Read Rampi Lukas 1 Bible Online

Lukas 1 - Rampi bible

Lukas 1

¹Teopilu to kuꞌadaꞌi. Woriꞌ toaꞌ pangkiꞌ mata hapo to nowali hi Yesu i tempoNa uwaꞌ tene i duniaꞌ hieꞌe, roꞌukiꞌ hei ropowutekiki kareba to moromiꞌ noniuꞌ Io. Uwaꞌhi woꞌo to moꞌukiꞌ tunturakana hi Yesu. Aku moparesaꞌ lekiꞌ-lekiꞌna tiꞌo ka uluꞌ-uluꞌna hei moliwo moꞌukiꞌ hapo to mewali. Iomo hinaꞌ nolouꞌa meꞌitano pe toaꞌ to pangkiꞌ mata hei kuꞌukiꞌ suraꞌ hieꞌe.

⁴Tungkaihangku, hingkeꞌna ibahaꞌi kotuꞌuna hapo to nopoturuꞌkiko toaꞌ ntaniꞌna tiꞌo, tuꞌu mpololeke.

⁵I tempona tene Datu Herode moparenta i woiꞌ Yudea, uwaꞌ haduo tadulako mpenomba to nikokeneꞌi hi Sakaria. Hi Sakaria haduo tadulako mpenomba to notadulakoi hi Abia. Hantambina nikokeneꞌi hi Elisabe. Io woꞌo muleꞌna hi Harun, tadulako mpenomba to uluꞌ-uluꞌna.

⁶Tohamoko tiꞌo moromiꞌ waliare i pampeꞌelena Pueꞌ Ala, alaꞌ ka lalira mpuꞌu ropetuntuiꞌi lekiꞌ-lekiꞌna atura hei parentana Pueꞌ Ala.

⁷Angkana, hawaꞌhi moꞌanaꞌ alaꞌ hi Elisabe lalo hei motodimohi.

⁸Hampiha tempo, tadulako-tadulako mpenomba to notadulakoi hi Abia, tekahi hi Sakaria, majama i Tambina Pueꞌ Ala. Motuntuni adaꞌra, mampoꞌuwaꞌhi pantidoꞌ hingkeꞌna robahaꞌi ba hihimo to teꞌuwiꞌ motutu dupaꞌ i lali Tambina Pueꞌ Ala. To noniuꞌ pantidoꞌ iomo hi Sakaria.

⁹

¹⁰Kolentuꞌara toaꞌ to woriꞌ mekokae i tanobaꞌa, hi Sakaria motutu dupaꞌ i lali Tambina Pueꞌ Ala.

¹¹I tempo tiꞌo, haduo malaꞌekana Pueꞌ Ala mampopemombaha wotana pe hi Sakaria. Malaꞌeka tiꞌo metotiꞌi tinaꞌ i kuanana meja potutua dupaꞌ.

¹²Konoꞌokiꞌnalu hi Sakaria malaꞌeka tiꞌo, io hoko hei motehuꞌ.

¹³Angkana notiꞌi malaꞌeka tiꞌo pe io, “Inioꞌko motehuꞌ Sakaria, alaꞌ pekokaemu Nohorimo Pueꞌ Ala. Hi Elisabe hantambimu, hingkiꞌ moꞌanaꞌ haduo tomaꞌani. Oꞌanaꞌ tiꞌo hangangaa ikokeneꞌi hi Yohanes.

¹⁴Oꞌanaꞌ tiꞌo hingkiꞌ ipomotanaꞌ mpololeke, hei ikonipoꞌanaꞌakina, hingkiꞌ ropomotanaꞌ woꞌo woriꞌ toaꞌ.

¹⁵Io hingkiꞌ mewali hawiꞌna Pueꞌ to modumbuꞌ i pampeꞌelena Pueꞌ Ala. Io hawaꞌi hingkiꞌ maꞌinu hapo to melolanu, Kohandoaꞌana tene nipoꞌanaꞌki, io nokuasaꞌimo Inohaꞌ Mangkolehi.

¹⁶Moliu pepoturuꞌna, io hingkiꞌ moranda woriꞌ toSaraeli hingkeꞌna mepoꞌohihi huliꞌ pe Pueꞌ Ala to ropenombai tododulura.

¹⁷Anaꞌmu tiꞌo hingkiꞌ mewali surona Pueꞌ medulu ka Pueꞌ. Komarohona hei kuasaꞌna hingkiꞌ hibali nabi Elia hampiha. Nokomi kuasaꞌna hei pepoturuꞌna, umoꞌ-umoꞌ hingkiꞌ mampokarima huliꞌ anaꞌra, hei toaꞌ to hawaꞌhi metuntu pe Pueꞌ, hingkiꞌ noranda huliꞌ pe lala to tuꞌu. Lekiꞌ-lekiꞌna to nowali tiꞌo hingkiꞌ mampatimomo lalina toaꞌ, hingkeꞌna mantorimohi Pueꞌ.”

¹⁸Meꞌitano hi Sakaria pe Malaꞌeka, “Hohumbomo kokubahaꞌne kotuꞌuna to itiꞌi tiꞌo? Alaꞌ toꞌamamoꞌa hei hantambingku woꞌo basemo.”

¹⁹Mehoniꞌ malaꞌeka, “Akumola hi Gabiriel. Akumo to metotiꞌi i hinarona Pueꞌ Ala mampekau hawaꞌNa. Io to morumbaꞌa humei, mampowutekiko kareba to moromiꞌ hieꞌe.

²⁰Hapo to kutiꞌikiko hingkonia, bateꞌna hingkiꞌ mewali ane wutemoꞌi tempone. Angkana alaꞌ hawaꞌko mepoꞌohi i lolitangku, mepongka hinewowoꞌena, hawaꞌko himpowiharo wute tebuhoꞌi hapo to kutiꞌi hingkonia.”

²¹Kolentuꞌana hi Sakaria i lali Tambina Pueꞌ Ala, toaꞌ to woriꞌ mokolelomohi mampekau. Ropowuli, mahamporeꞌi hinaꞌ morue rahi.

²²Ikopesuwunalu hi Sakaria, hamboaꞌmo mpuꞌu himpowiharo mowero-wero romo. Iomo hinaꞌ tongawa pe toaꞌ to woriꞌ, koꞌuwaꞌna to mewali noꞌokiꞌ i lali Tambina Pueꞌ Ala.

²³Ukomo tempona majama i Tambina Pueꞌ Ala, molaimo hi Sakaria ka Yerusale, mahuliꞌ nolou pe bolaꞌna.

²⁴Handoaꞌi tene morue uko tiꞌo, mohinonaꞌimo mpuꞌu hi Elisabe, hantambina. Limo mbula komoruene hi Elisabe i tambi nturusi. Notiꞌi,

²⁵“To mewali hieꞌe, nokomi kuasaꞌna Pueꞌ pe aku! Hinewowoꞌena Nobarakatiꞌa woꞌo hingkeꞌna moꞌanaꞌa hei hamboaꞌmoꞌa mohili nokomi kolalongku.”

²⁶Matengkaꞌmo oni mbula hi Elisabe mohinonaꞌi, i tempo tiꞌo woꞌo Pueꞌ Ala morumbaꞌ malaꞌeka Gabiriel nolou pe bolaꞌ Nasareꞌ i woiꞌ Galilea,

²⁷hingkeꞌna ako mampohidupaꞌki haduo anaꞌntowowalo to nikokeneꞌi hi Maria. Anaꞌ ntowowalo tiꞌo wuliana haduo anaꞌntomaꞌani to nikokeneꞌi hi Yusuf, pemuleꞌana datu Daudi.

²⁸Kohupaꞌna malaꞌeka tiꞌo pe hi Maria notiꞌi, “Tabea. Pueꞌ Ala moꞌowoniko! Ingkomo to noꞌuwiꞌ Pueꞌ Ala pahua pebarakati!”

²⁹Nopohele mpololeke hi Maria pahori lolitana malaꞌeka, hei nopekiri hapo tungkaihane.

³⁰Notiꞌi womo malaꞌeka pe io, “Inioꞌko motehuꞌ Maria, alaꞌ Pueꞌ Ala to moꞌuwiꞌko pahua pebarakati.

³¹Hingkiꞌ mohinonaꞌiko, hei hingkiꞌ mampoꞌanaꞌkiko haduo tomaꞌani to hangangaa ikokeneꞌi hi Yesu.

³²Hingkiꞌ kodeꞌ tuwuꞌNe, hei Io hingkiꞌ rotiꞌi Anaꞌna Pueꞌ Ala to meliu kuasaꞌNe ka lekiꞌ-lekiꞌna to ropenombai. Hei Pueꞌ Ala hingkiꞌ mohiniꞌI mewali datu hibali datu Daudi, koꞌuweꞌara.

³³Hei Anaꞌmu tiꞌo hingkiꞌ moparenta toSaraeli wute nantolou-louna, hei poparentaNa tiꞌo hawaꞌi hingkiꞌ mokoꞌukoa.”

³⁴Notiꞌi hi Maria pe malaꞌeka tiꞌo, “Hohumbomo kohingkiꞌ pewaline to itiꞌi tiꞌo, alaꞌ handoaꞌa momaꞌani?”

³⁵Mehoniꞌ malaꞌeka, “Inohaꞌ Mangkolehi hingkiꞌ mengkohou pe ingko, hei kuasaꞌna Pueꞌ Ala to i tanti hingkiꞌ moꞌowoniko. Iomo hinaꞌ Oꞌanaꞌ to hingkiꞌ ipoꞌanaꞌki tiꞌo hingkiꞌ rotiꞌi mangkolehi hei Anaꞌna Pueꞌ Ala.

³⁶Hingkeꞌ ibahaꞌi, halalimu hi Elisabe to motodimo mpuꞌu hei to rotiꞌi lalo, hinewowoꞌena mohinonaꞌimo matengkaꞌmo oni mbulana!

³⁷Inioꞌko hoko alaꞌ i Pueꞌ Ala, hawaꞌi uwaꞌ to hawaꞌi Nobiaꞌ Nowali.”

³⁸Notiꞌi hi Maria, “Aku hieꞌe hawiꞌna Pueꞌ Ala. Mewaliꞌ hapo to itiꞌikiꞌa bateꞌna hingkiꞌ mewali i wotangku.” Uko tiꞌo, molaimo malaꞌeka tiꞌo mampolihi hi Maria.

³⁹Uko tiꞌo, molaimo hi Maria ka woiꞌ Galilea nohohiꞌi nolou pe woiꞌ Yehuda pe haꞌanu kota to i birina.

⁴⁰Kohupaꞌnalu i tambina hi Sakaria, hi Maria liu-liu mekahi i lali tambina honiꞌi metabeꞌ pe hi Elisabe.

⁴¹Konohorinalu hi Elisabe petabeꞌne hi Maria, mengkaduiꞌmo oꞌanaꞌ to i lali hinaꞌine, hei hi Elisabe nokuasaꞌimo Inohaꞌ Mangkolehi,

⁴²honiꞌi nopololitaki nopokodeꞌ, “Ingkomo haduo to nobarakati Pueꞌ Ala ka lekiꞌ-lekiꞌna towoweꞌe, hei Oꞌanaꞌ to ipohinonaꞌiki tiꞌo, nobarakati woꞌo Pueꞌ Ala.

⁴³Motanaꞌa, alaꞌ kehapoꞌa hawaꞌa masipatoꞌ angkana nokohupaꞌiꞌa inoꞌna Pueꞌ to kupenombai.

⁴⁴Ikokuhorinalu petabeꞌma, kaliuꞌ mengkaduiꞌ oꞌanaꞌ to i lali hinaꞌingka alaꞌ motanaꞌi.

⁴⁵Nokomi pepoꞌohimu pe lolitana Pueꞌ, morasiꞌko loleke, alaꞌ hapo to Notiꞌikiko, bateꞌna hingkiꞌ mewali!”

⁴⁶Notiꞌi hi Maria, “Ka lalingku mpuꞌu mampokodeꞌ Pueꞌ.

⁴⁷Motanaꞌ mpuꞌu lalingka alaꞌ Pueꞌ Ala mamposalamaꞌa.

⁴⁸Noponindiꞌa kaiaꞌ, hawiꞌNa to mengkaꞌiwowoiꞌ. Mepongka hinewowoꞌena, lekiꞌ-lekiꞌna toaꞌ hingkiꞌ mantiꞌi koꞌakunamo to nobarakati Pueꞌ Ala,

⁴⁹alaꞌ Pueꞌ Ala to Makuasaꞌ, mampotongawamo kuasaꞌNa i aku. Mangkolehi mpuꞌu konaꞌNe!

⁵⁰Nopomombaha rimaNe pe lekiꞌ-lekiꞌna toaꞌ to mengkoruꞌ pe Io, wute i pemuleꞌara.

⁵¹Nokomi komarohona kuasaꞌNa, Io mowali hapo to moromiꞌ mpololeke. Hihimo to mampokokodeꞌ, Nokaꞌa-kaꞌahi hingkeꞌna tungkaihara hawaꞌi mewali.

⁵²Datu-datu Nopepengkohouhi ka tikoara, angkana toaꞌ to mengkaꞌiwowoiꞌ, hingkiꞌ Nopoꞌitantihi.

⁵³Hihimo to bilora, Nopowohuhi hante pangka to moromiꞌ. Angkana tosugiꞌ,[1] Nobuehi hante hawaꞌi uwaꞌ to nokomi.

⁵⁴Pueꞌ Ala mobuhoꞌimo dandi to Nodandi hampiha pe hi Burahima hante i pemuleꞌana. Iomo hinaꞌ ingkiꞌ toSaraeli Nosulungiki, hei Noponoꞌokiꞌiki rimaNe wute nantolou-louna.”

⁵⁵

⁵⁶Hi Maria meꞌohaꞌ i hi Elisabe kira-kira tolu mbula komoruene, honiꞌi mahuliꞌ nolou pe tambina.

⁵⁷Hupaꞌmo tempona hi Elisabe moꞌanaꞌ, io mampoꞌanaꞌki haduo oꞌanaꞌ tomaꞌani.

⁵⁸Ikorohorinalu awanahi hante halalinahi, Pueꞌ mampotongawa komoromiꞌna laliNa pe hi Elisabe, motanaꞌhi woꞌo.

⁵⁹Ganaꞌmo walu ando umuruꞌne himidoꞌ tiꞌo, lekiꞌ-lekiꞌna awara hante halalira mowali ada pebulabaꞌ motuntuni adaꞌra toYahudi. Anaꞌ tiꞌo hingkiꞌ nikokeneꞌi hi Sakaria, motuntuni konaꞌna umoꞌna,

⁶⁰angkana notiꞌi inoꞌne, “Anioꞌ! Nikokeneꞌiwae hi Yohanes.”

⁶¹Mehoniꞌhi rotiꞌi, “Naꞌ handoaꞌi tene uwaꞌ halalimi to nikokeneꞌi tiꞌo!”

⁶²Iomo hinaꞌ mokokawemohi hi Sakaria ropeꞌitanoi konaꞌne anaꞌna to nolei.

⁶³Hi Sakaria merapiꞌ haꞌanu watu poꞌukiꞌa honiꞌi noꞌukiꞌ, “Hi Yohanes.” Ropolomomenia.

⁶⁴Hei i tempo tiꞌo woꞌo, hi Sakaria kaliuꞌ mololita, hei mampokodeꞌ Pueꞌ Ala.

⁶⁵Lekiꞌ-lekiꞌna to mewali tiꞌo ropohoko toaꞌ to itoꞌo, hei tekareba pe humanele bolaꞌ to uwaꞌ i biri-biri woiꞌ Yudea.

⁶⁶Kareba to rohori tiꞌo, ropoꞌilali lekiꞌ-lekiꞌna toaꞌ to pahori. Iomo hinaꞌ rotiꞌi, “Oꞌanaꞌ hieꞌe hingkiꞌ mewali intu hapo?” Alaꞌ kuasaꞌna Pueꞌ Ala uwaꞌ i io.

⁶⁷Hi Sakaria umoꞌna oꞌanaꞌ tiꞌo, nokuasaꞌimo Inohaꞌ Mangkolehi, honiꞌi mampowute peponobuhoꞌi to ka Pueꞌ Ala waheꞌe,

⁶⁸“Humeiki mampokodeꞌ Pueꞌ Ala, Pueꞌna toSaraeli, alaꞌ Io to humei mamposalamaꞌki hei humei mampohinteki!

⁶⁹Norumbaꞌ humei haduo datu to makuasaꞌ to mohompoꞌki, hibali to nopowutemo Pueꞌ Ala moliu i nabi-nabina to Norumbaꞌ. Datu tiꞌo pemuleꞌana datu Daudi, hawiꞌNa hampiha. Pueꞌ Ala mobuhoꞌi dandina.

⁷⁰

⁷¹Hingkiꞌ Nopohinteki ka poniꞌta hei ka tungkaihara toaꞌ to mokabiriꞌki.

⁷²Pueꞌ Ala mampetidoꞌki rimaNa pe tododulunta, hei mobuhoꞌi dandiNa to mangkolehi to Nodandimo hampiha pe tododulunta.

⁷³Maroho mpuꞌu podandiNe pe tododulunta, iomo to Nodandi pe hi Burahima, hingkeꞌna ingkiꞌ to mewali pemuleꞌana hingkiꞌ Nopohinteki ka poniꞌta, hingkeꞌna mengkoruꞌki pe Io hei hawaꞌi uwaꞌ komotehuꞌta. Hingkiꞌ mewaliki toaꞌNa to mengkoruꞌ hei mononto i pampeꞌeleNa wute i koꞌukoana tuwuꞌta.” Tiꞌo to hingkiꞌ nowali Pueꞌ Ala pe ingkiꞌ.

⁷⁴

⁷⁵

⁷⁶Uko tiꞌo hi Sakaria mantiꞌi pe anaꞌna, “Ingko anaꞌku, hingkiꞌ rotiꞌiko nabina Pueꞌ Ala to meliu kuasaꞌNe ka lekiꞌ-lekiꞌna to ropenombai, alaꞌ ingko to nipopedulu ka datu Topohompoꞌ hingkeꞌna notimomo lalire toaꞌ hingkiꞌ mantorimo Pueꞌ.

⁷⁷Hingkiꞌ ipowutekihi woꞌo hohumbo lalane salaꞌra wadi teꞌampuni hante hohumbo lalane ropahua kotuwuꞌ to wolaꞌ ka Pueꞌ Ala.

⁷⁸Nokomi komarimana Pueꞌ Ala, Io humei Mampatuwuꞌki. Hibali pehupaꞌna ando,

⁷⁹to mowantai duniaꞌ to mokorindi hieꞌe, watoꞌo woꞌo Pueꞌ hingkiꞌ mowantai toaꞌ to tuwuꞌ i lali komokorindia to motehuꞌ komahia. Hingkiꞌ Norandaki hingkeꞌna pahuaki Romiꞌ Ngkotuwuꞌ.” Tiꞌomola to notiꞌi hi Sakaria.

⁸⁰Anaꞌna hi Sakaria tiꞌo, kokodeꞌ-kodeꞌa hei tetambai woꞌo komarohone pepoꞌohina. Io nolou meꞌohaꞌ i popada woꞌoni wute tempona mepongka mampowute pohawaꞌna Pueꞌ pe toSaraeli.