Read Rampi Markus 14 Bible Online

Markus 14 - Rampi bible

Markus 14

¹Roꞌando romo hingkiꞌ hupaꞌmo ando Posusaꞌa Pokalintora toYahudi hei Posusaꞌa Roti to Hawaꞌi Niragiꞌi. Tutuꞌ-tutuꞌ tadulako mpenomba hei guru-guru agama kolentuꞌara mampaliꞌ lala mohokiꞌ wowuni hi Yesu hingkeꞌna nihukuꞌI mahi.

²Rotiꞌi, “Inioꞌ dulu tohokiꞌI i ando ngkodeꞌ hieꞌe, bukotahi intu toaꞌ woriꞌ hei marisuhi.”

³I tempona hi Yesu i bolaꞌ Betania, Io i tambina haduo toaꞌ to nikokeneꞌi hi Simo, to kanorumpa hakiꞌ kusta. Kolentuꞌara mangka itoꞌo, hupaꞌmo haduo towoweꞌe[22] mangkomi haꞌanu butoloꞌ to moꞌohi bokaꞌ narwastu to masuliꞌ hilina. Towoweꞌe tiꞌo mopiheꞌ tutuꞌ peꞌohaꞌana bokaꞌ tiꞌo hei nopeboboki i tutuꞌna hi Yesu, katoꞌo uwaꞌhi to koiꞌ hei mololitamohi haduo hei haduo, “Mahamporeꞌi bokaꞌ to mewowau hei to masuliꞌ tiꞌo hinaꞌ nitube ntooꞌlu?

⁴

⁵Ane rapaꞌna bokaꞌ to mewowau tiꞌo nipobaluꞌ, hilina lobi tolu natuna doiꞌ peraꞌ. Ane kenipobaluꞌi bokaꞌ tiꞌo kenipaꞌaniki toaꞌ to merima-rima hiline.” Iomo hinaꞌ koiꞌhi pe towoweꞌe tiꞌo.

⁶Angkana Nopantiꞌikihi hi Yesu, “Tedehiluiae. Mahamporeꞌi hinaꞌ ipomasusakei laline towoweꞌe hieꞌe? Hapo to nowali i Aku, moromiꞌ,

⁷alaꞌ Aku hawaꞌA hingkiꞌ uwaꞌ nturusi i lumbumi. Ane toaꞌ to merima-rima uwaꞌhi nturusi i lumbumi, hei woriꞌ tene tempomi mosulungihi.

⁸Towoweꞌe hieꞌe mowali hapo to nobiaꞌ nowali. NobobohiꞌA bokaꞌ to mewowau hingkeꞌna mampotimomo umbiꞌ wotangKu ikohingkiꞌ nitawungKu.

⁹Hingkeꞌna ibahaꞌkei: I humanele duniaꞌ, i imbolu Kareba Moromiꞌ nipekarebaiki, towoweꞌe hieꞌe bateꞌna hingkiꞌ nikolowoi nturusi alaꞌ hapo to nowali tiꞌo nopololita toaꞌ.”

¹⁰I tempo tiꞌo, haduo ka topeguruNa to hampuluꞌ meroduo, to nikokeneꞌi hi Yudas Iskarioꞌ, nolou pe tutuꞌ-tutuꞌ tadulako mpenomba, mampowute tungkaihana hingkiꞌ mampobaluꞌ hi Yesu pe iohi.

¹¹Motanaꞌhi mpololeke pahori hapo to notiꞌi hi Yudas tiꞌo, hei nidandi hingkiꞌ nipaꞌani doiꞌ. Katoꞌo, hi Yudas mampaliꞌ tempo to moromiꞌ mampewei hi Yesu pe iohi hingkeꞌna nihokiꞌI.

¹²Roꞌando katoꞌo, i ando pampatimomo Posusaꞌa Roti to Hawaꞌi Niragiꞌi i tempona gimba Pokalintora toYahudi nirereꞌ, topeguruna hi Yesu meꞌitano pe Io, “Pueꞌ, i imbo peleihaMa kipatimomoꞌi pangka Pokalintora to hingkiꞌ toꞌoka?”

¹³Katoꞌo norumbaꞌmo hi Yesu roduo topeguruNe, Notiꞌikihi, “Noloumokei pe kota Yerusale. Itoꞌo hingkiꞌ ihuakei haduo tomaꞌani to mangkomi kendi to moꞌohi uwai. Metuntumokei pe tambi to nopekahii.

¹⁴Itiꞌikikei pe tumpuna tambi, Nopeꞌitanoki Guru: ‘I imbo wadiꞌA mangka pangka Posusaꞌa Pokalintora moꞌawa-awa hante topegurungKu?’

¹⁵Tumpu tambi tiꞌo hingkiꞌ mampatidoꞌkikei haꞌanu kamaraꞌ to kodeꞌ i womboꞌ. Kamaraꞌ tiꞌo timomomo umbiꞌ hei ganaꞌmo parewane. Itoꞌo ipatimomokiki pangka Pokalintorante.”

¹⁶Noloumohi mpuꞌu topeguruNe to roduo tiꞌo mekahi pe lali kota. Kohupaꞌralu itoꞌo, lekiꞌ-lekiꞌna mewali hibali to Notiꞌikihi hi Yesu, hei mampatimomohi pangka Pokalintora.

¹⁷Winina, hupaꞌmo hi Yesu moꞌawa-awa hante topeguruNa to hampuluꞌ meroduo.

¹⁸Kolentuꞌara mahura mangka, notiꞌi hi Yesu, “Tuꞌu mpololeke lolitangKa hieꞌe: Haduo ka lumbumi to moꞌawa-awa mangka hinewowoꞌena, hingkiꞌ mampeweiꞌA pe poniꞌKu.”

¹⁹Korohorina topeguruNa lolitaNe, hanondoihamohi, hei meꞌitanomohi haduo-haduo pe hi Yesu, rotiꞌi, “Handoꞌio aku hinape?”

²⁰Nohoniꞌ hi Yesu, “To mampeweiꞌA pe poniꞌKu, iomo haduo ka lumbumi to hampuluꞌ meroduo hieꞌe to mampetubuꞌki roti i haꞌanu taboꞌ moꞌawa-awa hante Aku.

²¹Tuꞌu mpololeke, Anaꞌ Manusiaꞌ bateꞌna hingkiꞌ mahi hibali to teꞌukiꞌmo i lali Suraꞌ Mangkolehi. Angkana hingkiꞌ makaja konihukune toaꞌ to mampewiꞌA pe poniꞌKu. Aginamo toaꞌ tiꞌo hampoliꞌmo nipoꞌanaꞌki.”

²²Kolentuꞌara mangka, hi Yesu moroa roti honiꞌi mekokae moꞌawerasiꞌ pe Pueꞌ Ala. Uko tiꞌo, mokebiꞌ-kebiꞌmo roti hei Nopedolaꞌki, honiꞌi Notiꞌi, “Niroa, hei iꞌokamokei. Hieꞌemo wotangKa.”

²³Uko tiꞌo, Noroa woꞌo anggoroꞌ, mekokae moꞌawerasiꞌ pe Pueꞌ Ala, hei Nopaꞌanikihi. Koꞌukoralu maꞌinu,

²⁴i tempo tiꞌo, hi Yesu mampatiꞌikihi, “Hieꞌemo raꞌangKa to hingkiꞌ hibobo i komahingKu hingkeꞌna mohompoꞌ salaꞌna toaꞌ to woriꞌ. RaꞌangKu hieꞌe mampokaroho dandina Pueꞌ Ala to mampohintuwuꞌ Pueꞌ Ala hante toaꞌ.

²⁵Hingkeꞌ ibahaꞌkei: Hamboaꞌmo hingkiꞌ Kuꞌinu anggoroꞌ hieꞌe wute Kuꞌinu anggoroꞌ to wolaꞌ i lali poparentana UmoꞌKu.”

²⁶Uko tiꞌo, molingahi halangkaꞌ linga pepokodeꞌ. Koꞌukora molinga, molaimohi ka kota nolou pe Biri Saitu.

²⁷Katoꞌo, hi Yesu mampatiꞌikihi topeguruNa, “Ingkei lekiꞌ-lekiꞌmi hingkiꞌ mampolihiꞌA, alaꞌ Pueꞌ Ala moꞌukiꞌmo i lali Suraꞌ Mangkolehi waheꞌe: ‘Hingkiꞌ Kurokoꞌ Topolambaꞌ tiꞌo, horiana mogara-garahi gimbaNe.’ [23]

²⁸Angkana i kotuwuꞌKu huliꞌ, hingkiꞌ meduluꞌA nolou pe woiꞌ Galilea, hei hingkiꞌ Kupekaukei itoꞌo.”

²⁹Notiꞌi hi Peturuꞌ, “Pueꞌ! Kehapoꞌi lekiꞌ-lekiꞌra hieꞌe mampolihiko, angkana aku hawaꞌi!”

³⁰Notiꞌi hi Yesu, “Peturuꞌ, tuꞌu to Kutiꞌikiko: wini hieꞌe, ikohandoaꞌana tene metantoroꞌoꞌuoꞌ manuꞌ i korompihana, tolu mpihamoko mosapuakaꞌA.”

³¹Angkana hampiha tene nopokaroho hi Peturuꞌ lolitane notiꞌi, “Kehapoꞌa mahi moꞌawa-awa hante Ingko, hawaꞌKo hingkiꞌ kusapuaka!” Hatoꞌo woꞌo lolitare topeguruNa to ntaniꞌna.

³²Uko tiꞌo, hupaꞌmohi mpuꞌu hi Yesu hante topeguruNa i kineteꞌ to nikokeneꞌi Getsemani. Itoꞌo hi Yesu mampatiꞌikihi topeguruNa, “Ingkei, mahuramokei iseꞌe. Aku hingkiꞌ nolouꞌA dulu mekokae.”

³³Angkana hi Peturuꞌ, hi Yakobus hante hi Yohanes Nopoꞌawahi. I tempo tiꞌo, maporiꞌ pehoriNe hei mororidiꞌ.

³⁴Notiꞌikihi, “Maporiꞌ mpololeke lalingKa, hibaliꞌA to hingkiꞌ mahi Kuhori. Iseꞌemokei dulu hei majaga-jagakei!”

³⁵Uko tiꞌo, hi Yesu nolou mekoꞌela hangkiuꞌ, honiꞌi melingkotuꞌ i woiꞌ, mekokae. I lali pekokaeNa, merapiꞌ hingkeꞌna ane hohumboꞌi, hawaꞌi hingkiꞌ pahua komaporiꞌ tiꞌo,

³⁶Notiꞌi, “UmoꞌKu! Hawaꞌi uwaꞌ to hawaꞌi Ibiaꞌ Iwali. IpomoꞌelakiꞌA kaiaꞌ komaporiꞌ to hingkiꞌ MorumpaꞌA hieꞌe, angkana handoꞌio peleihangKu to Kutuntuni, angkana wae peleihaMu.”

³⁷Uko tiꞌo, Nolou womo pe topeguruNa to tolu duo. Nohuahi kolentuꞌara leꞌo. Notiꞌi pe hi Peturuꞌ, “Simo! Leꞌolukongkoe wora. Hingkoweꞌ wora hajaa hawaꞌi ibiaꞌ majaga-jaga.

³⁸Ingkei lekiꞌ-lekiꞌmi, majaga-jagakei hei mekokaemokei, hingkeꞌna inioꞌkei norumpa pekeloꞌ. I lalimi ileikei mpololeke mowali to moromiꞌ, angkana hawaꞌi nibiaꞌ alaꞌ wotami bateꞌna moledeꞌ.”

³⁹Katoꞌo hi Yesu nolou womo mekokae. PekokaeNa tiꞌo hibali hante pekokaeNa to uluꞌ-uluꞌna.

⁴⁰Uko tiꞌo, Io mahuliꞌ womo pe topeguruNa, hei leꞌo womohi nokomi kongkololeꞌora. Hawaꞌi robahaꞌ hapo to hangangaa rotiꞌi pe Io.

⁴¹Nolou womo hi Yesu mekokae ikotolu mpihana, hei uko tiꞌo, mahuliꞌ womo pe topeguruNa. Notiꞌikihi, “Leꞌolukeirope teneto? Ganaꞌmo! Hupaꞌmo tempone Anaꞌ manusiaꞌ hingkiꞌ nisapuaka hei nipewei pe korawera toaꞌ to kodake.

⁴²Peꞌaromokei! Molaimoki! Elekei! Toaꞌ to hingkiꞌ mampewiꞌA pe poniꞌKu dodungkumo!”

⁴³Kolentuꞌana tene hi Yesu mololita, hupaꞌmo hi Yudas, haduo ka topeguruNa to hampuluꞌ meroduo, moꞌawa-awa hante toaꞌ to woriꞌ. Mangkomihi piho hante petotuꞌ. Toaꞌ tiꞌo norumbaꞌhi tutuꞌ-tutuꞌ tadulako mpenomba, guru-guru agama hante tomotodi-tomotodira toYahudi ako mohokiꞌ hi Yesu.

⁴⁴Notiꞌikimohi umbiꞌ hi Yudas tandaꞌne hingkeꞌna robahaꞌi koꞌiona hi Yesu, notiꞌi, “Himo to kuꞌumaꞌ, iomo hi Yesu. Ihokiꞌmokei honiꞌi ikomikei. Ipodaꞌkei mpololeke.”

⁴⁵Mewaliꞌ, kohupaꞌralu itoꞌo, noloumo hi Yudas mampohidupaꞌki hi Yesu, notiꞌi, “Guru!” Honiꞌi noꞌumaꞌ.

⁴⁶Katoꞌo hi Yesu rohokiꞌmo mpuꞌu hei rohiluꞌ.

⁴⁷Katoꞌo, haduo toaꞌ to metotiꞌi dodungku hi Yesu mowutu pihona honiꞌi notobai tolinane hawiꞌna Tadulako Mpenomba Ngkodeꞌ wute mopudiꞌ.[24]

⁴⁸Notiꞌi hi Yesu pe toaꞌ to mohokiꞌI, “Mahamporeꞌi hinaꞌ humeiꞌAkei ihokiꞌ mangkomikei piho hante petotuꞌ? Ba itiꞌikeireꞌi toaꞌ to kodakeꞌA?

⁴⁹Ando-ando uwaꞌA moꞌawa-awa hante ingkei i tanobaꞌana Tambina Pueꞌ Ala mepoturuꞌ. Mahamporeꞌi hinaꞌ hawaꞌAkei ihokiꞌmo i tempo tiꞌo? Angkana lekiꞌ-lekiꞌna hieꞌe hangangaa mewali, hingkeꞌna tebuhoꞌi hapo to teꞌukiꞌ i lali Suraꞌ Mangkolehi.”

⁵⁰Uko tiꞌo, lekiꞌ-lekiꞌna topeguruNa mehilaimohi mampolihi hi Yesu.

⁵¹I tempo tiꞌo, uwaꞌ woꞌo haduo anaꞌntomaꞌani to metuntu pe hi Yesu. Io hawaꞌi mebaduꞌ mopakeꞌlu wida. Io hingkiꞌ ropangku woꞌo,

⁵²horiana mampohente wida tiꞌo honiꞌi mehilai hante melolawa.

⁵³Katoꞌo, hi Yesu nikomi nolou pe tambina Tadulako Mpenomba Ngkodeꞌ. Itoꞌo, morampu-rampuhi lekiꞌ-lekiꞌra tutuꞌ-tutuꞌ tadulako mpenomba, guru-guru agama hante tomotodi-tomotodira toYahudi to ntaniꞌna.

⁵⁴Hi Peturuꞌ metuntu ngkoꞌela ka hi Yesu wute i tanobaꞌa tambina Tadulako Mpenomba Ngkodeꞌ. Itoꞌo, io mahura maniru moꞌawa-awa hante topampodaꞌ.

⁵⁵I tempo tiꞌo, tutuꞌ-tutuꞌ tadulako mpenomba hante lekiꞌ-lekiꞌna tadulako agama Yahudi mampaliꞌhi sabiꞌ to hingkiꞌ mosalaꞌi hi Yesu, hingkeꞌna nihukuꞌi mahi. Angkana hawaꞌi rohua salaꞌNe.

⁵⁶Woriꞌ mpuꞌu sabiꞌ to mosalaꞌi, angkana tongawamo mowutihi alaꞌ posobiꞌira hawaꞌi hibali-bali.

⁵⁷Uwaꞌhi haꞌumbora toaꞌ metotiꞌi mewali sabiꞌ wuti, rotiꞌi,

⁵⁸“Toaꞌ hieꞌe kihori mantiꞌi waheꞌe: ‘Hingkiꞌ Kurenda Tambine Pueꞌ Ala to noꞌaro toaꞌ, angkana ikotolu andona hingkiꞌ Kuꞌaro to ntaniꞌne to hawaꞌi rowali korawena toaꞌ.’”

⁵⁹Angkana ipantiꞌira tiꞌo, hawaꞌi woꞌo hibobali lolitare.

⁶⁰Metotiꞌimo Tadulako Mpenomba Ngkodeꞌ i hinarona lekiꞌ-lekiꞌna tadulako mampatiꞌiki hi Yesu, “Hawaꞌhireꞌi Ihoniꞌ to mosalaꞌiKo tiꞌo?”

⁶¹Angkana hi Yesu hawaꞌi mehoniꞌ, howeꞌ halangkaꞌ lolita. Hampiha tene Tadulako Mpenomba Ngkodeꞌ meꞌitano pe Io, “Ba Ingko mpuꞌu Datu Topohompoꞌ, Anaꞌna Pueꞌ Ala iomo Pueꞌ Ala to masipatoꞌ nipokodeꞌ?”

⁶²Nohoniꞌ hi Yesu, “Tuꞌu. Akumo hieꞌe. Hingkiꞌ iꞌokiꞌkei Anaꞌ manusiaꞌ mahura tinaꞌ i kuanana Pueꞌ Ala to Makuasaꞌ, hei hingkiꞌ iꞌokiꞌkei woꞌo mengkohou humei ka suruga moꞌawa-awa hante kini.”

⁶³Konohorina Tadulako Mpenomba Ngkodeꞌ hapo to notiꞌi hi Yesu, nohepaꞌmo jubane hadoduona nokomi kobukotana honiꞌi notiꞌi, “Hamboaꞌmo paralu uwaꞌ sabiꞌ!

⁶⁴Tohorimo lolitaNe to mampohibali wotaNa hante Pueꞌ Ala. Hohumbomo pobutusimio?” Lekiꞌ-lekiꞌna mantiꞌi, “Masalaꞌ mpololeke! Io hangangaa nihuku mahi!”

⁶⁵Katoꞌo, uwaꞌhi to molikuꞌI, uwaꞌhi woꞌo to mampopoꞌioꞌioꞌI: ropiriꞌ mataNe honiꞌi rokondo, ropantiꞌiki, “Ee, ane tuꞌu-tuꞌuKo nabi, Itiꞌi ba hihimoꞌi to mokondoKo!” Hingkoweꞌ topampodaꞌ motampedaꞌ woꞌo hi Yesu.

⁶⁶I tempona tene hi Peturuꞌ i tanobaꞌa, hupaꞌmo haduo towoweꞌe to majama i tambina Tadulako Mpenomba Ngkodeꞌ.

⁶⁷Kopangkiꞌnalu hi Peturuꞌ maniru, nopomoꞌoꞌele honiꞌi nopantiꞌiki, “Hareꞌi ingko woꞌo to poko moꞌawa hante hi Yesu toNasare tiꞌo?”

⁶⁸Angkana nosapuaka hi Peturuꞌ notiꞌi, “Hawaꞌi kubahaꞌ hapo to itiꞌi!” Katoꞌo melimbamo nolou dodungku i wambaꞌ. [Metantoroꞌoꞌuoꞌmo manuꞌ.]

⁶⁹Towoweꞌe tiꞌo pangkiꞌ womo hi Peturuꞌ, hei mampatiꞌikihi toaꞌ to uwaꞌ itoꞌo, “Io hieꞌe haduo ka topeguruna hi Yesu.”

⁷⁰Angkana hi Peturuꞌ mesapuaka womo. Hawaꞌi morue katoꞌo,[25] toaꞌ to metotiꞌihi itoꞌo mampatiꞌikiꞌi woꞌo, “Ingko mpuꞌu haduo awaNe, alaꞌ ingko toGalileako woꞌo!”

⁷¹Mololitamo hi Peturuꞌ, notiꞌi, “Mosumpaꞌa, hawaꞌi mpuꞌu kubahaꞌ toaꞌ to itiꞌikei tiꞌo!”

⁷²I tempo tiꞌo, metantoroꞌoꞌuoꞌmo manuꞌ i korompihana. Noponindi hi Peturuꞌ lolitane hi Yesu to mantiꞌi, “Ikohandoaꞌanaꞌ tene metantoroꞌoꞌuoꞌ manuꞌ i korompihana, tolu mpihamoko mosapuakaꞌA.” Katoꞌo hi Peturuꞌ meꞌola wute hohokuꞌa.