Read Rampi Markus 3 Bible Online

Markus 3 - Rampi bible

Markus 3

¹Hampiha tempo, nolou womo hi Yesu mekahi pe lali tambi penombahara toYahudi. Itoꞌo, uwaꞌ haduo toaꞌ to mahi korawene hamali.

²Uwaꞌhi woꞌo toParisi to mampaliꞌ komasalaꞌana hi Yesu. Iomo horiana rokamata nturusi ba hingkiꞌ majamaꞌI i ando penombaha.

³Notiꞌi hi Yesu pe toaꞌ to mahi korawena hamali, “Humeiko metotiꞌi i hinaro,”

⁴honiꞌi noteneihi hi Yesu, “Motuntuni atura agamanta, hapo to masipatoꞌ towali i ando penombaha: Mowaliki to moromiꞌ ba to kodake? Mosulungiki toaꞌ ba morokoꞌki toaꞌ?” Angkana hawaꞌhi mehoniꞌ, Monondiiꞌluhi.

⁵Mewaliꞌ, handondoiha laline hi Yesu alaꞌ lalira morintodi. Nokomi kobukotaNa, Noꞌoꞌelehi mantuleliꞌ honiꞌi mantiꞌi pe toaꞌ to mahi korawena tiꞌo, “Onaꞌi humei korawema!” Konoꞌonaꞌnalu korawene, kaliuꞌ moꞌoriꞌ.

⁶Katoꞌo molaimohi toParisi ka tambi penombaha, akohi mororapaꞌ hante toaꞌna datu Herode, ropaliꞌ lala hingkeꞌna hi Yesu nihukuꞌi mahi.

⁷Uko katoꞌo, hi Yesu hante topeguruNa molaihi nolou pe bota rano Galilea. Katoꞌo woriꞌhi toGalilea to metuntu pe Io hei woriꞌhi woꞌo toaꞌ to mehupaꞌ ka woiꞌ Yudea,

⁸kota Yerusale, ka woiꞌ Idumea, ka hanupe uwai Yarade, hei uwaꞌ woꞌo to ka kota Tiru hante Sido. Woriꞌ mpololeke toaꞌ to nolou pe hi Yesu alaꞌ pahorimohi kareba noniuꞌ i lekiꞌ-lekiꞌna to Nowali.

⁹Woriꞌ toaꞌ to hawaꞌi polido Nopokoꞌoriꞌ, horiana toaꞌ momekari-karimohi ako mangkododungkui hi Yesu hingkeꞌna motikohi hi Yesu. Nokomi koworiꞌna toaꞌ, hi Yesu morumbaꞌ topeguruNa mampatimomo duanga Nopehendeꞌi, hingkeꞌna hawaꞌi bihiꞌ i lumbuna toaꞌ to woriꞌ.

¹¹Itoꞌo woꞌo uwaꞌhi toaꞌ to nopekahii tokodake. Ikopangkiꞌralu hi Yesu, kaliuꞌhi melingkotuꞌ metoungkaꞌ i kapuꞌNa, hei tokodake tiꞌo moloaꞌhi, rotiꞌi, “Ingkomo Anaꞌne Pueꞌ Ala!”

¹²Angkana hi Yesu moꞌopihi mpuꞌu, hingkeꞌna inioꞌ ropetiꞌiki kohihimoNa.

¹³Uko tiꞌo, hi Yesu nolou pe peꞌohaꞌa to uwaꞌ i biri, hei mowowoi toaꞌ to hintotoꞌ hante peleihaNa, katoꞌo hupaꞌmohi mpuꞌu pe Io.

¹⁴Kowuteralu itoꞌo, Io moꞌuwiꞌ hampuluꞌ meroduo toaꞌ ka lumbura to mewali suroNa, hei Notiꞌikihi, “Kuꞌuwiꞌkei hingkeꞌna ipoꞌowoniꞌAkei. Hingkiꞌ Kurumbaꞌkei nolou mampowute Kareba Moromiꞌ,

¹⁵hei hingkiꞌ Kupaꞌanikei kuasaꞌ mampopolai lomoa.”

¹⁶Hieꞌemo konaꞌre to hampuluꞌ meroduo tiꞌo: Hi Simo to nokokeneꞌi hi Yesu hi Peturuꞌ; hi Yakobus, anaꞌna hi Sebedeus, hi Yohanes, hineeꞌna hi Yakobus (hi Yesu mokokoneꞌihi Boanege, palaihana: anaꞌ boluntuꞌ)[6] hi Andaria, hi Pilipu, hi Batolomeu, hi Matius, hi Toma, hi Yakobus anaꞌna hi Alpeu, hi Tadeu, hi Simo toSeloꞌ, hei hi Yudas Iskarioꞌ to mampobaluꞌ hi Yesu.

²⁰Koꞌukona hi Yesu moꞌuwiꞌ suroNa, Io mahuliꞌ nolou pe tambi, hei woriꞌhi toaꞌ to mehupaꞌ morampu, koꞌukoana hi Yesu hante suroNa hamboaꞌmohi hampakaꞌ mangka.

²¹Uwaꞌhi toaꞌ to mantiꞌi, “Io hamboaꞌmo mononto!” Iomo horiana halaliNa nolouhi moroa hi Yesu.

²²Uwaꞌhi woꞌo guru agama toYahudi to hupaꞌ ka kota Yerusale, mantiꞌi “Io nopekahii Belsebul, datuna lekiꞌ-lekiꞌna lomoa hei hante kuasaꞌna Belsebul tiꞌo to Nopake mapopolai lomoa.”

²³Iomo horiana nowowoihi hi Yesu hei Nopololitakihi haꞌumbora langkaꞌ pandiriꞌ. Notiꞌi, “Wadireꞌi lomoa mampopolai hangko lomoana?

²⁴Rapaꞌna, ane uwaꞌi haduo datu, hei toaꞌna mosisalaꞌhi nturusi, kodatua tiꞌo hingkiꞌ mokero.

²⁵Ane tohantino mosisalaꞌ nturusi, potino tiꞌo hingkiꞌ mokero.

²⁶Hatoꞌo woꞌo i kodatua Belisiꞌ. Ane lomoa moꞌewa hangko lomoana, koꞌukoana kodatua Belisiꞌ mokero.

²⁷Belisiꞌ wadi nipandiriꞌ hibali haduo toaꞌ to maroho. Ane haduo toaꞌ to mekahi pe lali tambina toaꞌ to maroho hei mangkodokoꞌi manako ohi tambina, hangangaa nohiluꞌ duluna tumpune tambi tiꞌo, honiꞌi hohumbo noroa lumane. Hatoꞌo woꞌo Aku, ane mampopolaiꞌa tokodake, palaihana, Kunanimo Belisiꞌ.

²⁸Pehoromuakei moromiꞌ: lekiꞌ-lekiꞌna dosa hante lolita pesapuaka wadi niꞌampuni,

²⁹angkana himo to mosapuaka Inohaꞌ Mangkolehi, hawaꞌi niꞌampuni.”

³⁰Hi Yesu mantiꞌi hatoꞌo alaꞌ uwaꞌ to mantiꞌi Io nopekahii tokodake.

³¹Katoꞌo, hupaꞌmohi inoꞌNe hante halalina hi Yesu, angkana metotiꞌiluhi i howali tambi, hei morumbaꞌhi toaꞌ ako mowowoi hi Yesu.

³²I tempo tiꞌo, woriꞌ toaꞌ to mahura motuleliꞌi hi Yesu. Rotiꞌiki, “Guru, inoꞌMu hante halaliMu uwaꞌhi i howali, humeiKo ropaliꞌ.”

³³Nopeꞌitanoki hi Yesu, “Himo inoꞌKa hante halalingKu?”

³⁴Katoꞌo Io meꞌoꞌele pe toaꞌ to motuleliꞌI, hei mantiꞌi, “Ingkeimola inoꞌKa hante halalingKu.

³⁵Himolu to mowali peleihana Pueꞌ Ala, iomohila inoꞌKa hante halalingKu.”