Read Rampi Markus 11 Bible Online

Markus 11 - Rampi bible

Markus 11

¹Dodungkumohi hi Yesu hante topeguruna i kota Yerusale, wutemohi i bolaꞌ Bepage hante Betania i Biri Saitu. Itoꞌo, hi Yesu morumbaꞌmo roduo topeguruNa

²Notiꞌikihi, “Noloumokei pe bolaꞌ to hingkiꞌ topoliuhi tiꞌo. Ane hupaꞌkei itoꞌo, hingkiꞌ iꞌokiꞌkei hambaꞌa kalide to moleaꞌ tene to nipehiluꞌki, handoaꞌi tene kahampiha nipelambaꞌi. Iꞌuweꞌkei ka konipehiluꞌakina hei ikomikiꞌAkei humei.

³Ane uwaꞌ toaꞌ to meꞌitano pe ingkei mahamporeꞌi hinaꞌ iꞌuweꞌkei? Ihoniꞌkei waheꞌe: ‘Noparaluꞌi Pueꞌ, hei hingkiꞌ kipopahuliꞌlu intu.’”

⁴Noloumohi topeguruNe to roduo tiꞌo, rohuamo mpuꞌu hambaꞌa kalide to moleaꞌ tene to nihiluꞌ i tanobaꞌa tambi i hiri lala. Kolentuꞌara moꞌuweꞌ ka konikohoihana

⁵toaꞌ to metotiꞌihi itoꞌo meꞌitano pe iohi, “Mahamporeꞌi hinaꞌ iꞌuweꞌkei kalide tiꞌo?”

⁶Mehoniꞌhi hibali to Notiꞌikihi hi Yesu hingkenia. Korohorina toaꞌ tiꞌo lolitare, rotedehimohi mangkomi kalide tiꞌo.

⁷Kalide tiꞌo nikomi nolou pe hi Yesu, rolampii hante jubara. Uko rolampii, melambaꞌmo hi Yesu.

⁸Uko tiꞌo, noloumohi pe Yerusale. Woriꞌ toaꞌ metuntu pe Io. Uwaꞌhi to medulu, uwaꞌhi woꞌo to kamuri. Woriꞌhi to mowuraꞌ jubara i lumbu lala to hingkiꞌ nopoliuhi hi Yesu, hei hantenaꞌhi woꞌo nolou moroa taweꞌ loti ka kineteꞌ honiꞌi ropeꞌaliꞌ i lumbu lala, tandaꞌ pepokodeꞌra pe hi Yesu. Toaꞌ to woriꞌ tiꞌo moloaꞌhi nturusi, rotiꞌi: “Hosana! Tepokodeꞌmo Pueꞌ Ala! Pueꞌ Ala mobarakati Toaꞌ to hupaꞌ i lali konaꞌNa!

¹⁰Pueꞌ mobarakati kodatuaNa. Io hingkiꞌ moparenta hibali Datu Daudi, tododulunta hampiha. Tepokodeꞌmo Pueꞌ Ala to i suruga!” [17]

¹¹Kohupaꞌna hi Yesu i kota Yerusale, liu-liu mekahi i lali tanobaꞌa Tambina Pueꞌ Ala hei Noparesaꞌ mantuleliꞌ. Uko tiꞌo, alaꞌ hingkiꞌ mokorindimoꞌi, hi Yesu mahuliꞌmo moꞌawa-awa hante topeguruNahi to hampuluꞌ meroduo nolouhi pe bolaꞌ Betania.

¹²Poꞌonina, molai womohi hi Yesu hante topeguruNa ka Betania nolou pe Yerusale. I lumbu lala, biloramo hi Yesu.

¹³Ka moꞌela tene, Noꞌokiꞌmo hapongko loti ara to mabomboꞌ taweꞌna. Koꞌakonamo Noꞌele loti tiꞌo, ba uwaꞌi wuaꞌne, angkana hawaꞌi uwaꞌ howeꞌ haꞌanu wuaꞌne, alaꞌ handoaꞌi tene tempona mowuaꞌ.

¹⁴Iomo horiana hi Yesu motundaꞌ loti tiꞌo, Nopantiꞌiki, “Mepongka hinewowoꞌena, hamboaꞌmoko hingkiꞌ mowuaꞌ.” Rohori topeguruNa lolitaNe tiꞌo.

¹⁵Hupaꞌ womohi hi Yesu hante topeguruNa i Yerusale, noloumo hi Yesu pe tanobaꞌana Tambina Pueꞌ Ala. Itoꞌo, Io mobue toaꞌ to mobaluꞌ-baluꞌ. Nodungka meja potopua doiꞌ, hei Nodungka woꞌo meja pobaluꞌ-baluꞌa tinti merpati.

¹⁶Hawaꞌi woꞌo Nopoliu toaꞌ mangkomi parewara moliu i tanobaꞌa Tambina Pueꞌ Ala.

¹⁷Uko tiꞌo, Io mampoturuꞌhi, Notiꞌi, “Hawaꞌireꞌi ibahaꞌkei hapo to teꞌukiꞌ i lali Suraꞌ Mangkolehi? Pueꞌ Ala mantiꞌi waheꞌe: ‘TambingKu hingkiꞌ mewali tambi pekokaeha to nopakeꞌ toaꞌ ka humanele duniaꞌ.’ Angkana ipopewalilukei tambi porampuana topanako!”

¹⁸Korohorinalu tutuꞌ-tutuꞌ tadulako mpenomba hei guru-guru agama hapo to nowali hi Yesu, mampaliꞌhi lala hingkiꞌ morokoꞌI. Hampiꞌana motehuꞌhi pe Io, alaꞌ robahaꞌ woriꞌ toaꞌ motanaꞌhi mampehoromua poturuꞌNa.

¹⁹Alaꞌ hingkiꞌ mokorindimoꞌi, hi Yesu hante topeguruNa molaimohi ka kota Yerusale.

²⁰Poꞌonina mehoꞌolu-olu, mahuliꞌ womohi hi Yesu hante topeguruNa nolou pe Yerusale. I lumbu lala, pangkiꞌhi loti ara to notundaꞌ hi Yesu hiwinia mahimo, mobani wute i uwakaꞌna.

²¹Noponindi hi Peturuꞌ lolitane hi Yesu, iomo hinaꞌ notiꞌi pe hi Yesu, “Guru! Ele loti ara to Itundaꞌ tiꞌo, banimo!”

²²Notiꞌi hi Yesu, “Mepoꞌohimokei pe Pueꞌ Ala.

²³Kutiꞌikikei: Ane rapaꞌna itiꞌikikei pe biri tiꞌo, ‘Tehinimoko hei mengkonawuꞌko i lali tahiꞌ!’ Bateꞌna hingkiꞌ mewali, asalana hawaꞌi bata-bata lalimi hei ipoꞌohikei mpuꞌu hapo to itiꞌikei.

²⁴Mewaliꞌ, nipehoromua lolitangKa hieꞌe. Ane mekokaekei merapiꞌ ba hapo-hapo, hangangaa ipoꞌohikei kohingkiꞌ nopaꞌanimi Pueꞌ Ala, hei hingkiꞌ itorimokei.

²⁵Ane mekokaekei hei uwaꞌ awami to ipokoiꞌkei, niꞌampuni dulu, hingkeꞌna Umoꞌmi to uwaꞌ i suruga hingkiꞌ moꞌampuni woꞌo salaꞌmi. [

²⁶Angkana ane hawaꞌi niꞌampuni awami, Umoꞌmi to i suruga hawaꞌi woꞌo hingkiꞌ moꞌampuni salaꞌmi.]”

²⁷Hupaꞌ womohi hi Yesu hante topeguruna i Yerusale. I tempora matengkaꞌ i tanobaꞌa Tambina Pueꞌ Ala, hupaꞌmohi tutuꞌ-tutuꞌ tadulako mpenomba, guru-guru agama hante tomotodi-tomotodira toYahudi to ntaniꞌna.

²⁸Meꞌitanohi pe hi Yesu, rotiꞌi, “Itiꞌikika, himo to mampakuasaꞌiKo mobue topobaluꞌ-baluꞌ ka Tambina Pueꞌ Ala hiwinia hante mampaguru toaꞌ to woriꞌ?”

²⁹Nohoniꞌhi hi Yesu, “Uwaꞌ woꞌo halangkaꞌ peꞌitanongKa pe ingkei. Ane ihoniꞌAkei, hingkiꞌ Kutiꞌi kohihimona to mampakuasaꞌiꞌA mowali lekiꞌ-lekiꞌna tiꞌo.

³⁰Hihimo to mampakuasaꞌi hi Yohanes Toperiu moriu toaꞌ? Ka Pueꞌ Ala, ba ka toaꞌ?”

³¹Mororapaꞌmohi tadulakore toYahudi tiꞌo haduo hei haduo, rotiꞌi, “Hohumbomo kotohoniꞌne? Ane totiꞌi ka Pueꞌ Ala, hingkiꞌ Nohoniꞌki, ‘Ane watoꞌoꞌi, mahamporeꞌi hinaꞌ hawaꞌkei mepoꞌohi?’

³²Angkana maporiꞌ woꞌo ane totiꞌi ka toaꞌlu.” Tadulakora toYahudi tiꞌo motehuꞌhi mampononaꞌa hi Yohanes Toperiu hingkeꞌna inioꞌhi noꞌewa toaꞌ to woriꞌ, alaꞌ lekiꞌ-lekiꞌna toaꞌ mantiꞌi hi Yohanes tiꞌo haduo nabi.

³³Katoꞌo rohoniꞌ, “Hawaꞌi kibahaꞌ.” Iomo hinaꞌ notiꞌikihi hi Yesu, “Ane watoꞌoꞌi, hawaꞌkei woꞌo hingkiꞌ Kutiꞌiki hihimo to mampakuasaꞌiꞌA mowali lekiꞌ-lekiꞌna tiꞌo.”