Read Rampi Markus 15 Bible Online

Markus 15 - Rampi bible

Markus 15

¹Mehoꞌolu-olu, lekiꞌ-lekiꞌna tadulako agama Yahudi, iomo: Tutuꞌ-tutuꞌ tadulako mpenomba hante guru-guru agama Yahudi hei tomotodi-tomotodira toYahudi, morapaꞌmohi hingkeꞌna morokoꞌhi hi Yesu. Katoꞌo rohiluꞌmo mpuꞌu hi Yesu honiꞌi rokomi nolou pe hinarona hi Pilatu, gubenuru tempo tiꞌo.

²Kohupaꞌnalu hi Yesu itoꞌo, meꞌitanomo hi Pilatu pe Io, “Ba Ingko mpuꞌu datune toYahudi?” Mehoniꞌ hi Yesu, “Ingko hadoduomu to mantiꞌi hatoꞌo.”

³Katoꞌo, woriꞌ langkaꞌ peroraiꞌre tutuꞌ-tutuꞌ tadulako mpenomba to ropowute pe hi Pilatu noniuꞌ hi Yesu.

⁴Iomo hinaꞌ meꞌitano womo hi Pilatu pe Io, notiꞌi, “Hawaꞌkoreꞌi hiniꞌ mehoniꞌ? Woriꞌ langkaꞌ to roraiꞌkiKo.”

⁵Angkana hi Yesu hawaꞌi hiniꞌ mehoniꞌ. Iomo hinaꞌ hele mpololeke hi Pilatu.

⁶Toꞌa-toꞌana i ando Posusaꞌa Pokalintora toYahudi, hi Pilatu biasana mampolohoꞌ haduo toaꞌ to nitarungkuꞌ, ba hihimolu to roperapiꞌ toaꞌ to woriꞌ.

⁷I toꞌa tiꞌo, uwaꞌ haduo to kolentuꞌana nitarungkuꞌ to meꞌewa pe topoparenta Roma. Konaꞌna hi Baraba. Io hante awa-awanahi nitarungkuꞌhi alaꞌ morokoꞌhi toaꞌ i lali peꞌewara pe topoparenta.

⁸Mewaliꞌ, hirampuhi toaꞌ to woriꞌ, mepongkamohi merapiꞌ pe hi Pilatu hingkeꞌna nopolohoꞌi haduo toaꞌ to nitarungkuꞌ hibali to biasa nowali i toꞌa-toꞌana.

⁹Noteneihi hi Pilatu, notiꞌi, “Hohumbo, ba ileikei ane kupolohoꞌkikei datune toYahudi hieꞌe?”

¹⁰Notiꞌi hi Pilatu hatoꞌo, alaꞌ nobahaꞌ tutuꞌ-tutuꞌ tadulako mpenomba mampewei hi Yesu pe io nokomi komowahiꞌralu.

¹¹Angkana tutuꞌ-tutuꞌ tadulako mpenomba mampomolaho lalira toaꞌ to woriꞌ hingkeꞌna hi Baraba nipolohoꞌ.

¹²Mewaliꞌ, nopeꞌitanoki womo hi Pilatu pe toaꞌ to woriꞌ, “Ane rapaꞌna hi Baraba to kupolohoꞌkikei, hapomo to hangangaa kuwali hante toaꞌ to itiꞌikei datura toYahudi hieꞌe?”

¹³Moloaꞌmohi toaꞌ to woriꞌ, rotiꞌi, “Nipakumolu!”

¹⁴Nopeꞌitanoki hi Pilatu, “Salaꞌ haporeꞌi to Nowali?” Angkana pedeꞌ moloaꞌhi, rotiꞌi, “Nipakumolu!”

¹⁵Hingkeꞌna toaꞌ woriꞌ motanaꞌ, iomo hinaꞌ hi Pilatu mampolohoꞌ hi Baraba. Uko tiꞌo, norumbaꞌmo surodadune molampidaꞌ hi Yesu hante koloroꞌ, honiꞌi nopaꞌanikimohi hingkeꞌna ropakuꞌI i loti momehulepe.

¹⁶Uko tiꞌo, surodadu-surodadu mangkomi hi Yesu nolou pe tanobaꞌa i tambi kodatuana Gubenuruꞌ, hei mowowoi lekiꞌ-lekiꞌna awara.

¹⁷Hi Yesu robaduꞌi juba to mangkononowa hibali to biasa nopakeꞌ datu, honiꞌi ropowaliki haꞌanu totali ka rui, ropohibali totali datu, hei nipototaliiki hi Yesu.

¹⁸Uko tiꞌo, mepongkamohi mampopohalaꞌ-halaꞌ hi Yesu, ropantiꞌiki, “KipokodeꞌKo, datu toYahudi!”

¹⁹Honiꞌi rokondo tutuꞌNe hante laiꞌ, roliku, hei melingkotuꞌhi i hinaroNa hibalihi woꞌo to menomba.

²⁰Koꞌukona ropohalaꞌ-halaꞌ, rowulamo juba to mangkononowa to ropobaduꞌikiꞌI hingkonia, honiꞌi robaduꞌimo huliꞌ baduꞌNa hadoduona. Uko tiꞌo, hi Yesu nikomimo nolou pe huwali kota hingkeꞌna nipakuꞌI i loti momehulepe.

²¹I lumbu lala, mangkohidupaꞌkihi haduo toaꞌ to nikokeneꞌi hi Simo toKirene to hingkiꞌ pe kota. Iomo umoꞌra hi Alesande hante hi Rupuꞌ. Hi simo tiꞌo roparuku surodadu toRoma mangkowaꞌ loti popakuana hi Yesu.

²²Hawaꞌi morue, hupaꞌmohi i pebolaꞌa to nikokeneꞌi Golgota,[26] (palaihana: Biri Bangaꞌ Rouꞌ).

²³Itoꞌo, hi Yesu ropopaꞌinu anggoroꞌ to nikalo hante ritiꞌ loti mur, angkana Io hawaꞌi hiniꞌ maꞌinu.

²⁴Uko tiꞌo, hi Yesu nipakumo i loti momehulepe, hei baduꞌNa ropemerompoꞌi horiana mowalihi pantidoꞌ hingkeꞌna mampokononto dolaꞌra haduo-haduo.

²⁵KonipakuNa i loti tiꞌo, tenteꞌ hio mihoꞌolu.

²⁶I hamokuꞌ lobo, ropoꞌukiꞌi hapo to nisalaꞌikiꞌi hi Yesu hinaꞌ nihuku. Ukiꞌna waheꞌe: DATURA TOYAHUDI. Lobo tiꞌo ropodokiꞌ i loti popakuaNa i womboꞌ tutuꞌNa.

²⁷Uwaꞌ woꞌo roduo topanako to nipaku i loti momehulepe moꞌawa-awa hante Io, haduo tinaꞌ i koanaNa hei haduo tinaꞌ i koiriNa.

²⁸[Mewaliꞌ, hapo to rowali tiꞌo mobuhoꞌi hapo to teꞌukiꞌ i lali Suraꞌ Mangkolehi to mantiꞌi waheꞌe: “Datu Topohompoꞌ hingkiꞌ hibali toaꞌ to kodake.”]

²⁹Toaꞌ to moliu itoꞌo, mododuahi tutuꞌra tandaꞌna mampononaꞌhi hi Yesu, rotiꞌi, “Ee! Itiꞌi woꞌo hingkiꞌ morendaKo Tambina Pueꞌ Ala hei Iꞌaro huliꞌ i lali tolu andona!

³⁰Ane watoꞌoꞌi, amomo sulungimoꞌi mpuꞌu wotaMa hadoduoMu! MengkohoumoKo ka loti momehulepe tiꞌo!”

³¹Hatoꞌo woꞌo tutuꞌ-tutuꞌ tadulako mpenomba hante guru-guru agama mampariwoiꞌhi nturusi hi Yesu. Mololitahi haduo hei haduo, rotiꞌi, “Toaꞌ ntaniꞌna Nosulungihi. WotaNa hadoduoNa hawaꞌi Nobiaꞌ Nosulungi!

³²Notiꞌi koꞌIona Datu Topohompoꞌ, Datura toSaraeli! Ane umbiꞌ tuꞌuꞌi, agina mengkohou ka loti popakuaNa tiꞌo, hingkeꞌna toꞌokiꞌ hei topoꞌohiꞌI!” Hingkoweꞌ toaꞌ to nipaku i loti moꞌawa-awa hante Io, motaloleuꞌ woꞌo hi Yesu.

³³Tenteꞌ hampuluꞌ dua pohoꞌando, hangkaꞌ-hangkaꞌ romo mokorindi i humanele woiꞌ tiꞌo. Komoruena, tolu jaa.

³⁴Tenteꞌ tolu kononewa, meroraimo hi Yesu nopokobue, Notiꞌi i lali wiharo Aram, Eloi, Eloi, lama sabakhtani? Palaihana, “Pueꞌ Ala, Pueꞌ Ala, mahamporeꞌi hinaꞌ IpolihiꞌA?”

³⁵Haumborahi toaꞌ to metotiꞌi dodungku i popakuaNa pahori peroraiNa, rotiꞌi, “Ipehoromuakei! Io mowowoi nabi Elia.”

³⁶Haduo ka lumbura mesilai nolou moroa kolumuꞌ, nolomiꞌ i lali anggoroꞌ to moꞌinsu, nopehopiꞌki i doe loti, honiꞌi nopehuduꞌki nolou nopononiuꞌ i omeꞌna hi Yesu hingkeꞌna Noꞌinuꞌi, honiꞌi mololita notiꞌi, “Pekau dulu, toꞌeleꞌi ba hingkiꞌ hupaꞌ mpuꞌu hi Elia mampohinteꞌI ka loti momehulepe!”

³⁷Katoꞌo, moloaꞌ womo hi Yesu Nopokobue, honiꞌi pudiꞌmo inohaꞌNe.

³⁸I tempo tiꞌo, rindi wida to i lali Tambina Pueꞌ Ala mohepaꞌ lumbu ka tanti wute i woiꞌ.

³⁹Tadulako surodadu to metotiꞌi mohinoroi loti momehulepe tiꞌo, pangkiꞌ hohumbo komahine hi Yesu. Notiꞌi, “Tuꞌu mpololeke. Io hieꞌe Anaꞌna Pueꞌ Ala!”

⁴⁰Uwaꞌ woꞌo itoꞌo haꞌumbora duo towoweꞌe to mampeꞌele ka moꞌela. Totolu ka iohi iomo hi Maria toMadala, hi Salome, hi Maria inoꞌna hi Yose hante hi Yakobus to moleaꞌ tene.

⁴¹Towoweꞌe tiꞌomohi to motuntuni hi Yesu hei mosulungiꞌi i tempoNa uwaꞌ i woiꞌ Galilea. Hei woriꞌ tene woꞌo towoweꞌe to ntaniꞌna to metuntu pe hi Yesu ka woiꞌ Galilea wute i kota Yerusale.

⁴²I tempo tiꞌo, hingkiꞌ mentoriꞌmo ando. Hei tempo tiꞌo iomo jaa pampatimomo ando penomba toYahudi.[27]

⁴³Iomo hinaꞌ haduo toaꞌ to nikokeneꞌi hi Yusuf toArimatea, io haduo tadulako agama Yahudi to roꞌadaꞌi hei to moruemo mampekau kohupaꞌna poparentana Pueꞌ Ala i duniaꞌ, mengkowuranimo nolou pe hi Pilatu merapiꞌ wotalokaꞌna hi Yesu hingkeꞌna notawuꞌI.

⁴⁴Hoko hi Pilatu pahori hi Yesu mahimo, iomo hinaꞌ nowowoi tadulako surodadu notenei ba tuꞌuꞌi mahimo hi Yesu.

⁴⁵Konohorina hi Pilatu lolitane tadulako surodadu tiꞌo, nopoliumo hi Yusuf moroa wotalokaꞌna hi Yesu.

⁴⁶Hi Yusuf mehili wida to popuhiꞌ to malolunu mpololeke, honiꞌi nolou mampopengkohou wotalokaꞌna hi Yesu ka loti momehulepe, honiꞌi nowiwiꞌ hante wida tiꞌo. Uko tiꞌo nokomimo, ako noꞌuliꞌ wotalokaꞌne hi Yesu i lali woloꞌ petowua to niwali i biri watu, honiꞌi mololihaki haꞌanu watu nopotutuꞌi woloꞌ petowua tiꞌo.

⁴⁷Hi Maria toMadala hante hi Maria inoꞌna hi Yose mampoꞌilali i imbo wotalokaꞌne hi Yesu niꞌuliꞌi.