Read Rampi Markus 10 Bible Online

Markus 10 - Rampi bible

Markus 10

¹Hi Yesu hante topeguruNa molaimohi mampolihi bolaꞌ Kapenau nolouhi pe woiꞌ Yudea, hei pe woiꞌ to uwaꞌ i hanupe uwai Yarade. Woriꞌ mpololeke toaꞌ to hupaꞌ motuleliꞌi hi Yesu, hei Io mampoturuꞌhi hibali biasana.

²Uwaꞌ haꞌumbora duo toParisi to mehupaꞌ. Tungkaihara hingkeꞌna mampomonawuꞌluhi hi Yesu. Katoꞌo meꞌitanohi, “Motuntuni atura agamanta, wadireꞌi tomaꞌani mampokaꞌaki hantambina?”

³Notiꞌi hi Yesu, “Hawaꞌ hapo to nopaꞌanikikei nabi Musa?”

⁴Rohoniꞌ toParisi, “Hi Musa mampoliu tomaꞌani mampokaꞌaki hantambina, asalana nowali duluna suraꞌ mpokaꞌa.”

⁵Notiꞌi hi Yesu, “Hi Musa moꞌukiꞌ hawaꞌ tiꞌo nokomi komorintodina lalimi.

⁶Angkana ka pewalina duniaꞌ, i tempona Pueꞌ Ala mowali toaꞌ, Io mowali tomaꞌani hante towoweꞌe.

⁷Hibali to teꞌukiꞌ i lali Suraꞌ Mangkolehi: ‘Iomo horiana haduo tomaꞌani hingkiꞌ mampolihi umoꞌna hante inoꞌna, hei tuwuꞌ moꞌawa hante hantambina,

⁸hingkeꞌna to roduo tiꞌo mewalihi hawowota. Mewaliꞌ hamboaꞌmohi meroduo, angkana haꞌanumohi’

⁹Iomo horiana Kutiꞌikikei, tomaꞌani hawaꞌi mpuꞌu wadi mampokaꞌaki hantambina, alaꞌ Pueꞌ Ala to mampohaꞌanuhi.”

¹⁰Uko tiꞌo, hi Yesu hante topeguruNa mekahimohi i tambi. Kolentuꞌara itoꞌo, meꞌitano womohi topeguruNe pe Io noniuꞌ adaꞌ mpokaꞌa.

¹¹Notiꞌikihi hi Yesu, “Himo to mampokaꞌaki hantambina honiꞌi hamoko womo hante towoweꞌe ntaniꞌna, palaihana tomaꞌani tiꞌo mowali dosa pe hantambina to nopokaꞌaki.

¹²Hatoꞌo woꞌo towoweꞌe to mampokaꞌaki maꞌanina honiꞌi hamoko womo hante tomaꞌani ntaniꞌna, palaihana towoweꞌe tiꞌo mowali dosa pe maꞌanina to nopokaꞌaki.”

¹³Hampiha tempo, uwaꞌhi toaꞌ to mangkomi oꞌanaꞌ pe hi Yesu hingkeꞌna Noperamahi hei Nobarakatihi. Angkana topeguruNa mampowuriꞌihi toaꞌ tiꞌohi.

¹⁴Konoꞌokiꞌna hi Yesu hapo to rowali topeguruNa, Nopowuriꞌihi, Notiꞌi, “Tedehiluhiae oꞌanaꞌ tiꞌo humei pe Aku. Inioꞌ niꞌopihi, alaꞌ toaꞌ to hibali oꞌanaꞌ hieꞌe to hingkiꞌ mewalihi toaꞌna Pueꞌ Ala i lali poparentaNa.

¹⁵Tuꞌu mpololeke to kutiꞌi hieꞌe: Ane hawaꞌkei mengkoruꞌ pe Pueꞌ Ala hibali haduo oꞌanaꞌ, hawaꞌkei hingkiꞌ mewali toaꞌna Pueꞌ Ala i lali poparentaNa.”

¹⁶Koꞌukona mololita hatoꞌo, Nokopuimohi oꞌanaꞌ tiꞌo, Nobarakatihi hante Nopalaꞌ tutuꞌre.

¹⁷Kohingkiꞌ polaina hi Yesu hante topeguruNa mampololiu patengkaꞌra, hupaꞌ womo haduo toaꞌ to mehilai nolou pe hi Yesu. Kaliuꞌ melingkotuꞌ i hinaroNa honiꞌi meꞌitano, notiꞌi, “Guru to moromiꞌ, hapo to hangangaa kuwali hingkeꞌna pahuaꞌa kotuwuꞌ to wolaꞌ to hawaꞌi mokoꞌukoa?”

¹⁸Notiꞌi hi Yesu, “Mahamporeꞌi hinaꞌ itiꞌi Aku hieꞌe to moromiꞌA? Hawaꞌi uwaꞌ howeꞌ haduo to moromiꞌ, bateꞌnalu Pueꞌ Ala.

¹⁹Bateꞌna ibahaꞌmo hawaꞌ to teꞌukiꞌ i lali Aturana hi Musa: ‘Inioꞌ merorokoꞌ, inioꞌ mebualosi, inioꞌ manako, inioꞌ mewali sabiꞌ to mowuti, inioꞌ mebagiuꞌ, hei iꞌadaꞌi inoꞌ umoꞌmi.’”

²⁰Notiꞌi toaꞌ tiꞌo, “Guru, lekiꞌ-lekiꞌna hawaꞌ tiꞌo, umbiꞌnamo kupetuntui mepongkaꞌa oꞌanaꞌ.”

²¹Konohorina hi Yesu pehoniꞌne, Noꞌoꞌele hei Nokarima mpololeke toaꞌ tiꞌo, iomo horiana Notiꞌiki, “Uwaꞌ tene halangkaꞌ to hangangaa iwali. Mahuliꞌmoko duluna ipobaluꞌmo lekiꞌne lumamu, honiꞌi hilina idolaꞌ-dolaꞌkihi toaꞌ to merima-rima tuwuꞌra Ane iwaliꞌi hatoꞌo, hingkiꞌ kodeꞌ howonine to ihua i lali suruga. Uko tiꞌo, humeimoko metuntu pe Aku.”

²²Konohorinalu toaꞌ tosugiꞌ lolitane hi Yesu, masusa laline honiꞌi molai, alaꞌ woriꞌ mpololeke woiꞌne hante lumana.

²³Hi Yesu meꞌoꞌele pe topeguruNa to metotiꞌi mantuleliꞌ, honiꞌi Notiꞌikihi, “Masusa mpololeke toaꞌ tosugiꞌ mewali toaꞌna Pueꞌ Ala i lali poparentaNa.”

²⁴Ropolomenia topeguruNa lolitane, katoꞌo Notiꞌiki womohi hi Yesu, “Anaꞌ-anaꞌKu, umbiꞌ masusa mpololeke mewali toaꞌna Pueꞌ Ala i lali poparentaNa.

²⁵Mololihaꞌ tene hambaꞌa unta mekahi i woloꞌ daruꞌ, hintina tosugiꞌ mewali toaꞌna Pueꞌ Ala i lali poparentaNa.”

²⁶Korohorinalu topeguruNa lolitane hi Yesu, ropolomenia mpololeke honiꞌi rotiꞌi, “Ane hatoꞌoꞌi himoreꞌi to wadi mewali toaꞌna Pueꞌ Ala?”

²⁷Noꞌoꞌelehi hi Yesu honiꞌi Notiꞌi, “Toaꞌ hawaꞌi pobiaꞌ mamposalamaꞌ wotana hadoduona hei mewali toaꞌna Pueꞌ Ala, angkana Pueꞌ Ala pobiaꞌ mowali hapo-hapolu, alaꞌ hawaꞌi uwaꞌ to hawaꞌi nobiaꞌ Nowali.”

²⁸Notiꞌi hi Peturuꞌ, “Hade hohumbomoka? Kipolihimo hinangkana hapongki hingkeꞌna metuntuka pe Ingko.”

²⁹Notiꞌi hi Yesu, “Hingkeꞌna ibahaꞌkei: Himo to mampolihi tambina, halalina, inoꞌna ba umoꞌna, anaꞌna ba kineteꞌna nokomi petuntuna pe Aku hei alaꞌ Kareba Moromiꞌ,

³⁰bateꞌna hingkiꞌ pahua howonina to kodeꞌ. I duniaꞌ hieꞌe io hingkiꞌ pahua hanatu mpiha koworiꞌne tambina, halalina, inoꞌna, anaꞌna, kineteꞌna, hei hingkiꞌ pahua woꞌo poperima-rima. Angkana i ando pobutusi, bateꞌna hingkiꞌ pahua kotuwuꞌ to wolaꞌ to hawaꞌi mokoꞌukoa.

³¹Angkana woriꞌ toaꞌ to himpodulumo hinewowoꞌena hingkiꞌ mewali to kamuri i ando to hingkiꞌ hupaꞌ. Hei woriꞌ woꞌo toaꞌ to kamuri hinewowoꞌena hingkiꞌ mewali to himpodulu i ando to hingkiꞌ hupaꞌ.”

³²Hi Yesu hante topeguruNa mampololiu patengkaꞌra nolou pe Yerusale, hei tempo tiꞌo, hi Yesu matengkaꞌ medodulu. Tepehi topeguruNe, hei toaꞌ to woriꞌ to metuntu kamuri morokaꞌhi. Nowowoi womo hi Yesu topeguruNehi to hampuluꞌ meroduo Nopohohidahi honiꞌi Nopowutekihi hapo to hangangaa hingkiꞌ mewali i Io.

³³Notiꞌi, “Ipehoromuakei moromiꞌ! Hinewowoꞌena, kolentuꞌanta nolou pe Yerusale. Itoꞌomola Anaꞌ Manusiaꞌ hingkiꞌ nipewei pe tutuꞌ-tutuꞌ tadulako mpenomba hei guru-guru agama, hei hingkiꞌ nibutusi hingkeꞌna nihukuꞌI mahi. Uko tiꞌo, hingkiꞌ nipewei pe toaꞌ to handoꞌiohi toYahudi.

³⁴Hingkiꞌ ropopoꞌioꞌio, niliku, nikondo, honiꞌi nirokoꞌ. Angkana ikotolu andona, Io hingkiꞌ tuwuꞌ huliꞌ.”

³⁵Hi Yakobus hante hi Yohanes anaꞌna hi Sebedeu noloumohi mekododungku pe hi Yesu, honiꞌi rotiꞌi, “Guru, uwaꞌ halangkaꞌ to kikodokoꞌi kiperapiꞌ pe Ingko.”

³⁶Notiꞌi hi Yesu, “Hapo to iperapiꞌkei pe Aku?”

³⁷Rohoniꞌ, “Ane mewaliKo Datu to manobaꞌ, Ipaꞌanika mahura hei moparenta moꞌawa hante Ingko, haduo tinaꞌ i koanaMu, haduo tinaꞌ i koiriMu.”

³⁸Notiꞌikihi hi Yesu, “Hawaꞌkei ibahaꞌ hapo to iperapiꞌkei. Ibiaꞌkeireꞌi morii komaporiꞌ hibali to hangangaa Kulentu? Ibiaꞌkeireꞌi mantaha komaporiꞌ hibali to hingkiꞌ morumpaꞌA?”

³⁹Mehoniꞌ hi Yakobus hante hi Yohanes, “Kibiaꞌlu!” Notiꞌi hi Yesu, “Umbiꞌ tuꞌu, hingkiꞌ pahuakei komaporiꞌ hibali to Kulentu, hei komaporiꞌ to hingkiꞌ morumpaꞌA.

⁴⁰Angkana handoꞌio Aku to mampokononto himo to hingkiꞌ mahura tinaꞌ i koanangKu hei tinaꞌ i koiringKu. Angkana Pueꞌ Ala to hingkiꞌ mampokononto himo toaꞌ to hingkiꞌ mahura itoꞌo.”

⁴¹Korohorinalu topeguruNa to hampuluꞌ perapiꞌre hi Yakobus hante hi Yohanes tiꞌo, koiꞌhi,

⁴²iomo horiana hi Yesu mowowoi lekiꞌ-lekiꞌna topeguruNa, Notiꞌikihi, “Ibahaꞌlukei poparentara toaꞌ to hawaꞌhi pobahaꞌ Pueꞌ Ala, mohiaꞌhi ane moparentaihi toaꞌ to woriꞌ. Toaꞌ to dingkaoꞌ pangkaꞌra moparuku toaꞌ hingkeꞌna mampetuntuihi hawaꞌra.

⁴³Angkana ingkei, inioꞌ hatoꞌo waliami! Himo ka lumbumi to mangkodokoꞌi dingkaoꞌ tikoane, hangangaa mewali toperewu.

⁴⁴Hei himo to mangkodokoꞌi himpodulu, hangangaa hibali haduo hawiꞌ i lekiꞌ-lekiꞌna toaꞌ.

⁴⁵Howeꞌ woꞌo Anaꞌ Manusiaꞌ hupaꞌ i duniaꞌ hieꞌe hawaꞌi humei nirewu, angkana hupaꞌ humei mewali toperewu, hei hingkiꞌ mampewei wotaNa nirokoꞌ mohompoꞌ dosana toaꞌ.”

⁴⁶Katoꞌo hi Yesu hante topeguruNa hupaꞌmohi i kota Yeriko. Kopolairalu ka kota tiꞌo, uwaꞌhi toaꞌ to metuntu i iohi hei i hiri lala uwaꞌ haduo tobilo mahura merapiꞌ-rapiꞌ. Konaꞌna hi Bartimeu (palaihana: anaꞌna hi Timeu).

⁴⁷Konohorinalu hi Bartimeu hi Yesu toNasareꞌ moliu, mewowoimo, notiꞌi, “Yesu, muleꞌna datu Daudi! Ipokarimaꞌa, kaiaꞌ!”

⁴⁸Woriꞌ toaꞌ to mampowuriꞌi, rotiꞌi, “Mondiiꞌko!” Angkana tobilo tiꞌo mewowoilu nopokobue, “Muleꞌna datu Daudi, Ipokarimaꞌa wokae!”

⁴⁹Meꞌohaꞌmo hi Yesu, Notiꞌi, “Wowoiꞌi humei!” Rowowoi tobilo tiꞌo honiꞌi rotiꞌiki, “Ipolebaꞌ lalima! Metotiꞌimoko, alaꞌ Nowowoimoko!”

⁵⁰Metotiꞌimo tobilo tiꞌo, nopelubaꞌ jubane, hei nohohiꞌi nolou pe hi Yesu.

⁵¹Hi Yesu meꞌitano pe io, “Hapo to ikodokoꞌi Kuwalikiko?” Mehoniꞌ tobilo tiꞌo, “Guru! Dokoꞌa kaiaꞌ pangkiꞌ!”

⁵²Notiꞌi hi Yesu, “Noloumoko. Alaꞌ pepoꞌohimu pe Aku, moꞌoriꞌmoko!” I tempo tiꞌolumo woꞌo, io pangkiꞌmo, hei matengkaꞌ metuntu hi Yesu.