Read Rampi Markus 7 Bible Online

Markus 7 - Rampi bible

Markus 7

¹Hampiha tempo, uwaꞌhi toParisi hante guru-guru agama toYahudi to ka Yerusale nolou mampohidupaꞌki hi Yesu.

²Hei pangkiꞌhi haꞌumbora topeguruna hi Yesu mangka, angkana hawaꞌhi mewaheꞌ motuntuni adaꞌra toYahudi.[12]

³ToParisi hante toYahudi ntaniꞌna, maroho mpololeke pampetuntuire adaꞌ tododulura. Rapaꞌna, hawaꞌhi wadi mangka ane handoaꞌhi tene mewaheꞌ motuntuni adaꞌra,

⁴hei ane mahuliꞌhi ka pobaluꞌ-baluꞌa, hangangaa mewaheꞌhi duluna. Hei woriꞌ tene adaꞌ to rotorimo ka tododulura to ropetuntui mpuꞌu, to hibali adaꞌ mowaheꞌ sangkiriꞌ, kiri hante mowaheꞌ woꞌo parewa ntaniꞌna to rowali ka tembaga.

⁵Iomo horiana toParisi hante guru-guru agama tiꞌo meꞌitanohi pe hi Yesu, rotiꞌi, “Mahamporeꞌi topeguruMa hinaꞌ hawaꞌhi mampetuntui adaꞌra tododulunta? Mangkahi, angkana hawaꞌhi duluna mewaheꞌ.”

⁶Notiꞌi hi Yesu, “Mampetoromiꞌlukei! Tuꞌu mpololeke lolitane nabi Yesaia hampiha noniuꞌ ingkei to mantiꞌi waheꞌe: Notiꞌi Pueꞌ Ala: ‘Toaꞌ tiꞌohi, iꞌomeꞌralu mampokodeꞌA, angkana lalira moꞌela ka Aku.

⁷Hawaꞌi modumbuꞌ penombare pe Aku, alaꞌ poturuꞌ to ropepoturuꞌki ka toaꞌlu, handoꞌio poturuꞌ to ka Aku.’ [13]

⁸Hatoꞌo woꞌo ingkei. Maroho potikomio adaꞌ, angkana hawaꞌna Pueꞌ Ala hawaꞌkei ipetuntui.”

⁹Uko katoꞌo, notiꞌiki womohi hi Yesu, “Ingkei, mapandekei mpololeke mohoha hawaꞌna Pueꞌ Ala ka kotuwuꞌmi hingkeꞌna mampokaroholukei adaꞌmi hadoduomi.

¹⁰Rapaꞌna, i lali hawaꞌna hi Musa teꞌukiꞌ waheꞌe: ‘Hangangaa iꞌadaꞌi umoꞌmu hante inoꞌmu.’ Hei teꞌukiꞌ woꞌo: ‘Himo to motundaꞌ umoꞌna ba inoꞌna io hangangaa mahi.’

¹¹Angkana pepoturuꞌmi waheꞌe: wadikei mantiꞌi pe tomotodimi: ‘Hapo tene to kupaꞌanikei, ukomo kupopenomba pe Pueꞌ Ala.’ Hante poturuꞌmi tiꞌo mopalaiha toaꞌ hawaꞌi paralu mosulungi tomotodira.

¹³Mewaliꞌ, alaꞌ adaꞌ to itorimokei ka tododulumi ipepoturuꞌkikei i toaꞌ to woriꞌ, mopalaiha ipahimokei pohawaꞌne Pueꞌ Ala. Hei woriꞌ tene poturuꞌmi to hibali tiꞌo to ipepoturuꞌkikei.”

¹⁴Uko tiꞌo, hi Yesu mowowoi womo toaꞌ to woriꞌ, Notiꞌikihi, “Ipehoromuakei moromiꞌ-romiꞌ hingkeꞌna ibahaꞌkei.

¹⁵Handoꞌio hapo to mekahi pe wotanta to mampomokomaꞌki angkana hapo to mesuwu ka wotanta to mampomokomaꞌki. [

¹⁶Moromiꞌ mpololeke ane ingkei mampoꞌilali hapo to ihorikei!]”

¹⁷Uko katoꞌo, hi Yesu mampolihi toaꞌ to woriꞌ, honiꞌi mekahi pe lali tambi. Meꞌitanohi topeguruNe pe Io ba hapo palaihane pandiriꞌ tiꞌo to Nopowute hingkenia.

¹⁸Notiꞌikihi, “Howeꞌ rope woꞌo ingkei hawaꞌkei ibahaꞌ palaihane? Handoꞌio pangka to mekahi i omeꞌta to mampomokomaꞌki i peꞌoꞌelena Pueꞌ Ala,

¹⁹alaꞌ pangka hawaꞌi mekahi pe lali pekirinta, angkana mekahilu i hinaꞌinta, honiꞌi mesuwu.” Moliu lolita tiꞌo, hi Yesu mampokononto kohawaꞌnamo uwaꞌ pangka to nikopali.

²⁰Notiꞌikihi womo hi Yesu, “Angkana walianta to kodake to mesuwu ka lalinta, tiꞌo wae to mampomokomaꞌki i peꞌoꞌelena Pueꞌ Ala,

²¹alaꞌ ka lalina toaꞌ, mehupaꞌ lekiꞌ-lekiꞌna pekiri to kodake, alana: uwaꞌhi to mowali walia to mekokomaꞌi, uwaꞌhi to manako, to merorokoꞌ,

²²to mebualosi, to mebagiuꞌ, hei to mowali mampopengaa to kodake. Hawaꞌhi pangkororeina, momaꞌani deleꞌ hei mohantambi deleꞌ, mowahiꞌhi, to mepomonawuꞌ mampokokodeꞌhi, hei hawaꞌhi hiniꞌ nipoturuꞌ.

²³Lekiꞌ-lekiꞌna walia to kodake tiꞌo mehupaꞌ ka lalina toaꞌ. Tiꞌomo to mampomokomaꞌ toaꞌ i peꞌoꞌelena Pueꞌ Ala.”

²⁴Uko katoꞌo, molaimohi hi Yesu hante topeguruNa ka woiꞌ Galilea nolou pe woiꞌ to dodungku i kota Tiru, hei kaliuꞌhi mekahi pe lali tambi. Tungkaihana hi Yesu hingkeꞌna hawaꞌi robahaꞌ toaꞌ kohupaꞌNe, angkana kohupaꞌNa tiꞌo hawaꞌi hohumbo niwowuni.

²⁵I bolaꞌ tiꞌo, uwaꞌ haduo towoweꞌe. Anaꞌna towoweꞌe tiꞌo nopekahii lomoa. Kopahorinalu kareba kohupaꞌna hi Yesu, kaliuꞌ ako mangkohidupaꞌkiꞌI honiꞌi melingkotuꞌ i kapuꞌNa merapiꞌ sulungi, notiꞌi, “Pueꞌ, Ipopolaikiꞌa kaiaꞌ to mampekahi anaꞌka!” Towoweꞌe tiꞌo handoꞌio toYahudi, io toPenisia to ka woiꞌ Siria.

²⁷Angkana nohoniꞌ hi Yesu, Notiꞌi, “HumeiꞌA duluna mosulungi oꞌanaꞌ. Hawaꞌi moromiꞌ moroa pangkana oꞌanaꞌ, honiꞌi nipaꞌaniki ahu.”[14]

²⁸Mehoniꞌ towoweꞌe tiꞌo, notiꞌi, “Tuꞌu mpololeke Pueꞌ, angkana ahu to uwaꞌ i luaꞌ meja kopangkaha, mangkahi woꞌo rupuꞌ pangkana oꞌanaꞌ to monawuꞌ ka womboꞌ meja.”

²⁹KonohoriNalu lolitane tiꞌo, notiꞌi womo hi Yesu, “Mombaha ka pehoniꞌmu komarohone pepoꞌohimu. Mewaliꞌ mahuliꞌmoko, alaꞌ mesuwumoꞌi lomoa to mampekahi anaꞌmu.”

³⁰Mahuliꞌmo mpuꞌu towoweꞌe tiꞌo. Hupaꞌ i tambina, noꞌokiꞌ anaꞌne toturu i koturuana, hei moꞌoriꞌmo alaꞌ lomoa to mekahi i anaꞌna tiꞌo mesuwumo.

³¹Uko katoꞌo, hi Yesu hante topeguruNa mampolihimohi kota Tiru mampololiu patengkaꞌra, hei mantuleliꞌhi ka kota Sido hante woiꞌ Dekapoli, nolou pe rano Galilea.

³²I Dekapoli, uwaꞌ haduo toaꞌ tobebe. Toaꞌ tiꞌo bonoꞌ hei hawaꞌi hohumbo mowiharo. Io rokomi nolou pe hi Yesu hei roperapiꞌ hingkeꞌna Noperamaꞌi.

³³Hi Yesu mampohida toaꞌ tiꞌo ka lumbura toaꞌ to woriꞌ, Koꞌukona Nopohohida, Nopopekahimo kororapuꞌNe pe lali tolinana toaꞌ to bonoꞌ tiꞌo. Honiꞌi meliku hei momonto woꞌo lilaꞌna toaꞌ tiꞌo.

³⁴Uko tiꞌo, hi Yesu menoaꞌmo pe laniꞌ, moruiꞌ peꞌinohaꞌNa, alaꞌ komarimaNa, honiꞌi Notiꞌi, “Efata!” Palaihana Tebungkahimo!

³⁵Pohorimo mpuꞌu toaꞌ tiꞌo, hei mololueꞌmo lilaꞌne. Moromiꞌmo pololitane.

³⁶Uko tiꞌo, Noꞌopihi hi Yesu toaꞌ to woriꞌ hingkeꞌna inioꞌ ropololita pe himolu hapo to mewali. Angkana kehapohi Noꞌopi, kareba tiꞌo bateꞌna ropowutelu nturusi.

³⁷Hokohi mpololeke toaꞌ to woriꞌ, rotiꞌi “Lekiꞌ-lekiꞌna to Nowali, moromiꞌ. Toaꞌ to bonoꞌ, pohorimo! Toaꞌ to hawaꞌi hohumbo mololita, mololitamohi!”[15]