Read Rampi Markus 6 Bible Online

Markus 6 - Rampi bible

Markus 6

¹Uko katoꞌo, hi Yesu hante topeguruNa mampolihomohi tambina hi Yairu nolou pe Nasareꞌ, bolaꞌ konipokodeꞌana hi Yesu.

²I ando penombaha toYahudi, Io nolou pe tambi penombaha, mampoturuꞌ toaꞌ to woriꞌhi itoꞌo. Kopahorira poturuꞌna hi Yesu, hokohi, hei rotiꞌi, “Ka imboreꞌito Nopahua komapande, horiana hatoꞌo komapandeNe? Komapande hapo to uwaꞌ i Io horiana Nobiaꞌ mowali tandaꞌ kuasaꞌ?

³Hareꞌi mobasilu jamaNe? Io anaꞌna hi Maria, hei uwaꞌ hineeꞌNe hi Yakobus, hi Yose, hi Yudas hante hi Simo[10]. HineꞌNahi woꞌo towoweꞌe habobolaꞌta?” Iomo horiana hi Yesu hawaꞌi ropoꞌohi.

⁴Uko katoꞌo, Notiꞌikihi, “Haduo nabi niꞌadaꞌi i imbolu koꞌakoana. Angkana ane i bolaꞌnaꞌi hadoduona ba i tambina, ba i lumbuna halalina, hawaꞌi niꞌadaꞌi.”

⁵Nopohoko hi Yesu alaꞌ hawaꞌhi mepoꞌohi pe Io. Iomo horiana Io hawaꞌi hohumbo mowali woriꞌ tandaꞌ kuasaꞌ itoꞌo. Io motikolu haꞌumbora duo toaꞌ to hawaꞌi polido hingkeꞌna moꞌoriꞌhi. Uko tiꞌo, hi Yesu hante topeguruNa matengkaꞌhi pe bolaꞌ-bolaꞌ to dodungku i Nasareꞌ, hei hi Yesu mopaguru toaꞌ.

⁶

⁷Io mowowoi topeguruNa to hampuluꞌ meroduo, honiꞌi Norumbaꞌhi roduo-roduo nolou mampowute pohawaꞌna Pueꞌ hei hori-horihi Nopaꞌanihi kuasaꞌ mampopolai to kodake.

⁸Ikohandoaꞌra tene molai, Notiꞌikihi hi Yesu waheꞌe: “Inioꞌkei mangkomi ba hapo-hapolu i patengkaꞌami, sangadina laiꞌ. Inioꞌkei mangkomi kopongkona, karanji ba doiꞌ.

⁹Hawaꞌi mahampo mesanalaꞌ, angkana inioꞌkei mangkomi baduꞌmi merompepaꞌ.”

¹⁰Honiꞌi Notiꞌikihi tene, “Ane hupaꞌkei i haꞌanu bolaꞌ, hei uwaꞌhi toaꞌ to mantorimokei i tambira, haminimokei itoꞌo wutekei molai nolou pe bolaꞌ to ntaniꞌna.

¹¹Ane uwaꞌ tumpu bolaꞌ to hawaꞌkei mantorimo ba to hawaꞌi palei mampehoromua lolitami, ipolihikei bolaꞌ tiꞌo, hei ikuntakei awu to medokiꞌ i palaꞌ kapuꞌmi, tandaꞌna iohi to hingkiꞌ nohuku Pueꞌ Ala.”

¹²Koꞌukona hi Yesu mampoturuꞌ topeguruNa, molaimohi mpuꞌu ako mampoturuꞌ toaꞌ to woriꞌ hingkeꞌna mengkatobaꞌhi ka dosara.

¹³Topeguruna hi Yesu mampopolaihi lomoa to mampekahi toaꞌ, hei mampewaukihi bokaꞌ pe toaꞌ to hawaꞌi polido koꞌukoana moꞌoriꞌhi.

¹⁴I tempo tiꞌo, Datu Herode Antipa pahori hapo to nowali hi Yesu, alaꞌ konaꞌna hi Yesu tekareba i umbo-umbolu. Uwaꞌhi to mantiꞌi, “Hi Yesu tiꞌo iomo hi Yohanes Toperiu to tuwuꞌ huliꞌ! Iomo horiana Nobiaꞌ mowali woriꞌ tandaꞌ kuasaꞌ to mepohele.”

¹⁵Angkana uwaꞌhi woꞌo to mantiꞌi, “Hi Yesu iomo nabi Elia.” Hei uwaꞌhi woꞌo to mantiꞌi, “Iomo haduo nabi, to hibali hante nabi to tuwuꞌ hampiha.”

¹⁶Konohorinalu Datu Herode kareba tiꞌo, notiꞌi, “Io bateꞌna hi Yohanes Toperiu, to kubokuꞌ dokoꞌne hampiha. Wora tuwuꞌ huliꞌ.”

¹⁷Komahina hi Yohanes Toperiu, waheꞌe lolitonane. Datu Herode mobualosi hineeꞌna iomo hi Pilipu, alaꞌ mampohantambiꞌi hi Herodia hantambina hi Pilipu. Mewaliꞌ woriꞌ mpiha hi Yohanes mokamoroki datu Herode nokomi waliana tiꞌo, notiꞌi, “Hawaꞌko wadi mampohantambi hantambina halalimu! Waliamu tiꞌo molungkaꞌi hawaꞌna hi Musa.”

¹⁸

¹⁹Mepongka katoꞌo, hi Herodia mampokoiꞌ hi Yohanes, iomo horiana nokodokoꞌi norokoꞌ. Angkana hawaꞌi tebuhoꞌi tungkaihane tiꞌo,

²⁰alaꞌ datu Herode morumbaꞌ surodaduna mampoꞌodaꞌ hi Yohanes i lali tarungkuꞌ. Datu Herode hawaꞌi podehoꞌ morokoꞌi alaꞌ nobahaꞌ koꞌiona rumbaꞌane Pueꞌ Ala hei toaꞌ to moromiꞌ lalina. Ane mampehoromuaꞌi lolitana hi Yohanes, wuli mpololeke pampekirine, angkana nolei woꞌo mampehoromua hapo to notiꞌi hi Yohanes.

²¹Hampiha, uwaꞌ tempo to moromiꞌ i hi Herodia mampopatengkaꞌ tungkaihana. Tempo tiꞌo, Datu Herode mowali posusaꞌ mangkolowoi ando konipoꞌanaꞌkina. Io mowowoi tadulako-tadulako, tadulako surodadu hei tua-tua to ka woiꞌ Galilea.

²²Kolentuꞌara mosusaꞌ, anaꞌna hi Herodia towoweꞌe mekahi hei monariꞌ i hinarona tolori. Motanaꞌ mpololeke datu Herode mampeꞌele ponariꞌna towoweꞌe tiꞌo, hatoꞌo woꞌo tolorine. Notiꞌi datu Herode pe towoweꞌe tiꞌo, “Hapolu to ikodokoꞌi, hingkiꞌ kupaꞌanikiko!”

²³Modandimo i hinarona tolorina, notiꞌi, “Hapolu to iperapiꞌ, kehapoꞌi hantangaꞌ ka kodatuangku, hingkiꞌ kupaꞌanikiko. Pueꞌ to mewali sabiꞌ!”

²⁴Molaimo towoweꞌe tiꞌo ako meꞌitano pe inoꞌna, notiꞌi, “Inoꞌ, hapo to hangangaa kuperapiꞌ?” Notiꞌi inoꞌne, “Iperapiꞌ tutuꞌne hi Yohanes Toperiu!”

²⁵Uko tiꞌo, nohohiꞌimo towoweꞌe tiꞌo nolou pe datu, honiꞌi notiꞌi, “Kuperapiꞌ tutuꞌne hi Yohanes Toperiu hinewowoꞌena niporia i womboꞌ kaparaꞌ.”

²⁶Konohorinalu datu Herode perapiꞌne tiꞌo, masusa laline, angkana dandina i towoweꞌe tiꞌo hamboaꞌmo wadi noꞌoruꞌ huliꞌ, alaꞌ io modandimo i hinarona tolorina.

²⁷Iomo horiana kaliuꞌ norumbaꞌ haduo surodadune ako mobokuꞌ dokoꞌna hi Yohanes Toperiu. Noloumo mpuꞌu surodadu tiꞌo pe petarungkuꞌa ako mobokuꞌ dokoꞌna hi Yohanes.

²⁸Tutuꞌna noporia i womboꞌ kaparaꞌ honiꞌi ako nowona pe towoweꞌe tiꞌo, hei towoweꞌe tiꞌo ako nopaꞌaniki pe inoꞌna.

²⁹Korohorina topeguruna hi Yohanes hapo to pewali tiꞌo, noloumohi moroa wotalokaꞌna hi Yohanes hingkeꞌna rotawuꞌi.

³⁰Ikopahuliꞌra suro to norumbaꞌ hi Yesu ako mampowute pohawaꞌna Pueꞌ Ala, ropowutemo pe hi Yesu lekiꞌ-lekiꞌna to rowali hei to ropoturuꞌkihi toaꞌ to woriꞌ.

³¹I tempo tiꞌo, woriꞌ mpololeke toaꞌ momehawa-hawa nolou pe hi Yesu, wute hi Yesu hante topeguruNa hamboaꞌmohi hampakaꞌ mangka. Iomo horiana notiꞌi hi Yesu pe topeguruNa, “Aginta molai nolou mampohohida pe peꞌohaꞌa to monondiiꞌ ka toaꞌ, hingkeꞌna meꞌohaꞌki hampaiꞌ.”

³²Katoꞌo, mehendeꞌmohi i duanga nolou pe komonondiiꞌana.

³³Angkana toaꞌ to woriꞌ pangkiꞌ kopolaira, hei robahaꞌ woꞌo pe imbo koꞌakoare. Mewaliꞌ woriꞌ toaꞌ ka bolaꞌ-bolaꞌ to dodungku mehilolaihi metuntu mampebota rano, koꞌukoana meduluhi hupaꞌ ka hi Yesu hei topeguruNahi.

³⁴Pengkohounalu hi Yesu ka duanga, Io pangkiꞌ toaꞌ woriꞌ to mampekauꞌI. Marima laliNe mampeꞌelehi, alaꞌ hibalihi gimba to hawaꞌi nilambaꞌ. Katoꞌo nopemoluka womo hi Yesu mampaguruhi mampopengaa poturuꞌ.

³⁵Hingkiꞌ mentoriꞌmo ando, toloumohi topeguruNe pe Io mantiꞌi, “Guru! Peꞌohaꞌa hieꞌe hawaꞌi uwaꞌ hapo-hapo, hei hingkiꞌ mentoriꞌmo ando.

³⁶Aginamo Irumbaꞌmohi toaꞌ to woriꞌ tiꞌo nolou pe bolaꞌ-bolaꞌ to dodungku hingkeꞌna mehilihi pangkara.”

³⁷Angkana notiꞌi hi Yesu, “Ingkeimola to hangangaa mampopopangkahi.” Rohoniꞌ topeguruNa, “Hade hapomo to kipaꞌanikihi? Ka imbomo topahua doiꞌ ronatu peraꞌ,[11] topopehili depa noꞌoka toaꞌ to waheꞌe koworiꞌre.”

³⁸Notiꞌi hi Yesu, “Elekei! Haꞌumbo onu depa to uwaꞌ i ingkei?” Katoꞌo roꞌele, rotiꞌi, “Limo onulu depa, hei rombaꞌalu bouꞌ.”

³⁹Uko tiꞌo, norumbaꞌmohi hi Yesu hingkeꞌna toaꞌ mahurahi motibura-tibura i womboꞌ kora.

⁴⁰Katoꞌo mahuramohi motibura-tibura. Hantibura uwaꞌ to hanatu koworiꞌre, uwaꞌ woꞌo to limo mpuluꞌ koworiꞌre.

⁴¹Uko tiꞌo, hi Yesu moroamo depa to limo onu hante bouꞌ to rombaꞌa tiꞌo, honiꞌi menoaꞌ pe laniꞌ mekokae moꞌawerasiꞌ pe Pueꞌ Ala. Nokebiꞌ-kebiꞌmo roti tiꞌo, honiꞌi Nopaꞌanikihi topeguruNa hingkeꞌna rodolaꞌ-dolaꞌkihi toaꞌ to woriꞌ. Hei bouꞌ woꞌo to rombaꞌa Nodolaꞌ-dolaꞌkihi.

⁴²Lekiꞌ-lekiꞌra mangkahi wute wohu.

⁴³Koꞌukora mangka, topeguruNa morampuhi lobina, buhaꞌ tene hampuluꞌ merobakuꞌ.

⁴⁴Koworiꞌra toaꞌ to mangka tempo tiꞌo, kira-kira limo sabu tomaꞌani, hawaꞌi teꞌihaꞌ towoweꞌe hante oꞌanaꞌ.

⁴⁵Uko tiꞌo, hi Yesu morumbaꞌmohi topeguruNa hingkeꞌna medulumohi meduanga pe hanupe rano Galilea i bolaꞌ Besaida, kolentuꞌana Io mampopahuliꞌ toaꞌ woriꞌ.

⁴⁶Koꞌukona hi Yesu mampopolai toaꞌ to woriꞌ, Io nolou pe birina mekokae.

⁴⁷TopeguruNahi nokowinimohi meduanga i lumbu rano. Angkana Io hadoduoNa uwaꞌ tene i lorina.

⁴⁸Ikonoꞌokiꞌna hi Yesu masusa mpololeke rohori topeguruNe mobohe duangara, alaꞌ mampohidupaꞌkihi parowo, iomo horiana dodungku ando, kira-kira tenteꞌ tolu, Io matengkaꞌ i womboꞌ uwai nolou pe iohi. Notungkaihi Noliu,

⁴⁹angkana koroꞌokiꞌna topeguruNa uwaꞌ toaꞌ to matengkaꞌ i womboꞌ uwai, moloaꞌ-loaꞌmohi, rotiꞌi, “Lomoa!”

⁵⁰Lekiꞌ-lekiꞌra pangkiꞌ uwaꞌ to matengkaꞌ i womboꞌ uwai tiꞌo, hei morokaꞌhi mpololeke. Iomo horiana Notiꞌikihi hi Yesu, “Inioꞌkei morokaꞌ! Pokarohokei lalimi! Akulu.”

⁵¹Kopehendeꞌnalu hi Yesu pe duangara topeguruNa, parowo kaliuꞌ meꞌohaꞌ. Katoꞌo ropolomomenia mpololeke,

⁵²alaꞌ kehapoꞌi handoaꞌhi tene morue pangkiꞌ tandaꞌ kuasaꞌ i tempona mampopopangka toaꞌ to woriꞌ, handoaꞌi tene mononto i pekirira kohihimona hi Yesu tiꞌo, alaꞌ lalira tetutuꞌi tene.

⁵³Kowuteralu hi Yesu hante topeguruNa i hanupe rano Galilea, meꞌohaꞌhi i bolaꞌ to nikokeneꞌi Genesareꞌ.

⁵⁴Pengkohoura ka duanga, tumpu bolaꞌ pangkiꞌ kohiYesunamo to hupaꞌ i bolaꞌra.

⁵⁵Mehilaimohi nolou pe bolaꞌ-bolaꞌ to dodungku, hei awara to mohakiꞌ rokowaꞌ rokomi nolou pe hi Yesu. I imbolu rohori koꞌuwaꞌna hi Yesu, itoꞌo rokomiꞌi aware to mohakiꞌ.

⁵⁶I imbolu koꞌakoana hi Yesu, ba i bolaꞌ to kodeꞌ ba i bolaꞌ to kokiuꞌ, mangkomihi awara to mohakiꞌ roporia i koworiꞌana toaꞌ, hei roperapiꞌ pe hi Yesu hingkeꞌna toaꞌ to mohakiꞌ Nopoliuhi motiko wotaNa, kehapoꞌi jubaNalu. Lekiꞌ-lekiꞌna toaꞌ to moruntui jubaNa, kaliuꞌhi mpuꞌu moꞌoriꞌ ka hakiꞌra.