Read Rampi Markus 4 Bible Online

Markus 4 - Rampi bible

Markus 4

¹Hampiha tempo, hi Yesu mepoturuꞌ womo i bota rano Galilea. Woriꞌhi mpololeke toaꞌ to nolou pe hi Yesu, alana momekawio-wiomohi, horiana Io mehendeꞌ duanga to i womboꞌ uwai, hei mahura itoꞌo, hei toaꞌ to woriꞌ metotiꞌihi i lorina.

²Woriꞌ langkaꞌ to Nopoturuꞌkihi moliu i pandiriꞌ, Notiꞌi,

³“Ipehoromuakei! Uwaꞌ haduo topokineteꞌ to nolou mohawori haworia i kineteꞌna.

⁴I tempona mohawori, uwaꞌ haworia to monawuꞌ i lala. Hupaꞌhi tinti, mabingku wute uko.

⁵Uwaꞌ woꞌo howoria to monawuꞌ i woiꞌ to manonipaꞌ alaꞌ mowatuꞌi i luaꞌne. Howoria tiꞌo hantouꞌ kotuwuꞌne, alaꞌ manonipaꞌi woiꞌne.

⁶Angkana ikonowantanalu ando, molau wute bani, alaꞌ hawaꞌi kuladu wakaꞌne.

⁷Uwaꞌ woꞌo howoria to monawuꞌ i lali rui. Howoria tiꞌo tuwuꞌ moꞌawa hante rui, koꞌukoana noputuꞌ rui wute mahi, io horiana hawaꞌi mowuaꞌ.

⁸Uwaꞌ woꞌo haworia to monawuꞌ i woiꞌ to molompoꞌ. Moromiꞌ kotuwuꞌne haworia tiꞌo. Kokodeꞌ-kodeꞌa wute mowuaꞌ. Uwaꞌ to tolu mpuluꞌ mpiha koworiꞌne ka howoriana, uwaꞌ to oni mpuluꞌ mpiha, uwaꞌ woꞌo to hanatu mpiha ka howoriana.”

⁹Uko mampowute pandiriꞌ tiꞌo, Notiꞌikimohi, “Moromiꞌ mpololeke ane ipoꞌilalikei hapo to ihorimokei!”

¹⁰Uko tiꞌo, tempona hi Yesu hadoduona, toloumohi topeguruNe to hampuluꞌ meroduo hante topetuntuNa to ntaniꞌna ako meꞌitano pe Io, rotiꞌi, “Hapo palaihana pandiriꞌ to Ipowute hingkonia?”

¹¹Notiꞌi hi Yesu, “Hampiha, tewuni tene poturuꞌ noniuꞌ i poparentana Pueꞌ Ala. Hinewowoꞌena nopaꞌanimokei Pueꞌ Ala pekiri hingkeꞌna ibahaꞌkei palaihane poturuꞌ tiꞌo. Angkana ane toaꞌ to hawaꞌi metuntu Aku, Kupoturuꞌhi moliu pandiriꞌ,

¹²hingkeꞌna tebuhoꞌi to teꞌukiꞌ i lali Suraꞌ Mangkolehi to mantiꞌi waheꞌe: ‘Roꞌokiꞌlu, angkana hawaꞌi robahaꞌ palaihane hapo to roꞌokiꞌ. Rohorilu, angkana hawaꞌi robahaꞌ tungkaihane hapo to rohori, hingkeꞌna hawaꞌhi mahuliꞌ pe Pueꞌ Ala, hei dosara teꞌampuni.’” [7]

¹³Uko tiꞌo, hi Yesu mampatiꞌikihi, “Ane hawaꞌkei ibahaꞌ palaihane pandiriꞌ to hingkenia, hohumbo koꞌibahaꞌnekei palaihane pandiriꞌ to ntaniꞌna?

¹⁴Topohawori tiꞌo, iomo to mampowute Pohawaꞌna Pueꞌ Ala.

¹⁵Uwaꞌhi toaꞌ to nipandiriꞌ hibali woiꞌ to nipolalai. Rohorilu pohawaꞌne Pueꞌ Ala, angkana Belisiꞌ mampowuli lalira, koꞌukoana hamboaꞌmohi mampoꞌilali pohawaꞌna Pueꞌ Ala to rohorimo tiꞌo.

¹⁶Uwaꞌhi woꞌo toaꞌ to nipandiriꞌ hibali woiꞌ to mowatu. Uluꞌra pahori pohawaꞌna Pueꞌ Ala, kaliuꞌ ropotanaꞌ.

¹⁷Angkana pepoꞌohira hampaiꞌlu alaꞌ hawaꞌi maroho poꞌuwakaꞌne pohawaꞌna Pueꞌ Ala i lalira, iomo horiana hawaꞌhi mantaha. Ane nipoperima-rimahi ba nipomaporiꞌhi nokomi pepoꞌohira i pohawaꞌna Pueꞌ, tewolihi lalire, hei hamboaꞌmohi mepoꞌohi.

¹⁸Uwaꞌhi woꞌo toaꞌ to nipandiriꞌ hibali woiꞌ to nokotuwuꞌi dui. Ropehoromua pohawaꞌne Pueꞌ hei robahaꞌ palaihane,

¹⁹angkana mampekiriluhi nturusi kotuwuꞌra i duniaꞌ hieꞌe, mangkodokoꞌiluhi morampu luma ngkoduniaꞌ, hei woriꞌ langkaꞌ peleihare to kodake. Koꞌukoana alaꞌ lekiꞌna tiꞌo, pohawaꞌna Pueꞌ hawaꞌi lebaꞌ i lalira horiana hamboaꞌmo modumbuꞌ i lali kotuwuꞌra.

²⁰Uwaꞌhi woꞌo toaꞌ to nipandiriꞌ hibali woiꞌ to molompoꞌ. Kopahorira pohawaꞌna Pueꞌ Ala, rotorimo, ropoꞌilali mpololeke hei ropetuntui, horiana pohawaꞌna Pueꞌ Ala tiꞌo mowuaꞌ i lali kotuwuꞌra. Uwaꞌ to tolu mpuluꞌ mpiha koworiꞌne ka howoriana, uwaꞌ to oni mpuluꞌ mpiha, uwaꞌ woꞌo to hanatu mpiha koworiꞌne ka howoriana.”

²¹Mololita womo hi Yesu pe toaꞌ to woriꞌ, Notiꞌi, “Ba uwaꞌ toaꞌ to motutu palita i lali tambi honiꞌi nohobiꞌi kiri ba noporia i luaꞌ koi? Bateꞌna hawaꞌi uwaꞌ. Palita bateꞌna nibunta i womboꞌ, hingkeꞌna mowantai lekiꞌna ohi tambi.

²²Hatoꞌo woꞌo lekiꞌ-lekiꞌna pepoturuꞌKu to tewuni tene, bateꞌna hingkiꞌ mombaha. Hei lekiꞌ-lekiꞌna lolitangKu to tewuni bateꞌna hingkiꞌ tongawa.

²³Moromiꞌ mpololeke ane ingkei mampoꞌilali hapo to ihorikei.”

²⁴Notiꞌi womo hi Yesu, “Ipoꞌilalikei hapo to ihorimokei hieꞌe, alaꞌ ane ikodokoꞌikei pahori hante mampetuntui pohawaꞌKu, pedeꞌ woriꞌ to hingkiꞌ nopokonontokikei Pueꞌ Ala.

²⁵Toaꞌ to mangkodokoꞌi pobahaꞌ peleihana Pueꞌ Ala, hingkiꞌ tetambai pebahaꞌre wute robahaꞌ mpololeke. Angkana toaꞌ to hawaꞌhi mangkodokoꞌi pobahaꞌ peleihana Pueꞌ Ala, kehapoꞌi robahaꞌmo hangkiuꞌ, bateꞌna hawaꞌi modumbuꞌ alaꞌ hingkiꞌ niroa huliꞌ.”

²⁶Notiꞌi hi Yesu, “Ane Pueꞌ Ala moparenta i lalira toaꞌ, pewalina hibali pandiriꞌ hieꞌe: Haduo toaꞌ mantudaꞌ kina i kineteꞌna.

²⁷Moromiꞌ wini ba ando, moromiꞌ i tempona turu ba i tempona meꞌaro, haworia tiꞌo tuwuꞌ nturusi wute kodeꞌ. Angkana hawaꞌi nobahaꞌ tumpu kineteꞌ hohumbo horiana haworia tiꞌo tuwuꞌ wute kodeꞌ.

²⁸Uluꞌ-uluꞌna woiꞌ tiꞌo mampopehupaꞌ taweꞌna, honiꞌi karuna. Uko katoꞌo, mowuaꞌmo, wute moꞌohi.

²⁹Ane mangkemoꞌi, tumpuna hingkiꞌ nolou mampekina kina tiꞌo, alaꞌ temponamoꞌi.”

³⁰Notiꞌi hi Yesu, “Ane poparentana Pueꞌ Ala hupaꞌ i duniaꞌ, hohumbo pewaline? Poparentana Pueꞌ Ala wadi nipandiriꞌ hibali howoria sesawi to mororoi mpololeke.

³¹Uwaꞌ to mohawori howoria tiꞌo i bota kineteꞌna. Howoria tiꞌo mororoi mpololeke, makaja komororoine ka lekiꞌ-lekiꞌna howoria to uwaꞌ i duniaꞌ.

³²Angkana ane nihaworiꞌi hingkiꞌ tuwuꞌ hei dingkaoꞌ ka loti ntaniꞌna. Tuwuꞌ mewali loti to mapongko, hei daꞌana nopehorai tinti.”

³³Hei woriꞌ tene pandiriꞌ to nopakeꞌ hi Yesu mampowute pohawaꞌna Pueꞌ Ala i toaꞌ to woriꞌ. Nopaturuꞌhi motuntuni pebiaꞌna pebahaꞌra.

³⁴Hi Yesu poko mopakeꞌ pandiriꞌ ane Nopoturuꞌhi. Angkana ane Io romo hante topeguruNahi, honiꞌi Nopokonontokihi lekiꞌ-lekiꞌna palaihane.

³⁵I ando tiꞌo woꞌo, kononewana, Notiꞌi hi Yesu pe topeguruNa, “Humeimokei, nolouki pe hanupe rano.”

³⁶Katoꞌo mehendeꞌmohi mpuꞌu pe duanga, honiꞌhi molai mampolihi toaꞌ to woriꞌ to i bota rano. Hei uwaꞌ woꞌo duanga to ntaniꞌnahi to metuntu i iohi.

³⁷Hawaꞌi morue katoꞌo, mampohidupaꞌkihi parowo to makaja. Duangara noripoꞌ balumba to kodeꞌ, wute duanga tiꞌo hingkiꞌ nobuhoꞌi uwai.

³⁸I tempo tiꞌo, hi Yesu leꞌo i pahohura to tinaꞌ i doena duanga, hei mopakeꞌ oluna to uwaꞌ itoꞌo. Topegurunahi tiꞌo moluke hi Yesu, rotiꞌi, “Guru! Mahamporeꞌi hinaꞌ hawaꞌKo tepe? Hingkiꞌ horewuꞌki!”

³⁹Katoꞌo hi Yesu meꞌaro, kaliuꞌ mokamoroki parowo hante balumba, Notiꞌi, “Peꞌohaꞌ parowo! Lebaꞌmoko balumba!” Meꞌohaꞌmo mpuꞌu parowo, hei rano tiꞌo kaliuꞌ lebaꞌ huliꞌ.

⁴⁰Uko tiꞌo, Io mantiꞌi pe topeguruNa, “Mahamporeꞌi hinaꞌ morokaꞌkei? Mahamporeꞌi hinaꞌ hawaꞌAkei ipoꞌohi?”

⁴¹Lemeniahi mpololeke topeguruNe, horiana mometenei-teneihi, “Himoreꞌi toaꞌ hieꞌe? Howeꞌ parowo hante balumba motuntuni hawaꞌNa.”