Read Rampi Markus 8 Bible Online

Markus 8 - Rampi bible

Markus 8

¹Hawaꞌi morue katoꞌo, woriꞌ womohi toaꞌ mororampu moꞌawa hante hi Yesu. Biloramohi alaꞌ hawaꞌi uwaꞌ pangkare. Iomo horiana hi Yesu mowowoi topeguruNahi, Notiꞌikihi:

²“Marima lalingKa mampeꞌele toaꞌ to woriꞌ hieꞌe. Tolu andomohi iseꞌe, hei bateꞌna biloramohi alaꞌ hamboaꞌmo uwaꞌ pangkare.

³Hawaꞌi moromiꞌ rekeꞌKa hingkiꞌ morumbaꞌhi molai. Uwaꞌhi intu to modungka i lala nokomi kobilorara, alaꞌ uwaꞌhi to hupaꞌ humei ka moꞌela.”

⁴Rotiꞌi topeguruNe, “Hade pe imbomo to pahua pangka topopolorahi, alaꞌ moꞌelaki ka bolaꞌ hei peꞌohaꞌanta hieꞌe hawaꞌi uwaꞌ hapo-hapo?”

⁵Noteneihi, “Haꞌumbo onu depa to uwaꞌ i ingkei?” Rohoniꞌ, “Pitu onulu.”

⁶Katoꞌo Norumbaꞌmohi toaꞌ to woriꞌ mahura i woiꞌ. Noroamo depa to pitu onu tiꞌo honiꞌi mekokae pe Pueꞌ Ala moꞌawerasiꞌ. Uko tiꞌo, Nokebiꞌ-kebiꞌmo honiꞌi Nopaꞌanikihi topeguruNa hingkeꞌna rodolaꞌ-dolaꞌkihi toaꞌ to woriꞌ.

⁷Uwaꞌ woꞌo haꞌumbora mbaꞌa bouꞌ to kokiuꞌ. Nopekokaeki moꞌawerasiꞌ honiꞌi Nopaꞌaniki topeguruNa hingkeꞌna rodolaꞌ-dolaꞌkihi toaꞌ to woriꞌ.

⁸Mangkamohi lekiꞌ-lekiꞌra wutehi wohu. Koꞌukora mangka, topeguruNahi morampu lobina pangka tiꞌo, lobina pitu bakuꞌ tene to kodeꞌ.

⁹Koworiꞌra to mangka i tempo tiꞌo, kira-kira iba sabu. Uko tiꞌo, toaꞌ to woriꞌ tiꞌo norumbaꞌmohi hi Yesu mahuliꞌ,

¹⁰honiꞌi Io hante topeguruNa kaliuꞌhi meduanga nolou pe woiꞌ Dalamanuta.

¹¹Haꞌumbora duohi toParisi ako mampohidupaꞌki hi Yesu. Hei ropemolukamo meꞌitano-tano pe hi Yesu alaꞌ mampaliꞌluhi komonawuꞌaNa hei roperapiꞌ hingkeꞌna mowaliꞌI tandaꞌ to mepohele to mampotongawa koꞌIonamo to ka Pueꞌ Ala.

¹²Konohorina hi Yesu, handondoiha laline, Notiꞌi, “Mahamporeꞌi hinaꞌ toaꞌ to tuwuꞌ tempo hieꞌe merapiꞌ tandaꞌ kuasaꞌ? Kutiꞌikikei, hawaꞌkei hingkiꞌ Kuponoꞌokiꞌi tandaꞌ kuasaꞌ hibali to iperapiꞌkei.”

¹³Uko katoꞌo, Nopolihimohi hei mehendeꞌ womo pe duanga nolou pe hanupena rano.

¹⁴Ikopolaira tiꞌo, topeguruna hi Yesu mangkolembulikihi mangkomi bakura, i duangara tiꞌo uwaꞌlu haꞌanu depa

¹⁵Hi Yesu mampowute lolita hieꞌe pe iohi, Notiꞌi, “Majaga-jagakei i ragiꞌra[16] toParisi hante i ragiꞌna datu Herode!”

¹⁶Angkana hawaꞌi robahaꞌ tungkaihaNe lolita tiꞌo. Mololitamohi haduo hei haduo, rotiꞌi, “Notiꞌi hatoꞌo, alaꞌ hawaꞌki uwaꞌ to mangkomi depa.”

¹⁷Angkana nobahaꞌ hi Yesu hapo to rotiꞌi topeguruNe, katoꞌo Notiꞌikihi, “Pekirimi hamoloꞌ i depalu! Iomo hinaꞌ hawaꞌkei ibahaꞌ palaihane! I imbolureꞌito pekirimio?

¹⁸Woriꞌ mpihakei pangkiꞌ kuasaꞌKu hei woriꞌ mpihakei pahori poturuꞌKu. Kematakei hei ketolinakei, angkana hawaꞌkei ibahaꞌ hapo palaihane to iꞌokiꞌkei hei to ihorimokei. Hawaꞌireꞌi ikolowoikei?

¹⁹TempoKu mampopopangka toaꞌ to limo sabu ka roti to limo onu to Kukebiꞌ-kebiꞌ? Haꞌumbo bakuꞌ lobine to irampukei?” Rohoniꞌ topeguruNa, “Hampuluꞌ merobakuꞌ.”

²⁰Nopeꞌitanoki womo hi Yesu, “Hei tempoKu mampopopangka toaꞌ to iba sabu ka depa to pitu onu, haꞌumbo bakuꞌ woꞌo lobine to irampukei?” Rotiꞌi, “Pitu bakuꞌ.”

²¹Notiꞌiki womohi, “Hade mahamporeꞌi hinaꞌ handoaꞌi tene ibahaꞌkei palaihane lekiꞌ-lekiꞌna tiꞌo?”

²²Katoꞌo, hi Yesu hante topeguruNa hupaꞌmohi i bolaꞌ Besaida. Itoꞌo toaꞌ mangkomi haduo tobilo pe hi Yesu, hei roperapiꞌ hingkeꞌna hi Yesu mampokoꞌoriꞌi

²³Notikomo hi Yesu korawene tobilo tiꞌo, honiꞌi Noranda nolou pe howali bolaꞌ. Uko tiꞌo, Noliku matane honiꞌi Norama matane. Hei, Nopeꞌitanoki, “Uwaꞌ to iꞌokiꞌno?”

²⁴Tobilo tiꞌo mampehohongkeꞌ mampeꞌele hapo to uwaꞌ i hinarona, hei notiꞌi, “Kuꞌokiꞌhi toaꞌ matengkaꞌ, angkana hibaliluhi loti.”

²⁵Katoꞌo Notiko womo hi Yesu matane korompihana. Hei moꞌoriꞌmo mpuꞌu. Lekiꞌ-lekiꞌna to noꞌokiꞌ, mombahamo.

²⁶Uko tiꞌo, notiꞌi hi Yesu, “Mahuliꞌmoko nolou pe tambimu, hampoliꞌmoko mekahi pe lali bolaꞌ Besaida hinewowoꞌena.”

²⁷Hi Yesu hante topeguruNa nolou pe bolaꞌ-bolaꞌ to dodungku i kota Kaisarea Pilipi. I lumbu lala, meꞌitano hi Yesu, Notiꞌi, “Motuntuni pahuara toaꞌ to woriꞌ, Aku hieꞌe, hihimoꞌA?”

²⁸Mehoniꞌhi topeguruNe, “Uwaꞌhi to mantiꞌi hi Yohanes Toperiu to tuwuꞌ huliꞌ. Uwaꞌhi woꞌo to mantiꞌi nabi Elia, uwaꞌ woꞌo to mantiꞌi Ingko haduo nabi hampiha to tuwuꞌ huliꞌ.”

²⁹Nopeꞌitanoki womo, Notiꞌi, “Ane motuntuni pahuami, Aku hieꞌe, hihimoꞌA?” Mehoniꞌ hi Peturuꞌ, “Ingkomo Datu Topohompoꞌ!”

³⁰Mepongka katoꞌo, Notiꞌikihi, “Inioꞌ itiꞌi-tiꞌikei pe hihimolu kohihimongKa.”

³¹Uko katoꞌo, nopelukamo hi Yesu mampowute pe topeguruNa hapo to hangangaa mewali i wotana hadoduoNa. Notiꞌi, “Anaꞌ Manusiaꞌ hangangaa nolou pe Yerusale hei mampolala woriꞌ komaporiꞌ. Itoꞌo, tomotodi-tomotodi, tutuꞌ-tutuꞌ tadulako mpenomba hante guru-guru agama hingkiꞌ mampoperima-rimaꞌA. Hingkiꞌ rorokoꞌA, angkana ikotolu andona, hingkiꞌ tuwuꞌA huliꞌ.”

³²Lekiꞌ-lekiꞌna tiꞌo Nopokonontokihi, angkana hi Peturuꞌ mobiniꞌ hi Yesu pe hirina honiꞌi nokamoroki alaꞌ hi Yesu mampololita kohingkiꞌ mahiNa.

³³Mehahiliꞌmo hi Yesu meꞌoꞌele pe topeguruNahi, honiꞌi mampowuriꞌi hi Peturuꞌ, Notiꞌiki, “Tolou! Ingko hibaliko Belisiꞌ! Itube pekiri to hatoꞌo, alaꞌ pekirimu tiꞌo pekiri manusiaꞌ, handoꞌio pekiri to ka Pueꞌ Ala.”

³⁴Uko katoꞌo, hi Yesu mowowoi toaꞌ to woriꞌ hante topeguruNa. Notiꞌikihi, “Himo to dokoꞌ metuntu pe Aku, hangangaa mampohinte peleihana hadoduona hei timomo woꞌo mampolala komaporiꞌ hei metuntu nturusi i Aku. Himo to motuntuni peleihana duniaꞌ, hawaꞌi pahua kotuwuꞌ to wolaꞌ. Angkana hihimo to mampohinte peleihana duniaꞌ hei metuntu pe Aku kehapoꞌi nirokoꞌ alaꞌ pampowutena Kareba Moromiꞌ, iomo to pahua kotuwuꞌ to wolaꞌ.

³⁶Hawaꞌi uwaꞌ dumbuꞌne morampuki lekiꞌ-lekiꞌna luma i duniaꞌ hieꞌe, ane hawaꞌki pahua kotuwuꞌ to wolaꞌ to hawaꞌi mokoꞌukoa.

³⁷Hawaꞌi uwaꞌ hapo-hapo to wadi topopotopu kotuwuꞌ to wolaꞌ tiꞌo.

³⁸Tuwuꞌkei i lumbura toaꞌ to kodake hei to hawaꞌi metuntu i Aku. Ane himo to mohili mopangakuꞌ petuntuna i Aku hei mampohili woꞌo poturuꞌKu, Aku woꞌo hingkiꞌ mohiliꞌA mopangakuꞌ koꞌiona topetuntuKa ane hupaꞌA huliꞌ ka suruga. I tempo tiꞌo, Anaꞌ Manusiaꞌ hingkiꞌ mengkohou humei ka suruga moꞌawa hante malaꞌeka-malaꞌekana Pueꞌ Ala, hei Io manobaꞌ hibali komanobaꞌna UmoꞌNa.”