Read Rampi Matius 8 Bible Online

Matius 8 - Rampi bible

Matius 8

¹Koꞌukonalu hi Yesu mepoturuꞌ, Io mengkohou ka biri, hei woriꞌ toaꞌ metuntu pe Io.

²I tempo tiꞌo, hupaꞌmo haduo toaꞌ tokusta hei melingkotuꞌ i hinarona hi Yesu, notiꞌi, “Tua, ane hiniꞌKo, Ipokoꞌoriꞌa kaiaꞌ!”

³Mehoniꞌ Yesu, “HiniꞌluꞌA. Katoꞌo Noperoramamo hi Yesu toaꞌ tiꞌo hei notiꞌi, Moꞌoriꞌmoko!” Tempo tiꞌo, hakiꞌna kaliuꞌ moꞌoriꞌ.

⁴Uko tiꞌo, notiꞌi womo hi Yesu pe io, “Inioꞌ dulu ilolitaꞌi pe hihimo hapo to mewali i ingko. Noloumoko dulu pe tadulako mpenomba, ipetidoꞌkimo wotama hingkeꞌna noꞌokiꞌi komoꞌoriꞌmamo, hei mampeweiko popenombamu motuntuni hawaꞌ to teꞌukiꞌ i lali Aturana hi Musa, hingkeꞌna mombaha i lekiꞌ-lekiꞌna toaꞌ komoꞌoriꞌmamo.”

⁵Uko tiꞌo, hi Yesu nolou pe bolaꞌ Kapenau. PekahiNalu itoꞌo, hupaꞌ haduo tadulako surodadu toRoma mampohidupaꞌki hi Yesu hei merapiꞌ sulungi,

⁶notiꞌi, “Tua! Hawiꞌku turulu nturusi i tambi alaꞌ mohakiꞌi wute kohu hei maporiꞌ mpololeke nohori.”

⁷Notiꞌi hi Yesu, “Hingkiꞌ nolouꞌA mampokoꞌoriꞌi.”

⁸Nohoniꞌ tadulako surodadu tiꞌo, “Tua, hawaꞌa masipatoꞌ mantorimoKo i tambingku.[10] Angkana kehapoꞌi Itiꞌiluꞌi hamokuꞌ lolita, hawiꞌku tiꞌo bateꞌna hingkiꞌ moꞌoriꞌ. Aku haduo tadulako surodadu. Uwaꞌ to i wowomboꞌka, hei uwaꞌhi woꞌo to i wowoiꞌku. Ane rapaꞌna kupohawaꞌkiꞌi haduo surodadu, kutiꞌiki, ‘Nolouko!’ Bateꞌna nolou. Ane kuwowoiꞌi surodadu to ntaniꞌna, ‘Humeiko!’ Bateꞌna humei. Ane kutiꞌiki hawiꞌku, ‘Iwali tiꞌo!’ bateꞌna nowali. Hatoꞌo woꞌo kokupoꞌohine kuasaꞌne lolitaMu.”

¹⁰Hoko hi Yesu pahori lolitana tadulako surodadu tiꞌo. Iomo horiana mehahiliꞌ pe toaꞌ to metuntu i Io, Notiꞌi, “Tuꞌu to Kutiꞌikikei, i lumbumi toSaraeli, handoaꞌi tene uwaꞌ ka Kuhua howeꞌ haduo to maroho pepoꞌohine hibali pepoꞌohina toaꞌ hieꞌe to handoꞌio toSaraeli.

¹¹Mewaliꞌ, hingkeꞌna ibahaꞌkei: woriꞌ toaꞌ to handoꞌio toYahudi hingkiꞌ mewali toaꞌna Pueꞌ Ala. Hingkiꞌ hupaꞌhi ka humanele duniaꞌ, mahurahi hei mangka i komotanaꞌ-tanaꞌ i lali kodatuana Pueꞌ Ala moꞌawa hante hi Burahima, hi Isaki hei hi Akoꞌ.

¹²Kotuꞌuana, ingkei wae toSaraeli to masipatoꞌ mewali toaꞌna Pueꞌ Ala i lali kodatuaNa. Angkana ingkei to hingkiꞌ nitube pe lali peꞌohaꞌa to mokorindi mpololeke, moꞌela ka Pueꞌ Ala. Itoꞌo, hingkiꞌ meꞌolakei hei maporiꞌ ihorikei.”

¹³Uko tiꞌo, notiꞌi hi Yesu pe tadulako surodadu tiꞌo, “Mahuliꞌmoko, alaꞌ hapo to ipoꞌohi, bateꞌna hingkiꞌ mewali.” Tempo tiꞌo woꞌo, moꞌoriꞌmo mpuꞌu hawiꞌne to kolentuꞌana mohakiꞌ i tambina.

¹⁴Uko tiꞌo, hi Yesu nolou pe tambina hi Peturuꞌ. Itoꞌo, Noꞌokiꞌ ponianane hi Peturuꞌ towoweꞌe turu alaꞌ mohakiꞌi hoholeꞌ.

¹⁵Konotikonalu hi Yesu korawene towoweꞌe tiꞌo, kaliuꞌ moꞌoriꞌ. Katoꞌo, io meꞌaromo honiꞌi mampatimomoki pangkana hi Yesu.

¹⁶Ikopentoriꞌnalu ando, woriꞌ toaꞌ nolou pe hi Yesu mangkomi to mohakiꞌ hante to nopekahii tokodake. Hi Yesu mampopolai tokodakehi tiꞌo moliu lolitaNa, hei lekiꞌna toaꞌ to mohakiꞌ Nopokoꞌoriꞌhi woꞌo.

¹⁷Lekiꞌ-lekiꞌna to nowali hi Yesu hieꞌe mobuhoꞌi lolitana nabi Yesaia hampiha to mantiꞌi: “Iomo to malentu komoledeꞌta hei mampokoꞌoriꞌ hakiꞌta.” [11]

¹⁸Hampiha tempo, toaꞌ woriꞌ motuleliꞌi hi Yesu. Konoꞌokiꞌnalu hi Yesu woriꞌ toaꞌ motuleliꞌiꞌI, Norumbaꞌmohi topeguruNe mewute nolou tinaꞌ i hanupe rano.

¹⁹Angkana hupaꞌmo haduo guru agama toYahudi, mampatiꞌiki hi Yesu, “Guru, pe imbo koꞌakoaMu, tolouꞌa woꞌo metuntu!”

²⁰Notiꞌi hi Yesu, “Serigala uwaꞌ woloꞌ peꞌohaꞌare, hei tinti uwaꞌ horare, angkana Anaꞌ Manusiaꞌ, hawaꞌi uwaꞌ tambi peꞌohaꞌaNe.”

²¹Uko tiꞌo, uwaꞌ woꞌo haduo toaꞌ to metuntu pe Io to mantiꞌi, “Pueꞌ, Ipoliuꞌa dulu nolou motawu umoꞌku.”

²²Angkana notiꞌi hi Yesu pe io, “Tedehimohi to mahi morewahi hangko tomahira. Angkana Ingko, metuntumoko Aku!”

²³Katoꞌo mehendeꞌmo hi Yesu hante topeguruNahi pe lali duanga, honiꞌi molaimohi meduanga mewute i rano Galilea.

²⁴Hangkaꞌ-hangkaꞌ romo mata mparowo to makaja i rano, horiana duangara hingkiꞌ mentoriꞌ alaꞌ norumpahi balumba. I tempo tiꞌo, hi Yesu kolentuꞌana leꞌo.

²⁵TopeguruNahi moluke hi Yesu rotiꞌi, “Pueꞌ! Sulungika! Hingkiꞌ horewuꞌki!”

²⁶Hi Yesu mampatiꞌikihi, “Ingkei to mororangko pepoꞌohimi. Mahamporeꞌi hinaꞌ morokaꞌkei?” Meꞌaromo hi Yesu honiꞌi mokamoroki parowo hante balumba tiꞌo. Kaliuꞌ lebaꞌ mpololeke rano tiꞌo.

²⁷Ropolemenia topeguruNa, hei rotiꞌi, “Hihimoreꞌito toaꞌ hieꞌe? Hingkoweꞌ parowo hante balumba motuntuni hawaꞌNa!”

²⁸Wutemo hi Yesu hante topeguruNahi i hanupe rano i woiꞌ Gadara. Itoꞌo uwaꞌ meroduo toaꞌ to nopekahii tokodake, meꞌohaꞌhi i petowua. Molaihi ka petowua tiꞌo, ako mampohidupaꞌkihi hi Yesu. Toaꞌ to roduo tiꞌo mekororokaꞌihi mpololeke, iomo horiana hamboaꞌmo uwaꞌ toaꞌ to podehoꞌ moliu itoꞌo.

²⁹Moloaꞌ-loaꞌhi toaꞌ to roduo tiꞌo, rotiꞌi, “AnaꞌNa Pueꞌ Ala! Hingkiꞌ Ipohampoka? Ba hingkiꞌ Ipoperima-rimaka, kehapoꞌi handoaꞌi tene hupaꞌ tempone Ando Pobutusi?”

³⁰Hawaꞌi moꞌela katoꞌo, uwaꞌhi boeꞌ to morombonga kolentuꞌara mahuge.

³¹Tokodake to mekahi i toaꞌ tiꞌo merapiꞌ pe Yesu, rotiꞌi, “Ane Ipopolaika kaseꞌe, Ipopekahika pe boeꞌ to woriꞌ tiꞌo.”

³²Notiꞌi hi Yesu, “Toloumokei!” Molaimohi mpuꞌu tokodake tiꞌo, hei mekahihi pe boeꞌ. Boeꞌ tiꞌo mehilaihi wute i tua to i bota rano hei monawuꞌhi i tua pe uwai horiana mahihi podu.

³³Toaꞌ to mampoꞌodaꞌ boeꞌ tiꞌo pangkiꞌ hapo to pewali i boeꞌra hei hapo to pewali i toaꞌ to nopekahii tokodake tiꞌo. Mehilaimohi nolou pe bolaꞌ mampowute lekiꞌ-lekiꞌna to mewali.

³⁴Iomo horiana tumpu bolaꞌ nolouhi mangkohidupaꞌki hi Yesu. Roperapiꞌ mpololeke hingkeꞌna molaiꞌI ka woiꞌra.