Read Rampi Lukas 10 Bible Online

Lukas 10 - Rampi bible

Lukas 10

¹Uko tiꞌo hi Yesu moꞌuwiꞌ pitu mpuluꞌ topeguruNa to ntaniꞌna hei Norumbaꞌhi roduo-roduo medulu ka Io, nolou pe lekiꞌ-lekiꞌna bolaꞌ to hingkiꞌ Nokonolouhi.

²Notiꞌikihi, “Toaꞌ to woriꞌ nipandiriꞌ hibali kina to mangke. Woriꞌ kina to mangke, angkana topekina hangkokiuꞌlu. Iomo hinaꞌ hangangaa niperapiꞌ pe tumpu kineteꞌ hingkeꞌna norumbaꞌhi toaꞌ nolou mekina pe kineteꞌna.

³Noloumokei, angkana hangangaa ikororomiꞌikei. Alaꞌ Kurumbaꞌkei nolou pe lumbura to kodake. Ingkei hibalikei anaꞌ gimba i lumbura hulakuꞌ.

⁴Inioꞌkei mebaku, mangkomi dompeꞌ ba mesanalaꞌ rompasa. Ane mohidupaꞌkei hante toaꞌ i lumbu lala, metabeꞌkei hawaꞌi rahi nipomorue.

⁵Ane mekahikei i lali tambi, hangangaa itiꞌikikei tumpu tambi, ‘Tabea hei romiꞌ ngkotuwuꞌ moꞌowonikei!’

⁶Ane moromiꞌi laline tumpu tambi mantorimokei, bateꞌna hingkiꞌ nobarakatihi Pueꞌ Ala. Angkana ane hawaꞌkei notorimo tumpu tambi, hawaꞌhi hingkiꞌ pahua pebarakati ka Pueꞌ Ala.

⁷Ane nitorimokei, inioꞌkei melimba-limba. Meꞌohaꞌkei i tambi tiꞌo wutekei mewotu nolou pe bolaꞌ ntaniꞌna. Hapo to nipaꞌanikikei iꞌokakei hante iꞌinukei alaꞌ topajama masipatoꞌ pahua howonina.

⁸Ane mekahikei i lali haꞌanu bolaꞌ hante nitorimokei, iꞌokakei hapo to nipaꞌanikikei.

⁹Ipokoꞌoriꞌkei to mohakiꞌ to uwaꞌ i lali bolaꞌ tiꞌo, hei itiꞌikihi tumpu bolaꞌ, ‘Hamboaꞌmo morue Pueꞌ Ala hingkiꞌ moparenta i lumbumi.’

¹⁰Angkana ane mekahikei i lali haꞌanu bolaꞌ hei hawaꞌkei rotorimo, noloumokei pe lala kota tiꞌo hei itiꞌikihi,

¹¹‘Ngkoweꞌ awu ka bolaꞌmi to medokiꞌ i palaꞌna kapuꞌki, kikunta i hinaromi to mewali tandaꞌ pangkolowoi pe ingkei, hei hingkeꞌ ibahaꞌkei, hamboaꞌmo morue Pueꞌ Ala hingkiꞌ moparenta i lumbumi!’

¹²Hingkeꞌ ibahaꞌkei, i ando pebutusi i koꞌukoana duniaꞌ, hingkiꞌ makaja pehukune Pueꞌ Ala pe toaꞌ tiꞌohi ka konihukuna toSodomo hampiha.”

¹³“Hurewuꞌmokei toKorasi! Hurewuꞌmokei to Besaida! Podo woriꞌmo tandaꞌ kuasaꞌ to Kuwali i bolaꞌmi, angkana hawaꞌkei mengkatobaꞌ ka dosami. Ane kerapaꞌna tandaꞌ kuasaꞌ tiꞌo Kuwali i kota Tiru hante i Sido, kemoruemohi mengkatobaꞌ ka dosara, kehapoꞌi handoꞌiohi toYahudi. Kemoroamohi baduꞌ mperorima ropobaduꞌ, hei moꞌawuihi tutuꞌra, tandaꞌ kotewolihinamo lalira.

¹⁴I ando pebutusi i koꞌukoana duniaꞌ, hingkiꞌ makaja mpololeke pehukune Pueꞌ Ala pe ingkei, ka konihukuna toTiru hante toSido.

¹⁵Hei ingkei toKapenau! Ba ipekirikei hingkiꞌ nohinikei Pueꞌ Ala pe suruga hawaꞌi! Angkana hingkiꞌ nopelubaꞌkei pe naraka!”

¹⁶Uko tiꞌo hi Yesu mololita womo pe topeguruNa notiꞌi, “Himo to mampehoromua lolitami, hibalimo woꞌo mampehoromua lolitangKu. Hei hihimo to mohohakei, hibalimo woꞌo Aku to nohohano, hei hihimo to mohohaꞌA, hibalimo woꞌo hante mohoha Pueꞌ Ala to morumbaꞌA.”

¹⁷Hawaꞌi morue uko tiꞌo, mahuliꞌmohi topeguruNe to pitu mpuluꞌ duo hei motanaꞌ mpuꞌu lalire rotiꞌi pe hi Yesu, “Pueꞌ, ngkoweꞌ woꞌo lomoa, mengkoruꞌhi woꞌo pe ingka, alaꞌ kipopolaihi i lali konaꞌMu.”

¹⁸Notiꞌi hi Yesu, “Kuꞌokiꞌmo Belisiꞌ monawuꞌ ka laniꞌ hibali wiaꞌ!

¹⁹Ipehoromuakei lolitangKa, Kupaꞌanimokei kuasaꞌ modihaꞌ ule hante olupa hei kuasaꞌ monani lekiꞌ-lekiꞌna komarohona poniꞌta. Hawaꞌi uwaꞌ haduo to nobiaꞌ mampohorewuꞌkei.

²⁰Angkana kehapoꞌi watoꞌo, inioꞌ ipotanaꞌkei pengkoruꞌre lomoa pe ingkei. Moromiꞌ rahimo ipomotanaꞌkei koteꞌukiꞌnamo konaꞌmi i suruga.”

²¹I tempo tiꞌo, hi Yesu nokuasaꞌi Inohaꞌ Mangkolehi, hei alaꞌ komotanaꞌna laliNa notiꞌi, “O Umoꞌ, Pueꞌ to mokuasaꞌi laniꞌ hante duniaꞌ! KupokodeꞌKo, alaꞌ lekiꞌ-lekiꞌna to tewowuni hampiha, Ipomombahamo pe toaꞌ to i wowoiꞌ tuwuꞌra, angkana Iwowuni ka toaꞌ to buhaꞌ pekiri hei toaꞌ to mapande, Alaꞌ iomo peleihaMa Umoꞌ.”

²²Uko tiꞌo notiꞌi hi Yesu, “Lekiꞌ-lekiꞌna nopaꞌanikiꞌA Umoꞌku. Hawaꞌi uwaꞌ haduo to pobahaꞌA, Aku anaꞌna Pueꞌ Ala, bateꞌnalu Umoꞌku to pobahaꞌA. Watoꞌo woꞌo, hawaꞌi uwaꞌ to pobahaꞌ Umoꞌku, bateꞌnalu Aku AnaꞌNa hei hihimolu to Kuponobahaꞌi.”

²³Katoꞌo hi Yesu mehahiliꞌ pe topeguruNa hingkeꞌna hawaꞌi rohori toaꞌ, hei notiꞌikihi, “Motanaꞌkei mpuꞌu, alaꞌ iꞌokiꞌmokei lekiꞌ-lekiꞌna hieꞌe.

²⁴Alaꞌ woriꞌhi nabi hante datu to dokoꞌhi pangkiꞌ hapo to iꞌokiꞌmokei, angkana hawaꞌi roꞌokiꞌ. Mangkodokoꞌihi mpololeke mampehoromua hapo to ihorikei, angkana hawaꞌi rohori.”

²⁵Uwaꞌ haduo guru agama toYahudi to mangkodokoꞌi mohohongkeꞌi hi Yesu meꞌitano, “Guru, hapo to hangangaa kuwali hingkeꞌna pahuaꞌa kotuwuꞌ to wolaꞌ to hawaꞌi mokoꞌukoa?”

²⁶Notiꞌi hi Yesu, “Hapo to ibasa i lali suraꞌna hi Musa? Hapo to teꞌukiꞌ itoꞌo?”

²⁷Mehoniꞌ guru agama tiꞌo, “To kubasa waheꞌe, ‘Ipokarimakei Pueꞌ Ala Pueꞌmi, hante kopopuhiꞌna lalimi, hante pekirimi mpololeke, hante komapandemi mpololeke, hei lekiꞌna rohomi. Hei ipokarimakei toaꞌ ntaniꞌna hibali koꞌipokarimana wotami hadoduomi.’ ”

²⁸Notiꞌi hi Yesu, “Niuꞌmo pehoniꞌma. Iwalimo watoꞌo hingkeꞌna pahuako kotuwuꞌ to wolaꞌ.”

²⁹Angkana guru agama tiꞌo hantoniꞌ hawaꞌi nobahaꞌ. Iomo hinaꞌ notiꞌi, “Hihimohi toaꞌ ntaniꞌna to hangangaa kupokarima?”

³⁰Mehoniꞌ hi Yesu, “Uwaꞌ haduo tomaꞌani to matengkaꞌ ka Yerusale pe bolaꞌ Yeriko. I lumbu lala, toaꞌ tiꞌo mohidupaꞌ hante to masilaka, hei morompoꞌi lekiꞌna hapo to nokomi, wotana nikondo wute molimpu, hei ropolihi i hiri lala.

³¹I tempo tiꞌo, uwaꞌ haduo tadulako mpenomba to moliu i lala. Konoꞌokiꞌna toaꞌ to marugi tiꞌo, noliulu i hambali lala.

³²Uwaꞌ woꞌo haduo topajama i Tambina Pueꞌ Ala to moliu itoꞌo. Konoꞌokiꞌna toaꞌ to marugi tiꞌo, nopempoliliꞌilu i hambali lala.

³³Hawaꞌi morue katoꞌo, moliu womo haduo toSamaria i lala tiꞌo. Konoꞌokiꞌnalu toaꞌ to marugi tiꞌo, marima mpololeke laline pe io.

³⁴Toloumo pe toaꞌ tiꞌo, mowaheꞌ belona mopakeꞌ bokaꞌ saitu hante anggoroꞌ honiꞌi nowiwiꞌ. Uko tiꞌo nopopelambaꞌmo i kalidena, nokomi nolou pe tambi peꞌohaꞌa, hei norewahi itoꞌo.

³⁵Poꞌonina mihoꞌolu, noroamo rompepaꞌ doiꞌ peraꞌ, nopepaꞌaniki pe tumpu tambi notiꞌi, ‘Irewahi dulu toaꞌ hieꞌe, ane handoaꞌi ganaꞌ doiꞌ hieꞌe, kupoganaꞌi romoꞌi ane mahuliꞌa intu.’ ”

³⁶Uko tiꞌo, nopeꞌitanokimo hi Yesu pe guru agama tiꞌo notiꞌi, “Motuntuni pahuamu, tolu duo toaꞌ to hingkonia, hihimo to mewali awana toaꞌ to nipokarugiꞌ tiꞌo?”

³⁷Mehoniꞌ guru agama tiꞌo, “Toaꞌ to mampetidoꞌki rimana.” Notiꞌi hi Yesu, “Niuꞌmo. Noloumoko hei hangangaa iwali woꞌo hatoꞌo.”

³⁸Katoꞌo hi Yesu mampololiumo pantengkaꞌaNa moꞌawa hante topeguruNa, wute i haꞌanu bolaꞌ. I lali bolaꞌ tiꞌo, uwaꞌ haduo towoweꞌe to nikokeneꞌi hi Marta to mantorimo hi Yesu i tambina.

³⁹Uwaꞌ woꞌo haduo halaline hi Marta towoweꞌe, konaꞌna hi Maria. Hi Maria tiꞌo mahura i hinarona hi Yesu hei mampehoromua lolitaNa.

⁴⁰I tempo tiꞌo, hi Marta bukota pe hi Maria, alaꞌ woriꞌ jamane morewu tolori. Iomo hinaꞌ noloumo hi Marta pe hi Yesu notiꞌi, “Pueꞌ, halalingku hieꞌe hawaꞌa nopororui majama kopongkona, hadoduongku majama! Itiꞌiki hingkeꞌna io humei mampororuiꞌa.”

⁴¹Notiꞌi hi Yesu, “Marta! Inioꞌ tepe pekirima hei maranaka.

⁴²Kotuꞌuana uwaꞌ halangkaꞌ to paralu mpololeke nipehoromua, hangangaa mampehoromuaki hawaꞌna Pueꞌ Ala, tiꞌo to modumbuꞌ mpololeke, hei iomo to noꞌuwiꞌ hi Maria. Hapo to noꞌuwiꞌ hi Maria hawaꞌi hingkiꞌ niroa ka io.”