Read Rampi Markus 5 Bible Online

Markus 5 - Rampi bible

Markus 5

¹Uko katoꞌo, hi Yesu hante topeguruNa wutemohi i hanupe rano, i woiꞌ Gerasa.

²Hangkoꞌlu pengkohoura ka duanga, hupaꞌmo haduo tomaꞌani to nopekahii tokodake mampohidupaꞌki hi Yesu. Toaꞌ tiꞌo meꞌohaꞌ i petowua hei hawaꞌi uwaꞌ to pobiaꞌ mohokiꞌi nokomi komarohona, kehapoꞌi nihiluꞌ hante rante.

⁴Woriꞌ mpiha kapuꞌne hante koraweꞌna nihiluꞌ hante rante, nobiaꞌlu nopudiꞌ-pudiꞌ. Iomo horiana hawaꞌi uwaꞌ toaꞌ to podehoꞌ mohokiꞌi.

⁵Ando wini, io mokadodoroꞌlu i petowua hante i womboꞌ biri, moloaꞌ-loaꞌ hei mobeloi wotana hante watu.

⁶Kopangkiꞌnalu hi Yesu ka moꞌela, mehilaimo ako modupaꞌI, honiꞌi melingkotuꞌ menomba i hinarona hi Yesu.

⁷Hi Yesu mampopolai tokodake to mampekahii toaꞌ tiꞌo, Notiꞌi, “Polai ka toaꞌ hieꞌe!” Angkana toaꞌ tiꞌo mololita nopokobue, notiꞌi, “Yesu, Anaꞌna Pueꞌ Ala to Makuasaꞌ! Haporeꞌi tungkaihaMa pe aku? Kuperapiꞌ i lali konaꞌna Pueꞌ Ala, inioꞌa Ipoperima-rima.”

⁹Nopeꞌitanoki hi Yesu, “Himo konaꞌma?” Mehoniꞌ, “Konaꞌku hi Legio[8], alaꞌ woriꞌka to mekahi pe toaꞌ hieꞌe.”

¹⁰Roperapiꞌ to kodake tiꞌo pe hi Yesu hingkeꞌna inioꞌhi Nopopolai ka peꞌohaꞌa tiꞌo.

¹¹Hawaꞌi moꞌela katoꞌo, uwaꞌhi boeꞌ to woriꞌ, to kolentuꞌara mahuge-huge i papina biri.

¹²Roperapiꞌ tokodake tiꞌo pe hi Yesu, rotiꞌi, “Ipopekahika pe boeꞌ tiꞌo.”

¹³Notiꞌi hi Yesu, “Noloumokei!” Katoꞌo molaimohi mpuꞌu tokodake tiꞌo hei kaliuꞌhi mekahi pe boeꞌ. Pekahira pe boeꞌ, mehilaihi boeꞌ tiꞌo ako mengkonawuꞌ i tua bota rano hei mahihi podu. Koworiꞌra to mahi kira-kira rosabu mbaꞌa.

¹⁴Koroꞌokinalu toaꞌ to mampoꞌodaꞌ boeꞌ tiꞌo hapo to pewali, kaliuꞌhi mehilai nolou pe kota-kota hei pe bolaꞌ-bolaꞌ to dodungku mampowute hapo to roꞌokiꞌ tiꞌo. Iomo horiana noloumohi tumpu bolaꞌ mampeꞌele hapo to pewali.

¹⁵Kowuteralu pe hi Yesu, roꞌokiꞌ toaꞌ to nopekahii lomoa to woriꞌ hingkenia, mahura hibalimo biasa, mebaduꞌ, hei monontomo pekirine. Iomo horiana morokaꞌhi.

¹⁶Toaꞌ to pangkiꞌ mata hapo to nowali hi Yesu i tempo tiꞌo, mampololita pe toaꞌ to mehupaꞌ itoꞌo hapo to mewali i toaꞌ to nopekahii tokodake, hei hapo to mewali i boeꞌ.

¹⁷Ikopahorira hapo to mewali tiꞌo, tumpu bolaꞌ moparuku hi Yesu molai ka woiꞌ Gerasa.

¹⁸Kolentuꞌana hi Yesu mehendeꞌ i duanga, toaꞌ to nopekahii tokodake hingkenia merapiꞌ hingkeꞌna metuntuꞌi pe Io,

¹⁹angkana hawaꞌi Nopoliu. Notiꞌikilu, “Mahuliꞌmoko nolou pe tambimu, ipololita pe toaꞌ to habobolaꞌmu hante pe halalimuhi hapo to nowali Pueꞌ Ala hei hohumbo komarimaNe pe ingko.”

²⁰Noloumo mpuꞌu toaꞌ tiꞌo pe woiꞌ Dekapoli,[9] mampowute hapo to nowali hi Yesu pe io. Hokohi lekiꞌ-lekiꞌne toaꞌ to pahori kareba tiꞌo.

²¹Hi Yesu hante topeguruNa mehendeꞌ womohi duanga, mahuliꞌ womo nolou pe hanupe rano Galilea. Kowuteralu itoꞌo, woriꞌ toaꞌ to nolou motuleliꞌi hi Yesu. Kolentuꞌana tene i bota rano,

²²hupaꞌmo haduo toaꞌ to nikokeneꞌi hi Yairu. Io haduo tadulako Tambi Penombaha toYahudi.

²³Melingkotuꞌ i hinarona hi Yesu hei merapiꞌ sulungi, notiꞌi, “Guru! Anaꞌku towoweꞌe kolentuꞌana mohakiꞌ ngkodeꞌ hei hingkiꞌ mahi. Kuperapiꞌ hingkeꞌna nolouki pe tambingku. Iperama hingkeꞌna nomoꞌoriꞌ hei hawaꞌi mahi.”

²⁴Noloumo hi Yesu metuntu hi Yairu. Woriꞌhi woꞌo toaꞌ to metuntu momebihiꞌ-bihiꞌmohi motuleliꞌi hi Yesu.

²⁵I lumbura toaꞌ to woriꞌ tiꞌo, uwaꞌ haduo towoweꞌe to hampuluꞌ merontoꞌamo nohua nturusi meraꞌa hawaꞌi moꞌoriꞌ hakiꞌne.

²⁶Woriꞌ mpihamo mepokuliꞌi pe sando, wute uko lumane nopobaluꞌ nopopobayari. Angkana hawaꞌi uwaꞌ komoꞌoriꞌane, wuliha tetambai hakiꞌne.

²⁷Konohorinalu hapo to ropololita toaꞌ noniuꞌ hi Yesu, notiꞌi i lalina, “Kehapoꞌi kuruntuilu jubaNe, bateꞌna moꞌoriꞌ hakiꞌka!” Katoꞌo noparuku mengkolohopiꞌ i lumbura toaꞌ to woriꞌ, mangkododungkui hi Yesu ka tunduNa, wute nohuamo mpuꞌu noruntui jubaNe.

²⁹Konoruntuinalu, kaliuꞌ meꞌohaꞌ raꞌane, hei nohoriki moꞌoriꞌmo ka hakiꞌna.

³⁰I tempo tiꞌo woꞌo, nohoriki hi Yesu uwaꞌ kuasaꞌ to mesuwu ka wotaNa. Mehahiliꞌmo pe toaꞌ to woriꞌ honiꞌi Nopeꞌitanoki, “Himo to moruntui jubangKa?”

³¹Rotiꞌi topeguruNe, “Guru! Woriꞌ mpololeke toaꞌ to momebihiꞌ-bihiꞌ motuntuniKo. Mahamporeꞌi hinaꞌ Ipetanoki himo to moruntui jubaMa?”

³²Katoꞌo hi Yesu mehahiliꞌ mantuleliꞌ mampaliꞌ himo toaꞌ to moruntui jubaNe.

³³Nobahaꞌ towoweꞌe tiꞌo hapo to mewali i wotana. Mororidiꞌmo nokomi komorokaꞌna, honiꞌi io tolou melingkotuꞌ i hinarona hi Yesu hei mopangakuꞌ hapo to nowali hei hapo to mewali i wotana.

³⁴Notiꞌi hi Yesu pe towoweꞌe tiꞌo, “AnaꞌKu! Nokomi pepoꞌohimu i Aku, horiana moꞌoriꞌko. Hinewowoꞌena moꞌoriꞌmoko, mahuliꞌmoko hante kotanaꞌ lali.”

³⁵Kolentuꞌana tene hi Yesu mololita, hupaꞌmohi haꞌumbora toaꞌ ka tambina hi Yairu mampatiꞌiki hi Yairu, rotiꞌi, “Tua, anaꞌmu mahimo. Hampoliꞌmoko mampomasusa Guru.”

³⁶Konohorinalu hi Yesu hapo to rotiꞌi toaꞌ tiꞌo, Notiꞌiki hi Yairu, “Anioꞌko morokaꞌ! Mepoꞌohimoko!”

³⁷Nopololiumo hi Yesu patengkaꞌaNe angkana hawaꞌi Nopoliu toaꞌ to woriꞌ metuntu Io, sangadina hi Peturuꞌ, hi Yakobus hante hi Yohanes hineeꞌna hi Yakobus.

³⁸Kowuteralu i tambina hi Yairu, noꞌokiꞌ hi Yesu woriꞌ toaꞌ to mageo hei meꞌola merorima.

³⁹PekahiNa pe lali tambi, Notiꞌikihi, “Mahamporeꞌi hinaꞌ mageokei hei meꞌolakei? Io hawaꞌi mahi, angkana leꞌolu.”

⁴⁰Angkana rokokereiꞌIlu. Katoꞌo, norumbaꞌmo hi Yesu lekiꞌ-lekiꞌna toaꞌ mesuwu pe howalihi, honiꞌi mekahimo hi Yesu hante inoꞌna hei umoꞌna moꞌawa hante totolu topeguruna hi Yesu pe konipowatana anaꞌ tiꞌo.

⁴¹Umuruꞌna oꞌanaꞌ tiꞌo hampuluꞌ rontoꞌamo. Notikomo hi Yesu korawene, hei mantiꞌi, “Talita kum!” Palaihana “AnaꞌKu meꞌaromoko!” Meꞌaromo oꞌanaꞌ tiꞌo hei kaliuꞌ matengkaꞌ. Lekiꞌ-lekiꞌna toaꞌ to itoꞌo lemeniahi pangkiꞌ hapo to mewali.

⁴³Angkana hi Yesu moꞌopihi hingkeꞌna inioꞌ ropetiꞌi-tiꞌiki hapo to Nowali tiꞌo, hei Notiꞌikihi, Ipaꞌanikei mangka anaꞌ tiꞌo.”