Read Rampi Markus 9 Bible Online

Markus 9 - Rampi bible

Markus 9

¹Notiꞌi womo hi Yesu, “Ipehoromuakei moromiꞌ hapo to Kutiꞌikikei hieꞌe. Uwaꞌ i lumbumi to hawaꞌi hingkiꞌ mahi ane handoaꞌi tene pangkiꞌ Pueꞌ Ala moparenta hante kuasaꞌNa.”

²Oni ando katoꞌo, hi Yesu mangkomihi tolu topeguruNa, iomo hi Peturuꞌ, hi Yakobus hei hi Yohanes hineeꞌna, nolouhi pe womboꞌ biri to dingkaoꞌ. Ioluhi, hawaꞌi uwaꞌ toaꞌ ntaniꞌna. Itoꞌo roꞌokiꞌ lentene hi Yesu tewolihi.

³Baduꞌna mewali popuhiꞌ hei manakiꞌ; hawaꞌi uwaꞌ haduo toaꞌ i duniaꞌ hieꞌe to wadi mowaheꞌ baduꞌ wute hatoꞌo kopopuhiꞌne mpololeke.

⁴Katoꞌo roꞌokiꞌ topeguruNa, roduo nabi to mololita hante hi Yesu. Nabi to roduo tiꞌo iomo hi Musa hante Elia.

⁵Katoꞌo, notiꞌi hi Peturuꞌ pe hi Yesu, “Guru. Moromiꞌ mpololeke koꞌiheꞌente. Aginamo kiwali tolu onu bambaruꞌ: haꞌanu Ingko Pueꞌ, haꞌanu hi Musa, hei haꞌanu woꞌo hi Elia.”

⁶Kotuꞌuana, hawaꞌi nobahaꞌ hi Peturuꞌ hapo to notiꞌi nokomi komorokaꞌra.

⁷Hangkaꞌ-hangkaꞌ romo, noputuꞌhi kini. Ka lali kini tiꞌo, rohorimo loaꞌ to mantiꞌi, “Hieꞌemo AnaꞌKa to Kupokarima. Ipehoromuakei lolitaNe!”

⁸Katoꞌo roꞌele mantuleliꞌ, hawaꞌi uwaꞌ toaꞌ ntaniꞌna moꞌawa hante iohi; Hi Yesu romo hadoduoNa.

⁹Pengkohoura ka womboꞌ biri tiꞌo, notiꞌikihi hi Yesu, “Inioꞌ duluna itiꞌi-tiꞌikei pe hihimolu hapo to iꞌokiꞌkei hingkenia, ane handoaꞌi tene nipotuwuꞌ huliꞌ Anaꞌ Manusiaꞌ ka komahia.”

¹⁰LolitaNa ropetuntui mpuꞌu. Hawaꞌi rololita pe hihimo hapo to mewali tiꞌo, angkana mometonoi-tonoihi hapo tungkaihane hi Yesu mantiꞌi “Hingkiꞌ tuwuꞌ huliꞌ ka komahia”

¹¹Meꞌitanohi pe hi Yesu, rotiꞌi, “Wulika. Mahamporeꞌi hinaꞌ rotiꞌi guru agama, nabi Elia hangangaa medulu mehupaꞌ, honiꞌiwae mehupaꞌ Datu Topohompoꞌ?”

¹²Nohoniꞌhi hi Yesu, “Tuꞌu to rotiꞌi. Nabi Elia hangangaa medulu mehupaꞌ, alaꞌ io to mampatimomo lekiꞌ-lekiꞌna. Angkana hohumbo hante Anaꞌ Manusiaꞌ? Mahamporeꞌi hinaꞌ teꞌukiꞌ i lali Suraꞌ Mangkolehi, Io woꞌo hingkiꞌ pahua woriꞌ komaporiꞌ hei hingkiꞌ ropononaꞌa toaꞌ?

¹³Hei Kutiꞌikikei, hupaꞌmo nabi Elia, angkana toaꞌ mampoperima-rimaꞌi motuntuni peleira, hibali to teꞌukiꞌ i lali Suraꞌ Mangkolehi.”

¹⁴I tempo tiꞌo, hi Yesu hante totolu topeguruNa mahuliꞌmohi ka womboꞌ biri nolou mampohidupaꞌki topeguruNa to ntaniꞌna. Kowuteralu itoꞌo, roꞌokiꞌ woriꞌ toaꞌ to motuleliꞌi topeguruNa, hei haꞌumbora duohi guru agama kolentuꞌara momehoniꞌ hante iohi.

¹⁵Koroꞌokinalu toaꞌ woriꞌ hi Yesu, hokomohi hei mehilaihi nolou mampohidupaꞌkiꞌI.

¹⁶Meꞌitano hi Yesu pe topeguruna, “Hapo to ipomehoniꞌikei hante guru-guru agama?”

¹⁷Haduo ka toaꞌ to woriꞌ tiꞌo mantiꞌi, “Guru! Hieꞌe anaꞌka kukomi hingkeꞌna Ipokoꞌoriꞌi. Io hawaꞌi hohumbo mololita alaꞌ nopekahiꞌi lomoa.

¹⁸Ane nopekahiꞌi lomoa, metanoli-noli i woiꞌ, hei mewowiriꞌ omeꞌne, mopakoiꞌ nihine, hei matodoꞌ wotane. Kuperapiꞌmo i topeguruMu hingkeꞌna mampopolaihi lomoa tiꞌo, angkana hawaꞌi robiaꞌ.”

¹⁹Katoꞌo notiꞌikihi hi Yesu, “Hohumbokei rope heꞌe to tuwuꞌ tempo hieꞌe? Mahamporeꞌi hinaꞌ handoaꞌi tene maroho pepoꞌohimi? Haꞌumbo tene komoruene hingkiꞌ Kupoꞌawakei honiꞌkei mepoꞌohi? Haꞌumbo tene komoruene hangangaa sabaraꞌA mampeꞌele waliami? Komi humei oꞌanaꞌ tiꞌo!”

²⁰Rokomimo mpuꞌu oꞌanaꞌ tiꞌo pe hi Yesu. Konoꞌokiꞌnalu lomoa hi Yesuno, io mampomororidiꞌ wotana oꞌanaꞌ tiꞌo wute modungka metanoli-noli, mewowiriꞌ omeꞌne hei wotana matodoꞌ.

²¹Meꞌitano hi Yesu pe umoꞌna anaꞌ tiꞌo, Notiꞌi, “Moruemoto waheꞌe?” Notiꞌi umoꞌne, “Mepongka ka kokokiuꞌana tene.

²²Woriꞌ mpiha lomoa hingkiꞌ morokoꞌi hante modungka pe lali api hante pe lali uwai. Ane Ibiaꞌi Guru, kuperapiꞌ hingkeꞌna Ipokarimaka hei Isulungika wongkenaꞌ!”

²³Notiꞌi hi Yesu, “Mahamporeꞌi hinaꞌ itiꞌi ‘Ane ibiaꞌI?’ Lekiꞌ-lekiꞌna mewali i toaꞌ to mepoꞌohi.”

²⁴Mehoniꞌ umoꞌne anaꞌ tiꞌo nopokobue, “Mepoꞌohiꞌa pe Ingko, Isulungiꞌa hingkeꞌna pedeꞌ maroho pepoꞌohingka.”

²⁵Konoꞌokiꞌna hi Yesu woriꞌ toaꞌ hingkiꞌ hirampu, Io mokamoroki lomoa tiꞌo, Notiꞌi, “Hee! Lomoa to mepobonoꞌ hei mepobebe! Polai ka oꞌanaꞌ hieꞌe, hei hampoliꞌmoko mekahi huliꞌ.”

²⁶Moloaꞌ-loaꞌ tokodake, mampomororidiꞌ oꞌanaꞌ tiꞌo, honiꞌi mesuwumo. Polainalu lomoa tiꞌo, oꞌanaꞌ tiꞌo hamboaꞌmo mengkaduiꞌ-duiꞌ hibalimo to mahi, iomo horiana woriꞌ toaꞌ mantiꞌi, “Mahimo!”

²⁷Angkana hi Yesu motiko koraweꞌna hei Nopopetotiꞌi. Metotiꞌimo mpuꞌu oꞌanaꞌ tiꞌo alaꞌ moꞌoriꞌmoꞌi!

²⁸Uko katoꞌo, hi Yesu hante topeguruNa mekahihi i lali tambi. Katoꞌo, meꞌitanomohi topeguruNe pe Io, rotiꞌi, “Guru, mahamporeꞌi hinaꞌ hawaꞌi kibiaꞌ mampopolai to kodake tiꞌo hingkenia?”

²⁹Nohoniꞌhi, “Lomoa to hatoꞌo, hawaꞌi hohumbo nipopolai hatoꞌolu, sangadina hante pekokae.”

³⁰Hi Yesu hante topeguruNa mampololiu patengkaꞌara moliu i woiꞌ Galilea. Hei hi Yesu hawaꞌi hiniꞌ robahaꞌ toaꞌ woriꞌ koꞌuwaꞌre i Galilea,

³¹alaꞌ i tempo tiꞌo, kolentuꞌana mampoturuꞌ topeguruNa hei Notiꞌikihi, “Anaꞌ Manusiaꞌ hingkiꞌ nipewei pe kuasaꞌna manusiaꞌ hei hingkiꞌ nirokoꞌ. Angkana ikotolu andona Io hingkiꞌ tuwuꞌ huliꞌ.”

³²Angkana topeguruNahi hawaꞌi robahaꞌ tungkaihane lolitana hi Yesu, hei hawaꞌhi woꞌo podehoꞌ meꞌitano pe Io.

³³Hi Yesu hante topeguruNa hupaꞌmohi mpuꞌu i bolaꞌ Kapenau. Tempora uwaꞌ i lali tambi, meꞌitanomo hi Yesu pe topeguruNa, Notiꞌi, “Hapo to ipomehoniꞌikei nturusi i lumbu lala hingkenia?”

³⁴Angkana hawaꞌhi mehoniꞌ, alaꞌ to ropomehoniꞌi i lumbu lala iomo noniuꞌ himo to i womboꞌ ka lumbura.

³⁵Katoꞌo, mahuramo hi Yesu hei mowowoi topeguruNa to hampuluꞌ meroduo, honiꞌi Notiꞌikihi, “Himo to mangkodokoꞌi hingkeꞌna i womboꞌ ka lumbumi, hangangaa mengkaꞌiwowoiꞌ pe lekiꞌ-lekiꞌna toaꞌ, hei hangangaa mewali toperewu i lekiꞌ-lekiꞌna toaꞌ.”

³⁶Uko tiꞌo, Io moroa haduo oꞌanaꞌ, Nopopetotiꞌi i hinarora, Nobobaleꞌ, honiꞌi Notiꞌikihi topeguruNa,

³⁷“Himo to mantorimo haduo toaꞌ i lali konaꞌKu kehapoꞌi to notorimo tiꞌo i wowoiꞌ tuwuꞌna hibali oꞌanaꞌ hieꞌe, palaihana Akumo to notorimo. Hei himo to mantorimoꞌA, handoꞌio Akulu to notorimo, angkana hibalimo woꞌo mantorimo Pueꞌ Ala to morumbaꞌA humei.”

³⁸Uko tiꞌo, notiꞌi hi Yohanes, “Guru, uwaꞌ kiꞌokiꞌ haduo toaꞌ to mampopolai lomoa i lali konaꞌMu, angkana kiꞌopi alaꞌ io handoꞌio tinaꞌ ka ingkiꞌ.”

³⁹Notiꞌi hi Yesu, “Inioꞌ niꞌopiꞌi, alaꞌ toaꞌ to mowali tandaꞌ kuasaꞌ i lali konaꞌKu, hawaꞌi hingkiꞌ mampokokeniꞌa konaꞌKu.

⁴⁰Toaꞌ to hawaꞌi moꞌewaki, iomohi to tinaꞌ ka ingkiꞌ.

⁴¹Kutiꞌikikei: Himolu to mosulungikei nokomi petuntumi pe Datu Topohompoꞌ, kehapoꞌi hasangkiriꞌlu uwai ntooꞌ nopaꞌanikikei, io hingkiꞌ pahua howonina ka waliana to moromiꞌ.

⁴²Angkana himo to mampokonawuꞌ haduo oꞌanaꞌ to hibali oꞌanaꞌ hieꞌe, alana hamboaꞌmo mepoꞌohi pe Aku, hingkiꞌ makaja mpololeke pehukune Pueꞌ Ala i toaꞌ tiꞌo. Aginamo nilewului nohu watu to kodeꞌ i dokoꞌna honiꞌi nitube pe lali tahiꞌ.

⁴³Ikororomiꞌikei hingkeꞌna inioꞌkei madosa. Ane rapaꞌna korawemu hamali mangkomiko mowali dosa, ibokuꞌmolu. Aginamo hamali korawema, asalana pahuako kotuwuꞌ to wolaꞌ moꞌawa hante Pueꞌ Ala, hintina romali korawemu, angkana koꞌukoana nitubeko pe lali naraka. Itoꞌo uwaꞌ api to makiꞌ nturusi. [

⁴⁴Itoꞌo, api makiꞌ nturusi, hei iliꞌ hawaꞌi hingkiꞌ mahi.]

⁴⁵Ane rapaꞌna kapuꞌmu hamalilu mangkomiko mowali dosa, ibokuꞌmolu. Aginamo hamalilu kapuꞌma, asalana pahuako kotuwuꞌ to wolaꞌ moꞌawa hante Pueꞌ Ala, hintina romali kapuꞌmu, angkana koꞌukoana nitubeko pe lali naraka. [

⁴⁶Itoꞌo, api makiꞌ nturusi, hei iliꞌ hawaꞌi hingkiꞌ mahi.]

⁴⁷Hei ane rapaꞌna matamu hamali mangkomiko mowali dosa, idungkiꞌmolu. Aginamo hamalilu matama, asalana mewaliko toaꞌna Pueꞌ Ala i lali poparentaNa, hintina romali matamu, angkana koꞌukoana nitubeko pe lali naraka.

⁴⁸Itoꞌo, api makiꞌ nturusi, hei iliꞌ hawaꞌi hingkiꞌ mahi.

⁴⁹Lekiꞌna toaꞌ hori-hori nipomangkolehi hante api, hibali popenomba to nipomangkolehi hante bure.

⁵⁰Bure modumbuꞌ mpololeke, angkana ane motobemoꞌi, hohumboreꞌi tene nipomobure huliꞌ? Hatoꞌo woꞌo, ingkei to metuntu i Aku hangangaa modumbuꞌkei nturusi hibali bure, hei hangangaa mohintuwuꞌkei nturusi haduo hei haduo.”