Read Rampi Lukas 11 Bible Online

Lukas 11 - Rampi bible

Lukas 11

¹I hampiha tempo hi Yesu nolou mekokae. Koꞌukona mekokae, haduo topeguruna mampetiꞌiki, “Pueꞌ, ipoturuꞌka woꞌo mekokae, hibali hi Yohanes Toperiu mampoturuꞌ woꞌo topegurunahi.”

²Notiꞌi hi Yesu pe iohi, “Ane mekokaekei, itiꞌikei waheꞌe, Umoꞌ, kipokodeꞌ konaꞌMa to mangkolehi. Kiperapiꞌ hingkeꞌna Ipotongawa poparentaMa, hinamo lekiꞌna toaꞌ mampetuntui peleihaMu i duniaꞌ hibali i suruga.

³Ipaꞌanika kopongkonangki to maganaꞌ i ando-andona.

⁴Iꞌampunika ka komasalaꞌki, hibali ingka woꞌo moꞌampuni toaꞌ to masalaꞌ pe ingka. Hei inioꞌka Ipotedehi nikeloi mowali dosa.”

⁵Notiꞌikihi womo hi Yesu, “Pandiriꞌna, ane uwaꞌ haduo ka lumbumi to nolou pe awana halumbu wini notiꞌi, ‘Bee, ipaꞌaniꞌa kaiaꞌ duluna depamu tolu onu kupohawa romoꞌi.

⁶Alaꞌ uwaꞌ toloringku to hongkoꞌ hupaꞌ, hei hawaꞌi uwaꞌ hapo-hapo to hingkiꞌ kupopoloraꞌi.’

⁷Angkana io mehoniꞌ waheꞌe, ‘Anioꞌa iganggu. Wambaꞌ tekuhimo hei turumoka lekiꞌ-lekiꞌki. Hawaꞌa hohumbo meꞌaro, hawaꞌko hohumbo kupaꞌani ba hapo-hapo.’

⁸Kehapoꞌi awamu tiꞌo hawaꞌi hiniꞌ meꞌaro hei mampaꞌaniko ba hapo-hapo, angkana alaꞌ hawaꞌko mohili merapiꞌ, koꞌukoana io hingkiꞌ meꞌaro hei mampaꞌaniko hapo to iparalui.

⁹Mewaliꞌ Kutiꞌikikei, Iperapiꞌmokei pe Pueꞌ Ala hapo to iparaluikei, hei hingkiꞌ Nopaꞌanikikei. Ipaliꞌmokei hei hingkiꞌ ihuakei hapo to iparaluꞌikei. Ikadoꞌkei wambaꞌ, hei hingkiꞌ niweaꞌkikei.

¹⁰Alaꞌ hihimo to merapiꞌ hingkiꞌ mantorimo. Hihimo to mampaliꞌ hingkiꞌ pahua. Hihimo to mangkadoꞌ wambaꞌ, hingkiꞌ niweaꞌki.

¹¹Uwaꞌkeireꞌi to mampaꞌani ule pe anaꞌmi ane anaꞌmi merapiꞌ bouꞌ?

¹²Ba uwaꞌkei to mampaꞌani anaꞌmi olupa ane merapiꞌi tolu manuꞌ?

¹³Kehapokei kodake, ibahaꞌkei tene mampaꞌani hapo to moromiꞌ pe anaꞌmi. Hapona tene Umoꞌmi to uwaꞌ i suruga. Io hingkiꞌ mampewei Inohaꞌ Mangkolehi pe toaꞌ to merapiꞌ pe Io.”

¹⁴I hampiha tempo, uwaꞌ haduo toaꞌ to nikomi pe hi Yesu. Toaꞌ tiꞌo hawaꞌi hohumbo mololita alaꞌ nopekahii tokodake. Hi Yesu mampopolai lomoa tiꞌo ka wotana, koꞌukoana hohumbomo mololita. Lemeniamohi toaꞌ to woriꞌ.

¹⁵Angkana uwaꞌhi ka lumbura to mantiꞌi, “KuasaꞌNa tiꞌo ka Belsebul, datura lekiꞌ-lekiꞌna lomoa. Iomo hinaꞌ wadi mampopolai lomoa.”

¹⁶Uwaꞌhi woꞌo to dokoꞌ mampaliꞌ komonawuꞌana hi Yesu. Merapiꞌhi pe Yesu hingkeꞌna Noponoꞌokiꞌkihi tandaꞌ kuasaꞌ hingkeꞌna tongawa koka Pueꞌ AlaNa.

¹⁷Angkana nobahaꞌ hi Yesu hapo to uwaꞌ i lalira. Iomo hinaꞌ notiꞌikihi, “Rapaꞌna uwaꞌi haduo datu, hei toaꞌ i lali kodatuana mosisalaꞌhi hei momeꞌewa, kodatua tiꞌo hingkiꞌ mokawewoꞌ. Ane toaꞌ hampohalalia poko mosisalaꞌ, hingkiꞌ makekoꞌ pohintuwuꞌre tino tiꞌo.

¹⁸Watoꞌo woꞌo i kodatua Belisiꞌ. Ane lomoa moꞌewa hangko lomoana, bateꞌna hingkiꞌ mokawewoꞌ kodatuane Belisiꞌ. Itiꞌikei, mampopolaiꞌA tokodake hante kuasaꞌna Belsebul.

¹⁹Hade ane Aku mampopolai tokodake hante kuasaꞌna Belsebul, kuasaꞌna hihimo to ropakeꞌ topeguruMahi tiꞌo mampopolai tokodake? Mewaliꞌ, ka waliana topegurumu tongawamo kohawaꞌna tuꞌu lolitami to mantiꞌi mampopolaiꞌA tokodake hante kuasaꞌna Belisiꞌ.

²⁰Angkana Aku mampopolaiꞌA tokodake hante kuasaꞌna Pueꞌ Ala. Tiꞌomo to mampotongawa Pueꞌ Ala moparentamo i lumbumi.

²¹Ane uwaꞌ haduo tomaꞌani to maroho mampoꞌodaꞌ tambina hei ane maganaꞌ-ganaꞌi parewa poponiꞌne, ohi tambina hawaꞌi wadi niroa.

²²Angkana ane hupaꞌi haduo to meliu komarohone, topampodaꞌ tambi tiꞌo nobiaꞌ noꞌewa hei nonani. Parewa poponiꞌna hingkiꞌ noroa hante lekiꞌ-lekiꞌna ohi tambina hingkiꞌ nodolaꞌ-dolaꞌkihi awana.

²³Hihimo to hawaꞌi tinaꞌ ka Aku, iomo poniꞌKu. Hihimo to hawaꞌi mosulungiꞌA mangkomi toaꞌ mewali toaꞌna Pueꞌ Ala, iomo to mampomoꞌela toaꞌ ka Pueꞌ Ala.”

²⁴“Ane molaimoꞌi tokodake ka toaꞌ, io nolou pe popada woꞌoni mampaliꞌ peꞌohaꞌana. Alaꞌ hawaꞌi uwaꞌ peꞌohaꞌane nohua, iomo horiana notiꞌi, ‘Aginamo mahuliꞌa nolou pe peꞌohaꞌangku to kupolihimo hampiha.’

²⁵Mahuliꞌmo mpuꞌu tokodake tiꞌo pe toaꞌ to nopolihi hampiha, hei noꞌokiꞌ handoaꞌi tene uwaꞌ to mampeꞌohaꞌi. Toaꞌ tiꞌo wadi nipandiriꞌ hibali tambi to terewahi ngkoromiꞌ, hantaro hoo.

²⁶Iomo horiana noloumo tokodake tiꞌo mowowoi pitu tokodake ntaniꞌna to meliu kokodakere ka io. Noloumohi mekahi pe toaꞌ to nopolihimo hampiha, hei lebaꞌ i toaꞌ tiꞌo. Koꞌukoana, tetambaimo komaporiꞌne toaꞌ tiꞌo ka to uluꞌ-uluꞌna.”

²⁷Koꞌukona hi Yesu mololita, uwaꞌ haduo towoweꞌe i lumbura toaꞌ to woriꞌ to mampetiꞌiki pe hi Yesu, “Morasiꞌ mpuꞌu towoweꞌe to mampoꞌanaꞌkiKo hante to mampoꞌomiꞌKo!”

²⁸Angkana mehoniꞌ hi Yesu notiꞌi, “To morasiꞌ iomo toaꞌ to mampehoromua hante motuntunihi hawaꞌna Pueꞌ Ala.”

²⁹Kolentuꞌara toaꞌ to woriꞌ motuleliꞌi hi Yesu, nopololiumo lolitaNa pe iohi notiꞌi, “Umbiꞌ kodakekei mpuꞌu to merapiꞌ hingkeꞌna Kuponoꞌokiꞌkei tandaꞌ kuasaꞌ. Angkana hawaꞌi uwaꞌ tandaꞌ kuasaꞌ to hingkiꞌ niponoꞌokiꞌikikei. To hingkiꞌ niponoꞌokiꞌikikei, bateꞌnalu tandaꞌ hibali to mewali pe nabi Yunus hampiha.

³⁰Hampiha hi Yunus mewali tandaꞌ pe tumpu bolaꞌ Niniwe. Hatoꞌo woꞌo Anaꞌ Manusiaꞌ hingkiꞌ mewali tandaꞌ pe toaꞌ to tuwuꞌ hinewowoꞌena.

³¹I ando pobutusi i kotutuana duniaꞌ, datu towoweꞌe to ka woiꞌ Seba[12] tinaꞌ munaꞌu hingkiꞌ metotiꞌi moꞌawa hante ingkei to tuwuꞌ hinewowoꞌena, hei io woꞌo hingkiꞌ mosalaꞌikei, alaꞌ hampiha datu towoweꞌe tiꞌo hupaꞌ ka woiꞌ to moꞌela, humei mampehoromua kopebahaꞌna Datu Salomo. Angkana hinewowoꞌena uwaꞌmo i lumbumi Haduo to meliu kokodeꞌne tuwuꞌNa ka Datu Salomo, angkana hawaꞌkei ipoꞌohi lolitaNe.

³²Watoꞌo woꞌo i ando pebutusi i koꞌukoana duniaꞌ, toNiniwe hingkiꞌ nipatuwuꞌ huliꞌ hiꞌoꞌalu hante ingkei to tuwuꞌ hinewowoꞌena, hei iohi hingkiꞌ mohukukei, alaꞌ hawaꞌkei mepoꞌohi pe Aku. Alaꞌ ipampehoromuara lolitaNa nabi hi Yunus nohohoꞌmohi ka dosara. Hinewowoꞌena uwaꞌmo Anaꞌ Manusiaꞌ i lumbumi to meliu kokodeꞌna tuwuꞌNa ka hi Yunus, angkana hawaꞌkei mampoꞌohi lolitaNa.”

³³“Hawaꞌi uwaꞌ haduo toaꞌ to motutu palitana hei notutuꞌi. Palitana bateꞌna noporia i womboꞌ hingkeꞌna wantana roꞌokiꞌ lekiꞌ-lekiꞌna toaꞌ to mekahi

³⁴Matamu iomo huluꞌna wotamu, alaꞌ ane moromiꞌi matama, moromiꞌ woꞌo pampeꞌelema. Angkana ane mokorindiꞌi matama, mokorindi woꞌo pampeꞌelema.

³⁵Hatoꞌo woꞌo hante lalimu. Hangangaa ikororomiꞌi, hingkeꞌna ane Nopomobaromoꞌi Pueꞌ Ala, inioꞌ ipomokorindiꞌi.

³⁶Ane Nopomobaroꞌi Pueꞌ lalima, hawaꞌi uwaꞌ to mokorindi hei mobaro woꞌo lekiꞌ-lekiꞌna kotuwuꞌmu, hibali huluꞌ to mampomobaro komokorindia.”

³⁷Koꞌukonalu hi Yesu mololita, uwaꞌ haduo toParisi to mowowoiꞌi nolou mangka pe tambina. Katoꞌo noloumo mpuꞌu mangka.

³⁸Lemeniahi toParisi pangkiꞌ hi Yesu mangka, alaꞌ hawaꞌi dulu mewaheꞌ motuntuni adaꞌ agamara.

³⁹Katoꞌo hi Yesu mantiꞌi, “Ingkei toParisi biasami mowaheꞌ paꞌinua hante taboꞌ i howalinalu, angkana lalimi buhaꞌ hante kokodakea hei mangkohokalukei nturusi lumana toaꞌ.

⁴⁰Bebekei mpuꞌu! Handoꞌio wotantalu to nowali Pueꞌ Ala. Io mowali woꞌo lalinta.

⁴¹Hapo to uwaꞌ i ingkei hangangaa ipaꞌanikihi toaꞌ to merima-rima tuwuꞌra. Ane iwalikei watoꞌo, hingkiꞌ mewalikei mpuꞌu toaꞌ to mangkolehi.

⁴²Hurewuꞌkei toParisi! Podotokei mpuꞌu motuntuni hawaꞌ to kokiuꞌ. Hingkoweꞌreꞌi huꞌa-huꞌa i kintaꞌmi hibali holoꞌ hante kulaꞌ, ipopenombakei hadolaꞌ hampuluꞌ pe Pueꞌ Ala motuntuni parentana hi Musa. Angkana hawaꞌ to kodeꞌ to mantiꞌi hangangaa niwali hapo to mononto pe awami hei hangangaa nipokarima Pueꞌ Ala, hawaꞌi nipetuntui. Kotuꞌuana, hawaꞌ to nipohimpodulu tiꞌo to hangangaa ipetuntuikei mpololeke, angkana inioꞌ woꞌo ipohentekei pampetuntuimi i hawaꞌ to ntaniꞌna.

⁴³Hurewuꞌkei toParisi! Alaꞌ motanaꞌkei ane nipopahurakei i pahura to niꞌadaꞌi i lali tambi penombaha. Motanaꞌkei ane noꞌadaꞌikei toaꞌ to woriꞌ i pobaluꞌ-baluꞌa.

⁴⁴Hurewuꞌkei, alaꞌ hibalikei petowua to hawaꞌi mombaha. Petowua tiꞌo nodihaꞌ-dihaꞌ toaꞌ, angkana hawaꞌi robahaꞌ koꞌuwaꞌna woriꞌ langkaꞌna to mekokomaꞌi i lalina. Watoꞌo woꞌo ingkei, moromiꞌ loliolukei, hantaro lalimi kodake.”

⁴⁵Haduo guru agama toYahudi mantiꞌi pe hi Yesu, “Ee Guru, ane watoꞌoꞌi lolitama, ingka woꞌo to Ipononaꞌa!”

⁴⁶Mehoniꞌ hi Yesu, “Hurewuꞌkei woꞌo guru agama! Alaꞌ ingkeimo to motuntuꞌ toaꞌ to woriꞌ hante atura-atura hei adaꞌ agama to madori, angkana hingkoweꞌ hangkiuꞌ hawaꞌkei hiniꞌ mosulungihi mampopatengkaꞌ atura tiꞌo.

⁴⁷Hurewuꞌkei alaꞌ ikoromiꞌikei petowuare nabi-nabi to norokoꞌ koꞌuweꞌami hampiha.

⁴⁸Ingkei hadoduomi mangakuꞌ mampetotuꞌu waliana koꞌuweꞌami, koꞌiora to morokoꞌ nabi-nabi tiꞌo, hei ingkei to mangkoromiꞌi petowuara.

⁴⁹Pueꞌ Ala pobahaꞌ kokodakena waliami. Waliami tiꞌo hibali hante waliara todulumi to kodake. Iomo hinaꞌ notiꞌi Pueꞌ Ala waheꞌe, ‘Hingkiꞌ Kurumbaꞌhi nabi-nabi hante suro-surongKu nolou pe iohi. Hantenaꞌhi hingkiꞌ nirokoꞌ, hantenaꞌhi hingkiꞌ nipoperima-rima.’

⁵⁰Iomo hinaꞌ toaꞌ to tuwuꞌ i tempo hieꞌe hingkiꞌ nihuku nokomi konirokoꞌra lekiꞌ-lekiꞌna nabi mepongka koniwalina duniaꞌ,

⁵¹mepongka i konirokoꞌna hi Abeli wute-wute pe hi Sakaria to nirokoꞌ i lumbuna meja potutua popenomba hante Tambina Pueꞌ Ala. Toaꞌ to tuwuꞌ hinewowoꞌena hingkiꞌ nihukuhi nokomi lekiꞌ-lekiꞌna walia tiꞌo!

⁵²Hurewuꞌkei guru agama! Kotuꞌuana keꞌingkeimo to hangangaa mampoturuꞌ awami hingkeꞌna pobahaꞌhi hohumbo lala mewali toaꞌna Pueꞌ Ala. Angkana ingkei hadoduomi hawaꞌkei hiniꞌ motuntuni lala tiꞌo, hei iꞌopikei woꞌo toaꞌ to mangkodokoꞌi mewali toaꞌna Pueꞌ Ala.”

⁵³Ikopolainalu hi Yesu katoꞌo, bukota mpololeke guru agama hante toParisi. Mepongka katoꞌo mampaliꞌhi lala hante peꞌitano to woriꞌ pe Io,

⁵⁴alaꞌ mampaliꞌhi komasalaꞌana lolitaNa.