Read Rampi Matius 5 Bible Online

Matius 5 - Rampi bible

Matius 5

¹Tempona hi Yesu pangkiꞌ toaꞌ to woriꞌ tiꞌo, Io tolou pe bobirina, honiꞌi mahura. KopahuraNalu, noloumohi topeguruNe mangkododungkuiꞌI,

²honiꞌi nopemolukamo hi Yesu mepoturuꞌ, Notiꞌi waheꞌe:

³“Motanaꞌmo toaꞌ to mampepolintaroki kotuwuꞌra pe Pueꞌ Ala, alaꞌ iomohi to mewali toaꞌna Pueꞌ Ala i lali PoparentaNa.

⁴Motanaꞌmo toaꞌ to handondoiha lalira, alaꞌ Pueꞌ Ala hingkiꞌ mampododolihi.

⁵Motanaꞌmo toaꞌ to mengkaꞌiwowoiꞌ, alaꞌ Pueꞌ Ala hingkiꞌ mobuhoꞌi dandiNa pe iohi.

⁶Motanaꞌmo toaꞌ to dokoꞌ mpololeke mewali mononto i pampeꞌelena Pueꞌ Ala, alaꞌ Pueꞌ Ala hingkiꞌ mampaꞌanihi hapo to rokodokoꞌi tiꞌo.

⁷Motanaꞌmohi toaꞌ to mampokarima hangko manusiaꞌna, alaꞌ Pueꞌ Ala hingkiꞌ mampokarimahi woꞌo.

⁸Motanaꞌmo toaꞌ to mampohimpodulu peleihana Pueꞌ Ala ka lalira mpololeke, alaꞌ iohi intu hingkiꞌ meꞌohahi moꞌawa Pueꞌ Ala.

⁹Motanaꞌmo toaꞌ to mangkomi podame i hangko manusiaꞌra, alaꞌ iomohi to hingkiꞌ nitiꞌi anaꞌna Pueꞌ Ala.

¹⁰Motanaꞌmo toaꞌ to nipoperima-rima nokomi petuntura i peleihana Pueꞌ Ala, alaꞌ iomohi to mewali toaꞌna Pueꞌ Ala i lali PoparentaNa.

¹¹Motanaꞌmokei ane nipononaꞌakei, nipoperima-rimakei, konaꞌmi nipokodake alaꞌ petuntumi pe Aku.

¹²Hangangaa motanaꞌkei mpololeke alaꞌ kodeꞌ howonina to hingkiꞌ ihuakei i lali suruga, hibali hante nabi-nabi hampiha nipoperima-rimahi woꞌo.”

¹³Nopololiu hi Yesu lolitaNe, Notiꞌi, “Ingkei to metuntu pe Aku, hibalikei bure pe toaꞌ to i duniaꞌ. Angkana ane motobemoꞌi bure tiꞌo hamboaꞌmo hohumbo nipomobure huliꞌ hei hamboaꞌmo modumbuꞌ. Aginamo nitube pe lala hingkeꞌna nodihaꞌ-dihaꞌ toaꞌ.

¹⁴Ingkei to metuntu pe Aku, hibalikei wanta to mowantai lekiꞌ-lekiꞌna toaꞌ i duniaꞌ. Hibalikei koniꞌokiꞌna kota to niꞌaro i womboꞌ biri, waliami hawaꞌi tewowuni.

¹⁵Hatoꞌo woꞌo hawaꞌi uwaꞌ haduo toaꞌ to motutu palita honiꞌi nohobiꞌi. Palita bateꞌna noporia i womboꞌ hingkeꞌna mowantaiꞌi lekiꞌna toaꞌ i lali tambi.

¹⁶Hatoꞌo woꞌo wanta to uwaꞌ i lalimi hangangaa mewanta, palaihana waliami to moromiꞌ mombaha pe lekiꞌ-lekiꞌna toaꞌ, horiana mampokodeꞌhi Umoꞌmi to uwaꞌ i suruga.”

¹⁷Notiꞌi hi Yesu, “Inioꞌ ipekirikei tungkaihangKu humeiꞌA mopahi Aturana Pueꞌ Ala to noꞌukiꞌ hi Musa hante poturuꞌra nabi-nabi hampiha. HawaꞌA humei mopahi, angkana humeiꞌA mampobuhoꞌi hapo to teꞌukiꞌ i Atura tiꞌo.

¹⁸Tuꞌu mpololeke to Kutiꞌikikei hieꞌe: laniꞌ hante woiꞌ handoaꞌi hingkiꞌ mokero ane lekiꞌ-lekiꞌna handoaꞌi mewali motuntuni Aturana Pueꞌ Ala to noꞌukiꞌ hi Musa, kehapoꞌi hamokuꞌlu lolita i lali Aturana Pueꞌ Ala tiꞌo hawaꞌi hingkiꞌ mopahi.

¹⁹Iomo horiana Kutiꞌikikei, himo to hawaꞌi mampetuntui halangkaꞌ hawaꞌ i lali Aturana Pueꞌ Ala, kehapoꞌi hawaꞌ to monangkoꞌlu, hei nopepoturuꞌki pe toaꞌ ntaniꞌna hingkeꞌna molungkaꞌihi hawaꞌ tiꞌo, toaꞌ tiꞌo hingkiꞌ mewali i wowoiꞌ mpololeke ka lekiꞌ-lekiꞌna toaꞌNa Pueꞌ Ala. Angkana himo to mampetuntui lekiꞌ-lekiꞌna hawaꞌ i lali Aturana Pueꞌ Ala, hei mampoturuꞌ toaꞌ ntaniꞌna hingkeꞌna motuntunihi woꞌo hawaꞌ tiꞌo, toaꞌ tiꞌomo to hingkiꞌ mewali i tanti ka lekiꞌ-lekiꞌna toaꞌNa Pueꞌ Ala.

²⁰Mewaliꞌ, Kutiꞌikikei: potuntunimi i peleihana Pueꞌ Ala hangangaa meliu ka petuntura guru-guru agama hante toParisi. Alaꞌ ane hawaꞌkei iwali hatoꞌo hawaꞌkei hingkiꞌ mewali toaꞌna Pueꞌ Ala i lali kodatuaNa.”

²¹Nopololiu hi Yesu lolitaNe, Notiꞌi, “Ibahaꞌmokei hawaꞌ to nipowutekihi tododulunta hampiha to mantiꞌi: ‘Inioꞌ merorokoꞌ, hei himo to merorokoꞌ hangangaa nihuku.’

²²Angkana hinewowoꞌena Kutiꞌikikei: himo to bukota pe hangko awana, hingkiꞌ nohuku Pueꞌ Ala. Hihimo to mampononaꞌa hangko awana, hingkiꞌ rokomi pe Topobutusina toYahudi. Hei hihimo to mampatiꞌiki hangko awana ‘Bebe’, masipatoꞌ mpololeke nitube pe lali api naraka.

²³Mewaliꞌ, rapaꞌna ane mekahiko pe Tambina Pueꞌ Ala mangkomi popenombamu, hei ane ikolowoiꞌi koꞌuwaꞌne tene awami to koiꞌ pekirina pe ingko,

²⁴hangangaa iporia duluna popenombama i hinarona potutua popenomba, honiꞌi mahuliꞌko nolou modame hante awamu tiꞌo hingkeꞌna mohintuwuꞌkei huliꞌ. Uko tiꞌo, honiꞌi mahuliꞌko nolou mampewei popenombamu pe Pueꞌ Ala.

²⁵Hatoꞌo woꞌo, ane uwaꞌ toaꞌ to mampehorikiko pe hinarona topebutusi, ikohandoaꞌami tene nibutusi, hangangaa ihohiꞌi nolou ipodameki toaꞌ tiꞌo, alaꞌ ane hawaꞌkei modame, monontomo hingkiꞌ nopehorikiko pe topebutusi, hei topebutusi tiꞌo hingkiꞌ nopeweiko pe pulisi, hei pulisi hingkiꞌ mokahiko pe lali petarungkuꞌa.

²⁶Tuꞌu mpololeke to Kutiꞌikikei: hawaꞌko wadi mesuwu ka lali petarungkuꞌa ane handoaꞌi tene uko ibaiari dendama.”

²⁷“Ibahaꞌmokei hawaꞌ to nipowutekihi tododulunta hampiha to mantiꞌi: ‘Inioꞌ mebualosi.’

²⁸Angkana hinewowoꞌena Kutiꞌikikei: himo to mampeꞌele haduo towoweꞌe hei nokohoka, palaihana mebualosimo i lalina hante towoweꞌe tiꞌo.

²⁹Mewaliꞌ, ane rapaꞌna matamu hambali to mangkomiko pe lali dosa, aginamo nidungkiꞌ hei nitube hingkeꞌna hawaꞌko madosa. Moromiꞌ tene ane hambalilu matamu angkana hawaꞌko mowali dosa, hintina romali matamu, angkana nitubeko pe lali naraka.

³⁰Ane rapaꞌna korawemu hambali mangkomiko madosa, aginamo nibokuꞌ hei nitube hingkeꞌna hawaꞌko madosa. Moromiꞌ tene ane hambalilu korawemu hei hawaꞌko mowali dosa, hintina romali korawemu angkana nitubeko pe lali naraka.”

³¹“Uwaꞌ woꞌo poturuꞌ to nipowutekihi tododulunta hampiha to mantiꞌi: ane uwaꞌ haduo tomaꞌani to mampokaꞌaki hantambina, io hangangaa mowali suraꞌ mpokaꞌa honiꞌi nopaꞌaniki hantambina.

³²Angkana hinewowoꞌena Kutiꞌikikei: Hihimo to mampokaꞌaki hantambina, hantaro hantambine hawaꞌi mampelapikiꞌi, io mangkomi hantambina tiꞌo madosa hei mebualosi ane hamokoꞌi huliꞌ. Hei tomaꞌani to mangkohamokoi towoweꞌe to nopokaꞌaki maꞌanina, io woꞌo mebualosi.”

³³“Ibahaꞌmokei woꞌo hawaꞌ to nipowutekihi tododulunta hampiha to mantiꞌi: ‘Inioꞌkei molungkaꞌi sumpami. Ane mosumpakei i hinarona Pueꞌ Ala, hangangaa ipobuhoꞌikei.’

³⁴Angkana hinewowoꞌena Kutiꞌikikei: inioꞌkei mpuꞌu mosumpa mantiꞌi konaꞌna laniꞌ ba woiꞌ, alaꞌ laniꞌ iomo pahurahana Pueꞌ Ala, hei woiꞌ pedadihaꞌaNa. Inioꞌkei mosumpa mantiꞌi konaꞌna Yerusale, alaꞌ Yerusale peꞌohaꞌana Datu Ngkodeꞌ, iomo Pueꞌ Ala.

³⁵

³⁶Inioꞌkei woꞌo mosumpa mantiꞌi konaꞌna tutuꞌmi, alaꞌ hawaꞌkei ibiaꞌ mampopopuhiꞌ ba mampomoꞌiti wilolumi, kehapoꞌi hangkarulu.

³⁷Ane ileikei ganaꞌlu itiꞌikei, ‘Ioꞌ’ hei ane hawaꞌi, itiꞌikei ‘Hawaꞌi.’ To meliu katoꞌo mehupaꞌ ka Belisiꞌ.”

³⁸“Ibahaꞌmokei hawaꞌ to nipowutekihi tododulunta hampiha to mantiꞌi waheꞌe: ‘Ane uwaꞌ to modungkiꞌ matana toaꞌ ba mowutu nihina, hangangaa io woꞌo nidungkiꞌki matane, hei niwutuki nihine.’

³⁹Angkana hinewowoꞌena Kutiꞌikikei: inioꞌ ipehawaiꞌi waliane toaꞌ to mowalia ngkodake pe ingkei. Ane rapaꞌna uwaꞌ to motampedaꞌ pipi koanamu, ipaꞌaniki womo pipi koirima.

⁴⁰Ane uwaꞌ to mampehorikiko pe topebutusi alaꞌ io dokoꞌ baduꞌmu, ipaꞌaniki woꞌo jubama.

⁴¹Ane noparukuko haduo surodadu mangkomi komiana hakilo komoꞌelane, ikomimo komiane rokilo komoꞌelane.

⁴²Ane uwaꞌ to merapiꞌ hapolu to uwaꞌ i ingkei, ipaꞌaniki, hei inioꞌkei bohiꞌ pe toaꞌ to dokoꞌ mebolo hapolu pe ingkei.”

⁴³“Ibahaꞌmokei hawaꞌ to nipowutekihi tododulunta hampiha to mantiꞌi waheꞌe: ‘Ipokarimakei hangko awami, hei ipokoiꞌkei poniꞌmi.’

⁴⁴Angkana hinewowoꞌena Kutiꞌikikei: ipokarimakei poniꞌmi, hei ipekokaekikei toaꞌ to mampoperima-rimakei.

⁴⁵Alaꞌ ane moromiꞌi lalimi pe poniꞌmi, mombahamo mpololeke koꞌingkeinamo anaꞌne Pueꞌ Ala. Alaꞌ Pueꞌ Ala moromiꞌ pe lekiꞌ-lekiꞌna toaꞌ. Io mampopelua ando pe toaꞌ to moromiꞌ hei pe toaꞌ to kodake. Nopoꞌuwaꞌ ura i toaꞌ to moromiꞌ waliara hei pe toaꞌ tota moromiꞌ waliara.

⁴⁶Hapomo to hingkiꞌ ihuakei ka Pueꞌ Ala ane marimalukei pe toaꞌ to mampokarimakei? Howeꞌ toperuruꞌ sima to nirekeꞌ kodake waliare, marimahi woꞌo pe toaꞌ to mampokarimahi.

⁴⁷Ba itiꞌikeireꞌi moromiꞌmo waliami ane moromiꞌlukei pe awami? Howeꞌ toaꞌ to hawaꞌi pobahaꞌ Pueꞌ Ala, hatoꞌo woꞌo rowali. Hapo poꞌoriane ingkei hante iohi?

⁴⁸Umoꞌmu to uwaꞌ i suruga mampokamarima lekiꞌ-lekiꞌna toaꞌ hante hawaꞌi uwaꞌ komakuraꞌna. Hatoꞌo woꞌo ingkei hangangaa iwalikei watoꞌo pe lekiꞌ-lekiꞌna toaꞌ.”