Read Rampi Markus 12 Bible Online

Markus 12 - Rampi bible

Markus 12

¹Uko tiꞌo, hi Yesu mampowutemo halangkaꞌ pandiriꞌ pe tutuꞌ-tutuꞌ tadulako mpenomba, guru-guru agama hante tomotodi-tomotodira toYahudi, Notiꞌi, “Uwaꞌ haduo toaꞌ to motudoꞌi kineteꞌna hante anggoroꞌ. Kineteꞌna tiꞌo nobontoꞌ mantuleliꞌ, hei mowoloꞌ woiꞌ nowali pebolaꞌana popiꞌiana anggoroꞌ hei moꞌaro woꞌo lolangkaꞌ pampodaꞌana. Uko tiꞌo, norumbaꞌmo haꞌumbora duo toaꞌ majama hei rasiꞌna rodolaꞌ-dolaꞌ intu, honiꞌi molaimo nolou pe woiꞌ to moꞌela.

²Temponamo morupuꞌ wuaꞌ anggoroꞌ, norumbaꞌmo haduo hawiꞌne hingkeꞌna nolou merapiꞌ dolaꞌna ka topajama kineteꞌna.

³Angkana hawiꞌ to norumbaꞌ tiꞌo wuliha rohokiꞌ topajama kineteꞌ hei rokondo, honiꞌi rorumbaꞌ mahuliꞌ ntooꞌ.

⁴Uko tiꞌo, tumpu kineteꞌ tiꞌo morumbaꞌ womo haduo hawiꞌna. Hupaꞌ itoꞌo, io woꞌo bateꞌnalu rokondo wute belo tutuꞌne hei ropokohili-hili.

⁵Katoꞌo, norumbaꞌ womo haduo hawiꞌne. Hupaꞌ itoꞌo, io rorokoꞌ. Hatoꞌo woꞌo korowaline pe lekiꞌ-lekiꞌna hawiꞌ to norumbaꞌ. Uwaꞌhi to rokondo hei uwaꞌhi woꞌo to rorokoꞌ.

⁶Hamboaꞌmo uwaꞌ to ntaniꞌne to norumbaꞌ tumpu kineteꞌ tiꞌo, bateꞌna romo anaꞌna to hadoduona to nopokarima. Koꞌukoana, anaꞌna tiꞌo norumbaꞌmo nolou pe topajama kineteꞌna. Notiꞌi tumpu kineteꞌ i lalina, ‘Bateꞌna hingkiꞌ mengkoruꞌhi pe anaꞌku.’

⁷Angkana, i tempora topajama kineteꞌ pangkiꞌ anaꞌna tiꞌo, morapaꞌmohi, rotiꞌi, ‘Ele! Tiꞌomo humei anaꞌne, io to hingkiꞌ mewali tumpu lekiꞌna kineteꞌ hieꞌe. Aginamo torokoꞌ, hingkeꞌna toroaꞌi kineteꞌne hei lekiꞌ-lekiꞌna ohina.’

⁸Katoꞌo, rohokiꞌmo mpuꞌu anaꞌne tiꞌo, rorokoꞌ hei rotube pe huwali kineteꞌ.”

⁹Uko tiꞌo, nopeꞌitanoki hi Yesu, “Mewaliꞌ, hapo to hingkiꞌ nowali tumpu kineteꞌ tiꞌo? Io bateꞌna hingkiꞌ humei morokoꞌ topajama kineteꞌna tiꞌo, hei kineteꞌna tiꞌo hingkiꞌ nopaꞌanikihi toaꞌ to ntaniꞌna rojama.

¹⁰Handoaꞌireꞌi tene ibasakei lolita hieꞌe i lali Suraꞌ Mangkolehi to mantiꞌi waheꞌe: ‘Watu to notube topoꞌaro tambi, watu tiꞌomola to mewali pahuraha tambi.[18]

¹¹Hatoꞌomola konowaline Pueꞌ Ala, hei moromiꞌ mpololeke hapo to nowali Pueꞌ Ala tiꞌo!’” [19]

¹²Korohorina tadulakora toYahudi lolitane hi Yesu, rokodokoꞌimo rohokiꞌ alaꞌ robahaꞌ koꞌiora to Notungkai pandiriꞌ tiꞌo. Angkana hawaꞌhi wurani mohokiꞌI, alaꞌ motehuꞌhi pe toaꞌ to woriꞌ. Iomo hinaꞌ molaimohi.

¹³Uko tiꞌo tadulakora toYahudi morumbaꞌ haꞌumbora duo toparisi hante toaꞌna datu Herode mampomonawuꞌ hi Yesu hante peꞌitano-peꞌitanora.

¹⁴Kohupaꞌralu i hi Yesu, ropantiꞌiki, “Guru, kibahaꞌ Ingko toaꞌ to mononto. Mepoturuꞌko ikototuꞌuana motuntuni peleihana Pueꞌ Ala. Hawaꞌi Ipetuntui ba hihimolu, alaꞌ hawaꞌKo mampopoꞌori toaꞌ. Iomo hinaꞌ kipeꞌitanoki: ba masipatoꞌki mobaiari sima pe Datu Ngkodeꞌ i Roma, ba hawaꞌi?”

¹⁵Nobahaꞌmo hi Yesu kohantotoniꞌre. Iomo horiana Notiꞌikihi, “Mahamporeꞌi hinaꞌ ipaliꞌkei konawuꞌane lolitangKu? PohumeikiꞌA dulu doiꞌ peraꞌ!”

¹⁶Katoꞌo, ropaꞌanikimo hampepaꞌ doiꞌ peraꞌ. Notiꞌi, “Lentena hante konaꞌna hihimo to uwaꞌ i doiꞌ hieꞌe?” Mehoniꞌhi, “Lentena hante konaꞌna Datu Ngkodeꞌ.”

¹⁷Notiꞌi hi Yesu, “Ane watoꞌoꞌi, ipaꞌanikikei Datu Ngkodeꞌ hapo to hangangaa nipaꞌanikiꞌi, hei ipaꞌanikikei woꞌo Pueꞌ Ala hapo to hangangaa nipaꞌanikiꞌI.” Lemeniahi mpololeke pahori pehoniꞌna tiꞌo.

¹⁸Uko tiꞌo, uwaꞌhi haꞌumbora duo toSaduki hupaꞌhi pe hi Yesu. ToSaduki tiꞌo iomo tadulako agama Yahudi to mampoꞌohi toaꞌ to mahi hawaꞌi hingkiꞌ nipotuwuꞌ huliꞌ.

¹⁹Kohupaꞌralu toSaduki tiꞌo, mampaliꞌluhi konawuꞌana hi Yesu, rotiꞌi, “Guru, nabi Musa moꞌukiꞌ i lali suraꞌ atura agamanta waheꞌe: Ane uwaꞌi tomaꞌani mahi, angkana hawaꞌi uwaꞌ muleꞌne, halalina hangangaa mampohantambi tobembaꞌ tiꞌo, hingkeꞌna uwaꞌ muleꞌne.

²⁰Mewaliꞌ, uwaꞌhi pitu topohalali, hamoloꞌ tomaꞌanihi. Tokokaꞌ hamokomo, angkana handoaꞌi tene uwaꞌ muleꞌna, mahimo.

²¹Katoꞌo, hineeꞌna mampohantambi tobembaꞌ tiꞌo. Handoaꞌi tene woꞌo uwaꞌ muleꞌre, mahimo. Hatoꞌo woꞌo to mewali ikotolu duona,

²²wute to i kopituna duona. Mahimohi lekiꞌ-lekiꞌra hei hawaꞌi uwaꞌ anaꞌre. Koꞌukoana, mahi woꞌo towoweꞌe tiꞌo.

²³Mewaliꞌ, i ando pobutusi, ane tuꞌu-tuꞌu tuwuꞌ huliꞌ lekiꞌ-lekiꞌna to mahi, hihimomo maꞌanine towoweꞌe tiꞌo, alaꞌ pitumohi to mampohantambiꞌi?”

²⁴Mehoniꞌ hi Yesu, “Hawaꞌi mpololeke maniuꞌ pekirimi tiꞌo, alaꞌ hawaꞌkei ibahaꞌ ohine Suraꞌ Mangkolehi, hawaꞌi woꞌo ibahaꞌkei kuasaꞌne Pueꞌ Ala.

²⁵Alaꞌ ane tuwuꞌhi huliꞌ toaꞌ to mahi, hamboaꞌmohi mohamoko alaꞌ kotuwuꞌra hibali kotuwuꞌna malaꞌeka i suruga.

²⁶Hingkiꞌ Kutiꞌikikei lolita to uwaꞌ i lali Suraꞌ to noꞌukiꞌ hi Musa to mampokononto kotuwuꞌra huliꞌ to mahi. I lali Suraꞌ Hawaꞌna hi Musa, tobasa lolitonane to mamponobuhoꞌiki hohumbo Pueꞌ Ala mohawaꞌ pe nabi Musa ka lali rui to makiꞌ. I tempo tiꞌo, hi Burahima, hi Isaki hante hi Akoꞌ moruemohi mahi. Angkana kehapoꞌi hatoꞌo, Pueꞌ Ala mampatiꞌiki hi Musa waheꞌe: ‘Akumo Pueꞌ Ala, to ropenombai nturusi hi Burahima, hi Isaki, hante hi Akoꞌ.’

²⁷Mewaliꞌ, ka lolitana Pueꞌ Ala tiꞌo, tobahaꞌ mpololeke Pueꞌ Ala handoꞌio Pueꞌ Alara to mahi, angkana wae Pueꞌ Alara to tuwuꞌ. Hawaꞌi mpololeke maniuꞌ pekirimio.”

²⁸I tempo tiꞌo, uwaꞌ haduo guru agama to pahori pometenei-teneira toSaduki hante hi Yesu hingkonia. Notiꞌi i lalina, “Moromiꞌ mpololeke pehoniꞌne hi Yesu!” Iomo hinaꞌ io woꞌo meꞌitano pe hi Yesu, notiꞌi, “Ka lekiꞌ-lekiꞌna Aturana hi Musa, hawaꞌ imbona to paralu mpololeke?”

²⁹Notiꞌi hi Yesu, “Hieꞌemo hawaꞌ to paralu mpololeke: ‘Ipehoromuakei toSaraeli! Pueꞌ Ala Pueꞌta, haduolu.

³⁰Ipokarimakei Pueꞌ Ala Pueꞌmi, hante kopopuhiꞌna lalimi hante pekirimi mpololeke, hante komapandemi mpololeke, hante lekiꞌna rohomi.’ [20] Tiꞌomo hawaꞌ to paralu mpololeke.

³¹Hei korolangkaꞌna waheꞌe: ‘Ipokarimakei toaꞌ ntaniꞌne hibalikei mampokarima wotami hadoduomi.’ Hawaꞌi uwaꞌ hawaꞌ ntaniꞌne to paralu mpololeke ka to rolangkaꞌ tiꞌo.”

³²Notiꞌi guru agama tiꞌo pe hi Yesu, “Tuꞌu mpololeke Guru! Noniuꞌ mpololeke to Itiꞌi tiꞌo. Pueꞌ Ala bateꞌna haduolu, hawaꞌi uwaꞌ to ntaniꞌne.

³³Hei hangangaa topokarima Pueꞌ Ala hante kopopuhiꞌna lalinta, hei komapandenta mpololeke, hei lekiꞌna rohonta. Hei hangangaa topokarima toaꞌ ntaniꞌna hibali wotanta hadoduonta. Tiꞌo to meliu komoromiꞌne ka lekiꞌ-lekiꞌna pinatuwuꞌ to nipopenomba hei popenomba ntaniꞌna to nipopenomba pe Pueꞌ Ala.”

³⁴KonohoriNalu komaniuꞌne pehoniꞌna toaꞌ tiꞌo, Notiꞌi hi Yesu, “Hangkiuꞌ romo hei mewaliko toaꞌna Pueꞌ Ala!” Mepongka katoꞌo, hamboaꞌmo uwaꞌ haduo to podehoꞌ meꞌitano ba hapo-hapo pe hi Yesu hingkeꞌna mampaliꞌ komonawuꞌaNa.

³⁵I tempona hi Yesu mepoturuꞌ i Tambina Pueꞌ Ala, Nopeꞌitanoki, “Mahamporeꞌi hinaꞌ guru-guru agama mantiꞌi Datu Topohompoꞌ, Iomo muleꞌna Datu Daudi?”

³⁶Hantaro hi Daudi, nokomi perandana Inohaꞌ Mangkolehi, mampololita noniuꞌ i Datu Topohompoꞌ waheꞌe: Pueꞌ Ala mololita pe Pueꞌku to kupenombai, “MahuramoKo tinaꞌ i kuanangKu wute Kupopengkoruꞌhi lekiꞌ-lekiꞌne poniꞌMu pe Ingko.” [21]

³⁷Datu Daudi mantiꞌi Datu Topohompoꞌ Iomo Pueꞌ to nopenombai. Mewaliꞌ monontomo Io handoꞌio podo muleꞌna hi Daudi, alaꞌ Io makuasaꞌ ka hi Daudi. I tempo tiꞌo toaꞌ woriꞌ to hirampu itoꞌo motanaꞌhi mampehoromua poturuꞌna hi Yesu.

³⁸Kolentuꞌana hi Yesu mopaguru toaꞌ to woriꞌ, Notiꞌikihi, “Moromiꞌ-romiꞌkei, inioꞌkei mampetuntui waliara guru-guru agama Yahudi. Rolei matengkaꞌ mopakeꞌ juba to kurauꞌ mpololeke tandaꞌ koꞌiora to i womboꞌ tuwuꞌra, hei motanaꞌhi ane noꞌadaꞌihi toaꞌ to woriꞌ i pobaluꞌ-baluꞌa.

³⁹Motanaꞌhi nipopahura i hinaro i pahuraha to teꞌadaꞌi i tambi penombaha hante i posusaꞌa,

⁴⁰hantaro moꞌakalaihi towoweꞌe tobembaꞌ hingkeꞌna uwaꞌ lalare morompoꞌi tambira, hei mekokaehi kurauꞌ-rauꞌ motutuꞌi waliara to kodake. Hingkiꞌ madori mpololeke hukuare.”

⁴¹Hi Yesu mahura dodungku i petiꞌ pebolaꞌana doiꞌ popenomba, hei mampeꞌele toaꞌ to mokahi doiꞌ popenombara i lalina. Woriꞌ toaꞌ tosugiꞌ mokahi doiꞌ ngkodeꞌ.

⁴²I tempo tiꞌo, hupaꞌmo woꞌo haduo towoweꞌe tobembaꞌ to merima-rima tuwuꞌna mokahi doiꞌ popenombana. To nokahi, rompepaꞌ doiꞌ see to hangkiuꞌlu ihaꞌne.

⁴³Hi Yesu mowowoi topeguruNa, Notiꞌikihi, “Tuꞌu mpololeke to Kutiꞌikikei: Tobembaꞌ to merima-rima tuwuꞌna tiꞌo, meliu popenombane ka popenombara lekiꞌ-lekiꞌna toaꞌ to ntaniꞌna,

⁴⁴alaꞌ iohi mampewei ka pelobiana doiꞌra, angkana towoweꞌe tiꞌo, kehapoꞌi merima-rima tuwuꞌne, io mampewei lekiꞌ-lekiꞌna to noparalu i lali kotuwuꞌna ando-ando.”