Read Rampi Markus 13 Bible Online

Markus 13 - Rampi bible

Markus 13

¹Kolentuꞌana hi Yesu matengkaꞌ mampolihi Tambina Pueꞌ Ala, uwaꞌ haduo ka topeguruNa to mampatiꞌiki, “Guru, ele Tambine Pueꞌ Ala hieꞌe! Orina maroho hei maranga mpololeke!”

²Notiꞌi hi Yesu, “Iꞌokiꞌkei komarangane Tambina Pueꞌ Ala hieꞌe angkana Kutiꞌikikei: hampiha tempo, hawaꞌi hingkiꞌ uwaꞌ haꞌanu watu to melobi i peꞌohaꞌana, bateꞌna hingkiꞌ morenda lekiꞌ-lekiꞌna.”

³Uko tiꞌo, noloumo hi Yesu hante topeguruNa pe Biri Saitu. Kolentuꞌana hi Yesu mahura mepopanto pe Tambina Pueꞌ Ala, hi Peturuꞌ, hi Yakobus, hi Yohanes hante hi Andaria noloumohi mololita pe Io i tempona hawaꞌi uwaꞌ toaꞌ ntaniꞌna,

⁴rotiꞌi, “Itiꞌikika ba hiwaꞌimbo pewaline lekiꞌ-lekiꞌna to Itiꞌi hingkonia? Hapo tandaꞌne ane hupaꞌmoꞌi tempone mewali?”

⁵Notiꞌi hi Yesu, “Majaga-jagakei, hingkeꞌna hawaꞌkei nipokonawuꞌ,

⁶alaꞌ woriꞌ toaꞌ hingkiꞌ hupaꞌ hei mantiꞌi koꞌiora Datu Topohompoꞌ, koꞌukoana woriꞌ toaꞌ hingkiꞌ ropokonawuꞌ.

⁷Ane pahorikei to kolentuꞌara moponiꞌ hei kareba moponiꞌ, inioꞌkei motehuꞌ, alaꞌ lekiꞌ-lekiꞌna tiꞌo hangangaa mewali dulu, angkana handoꞌio koꞌukoana duniaꞌ.

⁸Toharoboꞌ hingkiꞌ moponiꞌ hante roboꞌ ntaniꞌna, kodatua hingkiꞌ moꞌewa kodatua ntaniꞌna, hei i umbo-umbolu hingkiꞌ mewali luanoko hante kobiloraha. Angkana lekiꞌ-lekiꞌna tiꞌo hongkoꞌ pepongkana, hibali komaporiꞌ to nohori haduo towoweꞌe to nokomolaloi hingkiꞌ moꞌanaꞌ.

⁹Angkana ingkei hieꞌe, majaga-jagakei! Ingkei hingkiꞌ nihokiꞌ hei nikomikei pe hinarona tadulako agama hingkeꞌna nibutusikei. Hingkiꞌ nikondokei i tambi-tambi penombaha. Alaꞌ petuntumi pe Aku, hingkiꞌ nipeweikei pe topoparenta hante pe datu. I tempo tiꞌomo koholangkoami mampololita noniuꞌ Aku pe iohi.

¹⁰Hei Kareba Moromiꞌ hangangaa nipowute dulu pe humanele duniaꞌ, honiꞌi koꞌukoana duniaꞌ mewali.

¹¹Ane nihokiꞌkei hei nikomi pe tadulako, inioꞌkei motehuꞌ ba hapo pehoniꞌmi. Itiꞌimokei hapo to notiꞌi Pueꞌ Ala i lalimi i tempo tiꞌo. Alaꞌ hapo to itiꞌikei i tempo tiꞌo, handoꞌio ka pekirimi hadoduomi. Lolitami tiꞌo mehupaꞌ ka Inohaꞌ Mangkolehi.

¹²Ane hupaꞌmoꞌi tempone, toaꞌ hingkiꞌ mampeweihi halalira ba anaꞌra hingkeꞌna nirokoꞌhi. Uwaꞌ woꞌo oꞌanaꞌ to hingkiꞌ moꞌewa tomotodira hei mampeweihi tomotodira hingkeꞌna nirokoꞌi.

¹³Hatoꞌo woꞌo ingkei. Alaꞌ petuntumi i Aku, hingkiꞌ nokabiriꞌkei lekiꞌ-lekiꞌna toaꞌ. Angkana toaꞌ to mantaha hei metuntu nturusi i Aku wute i koꞌukoana hingkiꞌ pahuahi kotuwuꞌ to wolaꞌ to hawaꞌi mokoꞌukoa.”

¹⁴Mololita womo hi Yesu pe topeguruNa Notiꞌi, “Hingkiꞌ mehupaꞌ haduo to nitiꞌi ‘to kodake to mekokero’. (Himo to mobasa hieꞌe, hangangaa nobahaꞌ palaihane!) Mewaliꞌ ane iꞌokiꞌkei toaꞌ tokodake tiꞌo metotiꞌi i peꞌohaꞌa to hawaꞌi masipatoꞌ nopeꞌohaꞌi, aginamo toaꞌ to meꞌohaꞌ i Yudea mehilaihi nolou pe biri.

¹⁵Toaꞌ to mahura i dopiꞌ to marante kaliuꞌ mengkohouhi hei mehilai hampoliꞌmohi mekahi i lali tambira moroa ba hapo-hapo.

¹⁶Hatoꞌo woꞌo toaꞌ to i kineteꞌ, inioꞌhi mahuliꞌ nolou moroa parewara. Hangangaa mehilaikei katoꞌo!

¹⁷Hingkiꞌ maporiꞌ mpololeke tuwuꞌre towoweꞌe to mohinonaꞌi ba to mampoꞌomiꞌ anaꞌra i tempo tiꞌo.

¹⁸Mekokaekei pe Pueꞌ Ala hingkeꞌna ando pehilaihami tiꞌo inioꞌ i tempo ura.

¹⁹Alaꞌ i tempo tiꞌo, hingkiꞌ hupaꞌ komaporiꞌ to makaja mpololeke to hawaꞌi tene kahampiha mewali ka uluꞌ-uluꞌna i tempona Pueꞌ Ala mowali duniaꞌ wute hinewowoꞌena, hei hawaꞌi woꞌo uwaꞌ to hingkiꞌ mewali i ando kamurina.

²⁰Angkana komoruena komaporiꞌ tiꞌo hingkiꞌ nopohohiꞌ Pueꞌ Ala, alaꞌ ane hawaꞌi Nopohohiꞌ, hawaꞌi hingkiꞌ uwaꞌ haduo to tuwuꞌ. Mewaliꞌ, nokomi pepokarimaNa pe toaꞌ to Noꞌuwiꞌ, iomo hinaꞌ hingkiꞌ Nopohohiꞌ tempo komaporiꞌ tiꞌo.

²¹I tempo tiꞌo, ane uwaꞌ to mampatiꞌikikei, ‘Ele! Hieꞌemo Datu Topohompoꞌ!’ Ba ‘Hituꞌo humei!’ Inioꞌhi ipoꞌohikei,

²²alaꞌ hingkiꞌ uwaꞌ tempone woriꞌ toaꞌ to mepokonawuꞌ to mantiꞌi koꞌiora Datu Topohompoꞌ, ba to mantiꞌi koꞌiora nabi. Hingkiꞌ mowalihi tandaꞌ kuasaꞌ hei tandaꞌ to mepohele hingkeꞌna mampomonawuꞌhi toaꞌ to woriꞌ. Howeꞌ toaꞌ to noꞌuwiꞌ Pueꞌ Ala ropokonawuꞌ woꞌo.

²³Iomo horiana majaga-jagakei! Lekiꞌ-lekiꞌna tiꞌo kutiꞌikimokikei umbiꞌ ikohandoaꞌana tene mewali.”

²⁴Nopololiu hi Yesu lolitane, “Ane liumoꞌi tempo komaporiꞌ tiꞌo, Pueꞌ Ala hingkiꞌ mampomokorindi wantana ando, wula hamboaꞌmo mewanta,

²⁵lekiꞌna betueꞌ monawuꞌ ka laniꞌ hei makaja pododuane lekiꞌ-lekiꞌna to uwaꞌ i laniꞌ.

²⁶I tempo tiꞌo, lekiꞌ-lekiꞌna toaꞌ hingkiꞌ mampeꞌele Anaꞌ Manusiaꞌ mengkohou i lali kini hante kuasaꞌ hei komanobaꞌNa.

²⁷Hingkiꞌ Norumbaꞌhi malaꞌekaNe nolou morampu toaꞌ to Noꞌuwiꞌ ka humanele duniaꞌ, mepongka ka motoꞌando, wute-wute i kotompuha ando.”

²⁸“Ipoꞌilalikei hapo to Kupoturuꞌkikei moliu pandiriꞌ ka loti ara. Ane iꞌokiꞌkei daꞌane motimbeꞌ hei motaweꞌ, ibahaꞌmokei kohingkiꞌ hupaꞌne tempo poko ando.

²⁹Hatoꞌo woꞌo, ane iꞌokiꞌkei pewaline to Kupowutekikei hingkonia, ibahaꞌmokei hamboaꞌmo morue hingkiꞌ hupaꞌ Anaꞌ Manusiaꞌ.

³⁰Tuꞌu mpololeke to Kutiꞌikikei: Lekiꞌ-lekiꞌna to Kutiꞌi hingkonia bateꞌna hingkiꞌ mewali ikohandoaꞌana tene mahi lekiꞌ-lekiꞌna toaꞌ to tuwuꞌ tempo hinewowoꞌena.

³¹Laniꞌ hante duniaꞌ hingkiꞌ moholi, angkana lolitangKu tontona hingkiꞌ uwaꞌ nturusi wute nantolou-louna.”

³²“Angkana ando hei jaa pewalina lekiꞌ-lekiꞌna tiꞌo, bateꞌnalu UmoꞌKu to pobahaꞌ. Hawaꞌi uwaꞌ haduo toaꞌ to pobahaꞌ. Malaꞌeka to i suruga hawaꞌi robahaꞌ, howeꞌ Anaꞌna Pueꞌ Ala hawaꞌi Nobahaꞌ.

³³Mewaliꞌ hangangaa majaga-jagakei hei timomokei, alaꞌ hawaꞌkei ibahaꞌ tempo pewaline.

³⁴Ane hupaꞌA huliꞌ, pewalina hibali pandiriꞌ hieꞌe: Haduo tumpu tambi notungkai nolou pe kota to moꞌela. Ikohandoaꞌanaꞌ tene molai, io morumbaꞌmo hawiꞌna morewahi tambina, haduo-haduo nopaꞌanihi jama. Notiꞌi pe topampodaꞌ wambaꞌ, ‘Majaga-jagako!’

³⁵Mewaliꞌ, ingkei woꞌo hangangaa majaga-jagakei, hingkeꞌna ane hangkaꞌ-hangkaꞌ romo hupaꞌ tumpu tambi, hawaꞌkei hingkiꞌ nohua kolentuꞌami leꞌo. Alaꞌ hawaꞌkei ibahaꞌ hiwaꞌimbo kohupaꞌane tumpu tambi, ba kononewa ba halumbu wini ba dodungku ando ba mihoꞌolu. Hatoꞌo woꞌo ingkei, hangangaa majaga-jagakei nturusi, alaꞌ hawaꞌkei ibahaꞌ hiwaꞌimbo kohupaꞌangKa.

³⁷Hapo to Kutiꞌikikei hieꞌe, Kutiꞌi woꞌo pe lekiꞌ-lekiꞌna toaꞌ. Majaga-jagakei nturusi!”