”

⁴Hi Yesu Mehoniꞌ, “I lali Suraꞌ Mangkolehi teꞌukiꞌ waheꞌe: ‘Manusiaꞌ hawaꞌi podo tuwuꞌ ka kopongkonalu, angkana to toparalu iomo mampoꞌilali pohawaꞌna Pueꞌ Ala.’ ”

⁵Uko tiꞌo, Belisiꞌ mangkomi hi Yesu nolou pe Yerusale, kota to manobaꞌ, hei nopopetotiꞌi i wumbu Tambina Pueꞌ Ala,

⁶notiꞌiki, “Ane tuꞌu-tuꞌuKo mpuꞌu AnaꞌNa Pueꞌ Ala, mengkonawuꞌmoKo! Hawaꞌko hingkiꞌ mahampo-hampo, alaꞌ uwaꞌ teꞌukiꞌ i lali Suraꞌ Mangkolehi: ‘Pueꞌ Ala hingkiꞌ morumbaꞌ malaꞌekaNahi mohulaweꞌKo, hingkeꞌna kapuꞌMu hawaꞌi noniuꞌ watu.’ ” [6]

⁷Nohoniꞌ hi Yesu, “Uwaꞌ woꞌo teꞌukiꞌ i lali Suraꞌ Mangkolehi to mantiꞌi waheꞌe: ‘Inioꞌko mohohongkeꞌi Pueꞌ Alamu.’ ”

⁸Uko tiꞌo, Belisiꞌ mangkomi womo hi Yesu nolou pe biri to dingkaoꞌ mpololeke, hei notidoꞌki lekiꞌ-lekiꞌne kodatua i duniaꞌ hante komanobaꞌna kodatua tiꞌo,

⁹notiꞌi, “Ane melingkotuꞌKo menomba pe aku, lekiꞌ-lekiꞌna hieꞌe hingkiꞌ kupaꞌanikiKo.”

¹⁰Nohoniꞌ hi Yesu, “Polai Belisiꞌ! Alaꞌ teꞌukiꞌmo i lali Suraꞌ Mangkolehi waheꞌe: ‘Hangangaa menombako pe Pueꞌ Alamu, alaꞌ Iolu to masipatoꞌ ipengkoruꞌi.’ ”

¹¹Katoꞌo molaimo Belisiꞌ tiꞌo mampolihi hi Yesu, honiꞌi hupaꞌmohi malaꞌeka morewahi hi Yesu.

¹²Handoaꞌi tene morue katoꞌo, hi Yohanes Toperiu nihokiꞌ hei nitarungkuꞌ. Konohorinalu hi Yesu kareba tiꞌo, molaimo nolou pe bolaꞌ Nasareꞌ i woiꞌ Galilea.

¹³Honiꞌi loliu nolou meꞌohaꞌ i bolaꞌ Kapenau. Bolaꞌ tiꞌo i bota rano Galilea, i woiꞌ Sebulo hante Natali.

¹⁴Hi Yesu mampowute Pohawaꞌna Pueꞌ pe toaꞌ to meꞌohaꞌ itoꞌo, hingkeꞌna tebuhoꞌi lolita to nopowute nabi Yesaia hampiha to mantiꞌi waheꞌe:

¹⁵“Woiꞌra toSebulo hante toNatali to dodungku i rano Galilea, uwaꞌ tinaꞌ i hanupe uwai Yarade. Woiꞌ tiꞌo iomo Galilea to ropeꞌohaꞌi woriꞌ toaꞌ ntaniꞌ to handoꞌio toYahudi.

¹⁶Toaꞌ to itoꞌo, meꞌohaꞌhi i lali komokorindiana, Angkana hinewowoꞌena pangkiꞌmohi wanta to kodeꞌ. Toaꞌ to nokuasaꞌi komahia, nowantaimohi Haduo to mepaꞌani kotuwuꞌ.” [7]

¹⁷Katoꞌo hi Yesu mepongkamo mampowute pohawaꞌna Pueꞌ, Notiꞌi, “Mengkatobaꞌmokei ka dosami, alaꞌ hamboaꞌmo morue, Pueꞌ Ala hingkiꞌ moparenta i duniaꞌ.”

¹⁸Kolentuꞌana hi Yesu matengkaꞌ i bota rano Galilea, Noꞌokiꞌ roduo topohalali, konaꞌra hi Simo to rotiꞌi woꞌo hi Peturuꞌ hante hi Andaria, hineeꞌna. I tempo tiꞌo, kolentuꞌara mojalaꞌ i rano, alaꞌ simata iolu jamare.

¹⁹Notiꞌikihi hi Yesu, “Humeimokei metuntu pe Aku! Hingkiꞌ Kupopewalikei topojalaꞌ toaꞌ.”

²⁰Mepongka katoꞌo, kaliuꞌ mampolihimohi mpuꞌu jamara, hei metuntumohi pe hi Yesu.

²¹Hi Yesu mampololiu patengkaꞌNa, Noꞌokiꞌ womo roduo topohalali: hi Yakobus hante hi Yohanes hineeꞌna, anaꞌnahi hi Sebedeu. Tempo tiꞌo, kolentuꞌara mangkoromiꞌi jalaꞌra i lali duanga hante umoꞌra. Nowowoihi woꞌo hi Yesu hingkeꞌna metuntuhi pe Io.

²²Katoꞌo kaliuꞌ ropolihi duangare hante umoꞌra, honiꞌi metuntuhi woꞌo pe hi Yesu.

²³Hi Yesu motengkaꞌi humanele woiꞌ Galilea hei mepoturuꞌ i woriꞌ tambi penombahara toYahudi. Io mampowute Kareba Moromiꞌ noniuꞌ poparentana Pueꞌ Ala, hei mampokoꞌoriꞌ woꞌo lekiꞌ-lekiꞌna toaꞌ to hawaꞌi polido.

²⁴Hapo to Nowali tiꞌo tekareba wute i humanele woiꞌ Siria, horiana woriꞌ toaꞌ to mangkodokoꞌi nolou mohidupaꞌ hante hi Yesu. Toaꞌ tiꞌo mangkomihi lekiꞌ-lekiꞌna toaꞌ to molangkaꞌ-langkaꞌ hakiꞌna. Uwaꞌhi woꞌo to nopekahii tokodake, to mohakiꞌ mahi-mahi manuꞌ, hei tokohu. Lekiꞌ-lekiꞌra tiꞌo nopokoꞌoriꞌ hi Yesu.

²⁵I tempo tiꞌo, woriꞌ mpololeke toaꞌ to metuntu nturusi pe Io: uwaꞌhi to ka woiꞌ Galilea, ka Dekapoli, ka Yerusale, ka woiꞌ Yudea, hei uwaꞌhi woꞌo to ka hanupe uwai Yarade.