Read Rampi Matius 7 Bible Online

Matius 7 - Rampi bible

Matius 7

¹“Inioꞌkei mosalaꞌi toaꞌ ntaniꞌna, hingkeꞌna hawaꞌkei woꞌo nosalaꞌi Pueꞌ Ala.

²Alaꞌ hohumbo lalami mosalaꞌi toaꞌ, lala tiꞌo woꞌo to hingkiꞌ nopakeꞌ Pueꞌ Ala pe ingkei.

³Mahamporeꞌi hinaꞌ iꞌokiꞌkei kowilohane awami, hantaro rangka loti to i matami hawaꞌkei iꞌokiꞌ?

⁴Hohumbomo kowadimi mampatiꞌiki awami, ‘Mai, kupopolaiꞌi kowilohama,’ ane uwaꞌi tene rangka loti i matamu.

⁵Ingkei to mampehantoniꞌ! Hangangaa ipopolaikei duluna rangka to uwaꞌ i matami hadoduomi hingkeꞌna iꞌokiꞌkei mampopolai kowilohane awami.”

⁶Uko tiꞌo, hi Yesu mampowute womo pandiriꞌ hieꞌe, Notiꞌi, “Hapo to mangkolehi nioꞌkei ipaꞌaniki ahu, inioꞌna intu ahu tiꞌo hingkiꞌ meholibaꞌ motiokei. Hei inioꞌkei mampaꞌani parewa to masuliꞌ pe boeꞌ, alaꞌ boeꞌ tiꞌo hingkiꞌ modihaꞌ-dihaꞌ ntooꞌlu parewa tiꞌo.”[9]

⁷“Merapiꞌmokei pe Pueꞌ Ala, hingkeꞌ Nopaꞌanikei. Mampaliꞌmokei hingkeꞌ pahuakei, mangkokadoꞌmokei wambaꞌ, hingkeꞌ niweaꞌkikei.

⁸Alaꞌ hihimo to merapiꞌ hingkiꞌ mantorimo. Hihimo to mampaliꞌ hingkiꞌ pahua. Hihimo to mangkokadoꞌ wambaꞌ, hingkiꞌ niweaꞌki.

⁹Ka lumbumi, ba uwaꞌreꞌi haduo umoꞌ to mampaꞌani watu pe anaꞌna ane merapiꞌi roti? Ba uwaꞌkei to mampaꞌani ule ane anaꞌmi merapiꞌ bouꞌ? Hawaꞌi!

¹¹Kehapoꞌi kodake walimi, ibahaꞌkei tene mampaꞌani hapo to moromiꞌ pe anaꞌmi. Hapona tene Umoꞌmi to i suruga! Nobahaꞌ mpololeke mepaꞌani hapo to moromiꞌ pe hihimolu to merapiꞌ pe Io.”

¹²“Hapo-hapolu to ileikei rowali toaꞌ pe ingkei, hangangaa iwalikei dulu pe toaꞌ ntaniꞌna. Tiꞌomo ohine Hawaꞌna hi Musa hante pepoturuꞌ ka nabi-nabi.

¹³Hohopiꞌ wambaꞌ hei masusa lala to menonto pe kotuwuꞌ to wolaꞌ, hei hawaꞌi woriꞌ toaꞌ to moliu i lala tiꞌo. Wambaꞌ hante lala to menonto pe naraka koroba, hei woriꞌ toaꞌ to motuntuni lala tiꞌo. Mewaliꞌ mekahikei moliu wambaꞌ to hohopiꞌ, hingkeꞌna tuwuꞌkei nturusi moꞌawa hante Pueꞌ Ala.”

¹⁵“Majaga-jagakei i nabi-nabi to mampowute poturuꞌ to salaꞌ, hupaꞌhi pe lumbumi hantoniꞌhi hibali gimba, hantaro hibalihi serigala to mohiaꞌ.

¹⁶Hingkiꞌ ibahaꞌkei powutire ka wuaꞌna pajamara. Katimaraꞌ hawaꞌi mampowuaꞌki anggoroꞌ hei rui hawaꞌi mampowuaꞌki wuaꞌ ara.

¹⁷Hatoꞌo woꞌo lekiꞌna loti to tuwuꞌ moromiꞌ, moromiꞌ woꞌo powuaꞌne hei lekiꞌna loti to hawaꞌi tuwuꞌ moromiꞌ, hawaꞌi woꞌo moromiꞌ powuaꞌne.

¹⁸Hawaꞌi uwaꞌ loti to moromiꞌ, kodake powuaꞌne, hei hawaꞌi uwaꞌ loti to kodake, moromiꞌ powuaꞌne.

¹⁹Lekiꞌ-lekiꞌna loti to hawaꞌi mowuaꞌ moromiꞌ, hingkiꞌ nitowi hei nitube pe lali api.

²⁰Hatoꞌo woꞌo, hingkiꞌ ibahaꞌkei himo nabi to mepomonawuꞌ, alaꞌ mombaha ka wuaꞌna pajamara.

²¹Hawaꞌi ka lekiꞌna toaꞌ to mowowoiꞌA Pueꞌ to hingkiꞌ mekahi pe lali poparentana UmoꞌKu to uwaꞌ i suruga, angkana toaꞌ to mowali peleihana UmoꞌKu to hingkiꞌ mekahi pe lali PoparentaNa.

²²I ando pobutusi i kotutuana duniaꞌ, woriꞌ toaꞌ hingkiꞌ mantiꞌi pe Aku, ‘Pueꞌ! Hawaꞌireꞌi Ibahaꞌ i lali konaꞌMu kipowutemo Pohawaꞌne Pueꞌ Ala? Mobuemoka lomoa i lali konaꞌMu, hei woriꞌ woꞌo tandaꞌ kuasaꞌ to kiwali i lali konaꞌMu.’

²³Tempo tiꞌo, hingkiꞌ Kuhoniꞌhi, ‘Hawaꞌkei Kubahaꞌ! Polaikei kaseꞌe, ingkei to kodake waliami.’ ”

²⁴“Hihimo to mampehoromua lolitangKu hei nopetuntui, wadi nipandiriꞌ hibali haduo toaꞌ to buhaꞌ pekiri to moꞌaro tambina i womboꞌ watu to kodeꞌ mpololeke hei maroho.

²⁵I tempona meparowo hei ura makaja, uwai kodeꞌ. Parowo morumpa tambi tiꞌo, angkana hawaꞌi modungka alaꞌ tambi tiꞌo niꞌaro i womboꞌ watu.

²⁶Angkana toaꞌ to mampehoromua lolitangKu hieꞌe hei hawaꞌi nopetuntui, wadi nipandiriꞌ hibali haduo toaꞌ to bebe to moꞌaro tambina i womboꞌ woꞌoni.

²⁷I tempona meparowo hei ura makaja, uwai kodeꞌ. Tambi tiꞌo norumpa woꞌo parowo, liu modungka hei mokero.”

²⁸Koꞌukona hi Yesu mampoturuꞌ toaꞌ, lemeniahi lekiꞌ-lekiꞌne to pahori poturuꞌNa,

²⁹alaꞌ Io mepoturuꞌ hibali toaꞌ to makuasaꞌ, hawaꞌi hibali guru-guru agama.