Read Rampi Markus 1 Bible Online

Markus 1 - Rampi bible

Markus 1

¹Hieꞌemo Kareba Moromiꞌ noniuꞌ Yesu Kerisitu Anaꞌna Pueꞌ Ala.

²Lolitonana nopemoluka ka hapo to teꞌukiꞌ i lali suraꞌna Yesaia[1]. I lali suraꞌ tiꞌo Pueꞌ Ala mampatiꞌiki waheꞌe: “Hieꞌemo rumbaꞌangKa to hingkiꞌ Kurumbaꞌ medulu ka Ingko, hingkeꞌna mampatimomo lalaMu.”

³“Iomo to meꞌoꞌando popada woꞌoni, notiꞌi: ‘Pueꞌ hingkiꞌ hupaꞌmo! Ipatimomomokei lalaNe. Nipokononto lala to hingkiꞌ Nopoliuhi.’ ” [2]

⁴To nopowute nabi Yesaia tiꞌo tebuhoꞌimo ikohupaꞌna hi Yohanes toperiu i popada woꞌoni. Io mampowute pohawaꞌna Pueꞌ Ala pe toaꞌ to woriꞌ, notiꞌi, “Mengkatobaꞌmokei ka dosami hei humeimokei mampoperiu, hingkeꞌna dosami hingkiꞌ noꞌampuni Pueꞌ Ala.”

⁵Woriꞌ toaꞌ to nolou pe popada woꞌoni alaꞌ dokoꞌhi pahori lolitana hi Yohanes. Uwaꞌhi to ka woiꞌ Yudea hei ka kota Yerusale akohi mopangakuꞌ dosara, honiꞌi noriuhi hi Yohanes i uwai Yarade.

⁶Baduꞌna hi Yohanes niwali ka wilolu unta. Salupiꞌna ka koliꞌ. Pangkana popae hante uwai koniuꞌ.

⁷Hi Yohanes mampowute notiꞌi, “Hamboaꞌmo morue hingkiꞌ hupaꞌ woꞌo haduo Toaꞌ to meliu kuasaꞌNe ka aku. Howeꞌ moꞌuweꞌ pehiluꞌ sanalaꞌNa, hawaꞌa masipatoꞌ.

⁸Aku moriukei hante uwai, angkana Io hingkiꞌ moriukei hante Inohaꞌ Mangkolehi.”

⁹I tempo tiꞌo, hi Yesu molai ka bolaꞌ Nasareꞌ i woiꞌ Galilea, hei mampoperiu pe hi Yohanes i uwai Yarade.

¹⁰Pengkahorinalu hi Yesu ka uwai, Io pangkiꞌ laniꞌ moweaꞌ hei Inohaꞌ Mangkolehi mengkohou i womboꞌNa hibali tinti merpati.

¹¹Katoꞌo pahorihi loaꞌna Pueꞌ Ala ka laniꞌ to mantiꞌi, “Ingkomo AnaꞌKu to Kupokarima hei to mampomotanaꞌ lalingKu.”

¹²Uko tiꞌo, alaꞌ perandana Inohaꞌ Mangkolehi, hi Yesu nolou pe popada woꞌoni.

¹³Io meꞌohaꞌ itoꞌo iba mpuluꞌ ando iba mpuluꞌ mini komoruene nohohongkeꞌi Belisiꞌ. Uwaꞌhi woꞌo pinatuwuꞌ-pinatuwuꞌ to moꞌilo itoꞌo, hei malaꞌeka-malaꞌeka morewu hi Yesu.

¹⁴Kolentuꞌana hi Yohanes Toperiu nitarungkuꞌ, i tempo tiꞌo, hi Yesu nolou pe woiꞌ Galilea mampowute Kareba Moromiꞌ to ka Pueꞌ Ala,

¹⁵Notiꞌi, “Hupaꞌmo tempo to nopokononto Pueꞌ Ala. Hamboaꞌmo morue Pueꞌ Ala hingkiꞌ moparenta! Mewaliꞌ mengkatobaꞌmokei ka dosami hei mepoꞌohikei i Kareba Moromiꞌ.”

¹⁶Hampiha tempo, hi Yesu matengkaꞌ i bota rano Galilea, hei Noꞌokiꞌ hi Simo hante hineeꞌna to nikokeneꞌi hi Andaria kolentuꞌara mojalaꞌ, alaꞌ tiꞌolu jamare.

¹⁷Notiꞌi hi Yesu, “Humeimokei metuntu Aku! Hingkiꞌ Kupopewalikei topojalaꞌ toaꞌ.”

¹⁸Kaliuꞌ ropohentemo mpuꞌu jalaꞌre, hei metuntumohi pe hi Yesu.

¹⁹Uko tiꞌo, nopololiumo hi Yesu patengkaꞌaNe, hei Io pangkiꞌ womo hi Yakobus hante hineeꞌna to nikokeneꞌi hi Yohanes, anaꞌna hi Sebedeu, kolentuꞌara mangkoromiꞌi jalaꞌra i lali duanga.

²⁰Kaliuꞌhi nowowoi hi Yesu hingkeꞌna metuntuhi pe Io. Katoꞌo, ropolihimo mpuꞌu umoꞌre i lali duanga moꞌawa hante topajamana, hei metuntuhi pe Yesu.

²¹Uko tiꞌo, hi Yesu hante topeguruNa nolouhi pe bolaꞌ Kapenau. I ando penombahara toYahudi, hi Yesu mekahi pe lali tambi penombahara hei mepoturuꞌ.

²²Toaꞌ to pahori poturuꞌna lemeniahi, alaꞌ Io mepoturuꞌ hibali toaꞌ to makuasaꞌ, hawaꞌi hibali guru-guru agamara.

²³I tempo tiꞌo, uwaꞌ haduo toaꞌ to nopekahii tokodake mekahi woꞌo pe tambi penombaha, hei moloaꞌ-loaꞌ notiꞌi,

²⁴“O Yesu toNasare! Hingkiꞌ Ipohampoka! Ba hingkiꞌ ipokarugiꞌka? Kubahaꞌ koꞌIngkonamo Suro to Mangkolehi ka Pueꞌ Ala.”

²⁵Angkana nokamoroki hi Yesu Notiꞌi, “Mondiiꞌko! Pesuwu ka toaꞌ hieꞌe!”

²⁶Tokodake tiꞌo mampomororidiꞌ wotana toaꞌ tiꞌo, moloaꞌ-loaꞌ hei mesuwu.

²⁷Ropolomomenia toaꞌ to pangkiꞌ hapo to pewali tiꞌo, hei mometenei-teneihi haduo hei haduo, rotiꞌi, “Haporeꞌito hieꞌe? Hieꞌe poturuꞌ to wolaꞌ. Toaꞌ hieꞌe makuasaꞌ mpololeke! Howeꞌ tokodake mampetuntui hawaꞌNa!”

²⁸Mepongka katoꞌo, hapo to nowali hi Yesu tekarebamo i humanele woiꞌ Galilea.

²⁹Kopahuliꞌralu ka tambi penombaha tiꞌo, hi Yesu hante topeguruNa kaliuꞌhi nolou pe tambina hi Simo hante hi Andaria. Hi Yakobus hante hi Yohanes metuntuhi woꞌo.

³⁰Kohupaꞌralu i tambi tiꞌo uwaꞌ toaꞌ to mampetiꞌiki pe hi Yesu, ponianana hi Simo towoweꞌe turu alaꞌ mohakiꞌi hoholeꞌ.

³¹Katoꞌo hi Yesu tolou pe koturuana, Notiko korawene hei Noꞌaro, kaliuꞌ moꞌoriꞌ katoꞌo liu ako morewuhi.

³²Ikopentoriꞌnalu ando, woriꞌ toaꞌ nolou mangkomi to mohakiꞌ hei to nopekahii to kodake pe hi Yesu,

³³woriꞌ tumpu bolaꞌ nolou mororampu i tanobaꞌa tambina hi Simo.

³⁴Woriꞌ toaꞌ to nopokoꞌoriꞌ hi Yesu ka hakiꞌra to woriꞌ langkaꞌ hei mampokoꞌoriꞌ toaꞌ to nopekahii tokodake. Hei lomoa tiꞌo hawaꞌhi Nopoliu hi Yesu mampololita kohihimona hi Yesu, alaꞌ robahaꞌlu woꞌo kohihimoNa hi Yesu.

³⁵Dodungku ando, meꞌaromo hi Yesu honiꞌi molai nolou pe komonondiiꞌana ako mekokae hadoduoNa.

³⁶Hei hi Simo hante awanahi nolouhi mampaliꞌI.

³⁷IkorohuaNalu rotiꞌi, “Guru, woriꞌ toaꞌ to mampaliꞌKo.”

³⁸Katoꞌo hi Yesu mehoniꞌ, “Hangangaa nolouki pe bolaꞌ-bolaꞌ to dodungku, hingkeꞌna Kupowute woꞌo i iohi Kareba Moromiꞌ, alaꞌ tiꞌomo tungkaihangKa humei iseꞌe.”

³⁹Katoꞌo noloumohi hi Yesu hante topeguruNa mampowute pohawaꞌna Pueꞌ Ala i bolaꞌ-bolaꞌ i woiꞌ Galilea. Io mepoturuꞌ i lali tambi-tambi penombaha, hei mampopesuwu lomoa to mekahi pe toaꞌ.

⁴⁰Uwaꞌ haduo toaꞌ to kehakiꞌ kusta ako melingkotuꞌ i hinarona hi Yesu notiꞌi, “Ane hiniꞌluKo, Isulungiꞌakae! Ipokoꞌoriꞌa.”

⁴¹Iomo horiana marima laline hi Yesu pangkiꞌ toaꞌ tiꞌo. Katoꞌo Notiko hei Notiꞌi, “HiniꞌluꞌA! Moꞌoriꞌmoko!”

⁴²Kaliuꞌ moꞌoriꞌ toaꞌ tiꞌo ka hakiꞌna.

⁴³Uko tiꞌo, norumbaꞌmo hi Yesu molai, hei Notiꞌiki,

⁴⁴“Jagako! Inioꞌ itiꞌi-tiꞌiꞌi pe hihimo hapo to mewali hingkenia. Noloumoko ipetidoꞌki wotama pe tadulako mpenomba, hingkeꞌna noꞌokiꞌi komoꞌoriꞌmamo. Alaꞌ moꞌorimoko ikomimo popenombama motuntuni Aturana hi Musa, hingkeꞌna mombaha pe lekiꞌ-lekiꞌna toaꞌ komoꞌoriꞌmamo.”

⁴⁵Angkana, i imbolu koꞌakoana toaꞌ tiꞌo, nololita nturusi konopokoꞌoriꞌne hi Yesu, alana hi Yesu hamboaꞌmo rahi mampopeꞌoꞌokiꞌ i lali bolaꞌ, horiana Io meꞌohaꞌ romo i howali bolaꞌ i komonondiiꞌana. Angkana kehapoꞌi hatoꞌo, woriꞌ toaꞌ ka imbo-imbolu to nolou mampohidupaꞌki hi Yesu.