Read Rampi Markus 16 Bible Online

Markus 16 - Rampi bible

Markus 16

¹Liumo ando penombaha hi Maria toMadala, hi Maria inoꞌna hi Yakobus, hante hi Salome, nolouhi mehili minyaꞌ-minyaꞌ to mewowau, hingkeꞌna nolouhi mobobohi wotalokaꞌna hi Yesu.

²Mewaliꞌ, mehoꞌolu-olu i ando Minggu, i peluanalu ando, noloumohi pe petowua.

³I lumbu lala mololitamohi, rotiꞌi, “Hihimo to hingkiꞌ mosulungiki mololihaki watu potutuꞌina woloꞌ petowua tiꞌo?” Alaꞌ watu tiꞌo kodeꞌ mpololeke. Angkana kohupaꞌralu i petowua, roꞌokiꞌ watu tiꞌo mengkalolimo.

⁵Pekahira i lali petowua, pangkiꞌhi haduo anaꞌntomaꞌani to mahura tinaꞌ i kuanara, mebaduꞌ to popuhiꞌ. Hokohi towoweꞌe tiꞌo.

⁶Notiꞌi anaꞌntomaꞌani tiꞌo pe iohi, “Inioꞌkei motehuꞌ! Kubahaꞌ komampaliꞌmi hi Yesu toNasare to nipaku i loti momehulepe. Io tuwuꞌmo huliꞌ! Hamboaꞌmo uwaꞌ iseꞌe. Iꞌelekei hieꞌe koroꞌuliꞌane wotaNa.

⁷Noloumokei pe hi Peturuꞌ hante topeguruNa to ntaniꞌna hei itiꞌikikei waheꞌe: Hi Yesu tuwuꞌmo huliꞌ hei Io hingkiꞌ medulu nolou pe woiꞌ Galilea. Io hingkiꞌ iꞌokiꞌkei itoꞌo hibali to ka Nopowutekimokikei.”

⁸Mesuwumohi towoweꞌe tiꞌo ka petowua hei mehilaihi alaꞌ motehuꞌhi hei mororidiꞌhi. Alaꞌ komotehuꞌra tiꞌo, hawaꞌhi dulu mampowute kareba tiꞌo pe hihimolu. [

⁹Kotuwuꞌnalu hi Yesu ka komahia i ando minggu dodungku ando, uluꞌ-uluꞌna Io mampopemombaha wotaNa pe hi Maria toMadala. Hi Maria tiꞌo to nopokoꞌoriꞌ hi Yesu hampiha ikonopekahiana lomoa to pitu.

¹⁰Noloumo hi Maria pe topetuntuna hi Yesu, nohuahi kolentuꞌara meꞌola alaꞌ handondoiha lalire. Notiꞌikihi, “Pueꞌ tuwuꞌmo huliꞌ! Kuꞌokiꞌmo hingkonia!” Angkana lekiꞌ-lekiꞌna to nopololita hi Maria tiꞌo hawaꞌi mpuꞌu ropoꞌohi.

¹²Uko tiꞌo, hi Yesu mampopemombaha womo wotaNa pe roduo topetuntuNa kolentuꞌara mahuliꞌ ka kota Yerusale nolou pe bolaꞌra. LalaNa mampopemombaha wotaNa hawaꞌi hibali biasana.

¹³Katoꞌo mahuliꞌhi toaꞌ to roduo tiꞌo pe Yerusale, mampowute pe awara hapo to mewali. Angkana hawaꞌi woꞌo ropoꞌohi.

¹⁴Koꞌukoana hi Yesu mampopemombaha wotaNa pe topeguruNa to hampuluꞌ haduo kolentuꞌara mangka. Nopowuriꞌihi alaꞌ pepoꞌohira mororangko hei morintodi lalire. Hawaꞌhi mampoꞌohi lolitara toaꞌ to pangkiꞌ kotuwuꞌnamo huliꞌ hi Yesu.

¹⁵Uko tiꞌo, Nopantiꞌikimohi, “Noloumokei pe humanele duniaꞌ, mampowute Kareba Moromiꞌ pe lekiꞌ-lekiꞌna toaꞌ.

¹⁶Himolu to mepoꞌohi pe Aku hei niriu, io hingkiꞌ tehompoꞌ ka pehuku dosa. Angkana hihimo to hawaꞌi mepoꞌohi, bateꞌna hingkiꞌ nihuku.

¹⁷Toaꞌ to mepoꞌohi, hingkiꞌ Kupaꞌanihi kuasaꞌ mowali tandaꞌ-tandaꞌ to mepohele waheꞌe: I lali konaꞌKu, iohi hingkiꞌ mampopolai lomoa, hingkiꞌ mololitahi i lali wiharo to handoaꞌi kahampiha robahaꞌ.

¹⁸Uwaꞌhi to hingkiꞌ motiko ule, ba maꞌinu rasu, angkana hawaꞌhi hingkiꞌ mahampo. Ane moruntuihi toaꞌ to mohakiꞌ bateꞌra moꞌoriꞌ.”

¹⁹Koꞌukonalu Pueꞌ Yesu mampololitaki topeguruNa, mengkaꞌoreꞌmo nolou pe suruga honiꞌi mahura tinaꞌ i kuanana Pueꞌ Ala moparenta moꞌawa hante Io.

²⁰Katoꞌo, noloumohi topeguruNe mampowute Kareba Moromiꞌ i umbo-umbolu. Pueꞌ Yesu tontona mampoꞌowonihi. Nopaꞌanihi kuasaꞌ mowali tandaꞌ-tandaꞌ to mepohele hingkeꞌna mombaha kotuꞌune kareba to ropowute.]